Innehållsförteckning för February - May 2023 från Baba & Kleuter

’N Vriendin vertel my netnou van haar vyfjarige dogtertjie wat die vakansie op Hartenbos onverskrokke met haar nuwe boogie board die branders ingevaar het, daar waar sy nie eens meer kan staan nie. Sy’s ’n jongste kind en as boetie en sussie dit kan doen, kan sy mos ook. Hulle besluit toe om van ’n veilige afstand ’n ogie te hou, maar ook om haar bietjie te los sodat ’n brander haar maar kan rol, met die idee dat sy dan blitsvinnig self sal leer om versigtiger te wees. Dis toe ook wat gebeur het. Die arme kind is so lekker getuimel dat sy sommer buite die lewensredders se vlaggies eers weer opgestaan het. ’n Ander pa wat daardie tyd in die water was, het vinnig nader gehardloop om te…

WENBRIEF ONS REËNBOOGBABA Ná ’n moeilike pad van vyf jaar was ’n maklike swangerskap ons grootste wens. Min het ons geweet dat die Here in die moeilikste tye genade gee. Nadat ons drie jaar lank gesukkel het om swanger te word en ’n jaar lank fertiliteitsbehandeling gekry het, vind ons einde 2020 uit ons verwag ons wonderwerk. Maar toe doen ek covid op en ons dogtertjie word op 11 Junie 2021 dood gebore. Dit was, en is soms nog steeds, ’n baie moeilike pad om te stap. Die dood is so algemeen, maar tog so ’n ingewikkelde proses om deur te werk. Ons het ses maande lank weer natuurlik probeer swanger raak, maar sonder sukses. Toe is ons terug dokter toe en met rondte een was ons swanger! Dankie Here,…

HET JY GEWEET? Met sy pragtige pienk en wit blommetjies lyk ’n valeriaanplant alte mooi in jou slaapkamer. Maar dis nie al nie. Die soet geur van die plant word al eeue as hulpmiddel teen slaapprobleme ingespan. Dit help jou om aan die slaap te raak en verbeter ook die gehalte van jou slaap. Voeg ’n paar blomblaartjies by jou bad of ruik snags diep daaraan voor jy inkruip. Hou in gedagte dat die plant sowat ses uur sonlig per dag nodig het om te floreer.…

ONS KENNERS E-pos jou vrae na sharing@ypbmagazine.com Vrae kan ongelukkig nie persoonlik beantwoord word nie. LEË-SAKKIE-SINDROOM V Ek was 10 weke swanger met my tweede kind, toe ek ’n slymerige afskeiding met ’n bietjie bloed daarin gekry het. Ek is onmiddellik dokter toe en ’n sonar wys toe dat die sakkie leeg is. Ek is gediagnoseer met ‘leë-sakkie-sindroom’. Ek het nog nooit daarvan gehoor nie. Hoekom gebeur dit en wat is die kans dat dit weer sal gebeur? A DR. JP DU BUISSON ANTWOORD: Ek is jammer om te hoor van jou miskraam, maar jy moenie alleen voel nie. Een uit vyf vrouens sal beleef wat jy ervaar het. Wat jy beskryf is ’n teruggehoue miskraam. Dit ontstaan omdat die fetus baie vroeg afgesterf het of glad nie eens ontwikkel…

As jou baba eers gebore is, het sy nie meer haar naelstring – wat voedingstowwe en suurstof aan haar verskaf het – nodig nie. Kort ná jou pienkvoet se geboorte word haar naelstring geklamp en naby haar naeltjie gesny. Voor hy dit gesny het, het die dokter dit op twee plekke vasgeklamp om die bloeding tot die minimum te beperk. Die klamp word net so gelos tot die string verdroog het, gewoonlik een tot twee dae later. Wanneer dit verwyder word, is daar soms effense bloeding. Jy en jou baba sal geen pyn ondervind wanneer die naelstring geknip word nie omdat dit geen senuweepunte het nie. Die stompie wat oorbly, is ’n deel van die naelstring wat ná ’n ruk uitdroog, afval en jou baba se naeltjie agterlaat. Dit is…

Dit is nie juis een van ouers se gunsteling-ervarings nie, maar dis onvermydelik. Jou baba gaan die een of ander tyd ’n toe of verstopte neus kry. Dit beteken weer dat jou kleinding gaan sukkel om te slaap, of dalk nie behoorlik kan voed nie. Gelukkig is ’n toe neus darem gewoonlik nie te ernstig nie. Dit ontstaan wanneer die weefsel en bloedvate van jou baba se neusie swel as gevolg van ’n infeksie van die neusgange. ’n Toe neus gaan dikwels gepaard met ’n loopneus of slymkristalle wat aan die kant van jou baba se neusgate vorm en vaskleef. DEUR WAT WORD ’N TOE NEUS VEROORSAAK? Daar is talle oorsake, onder meer griep of verkoue. As die sondaar ’n verkoue is, slaan die neus toe weens beskadiging van die…

HET JY GEWEET? Die meeste babas kry hul eerste tand tussen vier en sewe maande oud. DIT HELP ALLES Sommige babas se tande verskyn stil-stil, maar ander is beslis nie so gemaklik met die proses is nie. En ’n moeilike baba beteken ’n moeë ma. Hier is rate wat ons by ervare ma’s en mediese kenners gekry het. TREK DIE AANDAG AF Bedags is dit soms genoeg om baba se aandag van haar ongemak af te trek deur haar besig te hou met aktiwiteite soos stap, dans en bietjie vertroeteling. MASSERING Vryf ferm met ’n skoon vinger oor haar tandvleisies. Jy kan ook ’n rubber-tandeborseltjie gebruik om die tandvleis mee te masseer. TANDERINGE ’n Tandering is nie te hard nie en is lekker koumateriaal. Belê gerus in die soort wat…

ONS KENNERS E-pos jou vrae na sharing@ypbmagazine.com Vrae kan ongelukkig nie persoonlik beantwoord word nie. EK WIL SPEEN V My kleuter van vier jaar drink omtrent twee keer gedurende die dag en party nagte twee tot drie keer aan my bors. Ek weet hy soek nie regtig meer melk nie, maar wil hom nie emosionele skade berokken deur my bors te weier nie. Hy gaan slaap ook nie in die aand sonder sy voeding nie. Ek is raadop. Hoe kan ek hom van die bors af kry? A LISANNE DU PLESSIS ANTWOORD: Dit maak nie saak of dit die ma of kind se besluit is om borsvoeding te staak nie, maar geleidelike spening is vir albei makliker en beter. As ’n ma onmiddellik moet ophou borsvoed, byvoorbeeld as sy chemoterapie…

Ons almal ken daardie magtelose gevoel van aan tafel sit met ’n snuiter wat weier om te eet. Dis dán dat jy maar gerus kan begin kweek aan die spreekwoordelike hare op jou tande, want die kans dat jy hierdie oorlog gaan wen, is skraal. Soms werk selfs die heel beste kunsies in die boek eenvoudig net nie om ’n kind sover te kry om te eet nie. Maar die feit bly staan, jy het die volste reg om bekommerd te wees as jou kind nie wil eet nie. Of ten minste nie goed eet nie – veral as hierdie patroon dae, selfs weke lank aanhou. Kos is die bepalende faktor van jou kind se gesondheid, groei en ontwikkeling. As sy nie reg eet nie, sal sy nie optimaal groei…

Jou kleinding leer die heel beste deur te voel en te vat, te hoor en te sien, en selfs te proe – en dit geld ook wanneer dit by die alfabet kom. “Leer op hierdie ouderdom behoort altyd pret te wees,” sê Mariska Grebe, ’n remediërende onderwyseres van Jeffreysbaai in die Oos-Kaap. “As kinders leer sonder dat hulle dit weet, onthou hulle die beste.” Prentjies, rympies, liedjies en prettige handwerk is alles slim maniere om jou kleinding aan letters bloot te stel, sê sy. “As jy byvoorbeeld ‘b vir beer’ doen, gee hom ’n beertjie om vas te hou. Dink oor watter geleenthede vir toevallige leer jy kan skep, soos om ‘p vir peer’ te behandel as jou kleinding ’n peer eet. Pak groot letters met klei of sand, rys…

JOU RESEPTE Hier’s ons lys van 53 toebroodjies, van eenvoudig tot ’n bietjie meer fênsie. Plak dit op jou yskas en kyk of jy die hele lys vanjaar kan aftik. Hou dit opwindend deur jou broodsoorte te wissel. Ons het ’n lysie daarvoor ook wat jou verder as alledaagse witen bruinbrood sal voer. SOUT  Marmite of Bovril Kaas Grondboontjiebotter (onversoet) Olyfsmeer Hummus Tamatie Maaskaas Komkommer Gerookte salm Salami Ham Vissmeer Gerookte makriel Avokado Biltong Pastrami SLIM MET OORSKIET  Hoender Skaapboud Steak Schnitzel Hamburger Maalvleis Wors Knoffelbrood Franse roosterbrood Piesangbrood SOET  Konfyt Heuning Stroop Nutella Biscoff-smeer Marmelade KOMBI’S  Eier en mayonnaise Kaas en konfyt Kaas en tamatie Tamatie en pesto Grondboontjiebotter en stroop Salm, komkommer en maaskaas Bronkors en smeerkaas Hoender en mayonnaise Spek, kropslaai en tamatie…

Kieme is oral, veral op plekke soos kleuterskole, en blootstelling is deel van die lewe. Maar as julle al by die soveelste verkoue trek en dis nog nie eens régtig winter nie, is dit tyd vir ’n paar bykomende voorkomingsmaatreëls en ’n paar planne om die immuunstelsel wakker te skud. VERMY SIEKES Die kieme wat verkoue en griep veroorsaak kan tot drie meter deur die lug trek wanneer iemand hoes of nies, en kan lank in die lug bly hang, of afsak en op ’n oppervlak gaan sit. Bly dus so ver moontlik weg van mense wat siek is. Moet ook nie hul eetgerei deel nie. Bly ook weg van rokers, want tweedehandse rook maak almal meer vatbaar vir siekte. Leer jou eie kinders ook om in ’n snesie te…

V My seuntjie het op ses maande begin kruip en op agt maande geloop. Ek moes toe reeds by kleuterskoolonderwysers hoor dat hy hiperaktief is. Ons het hom in ’n ander kleuterskool geplaas, waar ek nou wéér moet hoor dat hy hiperaktief is. Ek wil nie my kind benadeel of sy persoonlikheid onderdruk nie. Wat moet ek doen? Hy het pas vier jaar oud geword. A RENÉ DANIELS ANTWOORD: Niemand weet wat aandaggebrek-hiperaktiwiteitsteurnis (AGHS) of aandaggebreksteurnis (AGS) veroorsaak nie, maar daar word gemeen dat strukturele en funksionele wanbalanse ’n belangrike rol speel. Ons weet almal dat jong kinders oor die algemeen sukkel om stil te sit of aandagtig na opdragte te luister, en dat hulle soms hiperaktief kan wees. Kinders met AGHS se simptome is egter voor sewe jaar oud…

VOORBLAD WENNER WAAR KOM JULLE AAN SY NAAM? Dis ’n samestelling van die eerste drie letters van sy pa se naam (Louis) en die laaste drie letters van myne (Chantell). Dit was vir ons die mooiste geslagsneutrale naam wat ons al gehoor het. Dis ’n gewilde naam in die Filippyne, wat “geskenk van God” beteken, en dis presies wat hy is. NA WIE LYK HY? Louell het sy pa se gesigvorm, sterk vel en lang, donker wimpers. Wat die res betref, lyk hy presies soos ek op daardie ouderdom gelyk het. Sy pragtige goudblonde hare is volop aan albei kante van ons familie. Sy unieke lipkuiltjies is die gevolg van Van Der Woude-sindroom aan my kant van die familie. Dis ’n genetiese toestand wat in uiterste gevalle gesplete lippe en…

Canpol Babies maak dit alte lekker om ’n suksesvolle ma te word. Die geskenk sluit in ’n voedingsbra, veeldoelige broekie, borsmelk-bêresak, Bonjour Paris se silikon-fopspeen (0-6 maande), asook ’n fopspeenhouer en fopspeensakkie deur Bonjour Paris. Babynmore.co.za Om in te skryf: Stuur jou gunsteling-foto na sharing@ypbmagazine.com. Onthou om jou kind se naam, van, ouderdom, kontakbesonderhede en posadres in te sluit.…

Jou swangerskap word verdeel in drie trimesters wat elkeen sowat drie maande duur. Gedurende elke trimester ondergaan jou baba wonderbaarlike ontwikkeling. Die eerste trimester, wat oor 12 weke strek, kan nogal stil voel, maar dis wanneer die meeste ontwikkeling plaasvind. Onthou, twee selle word in die kort tydjie ’n mensie wat jy al mooi op ’n sonar kan sien. Vir die doel van dié artikel beskou ons week een as die eerste dag van jou laaste menstruele siklus, dus die tyd vóór bevrugting. Die drie fases in die eerste trimester is die bevrugtingsfase, die embriofase en uiteindelik die fetusfase. BEVRUGTING Ongeveer twee weke ná jou menstruele siklus is daar ’n volwasse eiertjie wat wag om bevrug te word. Bevrugting vind plaas wanneer ’n sperm die volwasse eier suksesvol binnedring en…

HOE GROOT IS JOU HART? Het julle al pleegouerskap oorweeg? Dis nie iets wat sommer ligtelik aangepak kan word nie. Die Afrikaanse Toekomstrust (ATTSA) se Hulp met Hart-projek verwelkom mense wat die pad wil stap om behoeftige kinders te help. Hulle besit en bestuur verskeie pleeghuise in ons land en bied ook ’n omvattende pleegoueropleidingsprogram aan wat op die ontwikkelingsbehoeftes en spesiale behoeftes van kinders fokus, asook die bou en instandhouding van verhoudings. Daar is ’n keuringsproses en vereistes waaraan voldoen moet word en dis ook baie belangrik dat pleegouers en maatskaplike werkers ten nouste saamwerk. As jy vanjaar pleegsorg wil aanpak, stuur gerus ’n e-pos aan help@attsa.org vir meer inligting oor hoe om die ruimte in jou huis en hart reg te kry. HOU TRED! TOEP VAN DIE MAAND…

SNYE EN SKRAPE Gewoonlik strek ’n skraap oor ’n groterige oppervlak, maar dis nie baie diep nie. Dis wel seer omdat dit so groot en rou is. Snye is ook gewoonlik nie te ernstig nie. Maak die wonde goed skoon met water en ’n stukkie gaas waarop ’n ontsmettingsmiddel soos Savlon (met water verdun!) gedrup is. Maak seker dat geen vuiligheid in die wond agterbly nie. Stukkies kan met ’n haartangetjie verwyder word. Los klein skrapies oop sodat dit vinnig droog word. As die skraap op ’n plek is waar jou kind se klere dit kan skaaf, smeer ’n ontsmettingsalf aan en plak ’n groot pleister op. Op snye kan jy ’n ontsmettingsalf soos Polysporin aanwend en die twee kante van die sny met ’n pleister na mekaar toe trek.…

Elke dag word ons omring deur ’n kaleidoskoop van kleure in derduisende verskillende skakerings. Terwyl dit vir ons al tweede natuur is om ’n naam aan elke kleur en skakering te heg, is dit ’n vaardigheid wat jou peuter en kleuter nog moet baasraak. Die vaslegging van kleurbegrip begin reeds met geboorte: Eksperimente het gewys selfs klein babatjies reageer verskillend op verskillende kleure en sal byvoorbeeld langer na ’n blou of groen voorwerp staar as na ’n rooie. Hulle het egter hulp nodig om te leer watter naam by watter kleur pas, maar hulle kan dit van twee jaar af al begin leer. Teen die tyd dat jou kind graad R toe gaan, word haar kleurherkenning geassesseer en sal sy ook al kleurpatrone moet kan onderskei soos twee geel, een…

WYS VIR ONS As jy wil hê jou kinder- of ooievaarspartytjie moet op hierdie blad verskyn, stuur gerus ’n e-pos met foto’s van ’n goeie gehalte en ’n kort beskrywing van die partytjie na sharing@ypbmagazine.com…

1 Bak modderkoekies. 2 Bou ’n tent. 3 Skiet kettie na ’n klomp ou verfblikke. 4 Spring soos ’n padda. 5 Swem. 6 Speel wegkruipertjie. 7 Spring tou. 8 Skop bal. 9 Ry fiets of skopfiets of stokperd. 10 Bou sandkastele. 11 Lees ’n vervolgverhaal onder die bome in die park – bietjies-bietjies al om die ander dag. 12 Klim boom. 13 Maak ’n reënboog met die tuinslang. 14 Speel wieliewielie-walie. 15 Plant blommetjies. 16 Blaas borrels. 17 Bou landskuns op die grond met natuurelemente soos akkers, stokkies, bessies, blare. 18 Rol van ’n heuwel af. 19 Maak gereeld tuin nat. 20 Hou ’n skemerpiekniek op die gras. 21 Lê op jul rug en vind beelde in die wolke. 22 Trek onkruid uit. 23 Vang insekte en hou hulle dop…

Het jy geweet dat sowat 80 persent van wat jou kind in haar skoolloopbaan leer, deur haar oë ingeneem word? Haar visuele vaardighede het egter met veel meer te doen as bloot goeie sig. Sig is maar een deel van die visuele ontwikkeling wat jou kind nodig het om ’n sukses van haar skoolloopbaan te maak. Visie stel ons in staat om dinge te identifiseer, te sien wat om te verwag en betyds daarop te reageer. Hoe jou kind se oë werk en wat sy sien, sal ook ’n rol speel wanneer sy in graad 1 begin lees, skryf en somme maak. Dit kan bepaal of sy sukkel om van die bord af te skryf, of sy dalk ’n b en ’n d verwar, en of sy dit moeilik vind…

"OUMA KOTIE WAS JOU ENIGSTE LEWENDE OUMAGROOTJIE EN DIT IS BAIE JAMMER DAT DAAR NOOIT ’N FOTO VAN JULLE TWEE SAAM SAL WEES NIE" Terwyl ek sit en kyk hoe jy met legkaartstukke speel, rol my gedagtes terug na die oproep wat ek ’n paar aande gelede ontvang het. Dit was reeds sterk na 22:00 toe my foon lui en oom Magnus, mamma se broer, my inlig dat ouma Kotie se toestand versleg het en dat hy vrees dat haar tyd min is. Sy is die volgende oggend kort ná 06:00 oorlede. Ouma Kotie was jou enigste lewende oumagrootjie en dit is baie jammer dat daar nooit ’n foto van julle twee saam sal wees nie. Ons het soveel keer probeer en elke keer het iets skeefgeloop. En nou, met…

JOU KOMPETISIE ONS IS AANLYN! Sosiale media Volg ons op sosiale media om op hoogte te bly van kompetisienuus. #CoverStarSearch Vir die volledige reël, en bepalings en voorwaardes, blaai na bl 97. Om ‘n pasgeborene in te skryf, epos ‘n foto na coverstar@ypbmagazine.com Dit kan enige geslag wees. Maak seker die foto is onlangs. Onthou om die kind se naam, ouderdom en waar julle vandaan kom in te sluit, asook kontakbesonderhede. Ouderdomsperk: 3 maande SKRYF PASGEBORENES IN: 1 JANUARIE – 30 APRIL 2023 Om ‘n dogtertjie in te skryf, epos ‘n foto na coverstar@ypbmagazine.com Maak seker die foto is onlangs, duidelik en van goeie gehalte. Onthou om die kind se naam, ouderdom en waar julle vandaan kom in te sluit, asook kontakbesonderhede. Ouderdomsperk: 3 tot 48 maande SKRYF DOGTERTJIES IN:…

E-POS UIT DIE BUITELAND Om by die see en boonop nog op ’n eiland te bly, was altyd een van my grootse drome. Dit het waar geword toe ons in Januarie 2020 vanaf Colombia na Indonesië verhuis het. Ons is al byna agt jaar in die buiteland. Vyf jaar was in Barranquilla, waar die sangeres Shakira ook vandaan kom. Ons kleinste, Isabella (4), is daar gebore. Ons oudste, Es-Mare (11), het daar op drie jaar oud vlot Spaans leer praat. Tans woon ons op die eiland Sumbawa in Indonesië, waar my man, Pieter, by ’n goud-en-kopermyn werk. Ons is net 45 minute per vliegtuig van die eksotiese eiland Bali af. Party naweke spring ons op die myn se seevliegtuig vir ’n lekker wegbreek Bali toe. Die eiland Lombok is ’n…

’NWerkende ma is werklik ’n meester-jongleur. Die laaste ding wat sy nodig het, is om met skuldgevoelens opgesaal te word. Maar dis algemeen dat werkende ma’s dun gesmeer voel, en bekommerd is daaroor dat hulle óf hul werk óf hul gesin afskeep, al is dit nie eens waar nie. Dr. Colinda Linde, ’n Sandtonse kliniese sielkundige in privaat praktyk en ma van ’n tweeling, sê skuldgevoelens loop wyd. Jy is ’n ma wat aan ’n loopbaan bou, maar jy voel dikwels skuldig omdat ander mense vir ’n deel van die dag jou kinders moet grootmaak ... Jy voel ook asof jy jou man, vriendskappe en verantwoordelikhede tuis afskeep weens jou werk. Terselfdertyd voel jy dikwels dat jy nie na wense by die werk presteer nie omdat daar so baie ander…

HUISLIKE GEBOORTE … IN DIE GOUE STAD Die Oxford Midwifery Unit is ’n nuwe geboorte-eenheid in Saxonwold, Johannesburg, wat ideaal is as jy nie vir ’n hospitaal kans sien nie, maar ook nie juis by jou eie huis wil wees wanneer jy kraam nie. Hier sal jy tuisgemaak word en rustig kan voel oor alles, want die eenheid is toegerus met al die tegnologie wat nodig is om enige gebeurlikheid te hanteer. Vroedvroue sal jou help, maar ginekoloë en verloskundiges is ook aan diens. Gaan na oxfordmidwifery.co.za om al die dienste te sien wat aangebied word. Die tariewe is billik! Dis ’n krisis Volgens Law for All word 3 500 babas elke jaar in Suid-Afrika verlaat. Sommiges oorleef en kry huise, maar baie nie. Wil jy help? Kyk dan ’n…

ONS KENNER E-pos jou vrae na sharing@ypbmagazine.com Vrae kan ongelukkig nie persoonlik beantwoord word nie. V Ek borsvoed al 10 maande lank, maar my melk is deesdae min. Ek kry maar so 50 tot 60 ml op ’n slag uitgepers wanneer ek soggens en saans uitmelk. My dogtertjie eet en slaap goed. Sy eet Nestum-pap wat ek met borsmelk aanmaak, want sy het uitgeslaan van Cerelacpap, wat met kookwater aangemaak word. Dit voel asof ek nie genoeg melk uitpomp vir ’n voeding soggens by haar oppasser sowel as vir haar pap nie. Moet ek aanhou, of kan ek haar pap met formulemelk aanmaak? A LISANNE DU PLESSIS ANTWOORD: Nestum en Cerelac word van koring en/of rys gemaak, afhangend van die spesifieke formule, maar Cerelac bevat melkpoeier (afkomstig van koeimelk) en…

Die effens nasale, draaierige klank is genoeg om jou maag ook te laat draai. Peuters kan kerm tot jou ore tuit en jy lus voel om self te begin skree! Byna alle peuters beproef die een of ander tyd die krag van kerm, maar hoe jy dit hanteer het ’n invloed op hoe lank hulle daarmee aanhou. “Neul” is ’n ondoeltreffende en onvolwasse vorm van kommunikasie wat kinders soms gebruik as hulle emosioneel voel, verduidelik die opvoedkundige sielkundige Riza van der Merwe van Roodepoort. Daarom help dit as jy jou kind help om doeltreffender te kommunikeer. IGNOREER DIE SLEG EN LEER HAAR REG Moenie aan jou kind se versoek gehoor gee wanneer sy neul nie, sê Riza – anders het sy geen rede om haar gedrag te verander nie. “Gee…

DIS ’N BELEGGING Leer my Lees met Tippie die Olifant Vlak R: Boek 1-10 is ’n stel wat jy gerus kan aanskaf as jou kind vanjaar gaan leer lees. Die boekies bied uitstekende steun aan ouers, onderwysers en natuurlik aan die ontluikende lesertjie ook. Die skrywers, José Palmer en Reinette Lombard, het jare ervaring in die kuns van kinders leer lees. R1 500 vir die stel van 10, LAPA Uitgewers. VIR OUER KINDERS Skool vir talente, eerste periode: oorverdowend deur Silke Schellhammer is vir selflees deur nege- tot 12-jariges, maar jy kan dit gerus vir jou jonger kinders voorlees. Die hoofkarakter, Alva, is in ’n kosskool op ’n verlate eiland. Dis vir kinders met ongewone talente. Van hulle kan krimp, vlieg of deur deure loop! Alva se talent is dat…

Tussen kieskeurige eters, kosallergieë en ’n bedrywige skedule deur voel baie ouers dat hul kleingoed ’n aanvulling nodig het. Vitamiene en minerale is immers belangrik vir kinders se algemene gesondheid, asook vir hul groei, ontwikkeling en optimale breinfunksie. Ons weet ook dat genoeg van die regte voedingstowwe sal voorkom dat die goggas wat by die kleuterskool rondloop, die oorhand kry. Voldoende voeding help ook om chroniese siektes te voorkom. Gesonde kos bly die beste manier om al die vitamiene en minerale in jou kind se lyfie te kry, ten spyte daarvan dat die kos van vandag dalk nie meer van dieselfde gehalte is as in ons oupas se tyd nie. Aanvullings behoort nie gebruik te word om gesonde kos te vervang nie, maar eerder om aan te vul wat dalk…

Jou kind se graad R-jaar is ’n baie belangrike oefentyd vir selfhelpvaardighede wat aanstaande jaar as vanselfsprekend beskou sal word. Dit maak hom ook doelgerig gereed vir die akademiese uitdagings wat in graad 1 wag. En jou ondersteuning kan hom daardie hupstoot gee wat dit maklik maak! Graad R is die jaar van selfstandigwording voor kinders die formele onderwys betree. Die kinders moet nou op alle gebiede leer om hulself te handhaaf en selfstandig te word. Dis amper soos die eerste helfte van die ou sub A-jaar. Graad R is beslis meer gestruktureerd as vorige kleuterskoolklassies, maar nie so formeel soos “skool” nie. Die nasionale kurrikulum sluit graad R in. Dis stap een en daar is vaste leeruitkomste en assesserings. Jou kind kry punte. Deur die jaar vind daar geleidelike…

SMS-KODE BK241PP WEN ’N EKSKLUSIEWE GESKENKPAK VAN PANADO® TER WAARDE VAN R1 000! Panado® weet dat ouers dit nuttig vind om ’n toegewyde plekkie vir hul kleinding se noodsaaklikhede te hê. ’n Doeksak maak dit ’n raps makliker om jou babagoed bymekaar te hou wanneer julle onderweg is. Die beste doeksakke kombineer vorm en funksie, met ekstra punte vir styl en funksionaliteit. Dis hoekom ons ses eksklusiewe Panado®-geskenkpakke ter waarde van R1 000 elk weggee. Die prys sluit ’n doelgerigte reisdoeksak en noodhulptassie in. Die doeksakke is stylvol, byderwets, maklik om skoon te hou en het genoeg plek vir al jou bababenodigdhede wanneer julle reis, terwyl die noodhulptassie verseker dat jy basiese noodhulpmiddels byderhand het om jou kinders se glimlaggies en speletjies in ’n japtrap terug te tower. Maak die…

ONS KENNERS E-pos jou vrae na sharing@ypbmagazine.com Vrae kan ongelukkig nie persoonlik beantwoord word nie. V My kind is nou drie en ’n half jaar oud. Ons is nou al ’n paar maande lank met potjielesse besig, maar kom nie juis êrens nie. Ek raak nou bekommerd, want al die ander kinders van haar ouderdom het potjielesse al onder die knie. Het my kind ’n probleem? Wat kan die oorsaak wees? A LIZANNE DU PLESSIS ANTWOORD: Elke kleuter het ’n unieke temperament en daarom is daar nie ’n regte manier of ’n regte tyd om te leer nie. Kinders bemeester potjielesse op verskillende ouderdomme, en dis hoekom verskillende benaderings vir elkeen werk. Soos met enige ander ontwikkelingsmylpaal is daar aspekte van ontwikkeling wat bemeester moet word voor potjielesse aangepak kan…