Innehållsförteckning för 04 Nov 2021 från TV Plus Afrikaans

Freddie Highmore se karakter, dr. Shaun Murphy, doen baie meer as net op pasiënte opereer en gebreekte bene spalk in seisoen 4 van die mediese drama The Good Doctor, Maandae op M-Net (*101) op 19:30 of op Catch-Up. Hy groei as ’n man, en ontdek sy sosiale onbeholpenheid kan ’n werktuig pleks van ’n struikelblok wees, soos in die eerste drie seisoene. “Die aantrekkingskrag van Shaun en die program was nog altyd, ten minste uit my karakter se oogpunt, optimisme en hoop. Sy positiewe uitkyk op die wêreld . . . Daar was beslis baie wipwaritte. Om iemand soos Shaun te hê, met sy meedoënlose begeerte om die goeie in mense te sien en hulle nie te oordeel nie, en om nie afleidings te maak sonder om iemand eers te…

Wanderlus Seisoen 1 Saterdae kykNET (*144) 19:30 Dit het al ’n leefwyse vir die paartjie Nicole Hellinger en Hennie Bosman van Franschhoek geword om naweke hul voertuig met die noodsaaklikste toerusting, soos ’n koelsak, kampeertoerusting en visstokke, te pak, en die lang pad te vat om nuwe ongerepte bestemmings in die Wes-Kaap te ontdek. Hul twee viervoetige vriende, Chloe en Diesel, reis natuurlik saam. Kos is glad nie ’n probleem nie, want die twee geesdriftige hengelaars gooi langs die pad hul vislyne in die see of ’n dam, haal oesters uit of vang kreef. Nicole, ’n opgeleide sjef, tower dan met hul vangs ’n smullekker koningsmaal op. En kyk maar gerus, want dié twee se opwindende wedervaringe sowel as hul passie vir die lewe en natuur is aansteeklik. SAMESYN EN…

Daar is min dinge wat Elana (Esther von Waltsleben) se oë so laat vonkel soos kinders. Sy straal van vreugde wanneer sy in die geselskap van ’n kind is, soos wanneer sy Stella (Mishka Ross), haar vriendin Bianca (Simone Biscombe) se dogter oppas. “Ouerskap sal ’n wonderlike ervaring vir Elana wees,” sê Esther. “Haar huwelik met haar vrou, Susan (Natasha van der Merwe), is gesond en sy voel dis tyd dat hulle met ’n gesin begin.” Maar Susan is nie heeltemal op dieselfde bladsy as Elana nie, en dit bring konflik, trane en groot drama! ONKANT GEVANG Susan is ontsteld wanneer sy uitvind Elana het ’n afspraak by ’n vrugbaarheidskliniek gemaak om te kyk of hulle met ’n gesin kan begin. “Dit vang haar onkant, en sy voel dit is…

Wanneer die meeste van ons ’n slegte dag beleef, is dit gewoonlik om ’n moeilike kliënt by die werk te hanteer. Maar Hillside se vriendelike paramedikus Tjattas (Rickus Strauss) se slegte dag het begin met die dood van ’n buurman en geëindig met Tjattas wat ’n volwaardige renosterstroper word. Praat van ’n onmoontlike situasie. INDIREKTE SKADE Die afgelope weke het ons gesien hoe Tjattas onkant gevang is deur ’n stropingsindikaat nadat hy by oom Bricks (Nico Allers) se finansiële en misdaadgemors ingesleep is. “Tjattas ken oom Bricks van die plakkerskamp waar hulle bure was,” verduidelik Rickus. Maar wanneer oom Bricks in Oktober byna dood by die Hillside-kliniek opdaag, met ’n renosterhoring in sy bors, wens Tjattas hy het oom Bricks nooit ontmoet nie . . . Sowat ’n week later…

Jy moet erken die moorddadige, booswig-sakevrou Felicity Price (Mary-anne Barlow) se liefdeslewe is tragies. “Felicity glo in die liefde, maar dit ontwyk haar,” sê Mary-anne. “Haar lewenslange begeerte om deur haar pa, Sebastian Price (Deon Lotz), wat sy in episode 1 vermoor het, raakgesien te word, het haar persoonlike verhoudings gekompliseer.” En dit word nie makliker nie: Felicity het ’n blinde wellus vir speurder Marco Andino (Nico Panagio), maar sy word gevra om haar nuwe liefde te verraai en aan die Price-familie oor sy optrede te rapporteer . . . al is dit eintlik tot haar voordeel. DERDE KEER GELUKKIG? Sedert Legacy in September 2020 begin het, was Felicity se verhoudings ’n onvoorspelbare wipwarit. Eerstens het sy in die geheim ’n affair met haar lyfwag-chauffeur Stefan Potgieter (Sean-Marco Voster) gehad.…

Dis lekker om TV te kyk en oor die karakters te gis. Het Annelize (Cindy Swanepoel) in Binnelanders (lees meer op ble. 24 en 25) regtig alweer probeer om iemand ’n rat voor die oë te draai? En moet Kristien (Marlee van der Merwe) nou regtig weer haar neus in iemand se sake steek in Getroud Met Rugby (lees meer op ble. 27 en 41). Maar dikwels spoel dié kommentaar en gegis oor na die akteur self – en dis daar waar dit problematies raak. Stel jou voor iemand skryf op jou Facebook-muur: “Die grootste fout wat jou ouers ooit gemaak het was om nie ’n aborsie (met jou) te kry nie.” Dis wat die Kwêla-veldaanbieder en sanger Willem Botha al van homself moes lees. Of wat as jy iemand…

Die Hof Seisoen 1 Woensdae kykNET & kie (*145) 20:00 Talle mense sit deesdae met hul hande in die hare of beland in ’n doodloopstraat wanneer hulle finansieel of onregmatig ingedoen word, of dalk met ’n slenter gevang word. Regsadvies en regskoste is duur en die gemiddelde man op straat kan dikwels net nie bekostig om die skuldige party hof toe te sleep of te dagvaar nie. Klein sake kan wel by die Hof Vir Klein Eise aanhangig gemaak word, maar hier is nóg ’n deur om aan te klop: Die reeks Die Hof bied ’n oplossing vir Jan Alleman wat ’n geskil of saak onder die waarde van R20 000 wil besleg. GROOT LEEMTE Advokaat Suzie Gordon, arbiter van die reeks Die Hof, sê dit is die heel eerste…

Net Koffie Seisoen 2 Sondae kykNET (*144) 17:00 Wat ookal die kwaal, ’n goeie koppie boeretroos is dikwels net die regte medisyne – koffie kan help. En een persoon wat haar koffie ken en altyd die regte koppie kan brou, is Henriëtte Marx (38), eienares van die koffiemaatskappy en verskaffer Coffee Excellence. Henriëtte is ook die aanbieder van die reeks Net Koffie. Die naam sê presies waaroor dit gaan: Koffie, en alles rakende koffie word in die reeks ondersoek. In seisoen 2, wat nou uitsaai, reis Henriëtte na Colombia – een van die toplande wat koffie vervaardig en uitvoer – hou koffiekuiers saam met bekendes, en bak, brou en kook met koffie in die kombuis. Dis ’n smaaklike affêre, dus maak vir jou ’n koppie en lees verder oor Henriëtte…

Die wêreld is besig om vuurwarm te raak vir die paramedikus Danny (Bradley Olivier). Sedert die booswig Nadine (Margit Meyer-Rödenbeck), Danny se ma, Vida (Vinette Ebrahim), se vennoot, in Oktober haar verskyning in Pretoria gemaak het, is Danny in sy familie se misdaadbedrywighede vasgevang. Hul hoofdoel is om dwelms te vervoer, wat Danny nou in sy ambulans doen – want wie sal nou vermoed ’n ambulans vervoer onwettige dwelms? Danny het aanvanklik na Nadine se pype gedans, maar nou trek hy ’n streep! Maar so maklik gaan Nadine nie haar kloue uit Danny trek nie. Nadine weet hoe om ’n dreigement oortuigend uit te voer. MIN KEUSES Danny is in ’n onmoontlik situasie wanneer Nadine se dreigemente om sy meisie, Chanel (Lindsey Abrahams), leed aan te doen vererger. “Nadine dryf…

Die skrif is al ’n rukkie aan die muur: Renate (Christel van den Bergh) het die afgelope paar weke al hoe meer irrasioneel begin optree en haar lewensmaat Simon (David Louw) teen die mure begin uitdryf. “Simon weet nie presies wat met Renate aangaan nie en hy dink sy probeer net opsetlik moelik wees. Die gedagte dat sy aan nageboortelike depressie ly, kom hoegenaamd nie by hom op nie,” sê David. Daar’s ook geen tekens dat Renate se toestand verbeter nie. Inteendeel, sy raak net by die dag erger, en ál meer obsessief oor die kleinste dingetjies. BREEKPUNT Dan kry Renate ’n ineenstorting en Simon jaag met haar hospitaal toe. “Simon gaan kuier vir Renate in die hospitaal en sê vir haar hul babaseuntjie, Regardt (Daniel Louw), gaan van haar…

VERLEDE KEER Eve het teenoor Brady oor haar bose dade gebieg, Eric het Maggie se hulp gevra om Nicole te vind, en Jennifer was bang sy gaan Eric verloor nadat sy vir hom gejok het. Kristen besoek Marlena in die hospitaal om die moord af te handel, Roman het John aangemoedig om met Hattie te trou, en Sami het Will se besluit om by Paul te bly uitgedaag, omdat Will eintlik op Sonny verlief is. IN DIÉ UITGAWE Sami maak Stefan ’n aanbod wat hy nie kan weier nie, en Kristen ontmoet Xander en onthul hulle werk saam. Nicole en Eric het uiteindelik seks, Xander stoot die geheimsinnige pasiënt by die hospitaal uit, en Lucas lig Bonnie in hy dagvaar vir alleentoesig oor die baba. Eric en Nicole bring Sami…

Kom ons begin met Sesame Street! Hulle is sedert 1969 met ons en daar is geen keer aan die wollerige Muppet-marionette in die opvoedkundige vermaakreeks Sesame Street nie. Wat ookal die maatskaplike kwessie is, dit word in die program bespreek – van afknouery, om nee te sê vir portuurdruk, tot hoe om ’n straat veilig oor te steek . . . daar is niks te groot of te klein vir die karakters soos Kermit The Frog, Miss Piggy, Big Bird en Elmo nie. Het jy geweet daar was reeds 52 seisoene sedert die eerste uitsending van Jim Henson se skepseltjies in Amerika? Dis meer as 4 500 episodes, en hulle is nog lank nie klaar nie. Meer as 95% van voorskoolse kinders in die VSA kyk Sesame Street voor hulle…

Ram Vir ’n Rus Seisoen 1 Woensdae VIA (*147) 20:00 Daar is iets aan maatsoekreekse, soos die Amerikaanse The Bachelor/The Bachelorette of die aanlyn stroomdiens Netflix se Love Is Blind, wat derduisende kykers nie kan weerstaan nie. Episode ná episode volg ons dié liefdesreise en kies ons gunstelinge wat ons dink bymekaar moet pas – en glo hulle gaan vir ewig en altyd gelukkig wees. En nou het ons ’n nuwe maatsoekprogram in Afrikaans – en boonop kom die pasmaats van Rusland! Ram Vir ’n Rus laat die liefdesvonke behoorlik spat en die vervaardigers speel Kupido vir die vier manne, oftewel ramme, wat hoop om liefde agter die Ystergordyn te vind. WAAROOR GAAN DIT? Vir die kykers wat nog nie die eerste twee episodes van die reeks gesien het nie…

Dis nag in die Samsoedien-huis! AB (Cedwyn Joel) het uitgevind die nier wat hy onlangs kry het, is op die swartmark gekoop, en hy is boos! “Hoewel AB dankbaar is vir sy nuwe nier, is daar iets wat nie vir hom reg voel oor die hele scenario oor hoe ’n skenker net uit die bloute gevind is nie,” sê Cedwyn. Iets het nie geklop nie, en hy het sy vriend die eksspeurder Chris (Marcel van Heerden) gevra om ondersoek in te stel. Chris kom toe op die sindikaat af wat AB aanvuur om sy halfbroer, Nazeem (Irvine van der Merwe) – wat AB vermoed die nier by die sindikaat gekoop het – te konfronteer. Nazeem kom uit met die waarheid, wat AB rooi laat sien en hy verklaar oorlog teen…

Daar is probleme in die Ferreira-huishouding en die jong Trudie (Daniah de Villiers) is die oorsaak. Dié vurige tiener met ’n omgeehart het onlangs weer haar verskyning in Binnelanders gemaak en daar hang ’n donker wolk oor haar omdat sy uit die skool geskors is nadat sy haar onderwyser se motor met suur beskadig het. “As gevolg daarvan mag Trudie nie haar matriekeindeksamen skryf nie. En om alles te vererger, weier sy om te verduidelik hoekom sy dit gedoen het,” sê Daniah. Renate (Sandra Vaughn), Trudie se ma, weet nie wat in haar kind gevaar het nie, en almal hoop haar tannie Naomi (Je-ani Swiegers) en oom Louis (Germandt Geldenhuys) kan haar laat bieg oor wat aangaan. KOMMER VERERGER “Kykers sal ’n opvallende verskil aan Trudie en haar optrede merk,”…

Dit lyk asof Thys (Sherman Pharo) en Ronel (Melanie du Bois) se huwelik op die rotse is. Ronel het ’n tyd terug die nuweling Nolan Baadjies (Jacques Bessenger) omgery en haar skuldgevoel het haar daagliks na sy hospitaalbed gedryf. En só het sy gou op die vreemdeling verlief geraak. Thys het haar talle kere gesmeek om dié kuiery te staak, maar Ronel was hardkoppig. Die situasie was vir Thys ondraaglik en hy besluit hul paadjies moet skei. Hy sê vir Ronel sy moet uit die woonstel trek, want hy gaan die huur opsê. Ronel is hewig ontsteld, sê Melanie. Maar, voeg sy by, dis nog te vroeg om van skei te praat. Ronel glo sy en Thys is vir eers net uitmekaar. HET PROBEER Intussen is Thys se familie omgekrap…