Innehållsförteckning för 27-Jul-18 från Landbouweekblad

’N NUWE boek, Death and Taxes, deur Johann van Loggerenberg (wat aan die hoof van die Suid-Afrikaanse Inkomstediens se ondersoek na die tabakbedryf gestaan het voor hy uitgeskop is deur Tom Moyane) onthul dat die Tabakinstituut van Suid-Afrika (Tisa) se nuutste veldtog teen tabak-sluikhandel maar ’n skynheilige oefening is. Vernaam klink mnr. Francois van der Merwe, voorsitter van Tisa, se verontwaardiging oor tabakmaatskappye se versuim om belasting te betaal, maar hol in die lig van die misdadige gedrag waarby dié bedryfsliggaam vir Groot Tabak in Suid-Afrika bygesleep word deur sy invloedrykste lid, British American Tobacco (BAT). Die bedryf het onder meer ’n prokureur betaal om op sy opponente te “spioeneer”. Deurslaggewend is dat BAT en Tisa ook in hierdie twyfelagtige gedrag geïmpliseer is. Tog het hulle terselfdertyd saam met die…

MPO ‘MOET SOOS GRAAN SA WORD’ Dit was op 28 Junie baie interessant om mnr. Jannie de Villiers van Graan SA op RSG te hoor. Ek het nog nie so ’n optimistiese hoof van ’n bedryfsorganisasie gehoor nie. Hulle het raad vir die groot mielie-oes. Nuwe markte is gevind en die mielies moet dus net uitgevoer word. Die volgende oggend het hy oor die telefoon laat blyk dat die vraag na graan oor die volgende tien jaar sal toeneem, maar dat die prys rondom die huidige vlakke sal bly. Graan SA is betrokke by die ontwikkeling van kultivars met ’n beter opbrengs. Die graanboere se organisasie is dus daar vir hulle. Dit laat my weer na die melkbedryf kyk. Hoekom gaan dit nie goed met ons nie? Die eerste rede…

In die berig “Megaweek gaan voort ondanks likwidasie” (LBW, 6 Julie 2018, bl. 22) word verkeerdelik verwys na mnr. Orton King as die uitvoerende direkteur van Agri Mega. King is die uitvoerende direkteur van die Mega Groep van Ondernemings (MGC). Die Megaweek word vanjaar van 12 tot 15 September aangebied en nie van 12 tot 14 September soos berig nie. Landbouweekblad korrigeer graag onjuisthede in artikels en nuusberigte. Stuur inligting oor regstellings so gou moontlik ná die publikasiedatum en verkieslik skriftelik aan Jan Bosman, Landbouweekblad, Posbus 1802, Kaapstad 8000; e-pos: jan.bosman@landbou.com; faks 021 406 2940; tel. 021 406 3183.…

PRES. CYRIL RAMAPHOSA moet nou besluit oor die lot van die geskorste direkteur-generaal van die Departement van Landbou, Bosbou en Visserye. Dit was mnr. Senzeni Zokwana, Minister van Landbou, Bosbou en Visserye, se standpunt op ’n mediakonferensie in Kempton Park oor die woelinge in sy departement sedert hy mnr. Mike Mlengana sowat ’n maand gelede van sy magte gestroop het. Zokwana het ontken daar is ’n bestuursvakuum in sy departement sedert dié nuutste optrede teen Mlengana. Hy sê die Hooggeregshof in Pretoria het dit vroeër duidelik gemaak dat die magte om ’n rekenpligtige amptenaar te skors of te dissiplineer by die President berus. “Daarom word die kwessie nou deur die President gehanteer en ons kan nie verder daaroor kommentaar lewer tot dit afgehandel is nie.” Sy stelling kom teen die…

Ten spyte van ’n wisselvallige groeityd is die span van Meycor-boerdery dankbaar om steeds bogemiddelde oeste en uitsonderlike sonneblomme te kan oes. Me. Mardine Meyer van die plaas Leeufontein in die distrik Hartebeesfontein sê terwyl hulle verlede naweek besig was om te oes, het haar skoonpa, mnr. Johan Meyer (sr.), op ’n sonneblom afgekom wat 4 m hoog staan. “Dit is die eerste keer dat ons so ’n hoë sonneblom op die plaas teëkom,” sê sy. Drie geslagte Meyers boer al 45 jaar lank op die plaas. “Ons het ’n baie moeilike planttyd gehad met baie wisselvallige reën, maar steeds haal ons bogemiddelde sonneblomen mielie-oeste af. Ons is baie dankbaar daaroor,” sê Meyer.…

VYF van die agt weermodelle wat die Australiese buro vir meteorologie gebruik vir sy verslae oor die Enso (El Niño Suidelike Ossillasie)-indeks, dui aan dat ’n El Niño-verskynsel teen die lente in die Suidelike Halfrond kan voorkom. Die Enso-indeks dui die stand van ’n La Niña- en El Niño-verskynsel aan. Luidens die nuutste verslag deur die buro is die aanduiders van die indeks tans neutraal, maar daar is op langer termyn ’n algemene neiging na El Niño. Volgens die buro dui weermodelle aan dat seevlaktemperature in die ewenaarstreke van die Stille Oseaan ongeveer 0,5 °C grade warmer as gewoonlik is. Die oostropiese Stille Oseaan is ook warmer as gewoonlik. Atmosferiese aanduiders is tans nog neutraal, maar die suidelike ossilasie-indeks is sedert middel Junie negatief. Die meeste internasionale klimaatmodelle wat deur…

DIE Trust vir Bedreigde Dierelewe (EWT) sê me. Edna Molewa, Minister van Omgewingsake, het kortpad gevat deur die toelaatbare uitvoer van leeubene te verdubbel tot 1 500 volledige skelette sonder om ’n behoorlike open-bare deelnameproses te volg. Molewa se besluit volg op die bevindings van die wetenskaplike gesag van die Departement van Omgewingsake. In die Staatskoerant van 25 Januarie sê Molewa hoewel die Afrika-leeu op bylaag 2 van die konvensie oor internasionale handel in bedreigde spesies (Cites) se lys is, wys navorsing dit is nie nadelig vir die diersoort as lewende leeus of liggaamsdele van leeus, soos bene en velle, uitgevoer word nie. Dr. Kelly Marnewick van die EWT sê egter in ’n verklaring sedert die aanvanklike kwota van 800 skelette per jaar verlede jaar ingestel is, is 31 leeus…

‘Onsinnig en gevaarlik’ Prof. Danie Brand meen die huidige rigting wat die debat oor grondhervorming inslaan, verwater die hele kwessie tot een vraag: Of die Grondwet verander moet word om die onteiening van eiendom sonder vergoeding moontlik te maak. “Om dié vraag te vra, is nie net onsin nie, maar dit is gevaarlik. Dit bedek eintlik die werklike probleem van grondbesit in Suid-Afrika. “Die Grondwet laat wél onteiening sonder vergoeding op verskeie maniere toe.” Brand sê ook dit beteken iemand oefen steeds absolute beheer oor grondbesit uit: óf ’n private eienaar óf die staat, ten koste van ander mense wat die grond ook moet gebruik. Volgens prof. Peter Delius van die Universiteit van die Witwatersrand neem die grondhervormingsproses krisisafmetings aan, want onafgehandelde grondeise wat van 1994 tot 1998 ingedien is,…

’N REEKS werksessies om verteenwoordigers van die vernaamste vakbonde in die landbou, onder meer die Food and Allied Workers’ Union (Fawu), die Agricultural, Food, Fishing and Retail Industry Workers Union (Afriwu) en die United Workers Front, op te lei, het op 13 Julie op Wellington in die Wes-Kaap begin. Die sessies is op versoek van die Skandinawiese wyn-monopolie begin. Dit is daarop gemik om vakbondleiers te help om die aard en vereistes van moniteringstelsels, asook die voordeel wat plaaswerkers uit sulke stelsels kan kry, beter te help verstaan, sê me. Marthane Swart van die konsultante-agentskap Kruger, Swart en Vennote. Sy lei die werksessies saam met mnr. Mzukisi Mooi van die sentrum vir landelike regstudies. “Die sessies is ’n bewusmakingsveldtog, asook om dialoog met Suid-Afrikaanse vakbonde moontlik te maak. Ons wil…

Vyf ton sojabone per hektaar is ’n droom wat mnr. Clayton Butler van Calcrete Trust al die afgelope vyf jaar lank nagestreef het. Dit is nagejaag met vasberadenheid, uithouvermoë en ’n benadering van aanhouer wen. Butler plant al die afgelope vyf jaar mielie- en sojaboonkultivarproewe vir Pannar om die regte kultivars vir dié besproeiingstreek te identifiseer. Vir Butler moet die regte kultivar aan verskeie vereistes voldoen. ’n Hoë genetiese opbrengspotensiaal moet in die kultivar opgesluit wees. Die beste agronomiese eienskappe is ook nie te versmaai nie, soos ’n goeie staanvermoë. Die pitte moenie op die land agterbly nie. Die onderste node moet dus lank genoeg wees sodat die stropertafel die plante onder die onderste peule kan afstroop. Die oopspring van peule kan ook ’n probleem wees. Hoe laer die gevaar…

’n Britse verpakkingsmaatskappy wat die enigste ter wêreld is wat isoleermateriaal van skaapwol kommersieel vervaardig, is onlangs deur koningin Elizabeth II vir vernuwing bekroon. Woolcool, wat in 2009 gestig is, gebruik wol as plaasvervanger vir polistireen, jelverpakkings en ander nie-herwinbare isoleermateriaal vir die vervoer van temperatuurgevoelige produkte in die voedsel- en farmaseutiese bedryf. Die verpakking bestaan uit 100% vervilte skaapwol (’n neweproduk van die skeerproses) wat gewas, geskuur en geseël word in ’n geperforeerde politeen-omhulsel. Die wol is hernubaar en bioafbreekbaar, en stel nitrate in die grond vry tydens kompostering. Dit kan ook op verskeie maniere hergebruik word, waaronder isolasie vir die huis, motor of vir troeteldierbeddens. Me. Josie Morris, besturende direkteur van Woolcool, sê: “Buiten dat Woolcool aflewerings van verkoelde of bevrore voedselprodukte teen die regte en veilige temperatuur…

Die uitmergelende droogte wat dreig om die rug van die landbou in die ekstensiewe weistreke te breek, vestig opnuut die aandag op veldtoestand, beweidingspraktyke en ook veldrehabilitasie. Namakwaland is een van die gebiede in Suid-Afrika met die langste geskiedenis van beweiding deur vee. Dr. Lita Webley, ’n onafhanklike argeoloog, het gevind dat klein troppies skape 2 000 jaar gelede in Namakwaland aangehou is. Sedertdien het die inheemse mense nomadies tussen waterbronne en weiding in die winter- en somerreëngebiede van Namakwaland getrek. Met die koms van wit boere in die 18de eeu het veeboerdery meer sedentêr geword, terwyl omheiningsubsidies in die 1950’s tot meer beheerde beweiding in kampe gelei het. Dié veranderinge het ’n impak op die veld gehad, sê me. Halcyone Muller, bestuurder van restourasie en boerdery by Conservation International,…

Dr. Ken Flower van die Universiteit van Wes-Australië in Perth het by verlede jaar se Jack Human-bewaringsweek gesê beheerde spoorverkeer is ’n logiese uitvloeisel van geenbewerking. “As jy nie meer bewerk nie, maar aanhou om oor die kamp te ry, kan jy jou opbrengs benadeel.” Hy sê foto’s wat met behulp van afstandswaarneming geneem is, toon dat waar die spore is, is die biomassa en opbrengste laer as op die res van die land. “As jy nie gedurig oor die hele kamp ry nie, word die grond mettertyd losser en kan die plante se wortels makliker indring.” Hy sê beheerde spoorverkeer is nuttig om vog goed te benut, want vog versamel in die ou stoppelrye. “As jy 2 cm-akkuraatheid op jou outomatiese stuur het, kan jy elke jaar net langs…

Namibië het streng vereistes vir die identifikasie van beeste. Ter wille van naspeurbaarheid moet beesboere twee oorplaatjies aan elke bees se oor sit; een met visuele inligting aan die dier se regteroor en die ander met ingeboude toe-rusting vir radiofrekwensie-identifikasie aan die linkeroor ( FOTO 1 ). Die byhou van aantekeninge kan egter ’n beslommernis wees as ’n boer met baie vee werk. Dit geld mnr. Mecki Schneider wat met ’n Brahman- en Simmentaler-stoetery, asook ’n kommersiële beeskudde by Grootfontein in Namibië boer. Dus het hy elektroniese toerusting gekoop en saam met Reimo, sy seun, en mnr. Alex de Koning, sy plaasbestuurder, ’n stelsel ontwikkel wat baie moeite uit die byhou van aantekeninge haal. Dit is veral danksy die jongste stuk elektronika wat die volledige stel data van elke bees…

DIEREVOEDING GROFHEID VAN MIELIES IN ’N VOERKRAALRANTSOEN Oor die jare was daar baie menings oor die grofheid van mielies in rantsoene. Van baie fyn tot heel mielies is al voorgestel. Wat is die regte grootte van mielies in ’n beesvoerkraalrantsoen? Is dit meel, gruis, gebreekte pitte of heel mielies? Mielies in rantsoene is altyd ’n omstrede onderwerp onder boere, veeartse en voedingkundiges. Almal is altyd reg, maar dit is onderhewig aan ’n paar voorvereistes. Baie goeie oorsigartikels oor hierdie onderwerp is deur prof. Fred Owens van Amerika gepubliseer. Belangrike oorwegings wat boere in ag moet neem is: ■ Alle fyn partikels wat die rumen binnegaan, sal waarskynlik eerste die rumen verlaat (die deurgangstempo verhoog). Die tyd in die rumen is dus kort. Gevolglik is die blootstelling aan vertering minder en…

Met die onlangse amptelike kennisgewing van ’n uitbreking van slenkdalkoors in die omgewing van Kimberley moes boere dringend besluit wat gedoen moet word, sê prof. Gareth Bath, hoof van die adviesliggaam vir kleinveegesondheid en ’n veearts verbonde aan Onderstepoort. Hy het dié inligting in die Herkouerveterinêre Vereniging van Suid-Afrika se Mei-verslag bekend gemaak. “Dit is riskant om skape, bokke en beeste oningeënt te laat omdat grootskaalse verliese, en veral aborsies, kan volg. Niemand kan ook seker wees van toekomstige weersomstandighede of die uitwerking van die komende somerreën nie en dus kan niemand uitbrekings of verliese voorspel nie,” sê Bath. “Indien almal egter op sulke uitbrekings wag voor hulle entstowwe toedien, kan erge verliese wel ontstaan omdat Onderstepoort Biologiese Produkte, wat die entstowwe vervaardig, oorweldig kan word deur ’n baie groot…

Die meeste jagters in Suid-Afrika handhaaf ’n lewenstandaard-maatstafvlak (LSM) van 8, wat beteken die deursneejagter het ’n voertuig en ’n woning met betreklik waardevolle bates. Die wonings en inhoud word gewoonlik teen brandskade, stormskade en diefstal verseker. Wanneer ’n geweer in ’n kluis toegesluit is, sal dit gewoonlik gedek wees teen bogenoemde gebeurtenisse mits die jagter huisinhouddekking het. Probleme ontstaan egter wanneer die jagter die geweer (of boog) uit die huis neem, hetsy vir jagdoeleindes of om op die baan te gaan oefen. Die geweer is nie gedek wanneer dit uit die huis geneem word nie, tensy allerisikodekking uitgeneem is. Die meeste mense neem egter nie hierdie soort dekking op hul gewere uit nie omdat dit gewoonlik ’n duurder opsie is. ALLE RISIKO’S RifleSURE is eenvoudige en bekostigbare allerisikoversekering vir…

Waarmee boer julle alles? Vanweë die tipografie van die Oos-Vrystaat, met sy berge én vlaktes, bedryf ons ’n gemengde boerdery met ’n veevertakking en ons plant mielies, suikerbone en koring. Waarom aard suikerbone net in die Oos-Vrystaat en Mpumalanga? Dis ’n gewas wat van koel weer hou, veral in die hoogsomer. Die plante hou nie van warm temperature in Januarie en Februarie nie, want dan gooi die plante hul blommetjies af en dra nie baie goed nie. Ons het matiger somers, met dagtemperature van sowat 25 °C tot 28 °C. Hoe besluit jy watter suikerboonkultivars jy gaan plant? Ons kry kultivars van Dry Bean Seeds en Pannar. Ons doen ook proewe en woon boeredae by om agter te kom watter kultivars die beste in ons omgewing gaan vaar. Suikerbone is…

Rose is van die gewildste kommersiële blomme ter wêreld, maar oor die geslagte heen het die soektog na plante wat langer blom, en die vraag na rose van alle kleure daartoe gelei dat die kenmerkende geur van rose in die slag gebly het. Navorsers van universiteite en navorsingsinstitute in Frankryk en China het die genoom van ’n Chinese roos, Rosa chinensis, variasie Old Blush, wat van die 18de eeu af gebruik is om rooshibriede te teel, volledig ontsyfer. Die doel was om die ligging van die gene wat rose so lekker laat ruik, vas te stel, en watter deel van die roosgenoom getakel moet word om dié geur weer te laat uitstaan. Die navorsers het ook gevind dat daar ’n assosiasie is tussen die terpene, wat geur help reguleer, en…

By altesame 45,2% van die distrikte in die Vrystaat het grondpryse laer geneig in die 12 maande tot April. In 21 distrikte is geen onlangse transaksies aangeteken nie. Die ontleding van grondverkope in die TABEL is vir grond van meer as 10 ha. In dié tyd is 671 ooreenkomste gesluit, wat altesame 288 954 ha teen R3,400 miljard behels het. Daarvan was 78 transaksies van kleur – 12% van die totaal. Dié soort transaksies sluit in verhandelings tussen individue (57), Regeringsaankope (10) en grond wat vir stedelike ontwikkeling verkry is (1). Dit het 35 050 ha (12,3%) teen R390 miljoen – 11,5% van die totale waarde – behels. Van die totaal was 53 transaksies vir grond van minder as 50 ha (8%), met die meeste transaksies (345 of 51%) vir…

Die vraag na rasegte Damaraskape neem opnuut besig toe en hy kry daagliks navrae daaroor, sê mnr. Frank Blumenthal van Hopetown wat sedert 1986 met dié skape boer. Hy het in die laat 1970’s met die bosoorlog in Namibië en Angola met Damaras kennis gemaak en besluit om van die geharde skape Suid-Afrika toe te bring. “Hulle is bestand teen talle van die siektes wat ’n mens gewoonlik in Afrika kry en aard goed in droë, woestynagtige gebiede. Hul oorsprong is eintlik Egipte.” Hy sê teen 1992 was daar al meer as honderd telers in die land. Die telersvereniging is ook in daardie jaar gestig. Toe die neiging ontstaan het om Meatmasters uit Wit Dorperramme en Damara-ooie te teel, het Blumenthal besluit om by rasegte Damaras te bly. “Tans is…

BOEREDAE 15 AUGUSTUS: Armoedsvlakteboeredag vir vleisbeesboere, LNR-bultoetssentrum, Vryburg. Melville Ferreira, sel 084 506 0068; e-pos: Ferreiram@arc.agric.za 18 AUGUSTUS: Inligtingsdag vir die stoetteler. Tema: Toekoms van genomiese ontleding en seleksie van teelmateriaal. Amanzi-wildreservaat, sel 082 828 1984 21 AUGUSTUS: Simm-beesboerdag. Koeikuddegesondheid, uitsoek van bulle en hoe om meer vir jou speenkalf te kry. Aangebied deur die Prosimm-studiegroep op die plaas Schoemansfontein, Hartbeesfontein. Johan Styger, sel 082 460 8443, e-pos: johan@btbsimmentaler.co.za 22 AUGUSTUS: Predasie-inligtingsdag, aangebied deur Cape Nature en die NWKV. Augsburg-plaas, Clanwilliam. Jannie Fourie, sel 083 564 1105, e-pos: jannie@nwga.co.za 24 AUGUSTUS: Agterpakhuislandbouvereniging se veld- en implementedag, met die samewerking van Trekkers en Meer. Augsburg-plaas, Clanwilliam. Tobie Nortjé, sel 082 927 5093; Mark Botha sel 082 738 5677. 11-13 OKTOBER: Agri-Expo Livestock: Plaasfees oor drie dae. Tentoonstelling van die SA vee-…

4,6% Die verbruikersprysinflasie het verlede maand met 0,2 van ’n persentasiepunt gestyg van Mei, toe dit op ’n jaargrondslag 4,4% was. Dit is nou 4,6%. Kosprysinflasie was op ’n jaargrondslag 3,1% hoër. Die inflasie vir verwerkte voedsel was op ’n jaargrondslag 1,9% en van onverwerkte voedsel 4%. Die inflasie vir suiker en ander soetighede het met 5,3% geval – die meeste van enige kosgroep. Inflasie vir nie-alkoholiese drankies was 6,2%, en vir alkoholiese drankies 8,3%. — Statistieke SA R5,63 Die rand behoort teen nagenoeg R5,63 teenoor die dollar te verhandel, gemeet aan die gesaghebbende weekblad The Economist se beroemde Big Mac-indeks. Die indeks gebruik die prys van ’n McDonalds-burger om aan te dui of geldeenhede teen realistiese vlakke verhandel – gemeet aan koopkrag-pariteit. In Amerika kos ’n Big Mac $5,51…

Het jy iets op die hart? Skryf gerus aan ons. Die wenbrief ontvang elke week R150 met die komplimente van BKB, asook ’n versamelaarswyn van Beyerskloof. Beyerskloof se Pinotage is ’n ikoniese Suid-Afrikaanse wyn. Die bonuswenbriefprys, ’n Magnumbottel van Beyerskloof se 2016-oes, is deur die eienaar en wynpionier mnr. Beyers Truter geteken. Die droë oesjaar van dié gewilde, klassieke Pinotage het gelei tot ’n goed gestruktureerde, gebalanseerde wyn. Sê jou sê in hoogstens 300 woorde. Stuur dit aan: Die Redakteur, Brieweblad, La ndbouweekblad, Posbus 1802, Kaapstad 8000. Of faks dit na 021 406 2940 of gebruik e-pos: lbw@landbou.com. Verskaf jou naam en adres, al wil jy ’n skuilnaam gebruik. Va ndeesweek se wenbrief is deur HARLAND WO OD geskryf.…

HARDE woorde het geval tussen mnr. Francois Baird, stigter van die teenstortingsbeweging Fair-Play, en me. Dessy Choumelova, handelsraadgewer van die Europese Kommissie in Pretoria, op ’n konferensie waar handelsbetrekkinge onder die soeklig gekom het. Baird het op Farmer’s Weekly se AgriBesigheid Afrika-konferensie in Kempton Park gesê 44% van hoendervleis wat in Suid-Afrika verbruik word, is ingevoer en dit het al tot 6 000 werksverliese in Suid-Afrika se hoenderbedryf gelei. In Kameroen het 120 000 werksgeleenthede verlore gegaan en Ghana se hele bedryf is weens storting vernietig. “Sedert ek by FairPlay betrokke is, het ons vier lesse geleer: By handel met groot handelsvennote moet ons nie net konsentreer op wat hulle sê nie, maar ook op wat hulle doen. Die twee stem nie altyd ooreen nie. “Daarby moet Suid-Afrika sy rug…

DIE feit dat die sojaboonbedryf nou ’n manier gevind het om tegnologie- en kultivarontwikkeling te finansier, is ’n groot deurbraak vir die bedryf, sê mnr. Jannie de Villiers, uitvoerende hoof van Graan SA. Hy het gereageer op die statutêre heffing wat op 22 Junie deur die Minister van Landbou, Bosbou en Visserye in die Staatskoerant afgekondig is. Daarvolgens sal saadmaatskappye vergoed kan word vir hul prestasie op die sojaboonsaadmark. Die heffing wat geïn word, sal volgens saadmaatskappye se markaandeel aan hulle uitbetaal word. Meer as R100 miljoen kan daardeur verkry word, waarvan 70% aan saadmaatskappye moet gaan, minstens 20% aan transformasie en minder as 10% aan administrasie. De Villiers sê vir baie lank het plaaslike sojaboonboere nie toegang verkry tot die nuutste GM-tegnologie en teelmateriaal nie. “Boere sal voortaan toegang…

KOMMER bestaan dat die program van verpligte diens vir veeartse omvergewerp kan word tensy ’n heeltydse koördineerder vir die program aangestel word. Die bestuurder van die program het reeds maande gelede bedank en daar is ’n moratorium op die vul van poste by die Departement van Landbou, Bosbou en Visserye. Die Rooivleisprodusente-organisasie (RPO) sê in sy jongste nuusbrief die departement beskou die verpligte gemeenskapsdiensjaar vir veeartse, wat pas hul studie voltooi het, as ’n suksesverhaal waardeur werksgeleenthede vir dié beroep geskep word. Die bedanking van die bestuurder beteken egter ’n tekort aan hulpbronne vir dié program waarvoor die staat R100 miljoen beskikbaar gestel het. INGRYPING Dr. Clive Marwick, voorsitter van die Suid-Afrikaanse Veterinêre Raad (SAVR), het bevestig dat die koördineerder ’n paar maande gelede bedank het. Dr. Mphane Molefe het…

MA AK die grondkwessie jou neerslagtig? Dink jy die platteland is gedoem tot agteruitgang? Is jy moeg vir politici se onpraktiese planne? Kom woon dan Landbouweekblad en Agri SA se grond- en plattelandse herlewingsberaad by en luister wat wit en swart boere doen om hul gemeenskappe te versterk. Die beraad vind op 23 en 24 Augustus in Limpopo plaas op Wildswinkel se veilingsterrein op Bela-Bela. Die sprekers is meestal boere. Jy is ook welkom om jou sê kom sê tydens teetyd, middagete en by die geselligheid op die eerste aand van die beraad. Ons weet almal van die groot bemagtigingsprojekte in die vrugtebedryf, maar ken jy die boere en werkers wat saam boer by Laingsburg, Loxton en Riviersonderend? Daar is Dirk Louw van Groblershoop, ’n voormalige plaaswerker wat nou self…

DIE gebrek aan kommunikasie tussen staatsdepartemente, tussen nasionale en provinsiale departemente en tussen die Departement van Landbou, Bosbou en Visserye en die landbou plaas ’n demper op samewerking, luidens ’n verslag van die Departement van Landbou. Die departement het die verslag op ’n inligtingsessie op Centurion bekend gemaak ná ’n reeks vergaderings met kommoditeitsgroepe om probleme en voorrangsake te bespreek. Die doel van die vergaderings was om die planne van verskillende platforms, vergaderings en strukture te integreer sodat alle belanghebbendes op hoogte daarvan is, hoe dit toegepas gaan word en die probleme wat daarmee voorsien word. Die betrokke departement meen die Regering en die onderskeie landboubedrywe moet beter saamwerk om die tekort aan hulpbronne in die landbou uit die weg te ruim. Sy strategiese plan vir 2019 tot 2024 is…

Geagte mnr. Ramaphosa. U sal my waarskynlik nie onthou nie omdat u so baie mense ontmoet. Ons het mekaar in 1996 ontmoet op ’n private vlug van Kaapstad na die destydse Mafikeng waar u die gasspreker was op Madiba se 78ste verjaarsdag. Dit was ’n baie aangename vlug en u wysheid en visie het ’n blywende indruk op my gemaak. Nou is dit 22 jaar later. U is nou die President van hierdie pragtige land. Ek boer in die Noord-Vrystaat op 6 000 ha grond, wat ek met baie bloed, sweet en trane bymekaargemaak en opgebou het. My besigheid onder die naam Sernick het 550 mense in diens en behels ’n geïntegreerde waardeketting wat ’n Bonsmarastoetery, ’n veevoerfabriek, ’n voerkraal, ’n abattoir, ’n ontbeningsaanleg en kleinhandelafsetpunte insluit. Die motivering vir…

Die verskynsel van heiningkontraste (fenceline contrasts), wat gewoonlik aan verskille in weidingsdruk en veldbestuur toegeskryf word, het ’n paar vars gedagtes opgelewer. Mnr. De Graaff Genis van die plaas Brakkies sê navorsers vind dikwels sulke teenstellings sonder om die geskiedenis van die grond of die rig-ting van die heining in ag te neem. In daardie deel van Namakwaland is die suidewind die heersende wind in die somer. Die skape beweeg instinktief in ’n suidelike rigting tot by die grens teen die wind op. Die grond aan die suidekant van die draad kan dus swakker as sy buurman s’n lyk, maar die kamp se noordekant lyk beter as die buurplaas se suidekant. Op De Graaff se plaas is daar ook ’n plek langs die grensdraad waar die skape jare lank geslaap…

■ Beheerde spoorverkeer is nie ’n nuwe praktyk in ander wêrelddele nie, maar Wes-Kaapse boere het verlede jaar vir die eerste keer daarmee begin in die skuinstes van die Overberg. ■ Vir sukses met beheerde spoorverkeer help dit as jy ver gevorder het op die bewaringsboerderypad, jou graankampe vooraf fyn beplan en uitlê, en planne kan maak om al jou masjiene ewe wyd te kry. ■ Kom luister na mnr. Hume Schönfeldt se praatjie oor sy ervaring met beheerde spoorverkeer by Bewaringslandbou Wes-Kaap se konferensie op 7 Augustus.…

Boere kan meer leer oor spoorverkeer tydens Bewaringslandbou Wes-Kaap (BLWK) se Jack Human-bewaringsweek op 7 en 8 Augustus. Die konferensiedag vind op 7 Augustus by Houwhoek Inn plaas en mnre. Hume Schönfeldt en Trevor Syme, ’n boer van Wes-Australië, gaan oor die voordele van beheerde spoorverkeer praat. Mnr. Clint della Bosca, wat in ’n baie droë deel van Wes-Australië boer, gaan van sy wedervaringe vertel. Ander sprekers is mnr. Izak Dreyer, ’n boer van Vrede in die Vrystaat, wat oor dekgewasse en weiding gaan praat. Mnr. Andries van der Poll, ’n nuwe era graanboer van Gouda, gaan praat oor sy vordering in die graanbedryf. Die dag word afgesluit met praatjies deur dr. Craig Galloway, navorser oor volhoubare landbou by Trace & Save, oor onlangse navorsing oor grondgesondheid in weidings, dr.…

Vervoerstres, voedingstres of die gebrek aan die regte voedingstowwe kan veroorsaak dat ’n groot aantal mikrobes in diere se spysverteringskanaal afsterf. ’n Drastiese afname in voordelige mikrobes lei tot minder beskikbare “werkers” wat voer kan afbreek en verteer, en dit dus vir die dier opneembaar maak. In akute gevalle gaan die dier se kondisie merkbaar agteruit, en in uiterste gevalle kan dit tot vrektes lei. In die verlede het boere vars beesmis van diere in die omgewing gevoer aan diere wat na ’n nuwe gebied verskuif is. Wanneer diere geslag word, versamel boere ook ruminale vloeistof, wat oraal gedoseer is. Moderne tegnologie het die proses verfyn en probiotika is ontwikkel. Dit verskaf diere ’n breë spektrum spesifieke mikrobes waar tekorte ontstaan weens stres. Dit kan ook gebeur waar jong diere…

Kaas-en-ham-strata Strata is ’n vullende brood-, kaasen eiergereg, amper soos ’n soutige broodpoeding. Dit maak die lekkerste ontbyt of ligte aandete, is ryk en romerig, maar kinderspeletjies om te maak. Wanneer ek dit vir ’n groot groep mense maak vir ontbyt, gebruik ek soms croissants pleks van brood – dis smullekker. ■ 8 ekstragroot eiers ■ 750 ml volroommelk ■ 3 ml elk sout en vars gemaalde swartpeper ■ 5 ml aangemaakte mosterd ■ 250 g gerookte ham, gesnipper ■ 250 ml gerasperde cheddarkaas ■ 250 ml gerasperde Gruyère-kaas ■ 10 dik snye Italiaanse brood, soos ciabatta, in blokkies gesny Klits die eiers, melk, sout, peper en mosterd goed saam. Sit die ham, kaas en broodblokkies in ’n groot, verseëlbare plastieksak en giet die eiermengsel oor. Verseël en draai die…

Breëkoparende (Polemaetus bellicosus) vlieg buite hul broeityd oor baie groot gebiede op soek na kos en onvolwasse voëls swerf selfs verder. Dié reise neem hulle ver buite die grense van bewaarde gebiede, waar hulle meer blootgestel is aan talle gevare. Huidige navorsing lê dus klem op die bewaring van hierdie voëlsoort binne én buite bewaarde gebiede (soos die Krugerwildtuin), veral ten opsigte van hul benutting van grondgebiede en broeisukses. Die status van die breëkoparend word weens die drastiese afname in sy getalle nou as bedreig beskou. NAVORSING IN DIE KAROO Veral die Karoo is belangrik vir die toekomstige bewaring van dié arendsoort en heelwat navorsing word gedoen oor die status en verspreiding van breëkoparende in die Karoo. Na raming kan daar van 150 tot 200 broeipare in hierdie gebied wees.…

Oom Pieter was ’n boer in murg en been. Op die klein plasie waar hy gebore is, het hy grootgeword en hy is ook daar in die familiekerkhof begrawe, met al die respek wat hy verdien het. Aanvanklik het hy in vennootskap met sy pa die aartappelboerdery behartig totdat hy dit later oorgeneem en alleen die boerdery versorg het. Van ’n aartappelplant kon jy hom niks leer nie en ’n land met mooi sandaartappels was vir hom een van die mooiste dinge wat ’n boer kon aanskou. Die inkomste was nie groot nie, maar met kundigheid en toewyding kon hy sy familie versorg tot sy kinders later ander weivelde gaan soek en gevind het. Een van sy seuns, klein Pieter, het later in die buitewyke van die stad vir hom…

INTERNASIONAAL: Die Chicagoprys het met 0,7%, of $0,93/t (R12,42/t), tot $134,20/t (R1 806/t) teenoor die vorige week gedaal. Op ’n jaargrondslag is dit 10,5%, of $15,65/t(R209,04/t), laer. Verwagte pryse: Jul. – $133,54/t (R1 784/t), Sept. – $138,73/t (R1 853/t), Des. – $143,46/t (R1 916/t), Mrt. 2019 – $146,21/t (R1 953/t). PLAASLIK: Die Safexprys van wit mielies het met 1,7%, of R34/t, tot R1 976/t teenoor die vorige week gedaal. Die prys van geel mielies het met 2,5%, of R52/t, tot R2 048/t gedaal. Op ’n jaargrondslag is wit mielies 9,5%, of R172/t, hoër, terwyl geel mielies 6,7%, of R128/t, hoër is. Verwagte witmieliepryse: Jul. – R1 993/t, Sept. – R2 025/t, Des. – R2 088/t, Mrt. 2019 – R2 141/t. Verwagte geelmieliepryse: Jul. – R2 075/t, Sept. – R2 107/t,…

Nog slegte nuus wag op verbruikers oor brandstofpryse. Volgens alle aanduidings teen die middel van die maand kom daar ’n vyfde opeenvolgende verhoging in die prys aan die begin van Augustus. Mnr. Dawie Maree, hoof van landbou-inligting en bemarking by FNB, sê syfers van die Sentrale Energiefonds het in die middel van Julie gedui op ’n onderverhaling van ongeveer 17 c/ℓ vir diesel en 21 c/ℓ vir petrol. “Die wisselkoers én die internasionale produkpryse is verantwoordelik vir die moontlikheid dat ons waarskynlik weer ’n verhoging gaan hê en dit lyk nie of die einde in sig is nie. “Graanprodusente sal beslis vir die komende produksietyd haarfyn moet beplan om te verseker hul kontantvloeibegrotings gaan klop. Dit is juis nou die tyd van die jaar wanneer produksiebegrotings en -beplannings opgestel word.”…

‘Ek hoop dit reën, want die waterkwota van 20% is reeds te min.’ MNR. CHARL MALAN, groenteboer in die Gamtoosvallei, oor watertekorte weens die leë Kougadam. Bl. 20 ‘Mense moet self die keuse van grondbesit kan uitoefen, soos voorgeskryf deur die Grondwet.’ PROF. MAANO RAMUTSINDELA, adjunkdekaan van die Universiteit van Kaapstad se fakulteit natuurwetenskappe, oor hoe grondhervorming behoort te geskied op koimmunale grond. Bl. 22 ‘Die toepassing van dubbele standaarde in grondhervorming, soos deur uitsonderings vir die Zoeloekoning, lei nie tot oplossings nie.’ MNR. BENNIE VAN ZYL, hoofbestuurder van TLU SA, oor onlangse regeringsbesluite in verband met grondhervorming. Bl. 22 ‘Ons sal hulle soek tot ons hulle kry.’ MNR. BP GREYLING, boer van Wakkerstroom, oor die soektog na ’n bende wat sy ouers aangeval en beroof het. Bl. 19 ‘Die…

OM JAPANNEES TE WEES Sport was onlangs weer baie goeie afleiding. Eers was dit Rassie Erasmus se bemoedigende debuut met die Bokke teen die besoekende Britte. Toe kom die Wêreldbeker-sokkertoernooi (al sokker wat ek kyk), en tennis op Wimbeldon, waar Kevin Anderson se leeuehart ’n mens weer trots laat voel het op Suid-Afrika. Die Japannese was egter die hoogtepunt. Ná ’n paar buitengewone groepwedstryde tydens die Wêreldbeker-sokkertoernooi het hulle teen België verloor. Nadat almal oor die skok gekom het, het ’n eienaardige ding gebeur. Die Japannese toeskouers het plastieksakke uitgehaal en die stadion begin skoonmaak. In die kleedkamer het die verslane Japannese sokkerspelers ook alles mooi skoongemaak en ’n briefie gelos wat eenvoudig in Russies sê: “Baie dankie”. Tant Emsie Schoeman sou trots gewees het. Ek dink gereeld aan daardie…

DIE volstruisbedryf en die Departement van Landbou, Bosbou en Visserye is druk besig om weer die goedkeuring vir uitvoer van die Europese Unie (EU) te kry. Nie vars óf bevrore volstruisvleis mag tans na die EU uitgevoer word nie, hoewel Suid-Afrika ’n nasionale plan vir die beheer van chemiese residu het. Die plan is onderhewig aan ’n jaarlikse goedkeuring deur die EU. Tydens die laaste oudit deur die EU is erge tekortkominge in die toepassing van die beheerprogram gevind, wat die betroubaarheid van die residustatus onder verdenking gebring het. Suid-Afrika is dus vanaf 1 Maart verwyder van die EU se lys van lande wat goedgekeurde planne het om residu te monitor. Dit het meegebring dat Suid-Afrika nie meer volstruis-, krokodil- of wildsvleis na die EU kan uitvoer nie. Dr. Mike…

MNR. PIET WOLMARANS van Swartruggens en drie van sy bure het onlangs ooreengekom op een van die grootste skikkingsbedrae tot nog toe in ’n saak oor snotsiekte. Die skikking is saam met ’n kostebevel teen Wolmarans se bure in die Hooggeregshof in Mmabatho bekragtig met die op-drag dat die skikkingsbedrag nie bekend gemaak mag word nie. Dit is ter vergoeding vir die 104 beeste wat Wolmarans verloor het weens snotsiekte sedert sy bure wildebeeste op hul plase gevestig het. Sy bure is ook die opdrag gegee om hul blouwildebeeste te verwyder van die plase wat aan Wolmarans se plaas grens. Wolmarans bedryf sy stoetery, Kwantum Simmentalers, al 25 jaar lank op sy plaas van 350 ha tussen Rustenburg en Swartruggens. Dié stoetery het al wêreldbekende bulle, soos Migkar en Profeet,…

KUNDIGES is tans besig om ’n nasionale aksieplan op te stel teen ’n boomplaag wat reeds in Durban, Johannesburg, Bloemfontein, Hartswater en die Tuinroete kop uitgesteek het. Dit kom nadat kenners van die instituut vir bosbou- en landboubiotegnologie (FABI) aan die Universiteit van Pretoria onlangs bevestig het dat boomvrektes in George en Knysna veroorsaak is deur die stompkopkewer (Euwallacea nr. fornicates) en sy simbiotiese swam (Fusarium euwallaceae). Die presiese omvang van die plaag kan in dié stadium nog nie bepaal word nie. Daar is vasgestel dat avokadobome in private tuine geraak is, maar sover bekend is geen kommersiële avokadoboorde tot dusver geraak nie. Volgens mnr. André Coetzee van die Suid-Afrikaanse Pekanneutprodusentevereniging is enkele pekanneutbome in Harts-water egter geraak. Dié vereniging en Subtrop, die sambreelliggaam vir subtropiese gewasse, is betrokke by…

1 ZIMBABWE| Geen geld vir grondoudit ’n Grondoudit om plaasbesit en grondgebruiksvlakke te bepaal, is tot stilstand gedwing deur ’n gebrek aan geld, aldus mnr. Perence Shiri, Zimbabwe se minister van lande, landbou en plattelandse hervestiging. Informele oudits het in die verlede ernstige ongerymdhede met die toekenning van plase uitgelig. Shiri sê die ouditspanne het voertuie en reistoelaes nodig. Die geld wat die regering daarvoor beskikbaar gemaak het, is onvoldoende. Hy sê die ministerie het die land se tesourie genader vir nog geld “en ons hoop hulle sal iets doen”, het hy gesê. Die land se Commercial Farmers’ Union sê wit boere wat tot dusver vergoeding van die regering vir onteiende plase aanvaar het, was dié wat geldelike probleme of mediese probleme ervaar het, want sulke vergoedings het net 10-15%…

SUID -AFRIK A ANSE boere is in ’n baie beter posisie om die mark te beheer as boere in Europa en Noord-Amerika, en verskaffers wat ’n goeie begrip van handelaars se sakeplanne het, kan ’n sterk mededingende voordeel geniet. Dít was die boodskap van me. Lindie Stroebel, hoofbestuurder van die produkbemarkingsvereniging PMA in Suider-Afrika op Farmer’s Weekly se AgriBesigheid Afrika-konferensie in Kempton park. “(Suid-Afrikaanse boere) is nie net afhanklik van groothandelaars nie. Daar is minstens vyf bemarkingskanale waarvan hulle gebruik kan maak. Dit sluit in uitvoer, plaaslike en streeksgroothandelaars, varsproduktemarkte, oorgrenshandel binne die streek en informele markte.” Sy het op ’n paneelbespreking oor wie die waarde in die waardeketting besit, gesê boere en sommige ander belanghebbendes in die landbouwaardeketting het nie genoeg kennis van die groothandelkant nie en raak nie…

’N GELIEFDE lid van BKB se topbestuur is onlangs oorlede. Mnr. Ronald John Smith, beter bekend as Ronnie, was die bedryfsdirekteur van dié bekende landboumaatskappy in Port Elizabeth. Smith is op 25 Mei vanjaar in die ouderdom van 58 jaar oorlede. “Dit was met leedwese dat ons moes verneem van die heengaan van mnr. Ronnie Smith. Hy het ’n kleurryke loopbaan van bykans ’n leeftyd by dié maatskappy gehad en was alombekend in Suid-Afrikaanse landboukringe,” sê sy kollega en vriend, mnr. Jacobus le Roux, hoofbestuurder van korporatiewe bemarking en openbare betrekkinge by BKB. “Ons meegevoel aan sy eggenote, Sheryl, en kinders, Jarred en Megan.”…

Daar is mediaberigte van melkboere wat hul melk laat uitloop omdat kopers pryse verlaag het te midde van bekgevegte oor die invoer van langlewemelk uit Pole. Dit raak vir kleiner boere al hoe moeiliker om te kan meeding, tensy hulle uitbrei om skaalekonomie na te jaag. Dit is nie noodwendig waar dat ’n groot melkery melk heelwat goedkoper produseer as ’n kleiner melkery nie, maar melkkopers verkies om eerder op een slag ’n groot tenkwa by een boer vol te maak as om by ’n paar kleiner boere op te laai. Daarom bied hulle ’n premie aan die groot boer. Landboubeleid skiet in hierdie opsig tekort, veral as dit regeringsbeleid is om nuwe, kleiner boere te probeer vestig. Dit is ’n klassieke voorbeeld waar die markwerking nagevolge het wat nie…

Alternatiewe parasietbestryding by vee kom toenemend in die kollig namate parasiete weerstand teen chemiese middels ontwikkel. Moontlike alternatiewe is biologiese en fitochemiese middels, genomiese seleksie van diere wat weerstandiger teen parasiete is, voedingaanvullings, doeltreffende weidingbestuur, en dat minder middels meer strategies toegedien word, sê dr. Heinz Meissner, veekundige konsultant. Jare lank is parasiete by herkouers hoofsaaklik chemies bestry, sê hy. Dit was grootliks suksesvol. Met die ontwikkeling van anthelmintiese middels in die private sektor, soos ivermektien, was daar min aansporing vir wetenskaplikes in die openbare sektor, soos by Onderstepoort, om toegewyde navorsing oor alternatiewe parasietbestryding te doen. “Die gevolg was ’n afname in (akademiese) vermoë. Wetenskaplikes kundig op dié gebied het net al hoe ouer geword.” Intussen het inwendige en uitwendige parasiete, nie net in Suid-Afrika nie, maar oor die…

Rusland en China verskans en versterk hul wêreldrol in die graanbedryf te midde van die landboubedryf wat onder finansiële druk gebuk gaan omdat die klem op hoër produktiwiteit is. Dit was een van die neigings onder bespreking op die onlangse Internasionale Graanraad (IGR) se konferensie in Londen waartydens die beweging binne die markomgewing, asook die toekomstige uitwerking van handelsverskille bekyk is. China, as die grootste verbruiker ter wêreld, bult sy spiere danksy sterk groei op dié mark. Die optrede van regerings van die lande wat groei en vorder is tydig. Hulle is ingestel op belegging, hulle bestee tyd en geld aan navorsing en ontwikkeling, en, heel belangrik, handhaaf ’n omgewing waarbinne belegging en groei kan plaasvind. Die produksie van graan sal in die komende groeityd op internasionale vlak na verwagting…

WAT IS DIE SLIMSTE DING WAT JY GEDOEN HET? Om nie in ’n boksie te lewe nie en om na ander mense te luister. Die jaar toe ek in Australië gewerk het, was ook ’n goeie tyd in my lewe. WAT IS DIE DOMSTE DING WAT JY GEDOEN HET? Om nie my AB-lyne se beplanning van die begin af 100% reg te doen nie. VAN WIE LEER JY DIE MEESTE? Beslis my pa, want sy passie vir en kennis van boerdery is aansteeklik. Ek is baie bevoorreg om elke dag saam met hom te kan werk, en ek leer elke dag iets nuuts.…

Siekteverslae deur veeartse van die Herkouerveterinêre Vereniging van Suid-Afrika (RuVASA) dui daarop dat die Vrystaat en aangrensende gebiede in ander provinsies deurloop onder gevalle van brucellose. In Maart vanjaar is gevalle aangemeld by Bethlehem, Dewetsdorp, Frankfort, Hertzogville, Hoopstad, Villiers en Winburg. In April het veeartse by Bethlehem, Gariepdam, Harrismith, Hertzogville, Hoopstad, Ladybrand/Excelsior, Villiers, Wesselsbron en Winburg gevalle van brucellose aangemeld. In Mei was die Vrystaat wéér die provinsie met die meeste aangemelde gevalle van brucellose, dié keer by Bloemfontein, Hoopstad, Memel, Viljoenskroon, Villiers, Wesselsbron en Winburg. Plase kan maklik met brucellose besmet word wanneer boere besmette diere inkoop, sê mnr. Neels de Villiers, ’n Bonsmaraboer en voormalige voorsitter van die Rooivleisprodusenteorganisasie in die Vrystaat. “Latente draers, wat nie die simptome toon nie, kan tussen jou diere beland.” Dit is gevolglik…

Hoewel minder gevalle, was daar tot dusver vanjaar nuwe uitbrekings van knopvelsiekte, het dr. David Wallace, senior navorser verbonde aan die Landbounavorsingsraad se Onderstepoort-instituut vir Veeartsenykunde (LNR-OVI), op die onlangse kongres van die Herkouerveterinêre Vereniging (RuVASA) gesê. Daar is onsekerheid oor watter insekte knopvelsiekte oordra, en die siekte se oorsprong is dus moeilik om te bepaal. Wallace het boere gemaan om hul diere betyds teen die siekte in te ent en het gewaarsku Suid-Afrika se entstofdekking is nie op die vlak waar dit moet wees nie. “Entstofdekking moet eintlik 100% wees met boere wat hul vee gereeld ent, maar op sommige plekke is dit net 15%.” Wallace, wat ook die verteenwoordiger van die internasionale organisasie vir dieregesondheid (OIE) in Suid-Afrika is, sê die knopvelsiektevirus, asook die skaappokvirus en bokpokvirus, is…

Boere moet in vennootskap tree met vleisbeeskenners wat toegang het tot verskillende markte. So sê mnr. Roelie van Reenen, direkteur van die verskaffingsketting by Beefmaster, ’n topprodusent van beesvleisprodukte aan Suid-Afrika, die Midde-Ooste, Verre-Ooste en verder. Dit sal nie net uitvoervolumes en winsgewendheid vir boere verhoog nie, maar ook help om groei in die Suid-Afrikaanse ekonomie te stimuleer. “Internasionale markte is ontvankliker vir Suid-Afrikaanse vleisprodukte as vantevore, danksy voordelige handelsooreenkomste wat onlangs onderteken is vir die uitvoer van beesvleisprodukte na China en elders,” sê Van Reenen. Luidens verslae gaan die vraag na vleis in China verhoog. Die Organisasie vir Ekonomiese Samewerking en Ontwikkeling voorspel dat vleis in die komende jare die snelgroeiendste invoerproduk in China sal raak. China se amptelike vleisinvoer het feitlik twintigvoudig gegroei van 23 702 ton in…

Kerrie-droëboontjiebredie ■ 500 g suikerbone ■ 2 groot uie, gekap ■ Olie, vir braai ■ 1 kg stoweskaapvleis (skenkels of benevleis) ■ 15 ml kerriepoeier ■ 3 knoffelhuisies, gekap ■ Suiker na smaak ■ Tamarynsap na smaak (opsioneel) Week die boontjies oornag in water. Gooi die water af en kook die bone in skoon water tot sag. Dreineer en hou eenkant. Braai die uie in die olie tot goudkleurig. Sit die vleis by en braai bruin. Voeg genoeg water by om die vleis te bedek en verhit tot kookpunt. Prut vir ’n paar uur tot die vleis lekker sag is. Voeg die saggekookte boontjies by die vleis en geur nou vir die eerste keer met sout. Voeg die kerriepoeier en knoffel by en laat stadig verder stowe. Voeg die suiker…

Hoe het jou onderneming sy ontstaan gehad? Vyf jaar gelede het ons Vrystaat toe getrek en op Jacobsdal gaan woon. My jongste seuntjie, Schalk, was maar sewe weke oud. Ek was ’n heeltydse tuisteskepper, maar met ’n hunkering om my eie onderneming te begin. Ek het baie daaroor gebid en een nag droom ek ek maak ’n piekniekkombers. Die volgende oggend het begin navorsing doen en gou besef daar is ’n gaping in die mark vir die allerbeste piekniekkomberse. As ma van drie het ek ook geweet aan watter vereistes so ’n kombers moet voldoen – dit moes klein kan opvou, maklik kan dra, masjienwasbaar, waterdig, mooi en funky wees. Die naaste materiaalwinkel was ongeveer 60 km ver – in Kimberley – maar ek is die volgende dag soontoe om…

Baie inligting kan met ’n QR-kode aan verbruikers oorgedra word. WYNLIEFHEBBERS kan nou sonder sukkel bekroonde Suid-Afrikaanse wyne in die hande kry danksy ’n ooreenkoms wat die organiseerders van die Michelangelo-eerbewyse met ’n kleinhandelreus gesluit het. Me. Lorraine Immelman, besturende direkteur van die Michelangelo-eerbewyse, het op Stellenbosch bekend gemaak dat die ooreenkoms met Checkers waarde gaan toevoeg vir wynprodusente én verbruikers, omdat die breë publiek nou maklik toegang gaan hê tot topwyne. “Ons doel met die kompetisie was nog altyd dat dit oor meer as net ’n blink plakkertjie op ’n bottel moet gaan. Produsente en verbruikers moet daarby baat vind. Een van ons probleme was om die wenwyne by die verbruikers uit te kry.” Tot onlangs was sulke wyne hoofsaaklik in spesiale wynwinkels beskikbaar, maar nou gaan Checkers spesiale…

Een van die rooskleurigste prentjies van die stand van die Suid-Afrikaanse sojaboonbedryf kom na vore in ’n ontleding van die jongste gegewens van die Oesskattingskomitee, ondanks ’n moeilike, onsekere begin van die seisoen. Volgens mnr. Gerhard Scholtemeijer, voorsitter van die Oliesade-advieskomitee, was die aanplantings van 787 200 ha ongeveer 37% meer as in 2016 – die meeste tot nog toe. Die opbrengs was gemiddeld 1,97 ton/ha teenoor verlede jaar se 2,29 ton/ha. Dit blyk die groter oppervlakte is méér te danke aan groter aanplantings deur boere wat reeds voorheen sojabone verbou het, as wat dit net danksy nuwe toetreders tot die sojabedryf was. Groot getalle nuwe toetreders het in die verlede daartoe gelei dat die gemiddelde opbrengs gedaal het. Dit blyk nou mielieboere besef en aanvaar ál meer die wisselbouvoordele…

GAUTENG CARLETONVILLE EIGENAARSFONTEIN (442), 207 ha, aan G.F. Tolmay, van C.M. Tolmay, R2 050 000. ELANDSFONTEIN (561), 89 ha, aan D.M. en O.M. Nagel, van C.M.Tolmay,R570000. HOUTKOP (594), 90 ha, aan Gauteng Chickens, van Skippie Botha-trust, R675 000. PAARDEPLAATS(177),36ha, aan Annex Holdings, van A.T.N. en P.H.L. Tracey, R8 000 000. SLUIS (46), 22 ha, aan G.J. Putter, van N. Cerone, R375 000. VYFHOEK (428), 24 ha, aan Chubby Chick Wholesale 3 (Edms.) Bpk., van Potch Boudienste, R11 800 000. WITSTINKHOUTBOOM (430), 41 ha, aan K.M. Labuschagne, van P.C. Combrinck, R2 166 000. NIGEL BOSCHFONTEIN (386), 119 ha, aan WB Suikerbossie (Edms.) Bpk., van Heikloof-beleggings, R684 294. LANGZEEKOEGAT (323), 663 ha, aan die Regering van die Republiek van SA, van J.H. en M.M.M. Pretorius, R10 000 000. RIETFONTEIN (364), 35 ha,…