Innehållsförteckning för Selfdoengids 2023 från Weg! Ry & Sleep

Help jouself Die instandhouding van jou woonwa is net so deel van kamp as agteroorsit langs die braaivleisvuur. Iewers gaan ’n mens die remme moet nagaan of dalk die drade van die ligteprop weer koppel. Dalk sien jy kans om self ’n ruit te vervang of miskien is dit tyd vir nuwe gasstutte vir jou wa se opwipdak. Hierdie gids is vir kampeerders wie se hande jeuk. Maar instandhouding begin nie by die vervanging van afgeloopte bande of die nagaan van die koppelstuk nie. Voorsorg is altyd beter as nasorg – en daarom sluit ons ook wenke in wat wissel van hoe om jou woonwa te berg regdeur tot die dilemma van houtvrot. Jou sleepvoertuig is ewe belangrik en ons kyk onder meer na die welstand van jou battery. Hiervoor…

Om die kampvuur en op internetforums het slepers verskillende menings oor hoe jy ’n woonwa behoorlik bêre. Sommige eienaars sê die enigste goeie plek om ’n wa te bêre is onder dak, tussen vier mure en agter toe deure. Party ouens bou ’n geteëlde woonwagarage. Ander sê ’n skadunetafdak is voldoende. Party sê die woonwa se opwipdak móét oop staan terwyl die woonwa nie gebruik word nie; ander meen dit móét toe wees. Nog ’n vraag is of die wa maar op sy wiele kan staan en of jy die wiele moet afhaal of lig. Daar is nie ’n enkele resep of antwoord nie, het die woonwadokter Johannes Knipe in Kaapstad destyds vir ons vertel. Dit hang af hoeveel jy jou wa sleep en vir hoe lank jy hom bêre.…

Om bande te vervang is nooit lekker nie – dit voel altyd of dit ’n klomp geld is wat net daarmee heen is. En hoewel ons verstaan dat jy gaan rondsoek vir die beste waarde vir geld, is dit nie altyd ’n goeie plan om eerlike Eddie se winskoopbande van die week op jou wa te sit nie. Daar is ’n klomp dinge wat jy in ag moet neem. ’n Goeie vertrekpunt is om te kyk hoe vervaardigers besluit op die bande waarmee hulle waens uit die fabriek kom. Clive Cox, wat ontwikkelingsbestuurder was by die destydse Jurgens Ci, sê as dit tyd word om nuwe bande vir jou wa te koop, moet jy sover moontlik hou by die spesifikasies van die bande waarmee die woonwa uitgekom het. Maar wanneer…

Diens jou wa se remme minstens een keer per jaar. As jy nie dikwels gaan kamp nie, kan jy dit elke 18 maande doen. Afgeloopte woonwaremme maak nie so “grrr-grrr” soos dié van jou kar wat gedaan is nie. Jy word dus nie gewaarsku nie, maar gelukkig is dit nie moeilik om self die remskoene na te gaan nie. Al is jou wa onlangs versien, sorg dit steeds vir gemoedsrus as jy die remme self nagaan voor ’n lang vakansie. As jy dit moet vervang, gaan selfs iemand met tien duime nie te veel sukkel nie. Inkopielys • Q20- roeswerende middel • remskoene Gereedskap • domkrag • wielmoersleutel • klein hamer • platpuntskroewedraaier • waterpomptang Só maak jy 1 Diens eers die een wiel en daarna die ander een. Maak…

Gasstutte is in die meeste sleepgoed ’n algemene onderdeel. Party hou die neuskasdeur oop, party lig die bed se basis op sodat jy by die pakplek daaronder kan uitkom, en ander help weer om ’n daktent oop te vou. Dan is daar ook dié wat help om jou wa se opwipdak te lig en op sy plek te hou. Soos met die meeste onderdele op ’n woonwa gaan die gasstutte ook die een of ander tyd aandag kort. Die stutte is eintlik silindriese kapsules met sowat 100 bar druk binne-in – dit is sowat 50 keer die druk van jou voertuig se bande. Maar die stutte kan mettertyd hulle fut verloor. As die opwipdak op ’n dag nie meer maklik lig nie, is dit moontlik die stutte wat besig is…

As jou woonwa, boswoonwa of sleepwa vir ’n paar maande gestaan het, is daar dalk skielik ’n klomp dinge wat nie meer so lekker werk nie. Dan moet jy kies: Óf jy hoes ’n klomp geld vir ’n diens óf jy doen dit self. Dis maklik en redelik goedkoop om jou eie wa te diens en te onderhou. Die geheim is ’n volledige kontrolelys. As jy volgens so ’n lys werk, is die kanse skraal dat jy iets sal vergeet. En as jy nie self jou wa diens nie, kan jy sommer die lys gebruik om te kyk of die manne by Haastige Hennie hulle werk behoorlik gedoen het. Hier’s ’n paar dinge wat gereeld nagegaan moet word. ONDERSTEL EN VERE Die onderstel dra die hele wa, en daarom moet…

Woonwatente word steeds van seil vervaardig – net soos ’n dekade of twee gelede. Tog verskil vandag se materiale heelwat vergeleke met dié uit die ou dae. Hedendaagse tentseil kan ’n leeftyd hou, maar die leeftyd van die tent hang af van hoe jy daarna omsien. PASOP VIR SEEP Die seilmateriaal word in die fabriek geseël pas nadat dit geweef is. Die materiaal word in ’n bad gedompel met ’n wasagtige seëlaar en ’n spesiale middel wat dit teen muf beskerm. Die seëllaag is dus nie net bo-op die materiaal nie, maar word in die weefsel geabsorbeer. Huishoudelike seep en skoonmaakmiddels word hoofsaaklik gemaak om vetterigheid te verwyder. As jy dus gewone seep gebruik om jou tent te was, loop jy die risiko om die wasagtige seëlaar te vernietig –…

Die probleem begin gewoonlik by die lasplekke, meestal wanneer water verby die rubberseëls en aluminiumstroke van jou woowna se dak en vensters lek. Sonlig, wind en reën laat die rubber hard word, wat beteken dit seël uiteindelik nie meer behoorlik nie en water en vog kan deurkom. Geroeste skroefies onder die seëls veroorsaak ook klein gapings waar vog tussen die panele en raamwerk kan insluip. Handvatsels is nog ’n probleem, veral wanneer die plastiek begin verweer. Onthou, die buitekante van die panele – en ons verwys hier na die ouer en standaardpadwoonwaens – is van aluminium gemaak, en die binneste het laaghout met ’n plastieklaag oor. Daarom is dit waterdig, maar sodra vog binne-in vasgevang word, bly dit binne. Hoe meer die hout vrot, hoe makliker sal water insypel en…

Mens kan maklik van die wiellaers vergeet omdat dit nie ’n groot, opvallende onderdeel is nie, maar wanneer hulle ophou werk, sit jy met ’n reusegemors. Die groot sondaar is gewoonlik die smeermiddel of, in daai mechanicwoordeboek van oom Apie, sommer net goeie ou ghries. Wiellaers lol dikwels wanneer jy dit die minste kan bekostig. Die moeilikheid begin terwyl jy teen jou maksimum sleepspoed tussen niks en nêrens Suidkus toe mik. Dis dan dat die wiellaer disintegreer en jou wa se wiel sy eie koers inslaan. Dís ’n nare gedoente. Gewoonlik kry die as erg seer, maar die wiel slaan dalk ook ’n gat deur jou woonwa of rol voor aankomende verkeer in terwyl jy spook om beheer oor jou sleepgoed te kry. Met net ’n bietjie moeite en ’n…

Ons is almal vinnig by om te skep, maar heelwat skugterder wanneer dit tyd is om met die skottelgoed te help, veral as jy trommeldik geëet is aan die potjie wat oom Sarel gemaak het. Die potjie wat ons vir dié artikel gebruik het, was in só ’n slegte toestand dat ons eerder die deksel teruggesit en besluit het om daarvan te vergeet. Ons redakteur, Schalk Jonker, het ook sy gehawende steakpan beskikbaar gestel vir die artikel. ’n Laag roes het op die pan gevorm, en ondanks sy pogings om dit skoon te kry was daar steeds oranje vlekke. As jy mooi daarna omsien en dit nie verniel nie – soos om koue water in warm kookware te gooi of dit gereeld te laat val – behoort jou…

WENK Batterye ontlaai wanneer dit nie gebruik word nie – des te meer so in koue weer. As jou woonwa dus gedurende die wintermaande staan, haal die battery uit en laai hom “stadig” met die regte laaier (trickle charge). Reg vir ’n stort Gaan die stortstelsel en krane na en toets dat alles behoorlik werk. Toets ook die geiser. Hy werk, hy werk nie... Kyk of daar barste of krake in die flikker- en remligte se lense is. Waar’s die water? Maak seker die waterpomp werk. Draai die krane oop en kyk of die water vloei. Kyk of daar lekplekke is by die pomp, krane of pype. Hoeveel skop nog? Terwyl jy nou hier besig is, toets die yskas, ligte en ander elektriese toestelle. As die battery te min skop…

Die instandhouding van jou sleepvoertuig behels die versorging van ál sy komponente, en nié net die gewone items wat vervang word as jy hom invat vir ’n diens nie. Die battery is iets wat gereeld nagelaat word, waarskynlik omdat hy net elke paar jaar of so vervang moet word. RY WANNEER JY KAN Om seker te maak jou battery bly gelaai, moet jy jou ryding elke klompie dae aanskakel en die enjin vir 10-15 minute laat loop. Dit is die battery se eerste verdedigingslinie, maar dit is ook onnatuurlik om jou kar net in die motorhuis of oprit te laat staan en luier. Klim eerder agter die stuur in en ry gou winkel toe vir melk en brood, want dit sal sorg vir goeie lugvloei deur die enjin – terwyl…

Daardie 1988-model Sprite Sport op Gumtree vóél sommer net soos joune. Jy het intussen jou wederhelfte oortuig ’n netjiese klein tweedehandse woonwa is presies wat julle nodig het. En teen ’n skamele R31 999 is dit mos dubbel en dwars die moeite werd... wie weet, dalk kan julle die verkoper nog ’n duisend rand of wat afstry. Koebaai, getroue ou viermankoepeltent! Die advertensie sê nie veel oor die wa se toestand nie, maar jy vertrou alles is in die haak, want met jou jongste wat pas universiteit toe is, is daar nie juis geld oor vir groot herstelwerk nie. Dalk net die gordyntjies vervang en nuwe beddegoed en breekware koop. Niks meer as dit nie. Ons het destyds met Joos Knipe van JK-woonwaens in Bellville gesels oor ’n klompie basiese…

Versien jou wa se koppelstuk minstens een keer per jaar of, selfs beter, voor en ná elke vakansie. Wanneer jy hom self diens, maak seker jy skroef alles deeglik vas en dat jy nie agterna met los onderdeeltjies sit wat ’n noodsaaklike doel dien nie. Jy wil immers nie vir die versekering se assessor verduidelik waarom jou wa ’n ander roete see toe gevolg het nie! KEN JOU STORIE Voor jy halsoorkop begin skroewe losdraai en jou woonwa jou met jou volgende vakansie halfpad deur die Du Toitskloofpas verbysteek, maak seker jy weet hoe dinge werk: Begin deur die aanwysings te lees. BEGIN VOOR Die meeste waens wat voor of in 2009 gebou is, het ’n kop van gietyster, maar die nuwer waens het deesdae ’n oorglipkop van staal. Hierdie…

Jou woonwa se Perspex-vensters kan bloot weens verwering begin kraak – veral by die knippe wat daarin vasgeskroef is. Hier’s ’n stap vir stap verduideliking hoe om self ’n venster te vervang. Dis só maklik – enigiemand wat ’n boor kan vashou en ’n skroewedraaier gebruik, behoort dit lag-lag te kan doen. STAP 1 Haal af Die oopmaakvensters aan jou wa skarnier aan twee gevormde aluminiumstroke wat aan die bokant van die venster loop. Die een strook is aan die wa vas en die ander een aan die venster. Die venster se strook gly in die een teen die wa op min of meer dieselfde manier as wat jou tent in daai groefie aan die rand van jou wa inryg, maar met genoeg speling sodat dit op en af kan…

Die voormalige Amerikaanse president Abraham Lincoln het op ’n keer gesê as hy ses uur het om ’n boom af te kap, sal hy die eerste vier uur gebruik om die byl te slyp. Ou Abe was nie net eerlik nie; hy was wys ook, en dít is iets wat ’n mens deesdae selde by politici sien. Ons gaan nie hier oor jou keuse van byl gesels nie, maar dalk is dit tyd om nuwe lewe te blaas in die een wat jy gebruik wanneer julle gaan kamp. Gaan loer in die motorhuis of jy enige van dié stukke gereedskap byderhand het. JY BENODIG • ’n Stomp en geroeste byl wat baie liefde en aandag nodig het• Asyn – om die roesdeeltjies op die byl se oppervlak af te breek•…

Op die internet kry ’n mens ’n groot verskeidenheid kampwenke – of hacks, soos die Engelsman dit noem. Ons weet egter te goed ’n mens kan nie alles glo wat jy op die wêreldwye web sien nie; dus het ons van die gewilder wenke self op die proef gestel om te kyk wat werk en wat nie... BREKFIS IN ’N BOTTEL Wat is dit? Hoekom die gevaar loop van eiers wat kan breek op pad na jou bestemming as jy eerder hierdie slim plan kan inspan? Gebruik bloot ’n leë waterbottel met ’n tuit en maak die lewe aansienlik makliker. Werk dit? Wel, solank almal van roereier hou. Jy kan maklik 18 eiers in ’n 500 ml-bottel inpas, en dan is daar genoeg plek vir ’n bietjie melk en…