Innehållsförteckning för 21 July 2022 från Huisgenoot

1 JOHAN STEMMET: DIS LEKKER BY DIE SEE! Die oudaanbieder van Noot vir noot en sy vrou, Coleen, het die Goudstad vir die Weskus verruil – maar hy’s nog net so besig soos altyd, vertel Johan Johan, ons mis jou vreeslik baie op die televisie. Noot vir noot was een uit ’n miljoen. Hou duim vas dit sal terugkeer noudat die covidregulasies verslap is. Geniet die Weskus en alles wat jy doen. Jy lyk goed! CONNIE Hoekom die Weskus en nie die Tuinroete nie? Ons het darem reeds ons eie celeb, Riaan Cruywagen! Ek kom self van die Weskus, gebore en getoë, maar wil om vele redes nie teruggaan nie. Maar ja, ons mag verskil, dis 100% reg so. GERDINE Welkom hier in die paradys; jy het reg gekies. Daar is geen…

SELDE het die vrygesel van ’n maatsoekprogram die tonge so laat klap. Hy is net ’n pierewaaier wat in die bondel vry en dan almal huis toe stuur, het kykers gereeld op sosiale media oor Francois Jacobs laat hoor. Min het hulle geweet hoeveel drama daar werklik agter die skerms van Op my eish! afgespeel het. Maar hier op die stoep van ’n restaurant in Johannesburg kan Francois (33) en die stralende Nykie Pretorius (26) vandag eindelik die sluier lig oor die uitkoms van die reeks – en ná vier maande se geheimhouding openlik ’n paartjie wees. Dit het gevoel asof hulle ’n “geheime affair” bedryf, vertel die akteur en hartebreker van die kykNET-reeks laggend met die groetslag. Net so, beaam Nykie langs hom: “Dit was omtrent ’n tyd van…

PREPPIE MOULOSE OORTREKTRUIE Gee jou uitrusting ’n preppie gevoel deur ’n rolnektop en moulose oortrektrui in natuurlike skakerings soos wit en aardse tone saam met ’n jas, skouersak en byderwetse wit stewels te dra. Rolnektop R69,99, moulose oortrektrui R179,99 en skoene R150, Mr Price. Spanbroek vanaf R499, jas vanaf R699, handsak R199 en sleutelhouer R129, Miladys. Oorbelle R170, Lovisa. WENK Bruin en wit is ’n goeie kleurkombinasie. Kombineer dit met aksente in taan en roomkleur vir ’n genuanseerde afronding. SPANBROEK EN OORTREKTRUI Winteroortrektruie of langmoutops en spanbroeke is stylpasmaats. Meng en pas dit met tekstuur en patrone – soos hierdie swart-en-grys vertolking van ’n klassieke kombinasie van ’n patroonoortrektrui en spanbroek – en rond die voorkoms af met ’n kunsleerjas, ombré kunsleerstewels en ’n gekwilte pofbaadjie. Oortrektrui vanaf R399 en…

IN DIE koue wintermaande voel dit dikwels of almal om jou hoes en snuif – en dis nie net jy wat meer bewus is daarvan sedert covid-19 ons getref het nie. Hoes is meer algemeen in die winter omdat die koue winterlug die slymvliese wat die lugweë uitvoer uitdroog – en hierdie membrane is ons voorste linie van verdediging. “Wanneer die lugweë uitdroog, word ons vatbaarder vir virusse en bakterieë,” sê dr. Simone Barry, ’n respiratoriese spesialis van Australië. “Ons bring ook meer tyd binnenshuis deur, en dit verhoog ons kans om by iemand met ’n verkoue aan te steek. Daarby hou ons dikwels verwarmers aan, wat ’n goeie omgewing skep vir virusse en bakterieë om in te floreer,” sê sy. Maar ’n gehoes kan verwarrend wees, want daar is…

“Vrydagaand is ’n heerlike lekkerleesbundel met verhale oor die liefde in al sy vorms,” sê die skrywer en samesteller Elsa Winckler. “Veral in die tyd waarin ons leef waar ’n mens min tyd het maar tog wil lees, bied die stories jou die geleentheid om binne ’n halfuur een klaar te lees.” Sy het die romanseskrywers wat sy ken, gevra om ’n kortverhaal oor die liefde te skryf, maar ook die krimiskrywer Dibi Breytenbach en die reisskrywer Gerrit Rautenbach. “’n Paar het nog nooit ’n kortverhaal geskryf nie en was bekommerd of hulle dit kan doen, ander het nog nooit oor die liefde geskryf nie en was skepties oor hul vermoë, maar eindelik was al 27 baie geesdriftig. “Drie mans het elk ’n storie in die bundel, en daar is…

ORIGHEID Piet sien op ’n dag sy willewragtig-pel dra ’n stel fyn oorbelle. “Nou van wanneer af dra jy die goed?” wil hy verbaas weet. “Vandat my vrou dit in my bakkie gekry het,” antwoord sy vriend. WOLLIE, PRETORIA YSLIKE EKSPEDISIE ’n Groep sakelui van die Vaaldriehoek het ’n bietjie vrye tyd tydens ’n besoek aan Kanada en besluit hulle wil probeer yshengel by ’n groot meer in die omgewing. Eers gaan hulle na ’n winkel om die nodige te koop – onder meer ’n stewige yspik. Maar ná twee uur is een van die manne terug by die winkel en vra klappertand: “Ons wil al die yspikke koop wat julle het.” Verbaas vra die winkeleienaar: “Hoe so? Hoe gaan dit daar buite?” “Nee, kyk, ons sukkel,” antwoord die hengelaar.…

SÊ DIT SO: In-flaa-sie Inflasie is die proses waardeur goed en dienste geleidelik ál duurder word. Dit beteken jy het meer geld nodig om iets te koop as wat jy ’n jaar gelede nodig gehad het om dieselfde ding te koop. Inflasie word as ’n persentasie aangedui – dit wys hoeveel duurder iets is as byvoorbeeld ’n jaar gelede. SYFERSTORIES 92 Dit is hoe oud Derek Skipper is, ’n Britse man wat onlangs ’n wiskundeskooleksamen in Engeland afgelê het. Dié eksamen word gewoonlik deur 16-jariges afgelê. Derek moes ’n vergrootglas gebruik om die vraestel te lees en kon nie alles betyds klaarkry nie, maar het gesê hy het dit geniet en “baie geleer oor hoe om ’n sakrekenaar te gebruik”. 100 000 Die Amerikaanse FBI het soveel dollar (sowat R1,6…

LEKKERGOED LEKKERTE Chrissy is dalk nog net 10 jaar oud, maar sy het al klaar drie liedjies uitgereik. Haar jongste een, “Beautiful Life”, is weer eens bewys dat dié meisie van Benoni nog een van Suid-Afrika se groot musieksterre kan word. En waaroor gaan die liedjie? “Dit gaan daaroor om positiewe dinge te kry om aan vas te hou wanneer dit rof gaan. In die lewe sal daar altyd negatiewe goed wees, maar daar is ook mooi dinge,” sê Chrissy. As jy fyn luister, kan jy dwarsdeur die liedjie hoor hoe sy na allerhande swiets verwys. “My gunstelinglekkers het van my lirieke geïnspireer. Ek is mal oor lekkergoed, veral Hershey’s-sjokolade, spookasem en enige Haribo-lekkers. Wanneer tye moeilik raak, verbeel ek my dat ek in ’n wêreld vol lekkergoed is, en…

EK IS baie lief vir die stad. Veral Capital Park. Hier is alle kleure en geure. Die buurt het nog karakter met al sy ou huise. Dit is divers. Nie baie mense weet waar is Capital Park nie, maar as ek sê ’n klipgooi van Danville, weet hulle so min of meer waar dit is. Ek bly al sedert my 20’s hier in Pretoria. En dis hier, uit my onmiddellike omgewing waar ek inspirasie put vir my skilderye. Ek sal verby ’n straatsmous of ’n gebou ry, my foon uithaal en ’n foto neem. Ek doen dit ook met mense wat ek ontmoet. Dan gaan ek huis toe en gaan skilder die foto. Ek het eendag verby ’n middelman op die hoek van Boom-en Potgieterstraat gery. Ek weet nie hoekom…

HY IS die nasie se gids deur die nimmereindigende beurtkragverdriet. As jy sukkel om die wie, waarom en wat nou van ons elektrisiteitskrisis te verstaan, is Chris Yellend se alombekende gesig daar op jou skerm om dit te verduidelik. Dis nou mits jou krag nie af is nie. ’n Rubriekskrywer het Chris (68) onlangs Suid-Afrika se “onvermoeibare energieontleder” genoem, want in sy aftreejare is dié pa van drie gedurig aan die werk. Tog is hy beskeie oor sy ekspert-status. “Ek dink ek het eintlik ’n blote oorsigtelike kennis van die energiesektor,” vertel Chris. “Ek het dalk die vermoë om ingenieurs se sogenaamde technotalk – soms noem ek dit self technobabble – om te skakel en sin daarvan te probeer maak op ’n manier dat kykers, luisteraars en lesers dit hopelik…

MARGARET THATCHER Brittanje se langs dienende premier van die 20ste eeu het in November 1990 ná ’n kabinetrebellie uitgetree. Haar universele “poll tax”, betaalbaar deur elke volwassene ongeag inkomste, het gewelddadige straatprotes uitgelok. Sy het ook groot teenkanting gekry omdat sy nouer bande met Europa wou aanknoop. Haar gewese bondgenoot, Geoffrey Howe, het bedank en haar Europese beleid sterk aangeval. In die daaropvolgende leierskapstryd is sy deur John Major vervang. TONY BLAIR Ten spyte van sy gewildheid het sy eie Arbeiderspartylede teen hom gerebelleer omdat hy geweier het om Israel te kritiseer vir die oorlog in Libanon in 2006. Hy was ook ongewild weens sy volgehoue steun van pres. George W. Bush en die omstrede oorlog in Irak. GORDON BROWN Hy het ná die algemene verkiesing in 2010 as premier…

Die Suid-Afrikaanse Reserwebank (SARB) het ’n inflasieteiken van tussen 3% en 6%. Die sentrale bank gebruik sekere monetêre beleide, veral die beheer van korttermyn rentekoerse, om inflasie binne dié teiken te hou. Sodra inflasie bo die teiken styg, word rentekoerse verhoog, wat beteken handelsbanke betaal hoër rente op die lenings wat hulle by die SARB aangaan. Dis hoekom dié banke dan terselfdertyd ook die koers op lenings aan klante verhoog. Dit word alles gedoen om te help om inflasie laer te hou. Inflasie lei basies daartoe dat alles duurder word – dit beteken jy kry veel minder vir elke rand wat jy het. Daarom raak ouer mense byvoorbeeld altyd nostalgies oor die dae toe ’n brood R1,75 gekos het – dis inflasie wat die prys opgestoot het tot rondom R17.…

Skryf gerus vir my oor jou sake van die hart of moeilike persoonlike kwessies. Ek beantwoord hier vrae en briewe van lesers en gee graag raad. Ek sal nie jou naam bekend maak nie en jou identiteit bly vertroulik. Skryf vir my by: Vra vir Irma, Posbus 1802, Kaapstad 8000 of stuur jou e-pos na vravirirma@gmail.com of SMS Vra vir Irma gevolg deur jou vraag na 36489. ‘DIE HELFTE VAN DIE FUT WAT UIT IS IN JOU HUWELIK, IS JOU VERANTWOORDELIKHEID’– IRMA VERLIEF OP MY DOMINEE V Ek weet ons predikant is baie lief vir sy vrou en sal nooit aan haar ontrou wees nie, maar ek is diep, diep, diep verlief op hom. Ek weet nie wat met my aangaan nie, maar ek kan myself nie keer nie. My…

In die buurt was hy net bekend as Mister Saker. Die lang, maer man met die silwer hare en die enorme hande. Bouershande, maar smaller; die vingers dunner gepunt asof hy ook klavier kan speel. Met sy vrou lankal oorlede en die twee dogters in Bloemfontein het hy alleen agtergebly in die huis wat hy met sy twee hande gebou het. “Pa moet nou werklik dink aan optrek na ons toe,” het die een dogter voorgestel. “Ja, dit is te gevaarlik vir ’n oumens alleen in die huis,” het die ander een aangelas. Dan het Mister Saker hom koppig van hulle weggedraai en sy sigaar op die stoep wat see toe wys, gaan rook. En toe is dit weer Vrydagaand. Switserse Elke met die blonde bolla wat rafelrig en onnet…

LEEU 22 JULIE – 22 AUGUSTUS Jy is vandeesweek vlymskerp en gereed om jou beroepswêreld met mening en intelligensie aan te pak. Dis ’n week om dinge te laat gebeur, maar hoe jy te werk gaan, gaan afhang van die suksesse of mislukkings wat jy sal hê. Laat leierskap pleks van baasskap jou lei om so op te tree dat dit daartoe sal lei dat mense jou respekteer pleks van vrees. Jou verjaardagmaand begin op die 22ste; geniet dit terdeë. GELUKKIGE NOMMERS 11, 19, 33, 51, 26, 16 MAAGD 23 AUG – 22 SEP Dit lyk asof jy tans ’n oorvloed geestelike energie het, wat jy tot jou voordeel kan gebruik pleks daarvan om dit net aan senuagtige en spanningsvolle aktiwiteite te bestee. Probeer om vir jou ’n realistiese doelwit…

PARTY produkte is so veelsydig, dit kom voor in amper alles wat ons gebruik, soms sonder dat ons dit eens besef. Die vraag na hierdie bestanddele kan vervaardigers tot uiterstes laat gaan om die opbrengs daarvan te vermeerder, en dit kan ’n vernietigende uitwerking op die omgewing hê. OOR PALMOLIE Oliepalmbome (Elaeis guineensis) is meer as 100 jaar gelede in Suidoos-Asië aangeplant, maar is inheems aan Wes-Afrika, waar dit in tropiese klimate voorkom. Die olie van dié bome is die mees vervaardigde, verhandelde en gebruikte eetbare olie ter wêreld, ’n kortkop voor sojaboon-, kanolaen sonneblomolie. Die vlesige vrugte is rooi (danksy hul hoë konsentrasie betakaroteen) en word gepers om palmolie te skep. Nadat dit deur ’n aantal verfyningsprosesse is, bly die RBDPO oor, wat staan vir “refined, bleached, deodorized palm…

Op huisgenoot.com kan kinders nou die nuwe aanlyn Afrikaanse kinderprogram Die Babbelbende kyk. In dié videoreeks ondersoek die karakters Bibi, Ben, Paloeka die leeu en Palawa die kameelperd saam interessante dinge terwyl hulle speel-speel meer oor ons wonderlike wêreld leer. Besoek huisgenoot.com, kies dan “HG Junior” en dan “Die Babbelbende” om al die episodes te kry. Of kyk elke dag aanlyn op jou selfoon, rekenaar of tablet ’n nuwe episode op ons tuisblad Elke episode is sowat 12 minute lank. Oor naweke deel ons aanlyn ’n omnibus van vyf episodes. Huisgenoot.com is deel van Netwerk24 en jy moet registreer om die episodes van Die Babbelbende te kyk. Besoek netwerk24.com om te registreer of laai die app in jou app-winkel af. Kom leer ken Die Babbelbende – en geniet hul vrolike…

TOE sy dit destyds begin ruik het, het sy obsessief deodorant aangewend. Toe dit nie werk nie, het sy in die stort gaan spring. Ook dít was vergeefs; dit het dinge eintlik toe net erger gemaak. Die reuk het bly kleef – dié van verrotte vis. En dit aan háár. Ook in die tyd daarna wou die klankie nie wyk nie, selfs al het Kelly Fidoe-White soms tot vier keer per dag gestort om haarself skoon te skrop. Maar al die seep in die wêreld sou die visreuk nie laat verdwyn nie, want dit is Kelly wat so stink – en nie weens swak higiëne nie, maar weens trimetielaminurie (TMAU), ’n seldsame toestand bekend as visreuksindroom. Dit is só seldsaam dat daar nog net 100 gevalle van die sindroom in…

DEAN SMITH Dean en sy meisie, BIANCA STEYN, was op ’n romantiese wegbreek in Italie. Dit was albei se eerste oorsese reis, en hulle het gereeld hul duisende Instagram-volgelinge op hoogte gehou van al die plekke wat hulle besoek. Hulle was by die Colosseum in Rome en het ook oulike dansvideo’s in die Italiaanse strate geskiet en op TikTok gedeel. Die paartjie het ook in Italie hul derde jaar saam gevier. “Die afgelope paar jaar het my soveel laat groei en soveel meer laat voel as wat ek gedink het moontlik is,” het Dean by ’n Instagram-foto van hulle voor die ikoniese Trevi-fontein in Rome geskryf. “Die lewe is soveel beter saam met jou, en jy laat my uitsien na die res van my lewe. Mag die res van my…

1965 – THE GLORY GUYS James se uitbeelding van Private Anthony Dugan het hom ’n benoeming vir die Golden Globe vir nuwe ster van die jaar besorg. 1972 – THE GODFATHER Santino “Sonny” Corleone was die karakter wat hom sy groot deurbraak gegee het. Hy het die rol in die opvolg van 1974 hervat. JIMMY SE VROUE In 1961 trou het met Dee Jay Mathis; hulle skei in 1966. Hulle het ’n dogter, Tara (in 1964 gebore). James is van September 1990 tot Maart 1994 met Ingrid Hajek getroud; hulle het ’n seun, Alexander James Caan, in 1991 gebore. Hy trou in 1976 met Sheila Ryan, maar hulle skei die volgende jaar. Hul seun, Scott Caan, ook ’n akteur, is in 1976 gebore. Op 7 Oktober 1995 trou hy met…

KLEIN soos sy is, was sy nog altyd mal oor skoene. En al is albei Zayaan Johnson se bene ná ’n ongeluk geamputeer, kan sy vandag weer die vreugde daarvan smaak om ’n nuwe paar skoene aan te pas. Dis nou wel anderste skoene, oftewel “pockets”, soos pa Rashaad Matthews hulle noem. Rashaad was vasbeslote om sy dogtertjie weer te sien loop nadat albei haar bene drie maande gelede vergruis is toe wan’ n verbyganger met sy kar in haar ouerhuis vasgejaag het. Daarom het hy (38) met die slim plan vorendag gekom om self vir Zayaan skoene van swart leer te ontwerp wat sy kan dra oor die stompies waar haar bene bo die knie afgesit is. “Sy werk baie hard, en ek motiveer haar elke dag. Die belangrikste…

As kragvoorsiener gee hy Eskom 3 uit 10. “Hulle is nie volhoubaar nie. Volhoubaarheid het drie pilare: finansieel, operasioneel en omgewingsgewys. Met Eskom is elkeen van daardie pilare gebreek. “Hulle kan byvoorbeeld net 50% van hul skuldverpligtinge diens. Dus moet hulle jaarliks op ’n staatsreddingsboei van omtrent R50 miljard staatmaak. “Operasioneel? Wel, ons het beurtkrag. En omgewingsgewys voldoen geeneen van hul steenkoolkragstasies buiten Kusile aan SA omgewingswette nie,” som hy op. Wie se skuld is dit? Die bestuur van Eskom se hande is grootliks vasgebind, verduidelik Chris. “Die aankoop van nuwe opwekkingskapasiteit berus by die minister van minerale bronne en energie (die omstrede Gwede Mantashe). Daarby kan jy net behoorlike instandhouding doen as jy genoeg reserwe-opwekkingskapasiteit het, maar ons het geen reserwekapasiteit nie. As jy nie speling het om instandhouding…

‘MY EERSTE GEDAGTE WAS: HOEKOM HET HY SO ’N FOTO VAN MY GENEEM?’ DIE bomaanval was net die begin. ’n Halfeeu lank moes sy letsels met haar saamdra, die merke wat in haar vel ingebrand is toe ’n napalmbom op haar grootworddorp in Viëtnam laat val is. Nou het Phan Thi Kim Phuc eindelik die laaste ronde laserbehandeling gekry om haar brandwonde van daardie noodlottige dag in 1972 te genees. “My pyn is soveel beter,” het sy onlangs ná die 12de sessie van ’n reeks behandelings gesê. Kim was maar nege jaar oud toe sy ’n simbool van die Viëtnam-oorlog geword het, als vanweë die ikoniese foto waarop sy kort ná die napalmaanval al huilend en kaal in ’n pad afloop, saam met nog inwoners wat van die verwoesting agter…

Romerige HOENDERPASTEI met PREIE & SAMPIOENE GENOEG VIR 6-8 MENSE / BEREIDING: 30 MIN. / VERKOEL: 2 UUR / GAARMAAK: 2 UUR VULSEL ◗ 125 ml (½ k) sago geweek in 250 ml (1 k) water◗ 15 ml (1 e) olie◗ 15 ml (1 e) botter◗ 400 g gemengde sampioene, in skywe gesny◗ 2 preie, in ringetjies gesny◗ 2 knoffelhuisies, gekap◗ 250 ml (1 k) hoenderaftreksel◗ 250 ml (1 k) rooibostee◗ 1,25 ml (¼ t) elk fyn naeltjies en neutmuskaat◗ 4-6 hoenderborsfilette◗ 15 ml (1 e) meel gemeng met 15 ml (1 e) water◗ 125 ml (½ k) suurroom sout en peper DEEG ◗ 250 ml (1 k) koekmeel ’n knippie sout◗ 125 g koue botter, in blokkies gesny◗ 1 eiergeel AFRONDING ◗ 1 eiergeel gemeng met 15 ml (1…

WENK Materiale en items met tekstuur sluit in hout, marmer, kunspels, wol, fluweel, matte en oorgooidekens, plante, plakpapier en patrone. WENK Meubels en dekoritems met tekstuur voeg kontras by gladde en eenvoudige elemente, wat ’n ruimte meer visueel interessant, knus en afgerond laat lyk. KRY DIT HIER @HOME HOME.CO.ZA 0860-834-834; ALETTA’S HANDMADE 083-571-6325; APLACETOSHOP.CO.ZA 079-351-0551; DECOFURNSA.CO.ZA 087-049-4155; HERTEXHAUS.CO.ZA 021-948-4764; FAITHFUL-TONATURE.CO.ZA 021-785-3268; KLIGHT.CO.ZA 021-552-4370; MRPHOME.COM 0800-212-535; PEP HOME PEPSTORES.COM 0860-737-000; PILGRIMAGESPACES.CO.ZA 082-566-5325; SHEETSTREET.COM 021-552-8607; WOOLWORTHS.CO.ZA; YUPPIECHEF.COM 0861-702-4969 HOEWEL ONS ALLES IN ONS VERMOË DOEN OM KORREKTE PRYSE TE VERSKAF, KAN FOUTE VOORKOM WAARVOOR HUISGENOOT EN DIE VERSKAFFER NIE VERANTWOORDELIK GEHOU KAN WORD NIE.…

DAAR is ’n hele nuwe kategorie geldslimmes wat oral aanlyn opduik – die sogenaamde “finfluencers”. Sommige het natuurlik werklik die kwalifikasies en kundigheid om finansiële advies te gee. Maar ongelukkig word daar ook op YouTube, Instagram en TikTok raad uitgedeel wat allesbehalwe wys of bewese is. Hier is vier wenke om jou die kaf van die koring te help skei. 1. GEWILDHEID BETEKEN NIE IEMAND IS KUNDIG NIE Die persoon kry ’n indrukwekkende getal likes, trek mooi aan en borrel oor van die sjarme. Maar pasop: Dit beteken nie hulle weet regtig waarvan hulle praat nie. Onthou Daar is ’n verskil tussen algemene spaarwenke (soos saamryklubs te midde van kwaai brandstofpryse) en finansiele raad (hoe om jou geld te bele). Eersgenoemde is basies gesonde verstand, maar vir laasgenoemde benodig jy…

Francois en Elandré se liedjie “Maak wakker” is die eerste enkelsnit en musiekvideo van Francois se vierde soloalbum, Kanniedood. Die twee se paaie het die eerste keer op ’n lughawe gekruis. “Dit was net ná Elandré se sukses met ‘Tougher Than the Rest’. Daarna het ons mekaar op feeste gesien. Ek het altyd gedink daar is iets unieks aan hom,” sê Francois. In die musiekvideo speel hulle speurders van die toekoms wat mense wakker maak met die klanke van rock ’n’ roll. Hulle is ’n Suid-Afrikaanse weergawe van Ghostbusters – “spookrokers”. “‘Maak wakker’ is ’n boodskap aan myself om op te staan en aan te gaan ná ’n negatiewe ondervinding,” vertel Francois. Hulle verklap meer: 1 Watter ander lesse het die liedjie julle geleer? Francois: “Ek het baie geleer hoe Elandré…

GROOT BLOKRAAI NO 2 449 As jy vashaak, kan jy gerus ander lesers se raad vra op ons Facebook-blad met die naam Huisgenoot-Blokraaie. WEN ’N BOEK VIR JOU LEWENSVERHAAL PLUS KOM IN AANMERKING VIR DIE MAANDELIKSE TREKKING VAN R1 000. VRAAG: Watter soort vuurwapen is ter sprake? Hierdie week wen een leser Die storie van my lewe, ’n pragtige hardebandboek wat jou help om jou eie lewensverhaal neer te skryf. Op dié manier kan jy jou kosbare herinneringe verewig, uitdruk wie jy as mens is en jou storie vir jou nageslag bewaar. Kort opskrifte sal jou help om jou gedagtes te orden en staaltjies oor belangrike mense en gebeure in jou lewe te onthou. Daar is ook hoofstukke waarin jy langer kan skryf oor verskillende lewensfases. Om dit te bestel, gaan…

1 In watter land het die kruiwa ontstaan? 2 Watter dier is op die Porsche-logo? 3 Watter Suid-Afrikaner het vanjaar en verlede jaar die Grammys aangebied? 4 Wat is die hoofstad van Finland? 5 Watter fietsryer het die Tour de France sewe keer agtereenvolgens gewen, maar is later geskors vir die gebruik van onwettige middels? ANTWOORDE 1 China 2 ’n Perd 3 Trevor Noah 4 Helsinki 5 Lance Armstrong BRONNE THEGUARDIAN.COM, CNBC.COM, SCIENCEALERT.COM, BUSINESSINSIDER.CO. ZA, NETWERK24.COM, EDITION.CNN.COM, BBC.COM, WIKIPEDIA.ORG, EUROPEANA.EU…

DIE dadelpalmboom (Phoenix dactylifera) is een van die oudste bome ter wêreld. Fossielrekords toon dat dadelpalmbome al 50 miljoen jaar gelede floreer het. Die bome is reeds in die vyfde eeu v.C. in Mesopotamië en Egipte gekweek. Dit het ’n stapelvoedsel en hoofbron van welvaart in die besproeibare woestyne van Noord-Afrika en die Midde-Ooste geword. Spaanse sendelinge het die boom in die 18de en 19de eeu na die Nuwe Wêreld gebring. VROULIKE DADELPALMBOOM Gemiddeld 23 m in die boom se natuurlike habitat KAN JY GLO? ! Daar is ’n geskatte 90 miljoen dadelpalmbome in die wêreld en die bome kan meer as 100 jaar oud word. BLOMME Anders as die meeste palmbome het ’n dadelpalmboom net óf manlike óf vroulike blomgroepe. Slegs vroulike blomme lewer vrugte, maar een manlike boom…

HY WAS die superster met die goedvoeltreffers, die pêrelwit tande en sonbruin vel – en die wêreld aan sy voete. Dis hoe George Michael wou hê aanhangers moes hom altyd sien; daarom het hy in 2016 maande lank sy hart en siel geploeg in die beplanning van ’n dokumentêr wat hy gehoop het sou ’n einde aan al die geskinder maak. Met ure se ongesiene beeldmateriaal by sy huis en met George self as die verteller, en onderhoude met vriende soos Elton John, Ricky Gervais en Liam Gallagher, wou hy hê dit moes die bepalende verhaal wees van ’n ongelooflike loopbaan wat hom een van die grootste sterre op aarde gemaak het. Ongelukkig het hy nooit kans gekry om die fliek klaar te maak nie, want die 53-jarige is op…

HY LEK sy lippe, swaai sy heupe en verwyder verleidelik al sy kledingstukke. Die gehoor is in ekstase. Die plaaslike danser Kalon Badenhorst se eksotiese danspassies het verhoë oral ter wêreld aan die brand terwyl hy die hoofkarakter in die Magic Mike Live-vertonings speel. Hoe het dit gebeur dat ’n ou van Randburg Channing Tatum se jeans volstaan? “Twee tasse en ’n droom,” vertel Kalon. Die 24-jarige uitvoerende kunstenaar moes homself knyp toe hy oorkant die Amerikaanse akteur sit wat die Magic Mike-rolprente en vertonings geskep het. “Dit was wonderlik om Channing te ontmoet,” sê Kalon. “Hy is langer as wat ek verwag het. Hy is net ’n aangename, opregte, gewone ou wat dit reggekry het om wonderlike dinge te doen.” Kalon is by die huis vir ’n kort blaaskans…

ELON MUSK kan maar net nie uit die nuus bly nie. Kort nadat sy romanse met die Australiese aktrise Natasha Bassett (30) bekend geword het, het die miljardêr se liefdeslewe wéér die hoofopskrifte gehaal. Nou moes die wêreld uitvind dat Elon (51) in die geheim in November verlede jaar ’n tweeling by een van sy uitvoerende beamptes, SHIVON ZILIS (36), gehad het – ’n maand voor die geboorte van sy dogter by sy eksmeisie Grimes (34). Die uitvoerende hoof van Tesla het skynbaar die nuus bevestig deur te twiet: “Doen my bes om die onderbevolkingskrisis te help verlig. ’n Geboortekoers wat ineenstort, is verreweg die grootste gevaar wat deur die beskawing in die gesig gestaar word.” Elon is die pa van die tweeling Vivian en Griffin (18) en drieling Damian,…

SO val die helde … Die akteur Armie Hammer (35), wat onlangs uit Hollywood weg is, het blykbaar ’n nuwe pos as ’n tyddeelverkoper in die Caymaneilande gekry. Die Call Me by Your Name-ster is verlede jaar uit verskeie Hollywood-projekte geskop nadat bewerings van sielkundige mishandeling en verkragting teen hom gemaak is. Hy het sedertdien teruggetrek Caymaneilande toe, waar hy grootgeword het. En as die gerugte waar is, het hy nou ’n nuwe werk in die tropiese paradys. Die “loopbaanskuif” kom nadat Armie verlede maand by die Morritt’s-oord se kantoor opgemerk is. Hy het ’n blou polohemp aangehad en saam met potensiële kopers deur die pryse van ’n eenheid gegaan. Die uitrusting was soortgelyk aan dié wat ander hotelpersoneel dra. Bespiegelinge oor sy nuwe werk het vroeër vandeesweek op sosiale…