Innehållsförteckning för 13 March 2025 från Huisgenoot

1 ‘HERE, RED DAREM NET VIR MY EEN’ Martin en Yolandé Smit se seuntjies, Ayden en Ryan, asook hul niggie, Leané van Papendorp, is in ’n karongeluk dood. Klein Tennique Joubert is erg beseer My innige meege voel. Dis net trane, want ek weet hoe dit voel om ’n kind te verloor. Wat nog te sê twee! Mag Jesus julle styf vashou en vertroos. Treur met gospelmusiek. God vee die trane af en versterk mens. CHRISTINE So bitter jammer vir julle as ouers. Hoe tel mens jou stukkende hart op en gaan aan met die lewe? Net ons Vader kan julle as ouers hierdeur dra. Hoop daar is ’n sterk steunnetwerk vir julle. My hart gaan uit na julle. HESTER Ag, my hart breek vir albei ouerpare! Dis so ontsettend hartseer dat…

DIT het as iets onbenulligs begin: ’n rooierigheid in sy linkerogie, aan die begin só klein, dit was amper onsigbaar. Haar seuntjie was teen daardie tyd al 16 maande oud en sy het geen rede gesien om haar te veel te bekommer nie, onthou Michelle Saaiman vandag. Klein Juwan (vandag 2) was immers haar derde kind – sy het met albei haar vorige kinders geleer om nie op hol te gaan oor elke kwaal nie. “Kinders word mos maar siek, maar om oor álles angstig te raak help eintlik niks nie,” sê Michelle. “Mens vra jouself: Wat is die ergste wat kan gebeur? Die antwoord is iets erg – báie erg.” Die voorval was in Augustus laas jaar, sê Michelle, en sy en haar man, Neels, het klein Juwan tog…

DIE meeste vreemde geluide wat jou liggaam maak, is heeltemal normaal – al is dit soms ’n bietjie van ’n verleentheid. Maar soms is hierdie kraak-, piep-en gorrelgeluide ’n waarskuwingsteken. Moet jy bekommerd wees of nie? Lees hier. FLUITENDE NEUSGATE Temperatuur-en humiditeitsveranderinge kan jou neus snags ekstra musikaal laat klink. Dit is selde iets om oor bekommerd te wees, maar dit kan wees as gevolg van neuspoliepe wat die neusgange voer, sê die Britse kenner dr. Sarah Jenkins. Gebruik ’n neussproei vir verkoues of ’n antihistamien vir allergieë om dit skoon te maak. Wanneer om hulp te kry: As jy ’n neusbesering gehad het, kan ’n gefluit op ’n skeur in die kraakbeen dui. Gaan sien ’n oor-neus-enkeelspesialis. WINDE OPBREEK Lug en oortollige gas kan soms onder die diafragma vasgevang…

Miles Teller en Anya Taylor-Joy speel ’n paar elite-skerpskutters wat aan weerskante van ’n enorme kloof geplaas word met die opdrag dat hulle absoluut niks uit die kloof mag laat ontsnap nie. Ten spyte van ’n bevel dat hulle nie mag kommunikeer nie, vorm die twee tog ’n band met mekaar so oor die kloof heen, net om dan saam ’n wêreldbedreigende gruwel te moet trotseer wat uit die duisternis opduik. Die regisseur is Scott Derrickson, wat ook verantwoordelik was vir flieks soos Doctor Strange en die gruwelprente The Black Phone en Sinister. “Ek dink die twee kragtigste emosies in die wêreld is die gevoel van verlief raak en die gevoel van werklike vrees,” het hy aan Empire gesê. “Ek dink my voorliefde vir gruwelprente spruit uit my kinderjare toe…

Waar kom jou liefde vir musiek vandaan? Dit kom van my familie. Dis in ons DNS. Albei kante van my familie is supermusikaal, en my grootouers aan albei kante het in musiekgroepe gespeel. Aan die een kant was my ouma ’n sangeres, en my ouma aan die ander kant was ’n talentvolle orrelspeler. My pa het ook ’n groot rol in my liefde vir musiek gespeel. Hy het my voorgestel aan die musiek waarmee hy grootgeword het, wat beteken dat ons huis altyd vol musiek was. Hy het my ook gedwing om as kind kitaar te leer speel (dankie, Pa!) en toe het my kitaaronderwyser my aangehits om te sing. Dit het eindelik gelei tot ek wat my eie liedjies skryf. Wou jy altyd ’n liedjieskrywer word? Dit was nie…

GROOT BLOKRAAI No 2587 KOMPETISIEVRAAG Watter soort winkel is ter sprake? As jy vashaak, kan jy gerus ander lesers se raad vra op ons Facebookblad met die naam Huisgenoot-Blokraaie. WEN ’N BOEK VAN LUX VERBI PLUS KOM IN AANMERKING VIR DIE MAANDELIKSE TREKKING VAN R1 000. Hierdie week wen een leser Nogtans-geloof deur Ivor Swartz (Lux Verbi, R280). Hoe bly ’n mens aan God vashou terwyl jou en ander se ervarings nie hoop weerspieël nie? Ivor Swartz, jeugpredikant van Pretoria, lei lesers om aan die hand van Habakuk 3:17-18 te vra hoe ’n nogtans-geloof-gebedslewe lyk. Hoe praat en leef jy voor ander met ’n nogtans-geloof? En hoe bly jy geanker in God, eerder as die uitkoms? Ivor leer ’n mens om ’n nogtans-geloof-uitkyk te hê deur die volgende keuses te maak: Kies…

’n Kajakvaarder van Chili het hom flou geskrik toe hy onlangs skielik in ’n boggelrugwalvis se tamaai bek beland het. Maar sou dié spesie hom heelpad kon insluk sodat hy hom á la Jona van die Bybel in ’n walvis se maag bevind? Adrian Simancas het nog lekker in die Magellaan-seestraat geroei toe ’n hengse impak hom skielik van onder en agter tref. Toe hy hom weer kom kry, het die walvis hom verswelg. Gelukkig het boggelrugwalvisse – tot 19 m en 40 ton en wat sowat 1,3 ton kos daagliks verorber – g’n smaak vir mense nie. So vinnig as wat die bultrug Adrian opgeslurp het, het hy hom dus weer uitgespoeg. Nietemin het die kajakker gedink dis neusie verby, dat die walvis hom klaar geëet en ingesluk het.…

Op hierdie dag het Mohandas Gandhi, leier van die Indiese onafhanklikheidsbeweging, die Soutmars begin, ’n niegewelddadige protes teen Britse oorheersing. Dit was die eerste stap in sy groter veldtog van burgerlike ongehoorsaamheid bekend as satyagraha (“waarheidskrag”) in Indië. Soutproduksie en -verspreiding in Indië was vir lank ’n baie winsgewende monopolie van die Britse koloniale heersers. Deur hul wetgewing is die Indiese bevolking verbied om sout onafhanklik te produseer of te verkoop. In die Soutmars het Gandhi en sy volgelinge honderde kilometers vanaf sy Sabarmati-geloofstoevlug tot by die kusdorpie Dandi geloop, waar hulle hande vol sout opgetel en dus tegnies sout “geproduseer” het, uit verset teen die Britse wette. Die burgerlike ongehoorsaamheid het uitgekring en duisende is in hegtenis geneem, insluitend hyself. Sy aanhouding het nog derduisende aangespoor om by die…

HULLE noem dit ’n vloek: die Oscar-vloek. Iemand wen die grootste prys in Hollywood en ry dan vir ’n rukkie die golf voor hulle uitsak en selfs verdwyn. Dit het gelyk asof dit met Adrien Brody gebeur het. In 2003 was hy die jongste mens in die geskiedenis wat die Oscar vir beste akteur gewen het. Hy het destyds groot name soos Jack Nicholson, Nicolas Cage, Daniel Day-Lewis en Michael Caine uitgestof. Op 29 was hy Hollywood se nuwe liefling, maar toe kry hy skielik nie meer hoofrolle nie. Ja, hy het die een fliek ná die ander gemaak, maar dit was asof Adrien gesukkel het om ’n rol te kry wat hom perfek pas. En toe kom The Brutalist oor sy pad. Die fliek word as sy groot terugkeer…

’N FEES BY DIE FIËSTAS! AS JY beplan om ’n soirée so reg uit die boeke te hou, is die eerste wegspringplek waarskynlik ’n plek wat jou gaste se asem wegslaan – dis tog die beginpunt vir enige goeie partytjie. Vra maar die outjies by die Fiëstas, hulle weet. Dié gesogte prysaand is vanjaar in die betowerende Kirstenbosch Nasionale Botaniese Tuin aan die voet van Tafelberg gehou, en kom ons sê maar net dít: Dit was toe ’n partytjie om te onthou. Die Fiëstas vereer jaarliks debuutproduksies by die land se sewe groot kunstefeeste – die Klein Karoo Nasionale Kunstefees, die Suidoosterfees, Innibos, die Vrystaat Kunstefees, Klein Karoo Klassique, Momentum Beleggings Aardklop en die Toyota Stellenbosch Woordfees. Dis ’n uithangplek vir die who’s who van die teaterwêreld en ’n geleentheid…

Wie is ons baas by Huisgenoot? Common sense sê dis Yvonne Beyers. ’n Oomblik se nadenke laat jou vermoed dis ’n trick question. Bedoel ek die skrywers? Wag. Koos Bekker? Die aandeelhouers? Ja. Daardie antwoorde is almal korrek, en vir die rekord wil ek dit asseblief stel dat ek nooit anders sou suggereer nie. Maar die regger antwoord is: Dis jy. Ons leser. Ons maak Huisgenoot vir mense wat bereid is om waardevolle geld te betaal vir goeie, boeiende, vermaaklike, leersame leesstof. Ons skryf vir lesers. Ons is gereeld bang dat ons stories nie hul teiken sal tref nie. Maar die doring in ons vrees is die lekker sekerheid dat ons lesers nie net lesers is nie, maar ook TV-kykers, musiekluisteraars, drawwers, Camino-stappers, duikers, vlieëniers, onderwysers, TikTokkers en dosente. Groot…

Wanneer en waar was jy op jou gelukkigste? Toe ek 21 was, besig om alleen te hardloop op ons plaas in Zimbabwe in die reën. Ek het soveel vryheid en dankbaarheid in daardie oomblik gevoel. Wat kan jy nie verduur nie? Vieslikheid, asprisheid, afpersing en kerrie. Wat is jou diepste put van ellende? Mense vir wie ek lief is wat swaarkry en dit nie met my deel nie. Ek hoop mense kan my genoeg vertrou om hulle swaar met my te deel. Ek kan dalk nie help nie, maar ek kan altyd luister. Wie of wat sou jy in jou volgende lewe wou wees? Ag, my oppervlakkige antwoord sal seker wees ’n Victoria’s Secret-model. Maar ek dink ek sou ook ’n goeie sielkundige gewees het. Wie sou jy die graagste…

MASCARPONE-TERT met ASPERSIE en GRASUIE GENOEG VIR 6-8 MENSE / BEREIDING EN GAARMAAK: 30 MIN. ◗ 600 g vars aspersies◗ 500 ml (2 k) mascarpone◗ 125 ml (½ k) fyngekapte grasuie◗ 250 ml (1 k) gerasperde gruyèrekaas◗ 250 ml (1 k) gerasperde parmesaankaas◗ 15 ml (1 e) dijonmosterd◗ 4 knoffelhuisies, fyngekap◗ sout en gekraakte swartpeperkorrels na smaak◗ 500 g bevrore skilferkorsdeeg, ontdooi◗ 1 eier, geklits met ’n bietjie water VIR VOORSIT ◗ ekstrasuiwer olyfolie, gekapte vars platblaarpietersielie en gerasperde suurlemoenskil Voorverhit die oond tot 200 °C. Voer ’n bakplaat met bakpapier uit en hou eenkant. 1 Skil die onderkante van die aspersies. Blansjeer die aspersies 3 min. in ’n kastrol kokende soutwater. Dompel dit daarna dadelik direk uit die kookwater in ’n bak met ys om weer ’n vars groen…

EERS was sigarette die ewige euwel waarvan mense ontslae moes raak. Deesdae is dit vaping. En al word so dikwels gesê dis minder skadelik as sigarette, beteken dit steeds nie dis veilig nie. Wil jy ophou vape? Hier’s vir jou ’n strategie. 1 NEEM DIE BESLUIT OM OP TE HOU Dit is belangrik om jou “hoekom” te verstaan, sê die verslawingspesialis Gert Moolman. Jy het dalk al baie daaraan gedink, maar jou nooit regtig daartoe verbind nie. Dink na oor waarom jy wil ophou en skryf jou redes neer. Pleks daarvan om dit te sien as iets om prys te gee, kyk eerder daarna as iets wat voordelig is vir jou gesondheid. 2 KIES ’N DATUM OM OP TE HOU Kies ’n spesifieke dag om heeltemal op te hou, verkieslik binne die…

VISSE 19 FEBRUARIE – 20 MAART As jy ’n Vis is wat geneig is om te droom, sukkel jy dalk soms om op take te fokus. Vandeesweek sal uitdagend wees, veral wat geldsake betref. Jy kan nie net saamstem met alles wat oor jou pad kom of nie verantwoordelikheid aanvaar nie. Onder die volmaan op die 14de kan dinge tussen jou en ’n geliefde op ’n spits gedryf word. Maak seker jy stryk dinge uit. RAM 21 MRT – 19 APR Asof dit nie genoeg is dat die liefdesplaneet, Venus, agteruitbeweeg in jou teken nie, beweeg Mercurius ook agteruit. Dis ’n goeie toets vir jou, wat maklik ongeduldig en geïrriteerd raak. Haal diep asem en tel tot tien – dit sal help om jou bloeddruk te laat daal. Dis tyd…

“Ek kon só identifiseer met die aanpassing waaroor Zirk skryf. Jy is absoluut ontwortel. Jy is op ’n stuk sement geplaas en gesê, groei! En ook hoe die kinders vir André le Roux ’n boodskap stuur en sê, Oom, stuur ’n sak vol geld, ons is arm.” KARLIEN SAAYMAN, bestuurder van Huis Stilbaai op dié kusdorpie in die Hessequa, en haar man, Lomie, het 18 jaar in Engeland gewoon. “Jy weet nie of jy kom of gaan nie. Jy is absoluut ontredderd. Jy wil daar wees. Jou verstand het jou tot daar gebring. Maar jou hart is nog nie daar nie. Mense wat nie self hierdeur is nie, het nie ’n idee wat jy beleef nie. Ja, jy wou gaan. So baie mense sê, jy wou mos. Maar niks kan…

DIT was ’n lang gesprek aan tafel. Die hele gesin het deelgeneem. Soms was iemand heftig. Soms was iemand snaaks. Soms het mense met mekaar gestry en soms het almal in samestemming geknik. Ons het gepraat oor THE DAY OF THE JACKAL. Die reeks was nog net halfpad uitgesaai. Elke Maandagaand het ons reggeskuif voor die televisie vir die nuutste episode. Ons het maar op ons tande gekners in die advertensies, want wie wil nou wag tot Dinsdagaand om te weet wat volgende gaan gebeur? Ons as gesin was lanklaas so tydgebonde aan ’n reeks. Almal weet al: Maandagaande om agt is jy onbereikbaar, jou foon op silent, jou etes geëet en jou huiswerk gedoen. Wanneer die episode verby is, blaas almal asem uit: Wie gaan eerste praat? Wie gaan…

1 Wat is die naam van die tradisionele Japannese kleed, met wye moue en ’n band wat om die middel vasgemaak word? 2 Watter land het die vorm van ’n stewel? 3 Wie was die omstrede laaste koningin van Frankryk wat blykbaar gesê het mense moet koek eet as hulle nie brood het nie? 4 Wat is die langste rivier in Amerika? 5 Wat is die naam van die beer in Jungle Book? ANTWOORDE 1 Kimono  2 Italië 3 Marie Antoinette 4 Missouri 5 Baloo BRONNE: ALEF.AERO, NASA.GOV, BBC, NPR.ORG, THEGUARDIAN.COM, BRITANNICA.COM, NEWSCIENTIST.COM, CNN, TANDFONLINE.COM, DOGONEWS.COM, SMITHSONIANMAG.COM, GUINNESSWORLDRECORDS.COM, YOUTUBE…

NOOIT voorheen was daar so ’n TV-kome-diereeks nie.  M*A*S*H, wat in ’n Amerikaanse veldhospitaal tydens die Koreaanse oorlog afspeel, het al die bloed en gruwels van konflik aan kykers opgedis. Die hoofkarakters – chirurge en verpleegsters in uniform – het eindeloos geswoeg om jong lewens te red. Soms het hulle misluk en dan die trauma met humor en emmers drank onderdruk. Vir elf jaar, van 1972 tot 1983, het die woep-woep-woep van helikopters vol gewondes nog ’n episode vol lag en trane ingelui. Die slotepisode van M*A*S*H is deur 106 miljoen mense gekyk. Dis steeds ’n rekord. Heelwat is al geskryf oor waarom M*A*S*H kykers so aangegryp het. Een groot rede is die enorme invloed van Alan Alda, wat die aweregse chirurg Hawkeye Pierce gespeel het. Hy was die enigste…

TEEN hulle yskas is ’n lysie geplak wat hulle tweeling se lewe tot op die halfuur – soms selfs tot op die kwartier – beplan. Teen sesuur opstaan met ’n bottel, dan halfagt eet, negeuur ’n slapie. Om kwart voor drie volg die volgende slapie, en dis klokslag kwart oor ses tyd vir bad. Die lysie dek alles. Hoe laat die babas bottel drink, eet, gaan slaap, wakker word. Ook hoeveel milliliter melk hulle met elke bottel kry. Daar’s boonop op die toonbank ’n boek wat rekord hou van elke dag se dinge. Ook tot op die uur en die milliliter uitgewerk. Mens wonder so by jouself: Hoe agtermekaar is hierdie mense? Maar stap jy by die eetkamer in, sien jy ’n toneel wat lyk asof die einste mense nog…

BEGEERLIKE BLOESE HEMELSE HEMDE KRY DIT HIER BASH.COM; EXACT 0860-834-834; FOSCHINI 0860-834-834; JET 0860-834-834; PEP 0860-737-000; POETRY 0860-333-329; SUPERBALIST.COM; TRUWORTHS 021-460-2300; WOOLWORTHS 0860-022-002; ZARA.COM HOEWEL ONS ALLES IN ONS VERMOË DOEN OM KORREKTE PRYSE TE VERSKAF, KAN FOUTE VOORKOM WAARVOOR HUISGENOOT EN DIE VERSKAFFERS NIE VERANTWOORDELIK GEHOU KAN WORD NIE.…

Skryf gerus vir my oor jou sake van die hart of moeilike persoonlike kwessies. Ek beantwoord hier vrae en briewe van lesers en gee graag raad. Ek sal nie jou naam bekendmaak nie en jou identiteit bly vertroulik. Stuur jou e-pos aan Vra vir Irma na vravirirma@gmail.com of SMS Vra vir Irma gevolg deur jou vraag na 36489. MY MAN VERKIES DIE TV AS KAMERMAAT V My man raak aand ná aand voor die TV aan die slaap en bly sommer heelnag daar. Wanneer hy wel die aand saam met my bed toe gaan, is dit net om een rede: seks. Wanneer dit verby is, staan hy doodluiters op en gaan lê weer voor die televisie. Ek voel verneder en gebruik. A Enige vrou in dieselfde bootjie sal ook so…

1 JONGSTE SALDO VS. BESKIK-BARE SALDO ➧ Jou jongste saldo is enige uitstaande magtigings wat nog van jou rekening gedebiteer moet word. ➧ Die beskikbare saldo (oftewel balans) is die bedrag wat oor is vir jou om te bestee. 2 UITSTAANDE MAGTIGINGS Dis transaksies wat gereserveer maar nog nie betaal is nie. Of wat nog gekrediteer moet word, soos deposito’s of inkopies by ’n kleinhandelaar. 3 EINDSALDO VS. OPENINGSALDO Die eindsaldo is jou balans aan die einde van die staattydperk. Die eindsaldo van die vorige staat word die openingsaldo op jou jongste staat. As jy dus krediet van R500 gehad het op die laaste staatdatum, sal jou openingsaldo dan ook R500 wees. 4 KONTANT-TRANSAKSIES Sommige transaksies word as kontant beskou al betaal jy nie met fisiese geld nie. Voorbeelde is onttrekkings, EFT’s, rekeningbetalings uit…

’NORANJE gloed verlig die weste. Vreemd, dink die seun toe hy in die tuin wakker skrik. Die feniks se hand vol sterre in die hemel vertel hom die môre behoort nog ’n paar uur weg te wees. Hy staan op en ruik aan die lug: ’n veldbrand. Hy kruip uit sy blyplek by die eendedam hardloop na die groot ou eikeboom wat in die hart van die tuin troon. Sy vingers klou aan die klowe en krake van die boombas soos hy klim. Hy smeek die groot ou eikeboom om die diere van die tuin te waarsku. Hulle moet padgee voor die brand kom. My kind, sê die groot ou eikeboom terwyl hy sy takke met ’n ritsel en ’n rek wakker skud, amper asof ’n bries sy blare in…

MUSIEK Lizzo is terug! Die sangeres LIZZO het aangekondig sy is terug met nuwe musiek. “Ek het die afgelope twee jaar aan musiek gewerk, my tyd gevat en dit reg gedoen. Die nuwe era begin vandag. Nuwe musiek of nuwe album? Dis een en dieselfde, skat.” Sy het ook haar laaste album, 2022 se Special, gegroet deur ’n video te deel waar sy in rooi verf “Bye Bitch” oor die albumomslag spuit. Die 36-jarige het die afgelope jaar ’n bietjie uit die kollig gebly nadat sy haar vormdraghandelsnaam, Yitty, ontwikkel het en met regsprobleme gekonfronteer is toe van haar voormalige dansers haar gedagvaar het vir teistering en die skep van ’n vyandige werkomgewing. In haar eie woorde was sy die afgelope ruk baie besig, maar ook baie opgewonde oor die…

REEKSE JERRY SPRINGER: FIGHTS, CAMERA, ACTION “Jerry! Jerry! Jerry!” Dis woorde wat jy nie net lees nie, maar wat in jou kop geskree word wanneer jy dit sien. Dan sien jy ook hoe die skare in Jerry Springer se geselsprogram op hulle voete spring terwyl hulle hande gelig en vuiste gebal die aanbieder toejuig. Hierdie minireeks van twee episodes lig die sluier oor Jerry se agtergrond – kan jy dink hy was eens ’n ernstige politieke joernalis? Maar dit delf ook dieper en kyk na die ontstaan van die gewilde gespreksprogram wat gereeld in vuisgevegte ontaard het. Daar is baie mense wat ook glo die program het mense se lewens verwoes. Ongeag die inhoud – gaste wat by hulle tannie geslaap het of iemand wat met ’n perd getrou het…

TEKORT Party mense se brein is mos soos ons tronkstelsel – nie naastenby genoeg selle nie. San Marchand HUWELIKSRAAD Daar is een ding wat jy oor vrouvat moet verstaan: Voor die troue sweef hulle tussen die wolke, die dag daarna sit sy haar voet neer. Louise Noeth WIL NIE INRUIL Die vierjarige Sooisie is baie lief vir sy tweejarige boetie. Eendag kom Mamma opgewonde by die huis: “Ek het goeie nuus, jy gaan ’n nuwe bababoetie of -sussie kry!” Net daar vra Sooisie: “Agge nee, Mamma, kan ons nie maar die ou ene hou nie?” Anton, Belville BIBBERSAKE Wat het alle banke en kaalnaelers in Ysland in gemeen? Gevriesde bates! San Marchand EKONOMIESE KLAS Gladde Gawie vra vir die vrou in die vliegtuigsitplek langs hom: “Het die lugredery jou ekstra…

SYFERSTORIES 6 600 km Zara Lachlan (21) van Brittanje het dié afstand voltooi en die eerste vrou en jongste mens geword wat solo, sonder ondersteuning, van Europa oor die Atlantiese Oseaan tot by Suid-Amerika roei. Sy’t einde Oktober in Portugal weggetrek en ná 98 dae in Frans-Guiana geëindig. Ondanks slegte weer, ’n omgeslaande boot, gebreekte toerusting en beserings insluitend ’n gebreekte vinger, het sy vasgebyt agter haar spane, tot 21 uur per dag. 8 882 Soveel verskillende bakstene het Clem Reinke (87) van Oklahoma die wêreldrekord vir die grootste baksteenversameling besorg. Sy “ongewone” stokperdjie kom 40 jaar ver en sy stene van dwarsoor Amerika, asook Duitsland, Griekeland, Ierland en Nieu-Seeland. Sommige dateer van duisende jare gelede, soos ’n Romeinse baksteen van 100 n.C. Sy dogter het hom verras deur stilletjies…