Innehållsförteckning för September 2018 från Weg! Ry & Sleep

Die Yslandse ryhuisverhuurder Happy Campers, wat fokus op kleiner ryhuise wat ook meer geskik is vir jonger toeriste, het ’n tak in Somerset-Wes oopgemaak. Tans kan ’n mens ’n Nissan NV200 by hulle huur vir R850-R1 150 p.d. (afhangend van die seisoen). Die NV200 is ingerig vir twee mense en sluit in ’n gasstoof, 4 gassilinders, ’n ys-vrieskas, ’n wasbak met lopende water, eetgerei en breekware, en beddegoed. Die Fiat Ducato is ’n opsie vir tot vyf mense en kos R1 550-R1 850 p.d. Die Ducato se geriewe is soortgelyk aan dié van die NV200. Die kampstoele (R50), slaapsak (R250), kamptafel (R100) en ekstra gassilinders (R40) moet ’n mens afsonderlik byhuur teen ’n eenmalige tarief. Die kinderkarstoeltjie (R100) en Garmin-GPS (R100) se tariewe word per dag bereken. Kontak 021 813…

Die oorspronklike plan was om die tweespoorpaadjies van die Kougawildernisgebied in die Langkloof met díe Jaguar te verken, maar toe ons hoor die bergtoppe van die Kamanassie af tot doer onder in die Kaap lê spierwit onder die sneeu, het ons die tog na Hoeree aan die einde van die Kouga-wildernis-4x4-roete kortgeknip en ons warmste klere in ’n tas geboender. Ons gaan sneeu kyk! Heelpad streekpad Ons trek teen oggendskemer uit die Oos-Kaapse dorp Joubertina weg. Hopelik is ons vroeg genoeg om vóór Oudtshoorn se verkeerskonstabels by die Swartbergpas uit te kom – voor hulle dit vir verkeer kan sluit. Met die druk van die ritmodusknoppie skakel ons oor van die eko- na die dinamiese modus, want dis wraggies nie nóú die tyd om brandstof te bespaar nie. Die E-Pace…

Die tradisionele roete na die suide van Namibië vanuit die Kaap is met die N7 langs, deur Springbok in die Noord-Kaap reguit tot by die Vioolsdrif-grenspos. Anderkant die grens is die B1 jou vinnigste roete tot by Keetmanshoop, Mariental en uiteindelik Windhoek. Jy kan ook in ’n japtrap gewilde bestemmings soos Ai-Ais en die Visriviercanyon van dié hoofpad af bereik, maar wat van die gebied wes van die C13-pad anderkant die Visrivier? Wat is daar te sien? As jy hierdie deel wil besoek, gaan dit jou immers ekstra rytyd kos en jy sal iewers moet oorslaap. Vir die deursnee-reisiger op vakansie was dit voorheen ’n kopseer, want jou keuses is Rosh Pinah óf Oranjemund, wat vanweë die Sperrgebiet besoekerspermitte vir buitemense vereis het. Twee onlangse ontwikkelings maak die suidwestelike hoekie…

“Jy móét hier af, want dis haas onmoontlik om terug te stoot. Jou voertuig se bande klou moeiteloos aan die graniet, maar skakel liefs oor na laestrek... ” Nelspruit is ’n gewilde aftrekplek vir vakansiegangers wat van Gauteng af na die Krugerwildtuin reis. Ook Mosambiekers kom oor die Maputokorridor Nelspruit toe om hulle maandelikse inkopies te doen. Skaars 10 minute buite die stad tref jy die Schagenvallei aan. Die vallei deel sy naam met ’n streek in die noorde van Nederland (nie juis bekend vir berge en valleie nie) en in dié vallei kom jy die nedersetting Alkmaar (ook ’n Nederlandse naam) teë. Hier, op ’n sitrus-enmacadamiaplaas met dieselfde naam, is die Alkmaar-4x4-roete. Wees op die uitkyk vir die baniere vir die Kwanyoni-lodge langs die N4-snelweg. Draai hier af (S25.449700…

VISVANGOORD PIENAARDAM-ONTSPANNINGSOORD Kies jou dam Die Pienaardam-oord is skaars 10 km buite Middelburg waar die N4 deurskiet Laeveld toe. Die oord beslaan ’n hele 300 ha en die Pienaardam lê voor jou soos jy die oord binnery. Die ontvangskantoor sit regs en die staanplekke begin van hier af antikloksgewys teenaan die oewer tot op die oorkantse wal. Die kans is goed dat jy ’n staanplek teen die oewer gaan kry, want 55 van die 80 staanplekke is by die water. Die 17 staanplekke op die oorkantse wal het wel nie kragpunte nie, maar net soos al die ander het elkeen sy eie waterkraan en geboude braaiplek (met ’n rooster). Die staanplekke is meestal op gras, en afhangend van waar jy staan, is hier ook ’n hele paar koeltebome om van…

Toe hulle Botswana in 2010 die eerste keer besoek het, was die Guma-strandmeer op die Henerys se kamplysie. Hulle het egter nooit daar uitgekom nie, want hulle seun, Wayne, het by die Tsodilokoppies malaria opgedoen en is in die Delta-hospitaal in Maun opgeneem vir behandeling. Die Henerys moes noodgedwonge die bespreking by Guma kanselleer. Toe hulle egter in Desember verlede jaar saam met hulle vriende Hannes en Mary-Ann van den Berg van Carltonville weer na Namibië en Botswana mik, was die Guma-strandmeer opnuut op hulle lys. En dié slag sou niks hulle keer nie. Lettie vertel... En daar sit ons... “Ons draai by Etsha 13 van die A35-pad af en volg die grondpad tot op die dorpie. Hier is geen duidelike aanwysings na Guma nie, en ek en Mike begin…

Wat sê die boekie? Brandstof Petrol Enjin 1,984 l Silinders 4 inlyn Krag 162 kW @ 4 500-6 200 r.p.m. Wringkrag 350 Nm @ 1 500-4 400 r.p.m. Ratkas 7 spoed-outomaties (DSG-dubbelkoppelaar) Aandrywing Allewiel, maar hoofsaaklik met die voorwiele. Tarra 1 680 kg BVM 2 420 kg BKM 4 925 kg Sleepvermoë vir geremde sleepding Tot 2 200 kg Afmetings 4 701 mm (l); 1 839 mm (b); 1 656 mm (h) Asafstand 2 790 mm Spoorwydte 1 585 mm (voor); 1 574 mm (agter) Grondvryhoogte 201 mm Brandstoftenk 60 l Prys (nuut) Vanaf R604 800 Prys (tweedehands) Ons het op autotrader.co.za ’n 2018-model met 200 km op die klok gesien vir R549 500. Vinnige feite Die sleephaak Die haak is nie standaard nie en die maksimum-neusgewig wat die bol…

Daar is ’n handjie vol tydlose uitvindsels wat vandag nog lyk en werk soos toe hulle die eerste keer die lig gesien het. Goed soos doringdraad (wat die Amerikaner Joseph F. Glidden in 1874 gepatenteer het), die skuifspeld (wat in 1849 deur Walter Hunt van New York uitgevind is) en die vlieëplak, wat in 1905 noodgedwonge ontwerp is toe die Amerikaanse staat Kansas onder ’n ongekende vlieëplaag deurgeloop het. As dit by boswoonwaens kom, kan jy dieselfde sê van die Commander wat vandag, 15 jaar ná die die eerste model, steeds geskoei is op die oorspronklike bloudruk. En dít beteken net een ding: dis ’n weldeurdagte woonwa wat ordentlik ontwerp is vir kampeerders wat ’n wa met hulle veldryer wil sleep tot waar dié nie meer kan nie. Ons het…

’n Tipiese loodsuurbattery bestaan uit ses selle wat in serie verbind is. Elke sel verskaf 2,1 V – dus gee al ses selle saam 12,6 V. Elke sel in ’n loodsuurbattery bestaan uit loodplate (katodes) en looddioksiedplate (anodes) wat mekaar afwissel en in ’n swaelsuuroplossing (elektroliet) gedompel is. ’n Chemiese reaksie wat in die elektroliet tussen die katodes en anodes plaasvind, laat elektrone vry wat deur geleiers vloei om elektrisiteit op te wek. Terwyl die lading in die battery gebruik word, reageer die swaelsuur met die plate en vorm daar ’n loodsulfaatlagie op die metale. Wanneer die battery herlaai word (deur jou motor se alternator), word die proses omgekeer en die loodsulfaat word nou omskep in looddioksied. Die proses kan herhaaldelik plaasvind totdat die battery mettertyd gaar is.…

Die battery is in 1800 deur Alessandro Volta gepatenteer – nou weet jy sommer ook waar “Volt” vandaan kom! Volta het 20 jaar voor dit dopgehou hoe sy vriend Luigi Galvani ’n padda dissekteer. Luigi het die padda aan ’n bronshoek gehang, en elke keer wanneer hy die lem van sy ystermessie in die dooie padda se boud gesteek het, het die padda se been geskop. Die stomme Luigi kon dit nie begryp nie, maar Volta het later ontdek dat twee verskillende soorte metale wat deur ’n vogtige medium verbind is, elektrisiteit opwek. Die battery wat Volta in 1800 gepatenteer het, het bestaan uit verskeie sink- en koperskywe wat in soutwater gedompel is. Jy kan Volta vandag bedank vir elke kopliggie, draagbare radio, slimfoon en ontelbare ander uitvindings wat op…

Ekstra myl in die Kgalagadi Onlangs het ons die voorreg gehad om die Kgalagadi-oorgrenspark vir 15 wonderlike dae te besoek. Maar die teëspoed het ons getref en ons wil graag die kampbestuurder van Nossob, Jaco Filander, en die personeellede Lesley en Stevan Strauss, Jackie Titus en Evan Bok bedank – ook die ander mense wie se name ons nie ken nie. Ons voertuig se aansitter het by die Cubitje Quap-watergat, ver van alles af, die gees gegee. Ons het dit skaars twee jaar gelede vervang en was baie verbaas dat dit weer moeilikheid gee. Met die hulp van ons seuns tuis kon ons ’n nuwe aansitter op Upington opspoor. Ons hoor toe by Jaco of hy dalk weet van iemand wat toevallig op pad terug is van Upington af diékant…

Die jaar 1978 was ’n interessante een vir Suid-Afrika. Die Groot Krokodil neem by John Vorster oor as eerste minister van Suid-Afrika, Margaret Gardiner word gekroon as Mej. Heelal, en die eerste Isuzu-bakkie rol uit die Kempston Road-aanleg in Port Elizabeth. Die 1,6 l-petrolweergawe het destyds R3 485 gekos en die 2,0 l diesel ’n stewige R4 295. “Isuzu het oor die jare baie veranderings beleef. Ons het by die Kempston Road-aanleg begin en ná vyf geslagte het ons na die meer moderne Struandale-aanleg verhuis. Ses geslagte later en Isuzu is steeds een van Suid-Afrika se gunstelingvervaardigers,” sê Johan Vermeulen, Isuzu se vervaardigings-en-produksiebestuurder. Isuzu-bakkies was van meet af aan innoverend. Hulle het gespog met die eerste tandstang-en-kleinratstuur en onafhanklike voorvering, én het die eerste dubbelkajuit in Suid-Afrika gebou. Meer as…

Beproef alles en behou die goeie – dít behoort Subaru se leuse te wees. ’n Paar jaar gelede het die vervaardiger met dieselenjins geëksperimenteer en ’n 2 l-turboaangejaagde oliebrander geskep. Nou, in 2018, het Subaru daai dieselenjin onder sy jis geskop en besluit om voortaan net met petrolenjins verder te boer. Dit beteken jy kan nou ’n Outback met een van net twee enjins kies: ’n 2,5 l-viersinlinderbokserenjin of die vlagskipmodel se 3,6 l-sessilinderbokser. Ons het laasgenoemde ’n week lank in die Kaapse winter bestuur om te sien waar dié Subaru verbeter is. Nuwe neus Nes met enige ontrimpeling is die sigbaarste verandering natuurlik die neus. Subaru het besluit om sy kenmerkende grootoog-hoofligte te vervang met ’n slanke ontwerp. Die ou sierrooster het ook die trekpas gekry, en in sy…

Sophia van Taak en Toast Coetzer, joernaliste by ons sustertydskrif, Weg, het onlangs byna 4 000 km in ’n Toyota Fortuner afgelê met die verfilming van die TV-reeks Weg Agterpaaie se mees onlangse reeks. Die reeks het op die Weskus gefokus met die begin in Kaapstad en die eindpunt by Alexanderbaai. Hulle het ook ’n ompad deur die binneland gery en die Sederberg, Namakwaland, Richtersveld en Boesmanland verken. ’n Mens het ’n produksiespan nodig om ’n TV-program te maak en die kameramanne Chris Kritzinger en Louw Prinsloo het saamgery. Wanneer ’n mens na Weg Agterpaaie Weskus kyk, sien jy net die wit Fortuner waarmee Sophia en Toast gery het. Maar elke skoot van daardie wit Fortuner wat op ’n prentjiemooi grondpad afdraai,…

Die Fx4 is een van die gerieflikste bakkies op die pad, veral met ’n outomatiese ratkas soos in ons toetsmodel. Die EPAS- elektroniese stuurstelsel maak die draaiwerk maklik en die bakrolbeheerstelsel help om die rit aansienlik gemakliker te maak. Onder die enjinkap grom dieselfde betroubare 3,2 l-turbo-diesel as in die gewone Ranger. Die outomatiese ratkas “leer” jou bestuurstyl aan, en teen die einde van die langnaweek op Standskloofpark het die bakkie diep in ons hart ingekruip. Krag 147 kW @ 3 000 r.p.m. Wringkrag 470 Nm @ 1 500 r.p.m. Prys R626 300…

Die Tiguan Allspace vervang nie die bestaande Tiguan nie, maar bied bloot ’n ekstra keuse aan kopers. En met dié nuweling speel Volkswagen mooi in slepers se kraal, want afgesien van die groter beenspasie vir die agtersitplek is die bagasieruim ook groter – in so ’n mate dat twee opslaansitplekke hierin pas. Dit maak die Allspace ’n model in eie reg wat nou netjies tussen die gewone Tiguan en die maatskappy se vlagskip-nutswa, die Touareg, inpas. Die Allspace is dus ’n uitstekende gesinsvoertuig waaraan jy met ’n geruste hart ’n wa kan haak – sy turboaangejaagde 2 ℓ-petrolenjin laat nie op hom wag nie. Kies die model vir jou Die Allspace is beskikbaar in vier modelle met twee enjingroottes. Die 1,4 ℓ is die enigste een met ’n sesganghandratkas en…

Die Commander se twee deure sit regoor mekaar in die sypanele, voor die wiele. Die “hoofdeur” is links aan die buitekombuiskant waar die ander een in die storttent oopmaak. Conqueror gebruik etlike jare al unieke hoekstutte wat verskil van die domkragsoort wat ’n mens by die meeste ander vervaardigers sien. Hierdie is ’n hoekstut in die ware sin van die woord, want hy stut die wa op die agterste hoeke. Weggebêre vou dit op teen die agterpaneel van die wa. Vir die uitslaanslag vou ’n arm oop net soos ’n mens jou opgetrekte arm reguit maak. Aan die onderpunt is ’n voet wat dan teen die grond vastrap. Van die voet af vou ’n volgende arm terug boontoe wat die helfte van die lengte van die groter arm is. Hierdie…

Die maatskappy het in 1991 sy deure geopen en aanvanklik sagte koelsakke in hulle klein fabriek in Maitland vervaardig. Die Camp Cover-reeks soos ons hom vandag ken, het 20 jaar gelede die lig gesien en het dié familie-onderneming in staat gestel om sy groter fabriek van 2 000 m² in Blackheath te bekom. Vandag het hulle nie minder nie as 80 mense in diens. Die fabriek lewer gemiddeld 150-350 sakke per dag, afhangend van die item. Wanneer iets soos ’n gewone inkopiesak vervaardig word, kan tot 1 200 per dag geproduseer word, maar met ’n meer komplekse item lewer die fabriek 60 produkte per dag. Die fabriek is aanpasbaar by markomstandighede en kan vinnig van koers verander. Gestel ’n produk vaar nie besonder goed op die winkelrak nie, kan hulle…

DAG 1 Ons avontuur begin in Himeville in KwaZulu-Natal, waar ons by die Stone House Café bymekaarkom. Die res van die dag bring ons in die voertuie deur met ’n rit teen die ontsagwekkende Sanipas uit. Nadat ons deur die Suid-Afrikaanse grenspos is, eet ons ’n piekniekmiddagete en kruie op ons tyd teen die pas uit. Op die kruin gaan ons Lesotho binne. Ons blyplek vir die nag is die knusse Sani Mountain-lodge op die rand van die Drakensberg. Die lodge bied verruklike uitsigte oor KwaZulu-Natal. DAG 2 Ons roete na die Katsedam neem ons oor die hoogste paaie in Suider-Afrika. Ons steek die Senqurivier oor (wat die Oranjerivier word wanneer dit Suid-Afrika binnegaan). By Katse bly ons in huise met ’n uitsig oor die dam. Ons eet aandete in…

Groter is beter 2014 NISSAN PATHFINDER 2.5DCI Jy het ’n stewige sleepvoertuig nodig wanneer jy ’n wa soos syne op die haak het, sê Benji Koorts van Pretoria. “Ek het my 2003-model Sprite Swing omtrent ses jaar met ’n 2009 Nissan X-Trail 2.0 gesleep, maar die motor se grootte en enjin het altyd vir my effens lig in die broek gevoel vir my wa. Ek het na ’n plaasvervanger begin soek en in ’n stadium die Ford Ranger 2.2-dubbelkajuitbakkie oorweeg vóór ek uiteindelik ’n jaar terug vir my die Nissan Pathfinder vir R299 000 aangeskaf het. My vereistes vir ’n sleepvoertuig is eenvoudig: Hy moet genoeg krag hê en swaar genoeg wees om gemaklik te sleep. Die Pathfinder het albei in oorvloed, met 140 kW krag, 450 Nm wringkrag en…

Soos hulle die wêreld met ’n Sprite Tourer-wa verken, laat Trevor Geldenhuys van Velddrif selfs nie naby die huis ’n oomblik vir ’n goeie foto verbyglip nie. “Ons bly 100 m van die Bergrivier af en neem ons vierbeendogtertjie, Bella, elke aand vir ’n stappie. Teen 5.30 nm. begin sy trippel en wag vir die uitstappie rivier toe. Op dié spesifieke dag was die water spieëlglad en die lug vol van die mooiste kleure wat ek net móés afneem. Ons is bevoorreg om so na aan die rivier met die skone natuur op ons voorstoep te bly.” Trevor se foto weerspieël dieselfde vreedsame atmosfeer as dié van Desiré, al verskil dit hemelsbreed. Al is dit in die natuur geneem, is al die elemente wat ’n mens se aandag trek, mensgemaak.…

Dis nie aldag dat ons oor ’n Lamborghini skryf nie, maar dit is groot nuus wanneer dié sportmotorvervaardiger sy eerste nutsvoertuig in meer as ’n kwarteeu bou. Ja, jy het reg gelees: Die nuwe Urus is nie ’n eerste vir Lamborghini nie. Die Amerikaanse weermag het die maatskappy in die laat jare sewentig genader om met ’n doelgerigte voertuig vorendag te kom, maar die projek het doodgeloop. Die ontwerp was darem nie verlore nie, want ’n padweergawe, die LM002, het in 1986 die lig gesien. In die volksmond het hierdie model as die Rambo Lambo bekend gestaan en hy was een van dié karre van sy tyd. As ’n mens na vandag se mark kyk, het sportnutsvoertuie ’n omwenteling veroorsaak. Jy kry een in elke kleur en geur: van klein…

Die Toyota Fortuner is ’n fenomeen. Hy’s nie ’n ryk- óf armmanskar nie, maar ’n mens voel tuis in hom ongeag die stand van jou bankbalans. Mense gebruik ’n Fortuner as ’n vakansievoertuig (en sit honderdduisende kilometers op die klok) én as ’n stadsmotor wat weinig grondpad sien. Maar hy’t te duur geraak vir jong mense en pensioentrekkers wat hulle sente moet omdraai. Én daar is ’n toenemende aantal mense wat besef hulle gaan waarskynlik nooit ’n Fortuner se 4x4-modus óf al sewe sitplekke gebruik nie. Vir hulle is daar nou ’n eenvoudiger weergawe van die Fortuner: Die Toyota Rush. Wat het ons hier? Die Rush is basies ’n Daihatsu Terios (wat nie in Suid-Afrika verkoop word nie) met Toyota-kentekens. Maar op sy beurt is die Daihatsu Terios gegrond op…

Wanneer ’n mens by die see gaan kamp, behels dit meer as strande vol sambrele, krieket langs die see en roomyse wat in die sand val. As jy jou tyd en kampplek reg kies, kan jy in rus en vrede gaan kamp en alles geniet wat die Suidkus bied, sonder dat dit voel jy moet gaan skrum op die strand vir ’n kolletjie om jou handdoek oop te gooi en ’n piekniek uit te pak. PARADISE-WOONWAPARK Die beloofde land As jy lus voel vir ’n seevakansie in die Suidkus naby die bekende toerismeplekke, maar darem ook eenkant genoeg om nie te voel asof jy vertrap word deur die skare nie, is Paradise die plek vir jou. Die smal eenrigtingpaadjie kronkel van die R61 af steilerig bult-op tussen die inheemse bosse…

Agri-toerisme is ’n heel nuwe ding, maar die eertydse boere Tot en Isabel Fourie het besluit om hulle bees- en blomboerdery opsy te skuif en op hulle lappie grond langs die Walvisroete eerder op suiwer toerisme te fokus. By Strandskloofpark se hoofhek en ontvangskantoor word jy vriendelik deur Anjé Badenhorst ontvang. Sy oorhandig ’n kaart van die oord wat jou staanplek aandui. Jy kry ook ’n elektroniese skyfie waarmee jy die hoofhek oopmaak as jy die oord wil verlaat om gou dorp toe te ry. As dit jou eerste besoek is, sal Anjé beduie waar die swembaddens, ablusiegeriewe en speelplek vir die kinders is. Jy kan ook ’n blou woonwatipe kragsok by haar huur. Só kamp ’n mens Wanneer jy deur die hek ry, word jy begroet deur ’n 400…

“Ons is in Mei by die huis weg in ons 2015-model Iveco Daily-ryhuis en het heelwat lodges en kampplekke aangedoen voor ons oor die grens na Botswana, toe Zambië en uiteindelik na Malawi is. Nadat ons in Mosambiek ook gaan draai het, het ons uiteindelik vroeg in Julie teruggekeer huis toe. Waar in Malawi het julle gekamp? Ons was vyf nagte by Chembe Eagle’s Nest by Kaap Maclear in die Malawimeernasionale park. Waar het julle daarvan te hore gekom? Ons het dit op die internet nagevors en dit ook teëgekom op ander reisigers se blogs wat ons gereeld lees. Hoe lyk dit daar? Een woord... idillies. Daar is ’n pragtige private strand wat tot teen die meer strek, en die watertemperatuur wissel deur die jaar van 24-26ºC. Hoe lyk die…

Vanweë die aard van ’n boswoonwa staan die romp hoog bo die grond. Dit beteken dus ’n ongemaklike hoogte om met een tree in die wa te klim. ’n Gemonteerde trappie vou uit die wa, wat die inklimslag vergemaklik. Teenoor die aanvanklike drumpelhoogte (545 mm) hoef jy nou jou voet net halfpad (285 mm) te lig vir die eerste trap. Die trap het ook ’n strop aan die kant wat jy trek as jy binne staan om dit op te slaan, sodat jy die deur kan toemaak voor jy inkruip. Dié soort trap hoort op elke wa omdat dit so prakties is. Terloops, ’n gaasdeur met sy eie ritssluiter pas in die deuropening as jy dalk met ’n oop deur wil slaap sonder dat goggas jou wegdra. Die dak lig…

SAMPIOEN-‘BRAAIPAAI’ MET MOSTERDSOUS Kolepastei Die ster van hierdie eenvoudige braaipaai is die witsous wat jy met mosterd geur. Jy benodig (genoeg vir 6-8) 6 eetlepels botter 1 ui, fyngekap 500 g sampioene, in skyfies gesny 2 takkies tiemie (of 1 teelepel droë tiemie) 2 eetlepels koekmeel 200 ml melk 2 eetlepels heelkorrelmosterd sout en swartpeper na smaak 2 rolle blaardeeg, ontdooi Só maak jy 1 Smelt 4 eetlepels botter en braai die ui en sampioene met die tiemie daarin tot gaar. Geur dit met sout en peper. Skep die mengsel uit en hou dit eenkant. 2 Smelt nou die oorblywende 2 eetlepels botter en voeg die meel daarby. Roer die mengsel goed todat dit ’n gladde smeer vorm, en braai dit vir ongeveer 2 minute. Haal die pot van die…

Die dubbelbatterystelsel bestaan uit ’n tweede (of derde) battery wat aan jou voertuig se alternator gekoppel is. Die doel daarvan is om elektrisiteit aan jou yskassie of cappuccinomasjien te verskaf sonder om jou hoofbattery leeg te tap. Jy kan jou eie dubbelbatterystelsel prakseer óf jy kan een van talle klaargemaakte stelsels koop en in jou voertuig laat aanbring. Installeer hom só Die eenvoudigste manier is soos volg: Heg die punt van een batterykabel aan die negatiewe pool van jou hoofbattery en die ander punt aan die negatiewe pool van jou tweede battery. Heg ’n tweede batterykabel aan die positiewe pool van die hoofbattery en die ander punt aan ’n isoleerder. Van die isoleerder af loop daar nog ’n batterykabel na die positiewe pool van jou tweede battery. Let wel dat…

Ek het ’n breukdeel van ’n sekonde om te kies: Óf ek val teen ’n rots af óf ek tuimel by die afgrond af. Oomblikke later is dit net bloed waar jy kyk... Ons Visrivier-avontuur is skaars 20 minute oud en daar staan reeds mense om my met Savlon en pleisters, terwyl ander skarrel om al my bagasie tussen hulle te verdeel. “Is jy reg om aan te gaan?” vra hulle bekommerd. Hardegat, maar met ’n stewige dosis pieperigheid sê ek: “Ja, kom ons doen dit. Ons ís nou hier.” LAAT EK BEGIN met ’n bekentenis. Ek is nie sportief nie, daar is twee of drie rolletjies om my midderif, ek hyg teen opdraandes, ek is nie bekend vir my fantastiese balans nie, en ek sou my voete en enkels…

“My pa, Neville Mallinson, se grootste wens was om met ’n woonwa te gaan kamp ná sy aftrede. Ongelukkig was hy ’n kankerlyer en hy is in Januarie vanjaar oorlede sonder dat hy ooit sy familie met ’n kampvakansie in sy wa kon bederf. Ons het ná sy dood sy internetsoekgeskiedenis nagegaan en was baie hartseer toe ons sien hoe hy aanlyn na gesinvakansiebestemmings, ryhuise en woonwaens gesoek het. Dit was sy droom. Ek het besluit om vir ons klein gesin ’n woonwa te soek sodat ek saam met my man, Abram, en ons twee kinders, Corinne (3) en Abram jr. (1) kan gaan kamp – om gestalte te gee aan my pa se onvervulde droom. Terwyl ek gesoek het, het ek besef ek het my rybewys gekry twee maande…