Innehållsförteckning för Apr - Jun 2022 från SARIE KOS

Ek was nog altyd een vir ’n seremonie . . . Ek hou daarvan om elke oomblik in my lewe te vier. Veral groot oomblikke, dan gaan ek gróót! Want ons moet trots wees op alles wat ons doen. Elke taak of mylpaal – groot of klein – verdien ’n viering. Dit motiveer ons om harder te werk sodat die suksesse groter en beter sal wees. Vir my was die geleentheid om die kosredakteur van SARIE te word seker een van die grootste mylpale in my lewe, een waarvoor ek nooit genoeg dankie kan sê nie. Die kans wat Michélle van Breda geneem het om ’n basies pas afgestudeerde met relatief min werk- en lewensondervinding aan te stel, was ’n groot risiko, maar ek wou aan haar bewys dat sy…

DIEMERSDAL NOBLE LATE HARVEST Een van my persoonlike gunstelinge, yskoud voorgesit saam met nagereg. Gemaak van sauvignondruiwe en verouder vir nege maande in houtvate, het dit soos jy verwag ’n groot neus van tropiese en droëvrugte. In jou mond is die soet-en-sagte-suurbalans perfek. Sowat R130 vir 500 ml, diemersdal.co.za DU TOITSKLOOF MOSCATO Alles waarvoor jy in ’n glas vra. Dié wyn met note van lietsjie, peer en heuning is semisoet en bied ’n goeie balans tussen geur, suur en soet. Die bottel het ’n skroefdop sodat jy dit vinnig kan knak en geniet. R65 vir 750 ml, dutoitskloof.co.za ROBERTSON WINERY NATURAL SWEET WHITE Kenmerkend van Robertson Winery is hierdie soet witwyn, geskik vir enige tafel of okkasie. Die RW Natural Sweet-reeks wyne word gemaak deur die vermenging van verskeie variëteite…

WORTEL-STRAALVISIE Eet wortels, dit verbeter jou nagsig! Nè? Wortels bevat betakaroteen wat jou oë voed en kan help dat jou sig nie agteruitgaan nie. Maar snags beter sien? Nee! Dis ’n mite wat glo gedurende die Tweede Wêreldoorlog deur die Britse lugmag as propaganda versprei is om die gebruik van radar in hul vegvliegtuie vir die vyand weg te steek. Britse vlieëniers eet baie wortels, daarom kan hulle so uitstekend in die nag sien, is rondvertel. Burgerlikes is aangemoedig om ook meer wortels te eet om beter te funksioneer as alles snags stikdonker is (om nie teikens vir die Duitse bomwerpers te wees nie). GOEIE, GOUE OLYFOLIE Ekstrasuiwer olyfolie raak nie beleë soos die tyd aanstap nie, maar bly sowat 18 tot 24 maande in ’n geseëlde bottel vars. Gebruik…

SAKPAS ETES As jy meer plantgebaseerde maaltye in jou weeklikse eetplan wil insluit of heeltemal vleisvry leef, dan is Bosh! on a Budget (HarperCollins UK, sowat R430) deur Henry Firth en Ian Theasby vir jou. Hierin sal jy meer as 100 heerlike veganisvriendelike geregte vind wat jou sak sal pas. GROENTE, DIS MOS LEKKER! Wil jy graag hê jou gesin moet meer groente eet of na ’n plantgebaseerde leefstyl oorskakel? Dan is Mokgadi Itsweng se debuutkookboek, Veggielicious (Human & Rousseau, sowat R375), net wat jy nodig het. Hierdie kookboek vier die groentetuin en seisoene met heerlike, bekostigbare resepte. SUKSES GEWAARBORG Die resepte in Foolproof Freezer (Hardie Grant Books, sowat R270) deur Rebecca Woods waarborg jou 60 smaaklike en eenvoudige etes wat met jou gunstelingbestanddele uit die vrieskas gemaak kan word.…

WAT IS DIE BESTE BLOM OM OP JOU TAFEL TE SIT WANNEER JY GASTE VIR ETE NOOI? Beslis rose. Dis tydloos, dit hou lank en jy kan dit sommer by jou naaste kruidenierswinkel koop. Ook lelies. Hulle hou weke lank. HOE HET DIT GEKOM DAT JY ’N BLOMWINKEL BEGIN HET? Ek is eintlik ’n apteker van beroep. My liefde vir blomme het begin toe van my vriendinne getrou het. Eers het ek hul blomruikers vir hul kombuistee gemaak en toe hul blomme vir hul troue begin doen. Dis ’n gawe van die Here af. WENKE VIR TAFELDEK MET BLOMME? Minder is beter. Ek het al gaste genooi vir ’n ete en net twee rose in ’n houertjie gesit, en dit was mooi. Loof is baie in die mode. Pluk sommer…

1 Jy kan nie terugkyk op die sukses van enigiets sonder om by die begin te begin nie. Waarom SARIE KOS? Daar was nie ’n Afrikaanse kostydskrif op die mark nie, maar die uitdaging was, wat sou hierdie tydskrif anders maak? Ja, natuurlik die taal, maar SARIE KOS moes ’n tydskrif wees wat vir die leser alles kan bied. Lesers wat elke dag vir hul gesin kook. Die inspirerende kok – die leser wat hou van onthaal en uitdagings. Die kok wat graag indulge en nie omgee oor die middellyf nie – jy weet, daai lekker goed in die lewe. En dan die gesondheidsbewustes. So het die vier afdelings ontstaan: Stylkos – onthaal met styl. Droomkos – daai lekker kosstories wat jou mond laat water. Tuiskos – elke dag se…

Marmite-enbiltongbroodbotterpoeding Glo my, hierdie resep gaan harte steel. Dis alles wat jy in smaak wil hê. Sit dit pleks van knoffelbrood voor by jou volgende braai. genoeg vir 6 100 g (110 ml) sagte botter, plus ekstra om pan te smeer 1 knoffelhuisie, fyngekap 1 hand vol sagte kruie (pietersielie, origanum en koljander), fyngekap 40 g ( potjie) Marmite of Bovril 100 g fyn poeierbiltong 12 snye soet, botterige brood, soos brioche of mosbolletjies 300 g beleë cheddarkaas, gerasper 4 eiers 400 ml melk 250 ml room 45 ml dijonmosterd sout en varsgemaalde swartpeper Verhit oond tot 180 °C. Meng botter, knoffel, kruie, Marmite en biltong saam tot gladde mengsel. Maak toebroodjies met die snye brood, bottermengsel en kaas. Smeer broodpan van 20 x 12 cm goed met ekstra botter.…

1 Gebruik sjokolade met ’n kakao-inhoud van 70% of hoër. 2 Moenie sjokolade in die mikrogolfoond smelt nie, dit kan brand en jou brownies ’n slegte nasmaak gee. 3 Wees versigtig dat jy dit nie te lank bak nie, anders word dit koekagtig en droog. Onthou, jy soek daai lekker sagte brownie. 4 Sit brownies in klein porsies voor, dis ryk. Kleiner porsies met goeie koffie werk goed. 5 Aangesuurde room (crème fraîche) of roomys is ook goeie pasmaats vir brownies. 6 Gee jou brownies tekstuur met fyngekapte neute of selfs koekies wat jy krummel. Voeg by jou beslag voordat jy dit bak. 7 Jy kan ook verskillende geure probeer. Gerasperde sitrusskil of bessies by die beslag gee brownies lekker nuwe lewe.…

James (Paul du Toit) is ’n desperate eks-sepiester wat, sonder sy vrou en kinders se wete, ’n rol as ’n fopdosser by ’n Kaapse nagklub aanvaar. Vir sy 40ste verjaardag ontvang hy ’n roomyskoek, maar toe sy vrou daar opdaag en hom in ’n rok betrap, smelt die koek tydens die grootste uitval van hul huwelik. Indien sy kollegas enigsins belang gestel het, sou hulle geweet het dat James ’n suiwelallergie het. Pandora Boxxx (Albert Pretorius) is ’n queen wat die ander se sigarette, grimering en middagetes steel en skaamteloos daarmee paradeer terwyl die slagoffers net kan toekyk. Vir haar verjaardag versoek sy elke jaar ’n pistasieneutkoek, bloot omdat sy weet dat niemand anders daarvan hou nie. Jay-C le Roux (Jacques Bessenger) is ’n saggeaarde siel wat James onder haar…

’N PLEKKIE IN DIE SON VIR DROËVRUGTE DEUR ERRIEDA DU TOIT In ’n kompetisie vir die kostitel Mej. Sonskyn loop ’n slopie gedroogde geelperskes lag-lag met die kroon weg. Al het dit plooiwange van dae onder die Afrika-son, laat ’n gedroogde taaipit- of elbertaperske die somer uitbundig weer vry op die koudste wintersdag. Gestoofde perskes is die mooiste metgesel vir wildspastei en beesstertbredie, die hartsbegeerte van ’n poedingbakkie en bekertjie warm vla. Ander bykosse staan in die skadu van vrugte wat so kan uitdy in sterk rooibostee. Die blink stroop wat dit vorm en die parfuumgeure van perskeblom, pypkaneel en nartjieskil waarmee dit die lug vul, verkrummel enige teenstander in ’n groenteskottel. Volg jy Leipoldt se raad, druk jy die plomp geweekte perskes eers behoorlik droog voor jy dit kook,…

Ek deel meer as net lekker resepte in hierdie kursus. Dit gaan oor die dieper lesse wat met wysheid kom. Ontspan, want in hierdie kookklasse is daar nie ’n klomp teorie of kwaai lektore wat punte gee nie Herman Lensing SLIMMER MET SARIE is ’n aanlyn projek wat elke entoesias die kans gee om meer te leer oor hul stokperdjie of om nuwe vaardighede baas te raak. In dié kursus rus Herman Lensing, kosredakteur van SARIE en SARIE KOS, en 13 kenners jou toe met 13 onontbeerlike tegnieke: Hoe maak jy pastadeeg, ontbeen jy ’n hoender of hoe verhef jy die nederige aartappel tot bistro-perfeksie? Selfs hoe om die regte (en beste) mes vir die werk te kies. Herman leer jou alles – al die moets en moenies en ’n…

2007 SARIE KOS het in September 2007 verskyn, maande voor SARIE se 60ste jaar. Dié 1ste uitgawe het binne 3 weke uitverkoop. Dit was (ná SARIE BRUID) SARIE se 2de handelsmerkuitbreiding, en is vandag die grootste. 70000 Teen 2009 is dit die grootste kostydskrif in SA en verkope draai by 70 000+ eksemplare per uitgawe. 10 Van tyd tot tyd gee SARIE KOS ook Engelse uitgawes uit onder die titel SARIE FOOD. Op lesersversoek het 10 uitgawes al verskyn. Pryse SARIE KOS wen in 2009 die groot prys waarvan almal droom, die Philip Tyler-trofee vir Algehele Uitgewersuitnemendheid! Beste Nuwe Tydskrif in SA. Vir mans SARIE KOS vir Mans word in Mei 2010 bekend gestel – ’n 1ste vir SA en slegs die 2de ter wêreld. Dit wen ook daardie jaar…

’n Tydlose gunsteling bly altyd in die mode. Dit is beslis die geval met die KWV Classic Collection, wat sopas met ’n elegante nuwe voorkoms bekend gestel is, maar steeds dieselfde klassieke wyn in jou glas is. Die gehalte en waarde van hierdie ongekompliseerde, vrugtige wyne koester die ongeëwenaarde KWV-erfenis wat oor meer as 100 jaar strek. Die getemde uitbundigheid van sy 11 enkeldruifsoort-wyne onderskei die Classic Collection as ’n reeks wat die diversiteit van die Kaapse Wynland uitbeeld. Die rooiwyne – Cabernet Sauvignon, Merlot, Shiraz, Pinotage en Petit Verdot – is ryk en propvol geur. Elegant en lewendig is die kenmerkende eienskap van die witwyne – Sauvignon Blanc, Chardonnay, Chenin Blanc, Grenache Blanc en Moscato. Die beste kenmerke van albei word vasgevang in die Rosé, wat as die perfekte…

PAVLOV SE VISSE Of dit nou ’n koi, goudvis, engelvis, harlekynvis of stertvis is . . . hulle leer gou wanneer en waar kos gaan verskyn. Leer jou troetelvisse dis etenstyd met ’n geluid, sein, of net deur hul tenk/poel op ’n sekere tyd van die dag te nader. Hy gaan vinnig besef wat aangaan en nader kom as jy die sein gee, al kry hy nie altyd kos nie. Selfs al hou jy ’n rukkie daarmee op, sal sommige visse gouer daarop reageer wanneer jy weer begin. Nee, visse het nie ore wat jy kan sien nie, maar tel geluide in die water met hul lyf en binneoor op. KATER SE WATER Katte het van nature ’n lae drang na water. Drink Kiets nie genoeg nie, kan hy urienwegprobleme…

1. Stel van 4 wit porseleinborde, R1 049 by Carrol Boyes 2. Die swart metaal-kersblaker sal enige tafel stylvol laat lyk, R139 by @home 3. Bonkige woudgroen glase met dekoratiewe riffies, R45 elk by thehomequarter.co.za 4. Geen tafel is klaar gedek sonder ’n lapservet nie, R229 vir ’n stel van 6 DSAkatoenservette, Yuppiechef 5. Die silwer eetgerei van Nicolson Russell is modern en elegant, sowat R1 659 vir ’n stel van 16 by aanlyn winkels soos Superbalist 6. Handgemaakte swart Kapula-kerse perfek vir jou tafel, R75 vir ’n stel van 4 by Yuppiechef 7. Ekstraklein deurskynende Daneblompot van Country Road, R199 8. Sit-sit só op die olyfgroen retroleunstoel van aluminium, R1 990 by Patio Warehouse…

Wag, eet koningin Liesbet dit? Ja. Wel, miskien. Dit kon ook oorlede prins Philip gewees het, of Charles en Camilla. Marmite het naamlik ’n koninklike waarborg ontvang, wat beteken die produk of diens word vir minstens vyf jaar aan die Britse koninklike familie verskaf. Ook moet die vervaardigers ’n doeltreffende omgewings- en volhoubaarheidsbeleid en aksieplan hê. Marmite. Die ou staatmaker in die ikoniese boepensglasbotteltjie met die geel-en-rooi etiket. Sout en sterk, soort van soos ’n sojasoussmeer. ’n Aangeleerde smaak, beslis. Dit kan die onvoorbereide palet so hard met ’n konsentraat van umami slaan, dat net die naam jou daarna ’n uitslag gee. Selde was ’n bemarkingslagspreuk só na aan die kol: Jy’s mal daaroor, of kan dit nie verdra nie, volgens die Britse webblad (marmite.co.uk). So byna was dit Marmageddon…

‘Ek het die werk by Oep ve Koep gevat om vervoerkoste te spaar,” vertel Rochelle Karolus in die sitkamer van die huis waarin sy sedert haar geboorte woon. Sy wou graag ná matriek maatskaplik studeer, maar daar was nie geld nie. Toe werk sy vir twee jaar by JET Stores op Vredenburg, totdat sy in 2010 by Oep ve Koep aangesluit het as administratiewe assistent vir Kobus van der Merwe se ma, Sanita. “Ek moes net ’n paar uur per dag admin doen, so as dit besig geraak het, het ek gehelp skottelgoed was. Later het ek begin toast maak en jam-potjies regkry en uiteindelik met lunch ook gehelp.” Binne ’n jaar was dit net Rochelle en Kobus in die kombuis en die admin was iets van die verlede. “Daar’s…

GNOCCHI IN ROOMSOUS Gebruik feta en kruisement vir dié lekker pastagereg. Kasslertjops gee die sous sy unieke rookgeur. genoeg vir 4-6 1. 1 ui, gekap 2. 2 knoffelhuisies, gekap 3. 4 kasslertjops, in blokkies gesny 4. 500 ml room 5. 4 takkies kruisement, fyngekap 6. 500 g gnocchi 7. 2 wiele feta, in blokkies gesny + olyfolie vir braai, sout en varsgemaalde swartpeper Verhit ’n bietjie olyfolie in ’n groot braaipan tot warm. Voeg uie en knoffel by en roerbraai vir 1 minuut. Voeg kasslerblokkies by en braai verder vir 2-3 minute of tot vleis begin verbruin. Gooi room by en bring tot kookpunt. Laat kook tot room met helfte afgekook het en ’n romerige sous vorm. Verwyder van hitte en roer kruisement by. Bring pot met water tot kookpunt…

1 Die Bingo Gala smaak soos ’n gewone Gala, maar dis die kleur, nie wynrooi nie maar kersierooi, wat mense na die variëteit aantrek. Die geld lê dus in die kleur. 2 Die Bingo is volkleur en nie gestreep soos ander Galas nie. 3 Alle Galas is min of meer dieselfde grootte. 4 Gala-appels proe almal min of meer dieselfde. 5 Oosterse lande verkies volrooi appels, so die Bingo word bestempel as ’n potensiële topverkoper daar. 6 Die kelkkant by appels is gewoonlik wit, by die Bingo-appels is dit so ’n ligpers kleur. Dit help jou om te sien dat die appel uiteindelik ’n rooier vrug gaan wees. 7 Die Bingo-mutasie is ontdek by Grabouw en word nou verder verbou in die Hemel-en-Aardevallei. 8 Jannie Wiegman is die eienaar van…

Droëvrugte-kaaskoek Die geheim van ’n goeie kaaskoek met ’n romerige tekstuur is om dit stadig te bak. genoeg vir een 30 cm-kaaskoek 1 pakkie (200 g) tenniskoekies, fyngemaak – gebruik ’n rolstok en slaan fyn in ’n GLAD Freezer Bag 50 g (120 ml) botter, gesmelt 800 g roomkaas 300 g aangesuurde room (crème fraîche) 180 g (215 ml) strooisuiker 40 g (70 ml) koekmeel 4 eiers gerasperde skil van 1 suurlemoen 100 g droëperskes, fyngekap Verhit oond tot 140 °C. Meng koekiekrummels en botter saam tot mengsel soos klam sand lyk. Voer ’n 30 cm-losboomkoekpan met GLAD Bake & Cooking Paper uit (foto 2) en druk krummelmengsel goed onder in pan vas. Gooi res van bestanddele in bak van elektriese menger en klits by matige spoed tot glad. Sit…

1 Vertel vir ons wie Mynhardt is. Ek is die somtotaal van ’n klomp ryk lewenservarings – groot hoogtepunte, laagtepunte, harde werk en ’n baie kleurvolle lewe gevul met hartsmense, mentors, kos-ikone en omgeemense wat my gevorm het tot op hierdie punt. Ek wou graag hulde bring aan almal wat deel was van my lewe sover en ek hoop lesers sien Mynhardt se hart in die boek. 2 Wat maak hierdie boek van jou uniek? Dit vertel my storie. Soos wat ek die boek aanmekaargesit en begin skryf en vertel het, het ek net weer besef hoe geseënd ek was en is en hoe daar niemand anders soos ek is nie. Die boek reflekteer hierdie gedagtes en is gevul met alles en almal vir wie ek lief is. 3…

Byna niks in die lewe, behalwe miskien die catering by ’n begrafnis, behoort óf soet óf sout te wees nie. By ’n roudiens hou jy dit eenvoudig, hoor ek, want dis moeilik om kieskeurig te wees terwyl jy staan en huil. Droë balletjies, blokkies, driehoeke en rombusvormige deeg dobber op ’n see van hartseer blaarslaai op die een tafel, en ’n diabeet se nagmerrie dryf in stroop op die ander. Soet of sout. En almal weet instinktief: dis barbaars om ’n soet ding te hap voor ’n sout een. Asof ’n begrafnis nie neerdrukkend genoeg is nie. En dan praat ons nog nie eens van die mense nie: die toebroodjies-sonder-korsie-tannies, die kurkdroogfrikkadel-ooms, die koeksister-kinders wat taai vingers aan kerkbanke, gehuurde tafeldoeke of die broekspype van benoude skrywers afsmeer. Asof die…

Besluit eers wat is die hoofgeur van die happie wat jy voorsit. Kies ’n sterk tee vir sterk geur, en andersom. Soek na geurnote in tee wat pas by geurnote in kos. Sitrus is ’n goeie pasmaat. Tee met melk se geurprofiel verskil. Proe dit dus met en sonder melk voor jy besluit hoe jy die tee enhappies gaan voorsit. Begin altyd met ligte tee en geregte eerste. Groen- en wittee (kamilletee is ook een) se geure is baie ligter as ons eie rooibos en swarttee s’n (Engelse, jasmyn- en Ceylontee). Kos ryk aan olie, soos salm, werk beter met tee sonder melk. Swaarder geregte soos sjokoladekoek of selfs steak werk beter met tee met melk.…

Die perfekte pasmaat vir dié Chardonnay. genoeg vir 4 8-10 hoenderdye (op die been met die vel aan) 30-45 ml olyfolie sout en varsgemaalde swartpeper 1 groot ui, fyngekap 15 ml botter 1 groot rooi soetrissie, gesny 10 ml tiemieblare (gekap maar sonder die steeltjies) 2 knoffelhuisies, fyngekap 30 ml meel 250 ml droëwitwyn 250 ml sterk hoenderaftreksel 15 ml heuning of bruinsuiker 250 ml room 200 g-pak babaspinasieblare 5 ml fyngekapte pietersielie vir garnering Smeer hoenderstukke met olyfolie, geur met sout en peper en verbruin in ’n groot braaipan. Haal uit pan en hou eenkant. Braai uie in botter tot dit begin sag word. Voeg soetrissie en tiemie by en braai vir 2 minute. Voeg knoffel by en braai nog ’n minuut. Sprinkel meel oor groente en meng tot…

Toe ek 16 jaar gelede by die ICA op Stellenbosch begin studeer het, kon ek net droom oor ’n kosloopbaan soos myne. My belofte aan myself is om altyd terug te ploeg sodat ons nuwe talent kan laat blom. Ons vier ons 70ste uitgawe saam met Letitia Prinsloo, hoof van die sjefskool, terwyl ek tafel dek en die studente kook WENKE OM ’N feestafel TE DEK Skeur growwe linne in smal stroke – dit kan maar rof en onperfek wees – en bind om die borde. Dit gee ekstra tekstuur en laat gaste voel asof hulle ’n geskenk oopmaak. Meng en pas verskillende teksture. Gedroogde blomme en vars tuinrose wat amper oopval, sorg vir mooi kombinasies. Al is hierdie ’n spyskaart vir ’n braai, kan jy steeds moeite met jou…

Boereworspiekelfrikkadelle met appelsalsa Die geheim is om die frikkadelle lekker klein te rol sodat dit op die Paasbolletjies pas. genoeg vir 6 FRIKKADELLE 1 sny witbrood 100 ml melk 500 g SPAR Select Oukransboerewors, maalvleis uit derm geryg 1 groot tamatie, geskil en grofgerasper 2 takkies tiemieblare, fyngekap sout en varsgemaalde swartpeper 6 SPAR Freshline-Paasbolletjies met ekstra speserye, vir voorsit 60 ml sagte botter, vir smeer SOUS 100 g (125 ml) SPAR-witsuiker 50 ml kerriepoeier 15 ml fyn borrie 15 ml fyn koljander 500 ml SPAR- wit asyn 125 ml water 2 SPAR Freshline-uie, fyngekap 6 lourierblare SALSA 2 SPAR Freshline-groenappels, in dun stokkies gesny 1 hand vol SPAR Freshline-koljanderblare, fyngekap 1 rooi SPAR Freshline-brandrissie, fyngekap 45 ml rooiwynasyn Frikkadelle Verhit oond tot 180 °C. Week brood in melk. Plaas…

1 Lig met die sout wanneer jy met Marmite kook. Dit bevat reeds sout, so proe eers voordat jy nog byvoeg en dalk jou gereg in die asblik laat beland. 2 Umami is wanneer jy iets proe wat die perfekte balans tussen soet, sout, suur en bitter is. Dit word ook ’n volronde mondgevoel genoem. 3 Jy kan enige Marmite-gereg ook met Bovril of Vegemite maak, kies die een waarvan jy hou. 4 Wanneer jy Marmite in ’n sous of soet vulsel gebruik, voeg dit eers by wanneer die mengsel die regte stadium bereik het, ’n karamelsous moet byvoorbeeld eers karamelliseer en ’n bottersous romerig wees. Die swart kleur kan jou flous oor waar in die proses jy is.…

Basiese brownie Ná jy hierdie brownie geproe het, gaan jy nie verder resepte soek nie. Wees gewaarsku, dis ryk, so sny maar klein blokkies. genoeg vir 8-10 blokkies 280 g (300 ml) botter, in blokkies gesny 450 g goeie donkersjokolade, fyngekap 400 g (500 ml) ligbruinsuiker 6 eiers 140 g (250 ml) koekmeel kakaopoeier vir oorsif Verhit oond tot 180 °C. Voer pan van 20 x 15 cm en sowat 3 cm hoog met bakpapier uit en spuit deeglik met kleefwerende kossproei. Plaas botter en helfte van sjokolade in ’n middelslagglasbak wat oor ’n pot met kookwater pas, maar sorg dat bodem van bak nie aan die water raak nie. Roer tot gladde mengsel en verwyder van hitte. Klits suiker en eiers in aparte mengbak met elektriese handklitser tot dik,…

Dit is ’n besonder genotvolle ervaring om as skrywer karakters uit te dink. Dis veral lekker wanneer jy weet dat daar fantastiese akteurs is wat gereed staan om in die karakters se velle te klim, hulle ’n lewe van hul eie te gee. ’n Fliek is net so goed soos die mense wat daaraan werk. Stiekyt is geseën met nie net talentvolle nie, maar ook toegewyde mense. ETIENNE FOURIE, SKRYWER EN REGISSEUR, OOR SY NUWE ROLPRENT, STIEKYT Ek doen baie navorsing vir karakters in die hoop dat hulle geloofwaardig sal wees – veral vir “larger-than-life”-karakters soos dié in Stiekyt. Ek imagine wie hulle is wanneer hulle saans ná werk by die huis is. En dan, natuurlik, wil ek weet wat hulle werklik gelukkig maak. En min dinge maak jou gelukkiger…

Varkrepe in appelbier Ek is mal oor gerookte varkrepe oor die kole. Dit braai lekker bros en jy kan dit sommer as ’n happie geniet voor die groot feesmaal. genoeg vir 6 1 ui, fyngekap 2 knoffelhuisies, fyngekap 125 ml soet sojasous 2 x 350 ml-bottels appelbier (cider) 60 ml brandewyn (as jy calvados kan kry, nog beter, dis ’n appelbrandewyn) 12 gerookte varkliesrepe (smoked pork belly rashers) Verhit oond tot 180 °C. Plaas uie, knoffel, sojasous, appelbier en brandewyn in ’n middelslagpot en bring tot kookpunt. Kook vir 5 minute en laat afkoel. Pak varkrepe in oondroosterpan en gooi sous oor. Oondbraai oop vir 20 minute. Kry intussen kole reg. Pak varkrepe in toeklaprooster en braai oor warm kole terwyl jy elke nou en dan met pansous verf. Braai…

In die somer gaan smul ons by vriende se oesters cabane aan wat hulle dieselfde oggend nog uitgetrek het Hoe lank bly jy al in Frankryk? Ek het elf jaar terug agter my hart aan hierheen verhuis. My man, Chappy van Vliet, was ’n professionele rugbyspeler en so trek ons toe vir jare van veld na veld en klub na klub. Enige rugbyspelersvrou sal vir jou kan sê dis ’n twee-tas-bestaan. Ons (en ons twee katte, Croissant en Taxi) het tien jaar gelede in die Bassin d’Arcachon kom woon. Dis waar Chap uiteindelik sy tokse opgehang het en hier lê my gehekelde kombers en Afrikaanse resepteboeke steeds. Chappy het ’n verfbesigheid en my werk is oor die waters (en die internet) in Suid-Afrika. Watter werk doen jy? Ek werk in…

My pa het saam met elke aandete rooi-uie gepiekel in wit asyn en versmoor met peper geëet. Watter rol dit gespeel het in die feit dat hy in sy tagtigs nog gedraf het, kan mens net gis. Jy hoor mos gereeld hoe goed asyn vir jou is. Jare later het ek gereeld soggens verdunde appelasyn op ’n leë maag ingewurg in die hoop dat dit die kilo’s sal laat wegsmelt. (Dit het nie.) En pas het ek nog ’n gebruik vir asyn ontdek: Vir die kamikaze-rysmiere in my tuin. Ná kanne asyn en ure voor daai rysmiergaatjies kan ek jubel: Dit breek hul spoed, ja. (Maar cayennepeper is beter en laat hulle die rysmierpaleis blitsvinnig ontruim.) Nie baie dinge is tegelykertyd ’n staatmaker as jy kos maak én huis skoonmaak…

REDAKSIONELE SPAN REDAKTEUR Michélle van Breda KOSREDAKTEUR Herman Lensing herman.lensing@sarie.com SKRYWER & KOSASSISTENT Marzanne Schoeman 060 904 5090 ONTWERPDIREKTEUR Anel Stapelberg TEKSREDAKTEURS Liesl Roodt & Natasja Lochner REPRODUKSIE Noorieyah Fakier & Dewald Spies REDAKSIONELE ASSISTENT Liesel Pienaar 073 272 0707 ADVERTENSIEVERKOPE & BORGSKAPPE HOOF VAN BORGSKAPPE Nikki Ruttimann Nikkir@media24.com HOOF VAN ADVERTENSIEVERKOPE Sarah Curtis-Bowles 021 461 2396 SLEUTELKLIËNTBESTUURDER Susan Pienaar 083 281 7300 SLEUTELKLIËNTBESTUURDER Charlene Meyer 082 928 5970 SLEUTELKLIËNTBESTUURDER Daniela di Giovanni 083 709 7040 DIVERSE INKOMSTE ONTWIKKELINGSBESTUURDER Lise van Breda lise.coetsee@media24.com GELEENTHEIDSDIREKTEUR Edmund Beukes Edmund.Beukes@media24.com KOÖRDINEERDER: DIVERSE PROJEKTE Anéne de Klerk anene.deklerk@media24.com CREATE STUDIO KREATIEWE DIREKTEUR Michael de Beer mike.debeer@media24.com HANDELSREDAKTEUR Gerda Engelbrecht gerda.engelbrecht@media24.com BEMARKINGSBESTUURDER Andile Nkosi andile.nkosi@media24.com UITGEWERSPAN HOOFBESTUURDER MEDIA24 LEEFSTYL Nerisa Coetzee FINANSIËLE BESTUURDER MEDIA24 LEEFSTYL Jameelah Conway BEDRYFSBESTUURDER MEDIA24 LEEFSTYL Edwina Lyners SIRKULASIE SIRKULASIEBESTUURDER Armand…