Indholdsfortegnelse for 10-Mar-17 i Landbouweekblad

MNR. PIETER BEUKES van die Yahshua-boerdery by Caledon het met ’n wenopbrengs van 3,09 ton kanola per hektaar stof geskop in die oë van mededingers in die Proteïennavorsingstigting se kanola-opbrengskompetisie. Lees die artikel op bl. 43. VERTEL ONS VAN JOU GESIN. Ek is met Salomien getroud. Sy is my regterhand in die boerdery, by die huis en in die kantoor. Sy hou my optimisties. Ons is geseën met drie pragtige kinders — Mieke, Izak en Jané. VERTEL ONS VAN JOU BETROKKENHEID BY JOU GEMEENSKAP. Ek was ’n paar jaar lank voorsitter van die landbouvereniging Caledon, is deel van die kanolabedryfskomitee en tree van verlede jaar af op as mentor vir ’n groep boere van Genadendal. Ek en ’n paar ander ouers van die Laerskool Caledon is besig om toutrek as…

AS vanjaar se eerste mielie-oesskatting realiseer, sal dit Suid-Afrika se naasgrootste mielie-oes tot nog toe wees. Die Nasionale Oesskattingskomitee se eerste raming dui op ’n nasionale oes van 13,918 miljoen ton – amper 80% groter as verlede jaar se droogtegeknelde oes en ook die naasgrootste tot nog toe. Die rekord tot dusver, 14,982 miljoen ton, is in 2014 van die lande gehaal. Dié eerste amptelike raming was boonop hoër as die gemiddelde markverwagting van net oor 13 miljoen ton. Die verhoogde oesverwagting is deels weens uitgebreide aanplantings (’n beraamde 35% meer, volgens die Oesskattingskomitee), maar grootliks danksy drasties beter produksie-vooruitsigte as waaraan die vorige oes uitgelewer was. Die geskatte witmielie-oes is 8,313 miljoen ton, wat 144% meer as verlede jaar is. Die geskatte geelmielie-oes is 5,605 miljoen ton, 28% meer…

Pleks van verwoesting het die tropiese sikloon Dineo in Februarie deurdringende reën oor groot dele van die binneland meegebring en damvlakke in veral Limpopo en Mpumalanga se Laeveld byna oornag in ’n groot mate laat herstel. “Dit is goed nat en ons het nie juis skade gely nie,” sê mnr. Robert Davel, uivoerende hoof van Agri Mpumalanga. Baie damme reg oor die land is vir die eerste keer in baie jare weer 100% vol. Hiervan is die merkwaardigste waarskynlik die Vaaldam. Van die damme in Limpopo is nog nie heeltemal vol nie, maar die situasie lyk aansienlik beter as in Januarie. Toe was die Tzaneendam maar net 18% vol. Teen druktyd was hy 42% vol, en nog water was aan die invloei. Die Nzhelele-dam tussen Musina en Louis Trichardt was…

AS verlede jaar se ingevoerde hoendervleis eerder plaaslik geproduseer was, sou die plaaslike voermark 1,5 miljoen ton hoendervoer ter waarde van R8,2 miljard kon verkoop, sê die Dierevoervervaardigersvereniging van Suid-Afrika (Afma). Mnr. De Wet Boshoff, uitvoerende direkteur van Afma, sê die invoer plaas ’n groot demper op die plaaslike voerbedryf. Afma-lede se totale voerproduksie, vir alle diersoorte, was 7 183 107 ton met ’n beraamde bruto omsetwaarde van R31 miljard. Daarvoor is 3,5 miljoen ton mielies en mielieprodukte en 1,2 miljoen ton sojaboonmeel as hoofbestanddele gebruik. Altesame 3 323 278 ton braaihoendervoer is gelewer, met ’n beraamde omsetwaarde van R17,6 miljard en ’n nasionale markaandeel van 46% van alle produkte. Altesame 11,7 miljoen ton voer met ’n bruto omsetwaarde van sowat R50 miljard is in die boekjaar 2015-’16 in Suid-Afrika…

VLEIS | Bedrogspul met invoer ondersoek Agri Inspec, ’n waghondliggaam namens die Rooivleisprodusenteorganisasie (RPO), het ’n moontlike bedrogspul met ingevoerde skaap- en beesvleis aan die been uit Australië en Nieu-Seeland oopgevlek. Dit word nou deur die owerheid ondersoek. Mnr. Bertus van Heerden, uitvoerende hoof van Agri Inspec, sê die instelling het verlede jaar verskeie invoertransaksies uitgewys – die meeste deur die Durbanhawe – waar die waarde van ingevoerde vleis dalk onderverklaar is om ’n verminderde tarief te betaal. Die transaksies het betrekking op 425 ton vleis ter waarde van R2,9 miljoen – slegs 7% van die totale invoer ingevolge die spesifieke tariefhoof (0204.42.00), maar Van Heerden sê prysvlakke moet markverwant verklaar word om die speelveld gelyk te hou. Mnr. Gerhard Schutte, hoofbestuurder van die RPO, sê ’n ad valorem-tarief van…

DIE uitmergelende droogte van die afgelope twee jaar het weidings seergemaak en rooivleisboere finansieel geknou. Al het vleispryse intussen gestyg en was daar sedert die begin van die jaar wydverspreide reën oor groot dele van die produksiegebied, moet boere nie oorhaastig kuddes opbou nie. Hulle moet eerder die veld ’n geleentheid gee om te herstel. Dié raad kom van mnr. Francois du Toit, voorsitter van die Oos-Kaapse tak van die Rooivleisprodusente-organisasie (RPO). Die tak neem die leiding in die Veediefstalvoorkomingsforum. Al is die skakeling tussen Agri Oos-Kaap en die onderskeie veediefstaleenhede doeltreffend, meen Du Toit die skakeling met die vervolgingsgesag en provinsiale polisiehoofkwartier is nie na wens nie. Die RPO dra 70% by tot die begroting van die inligtingsentrum vir roofdierbestuur onder leiding van prof. HO de Waal van die…

‘Die feit is die ooreenkomste wat gesluit is om ons internasionale markte te laat groei, is ongunstig vir die landbou.’ DIE landbou moet meer doen om te verseker dat die bedryf voordeel trek uit vryhandelsooreenkomste, en dié ooreenkomste moet beter gemoniteer word. Só het mnr. Jannie de Villiers (foto), uitvoerende hoof van Graan SA, op Agri SA se jaarlikse bedryfskonferensie op Somerset-Wes gesê. Die landbou staan altyd agter in die ry as handelsooreenkomste met ander lande be-ding word. Boonop bring vryhandelsooreenkomste nuwe markte, maar ook nuwe mededingers, wat die plaaslike landboubedryf dikwels miskyk. Hy het ook gewaarsku dat die proteksionisme wat moontlik die Trump-era gaan kenmerk, nog nie verdiskonteer is nie. “Gaan lande hoër tariefmure bou en gaan handel moeiliker word? Dít is die risiko’s wat ons moet ondersoek.” Die…

DIE internasionale maatskappy Golden Peanut and Tree Nuts, waarvan die boer mnr. Alfonso Visser ’n aandeelhouer en die Suid-Afrikaanse uitvoerende hoof is, bied op 14 en 15 Maart die derde internasionale pekanneutkonferensie by SA Pecans op Hartswater aan. Alfonso sê dit sal aan bestaande en voornemende produsente die geleentheid bied om op die hoogte van die nuutste ontwikkelings in die ekonomiese verbouing van pekanneute te kom. Drie onafhanklike Amerikaanse sprekers gaan optree. Hulle is dr. James Walworth, medehoof van die departement grond-, water- en omgewingswetenskappe aan die Universiteit van Arizona, dr. Richard Heerema, spesialis in pekan- en pistasieneute aan die Universiteit van Nieu-Mexiko, en mnr. Daniel J. Zedan, voorsitter van Nature’s Finest Foods en raadslid van die Amerikaanse pekanraad.…

PADGEBRUIKERS in die Oos-Kaap is in hul noppies nadat regter J.M. Roberson onlangs in die Grahamstadse Hooggeregshof beslis het die Oos-Kaapse departement van paaie en openbare werke moet binne 90 dae kontrakteurs identifiseer om sekere paaie in die provinsie te herstel. Die uitspraak volg ná ’n regsgeding wat Agri Oos-Kaap twee jaar gelede teen die provinsiale direkteur-generaal van paaie aanhangig gemaak het om dringende instandhoudingswerk te doen. Roberson het beveel dat: ■ Geïntegreerde roetine-onderhoud binne ses maande aan paaie gedoen moet word. ■ Waar die departement nie self herstel- en instandhoudingsdienste kan bied nie, moet ooreenkomste binne ses maande met munisipaliteite of kontrakteurs aangegaan word. ■ Binne 90 dae ná die hofbevel moet volledige besonderhede voorsien word oor die paaie wat herseël en gerehabiliteer moet word, en daarna moet die…

DIE EERSTE oesskatting vir mielies het die verwagtinge oortref. Die uitstekende produksiestoestande wat tot dusver geheers het, het daartoe gelei dat die eerste skatting van die seisoen vir mielies 13,9 miljoen ton is. Die oppervlakte beplant met mielies beloop meer as 2,6 miljoen hektaar. Maar moenie jou blind staar teen die groot oes nie. Benut die laer koopgeleenthede, want teen die beplante oppervlakte is die produksierisiko’s hoër. ’n Daling van 0,5 ton per hektaar kan die uitvoersurplus uitwis en selfs al gebeur dit nie, kan uitvoerders ondanks die sterk rand en lae internasionale kommoditeitspryse wel daarvoor sorg. VOORRAAD Weens die droogte en ’n totale produksie van 7,8 miljoen ton is die oordragvoorraad vir ouseisoenmielies 1,37 miljoen ton. Dit is gelykstaande aan 51 dae se voorraad. Vanweë die goeie produksiestoestande kan…

Daar is goeie nuus vir boere wat die afgelope 20 jaar die koringkultivar SST88 met groot welslae verbou, maar bekommerd is dat dit van die rak gaan verdwyn. Werk om dié kultivar te verbeter, gaan voort by Sensako, die maatskappy wat die meeste van die saad wat in dié stadium in die Kaapse koringgebiede verbou word, ontwikkel het. SST88 is in die 1990’s deur die legendariese graan- en peulgewasteler dr. Bart Lombard vir Sensako ontwikkel. Hy is in April 2015 oorlede, maar die kultivar leef voort. Boere loof die kultivar met die lang groeityd vir sy droogteverdraagsaamheid, stoelvermoë en uitstekende wortelstelsel. SST88 lewer goeie opbrengste in dele van die Wes-Kaap met ’n wisselvallige reënval en waar siektedruk laag is. SST88 se roesweerstand het egter nie die toets van die tyd…

Geroosterde babawortelslaai met koperpennie-slaaisous Koperpennieslaai is ’n ou boerekostreffer. Hier kry dit ’n moderne kinkel, maar sonder om die bekendheid te verloor. Olyfolie 750 g jong wortels, gehalveer Seesout 2 groot uie, dun gesny Kookwater 1 pak gemengde slaaiblare Sous 200 ml water 125 ml asyn 15 ml tamatiepasta 7 ml mielieblom 80 ml suiker 60 ml olie 5 ml elk worcestersous 5 ml mosterdpoeier Voorverhit die oond tot 190 °C en smeer ’n bakplaat met olyfolie. Sprei die wortels op die bakplaat uit en bedruip met ’n bietjie olyfolie. Geur liggies met seesout. Oondrooster vir ongeveer 5-7 minute, tot die wortels net begin sag word, maar nie gaar is nie. Haal uit die oond en skep die wortels oor op ’n koue bakplaat om die kookproses stop te…

LIGGING: Korfu, Griekeland Die groot ding met Nuwejaar hier op Korfu, waar ons die afgelope paar maande woon, is die sny van die Heilige Basilius-brood, wat hulle ’n pastei noem, maar eintlik ’n koek is. Dis ’n vasilopita in Grieks. Die seremonie is daarop gerig om voorspoed vir die nuwe jaar te bring. Die gasvrou voor die snywerk aan deur ’n kruisteken bo-op die koek te kerf. Dan word ’n stuk vir die huis afgesny en ’n stuk vir die heiliges. Daarna kry die oudste en dan die jongste om die tafel ’n sny, gevolg deur die res van die gaste en die huismense laaste. Soos ons eie mense toentertyd ’n tiekie in die poeding gebak het, word ’n muntstuk in die koek gebak. Die een wat die sny koek…

Danksy betroubaarheid, gehalte en dienslewering is werktuie in die AgriCAD-stal gewild onder boere. Goeie buitelandse en plaaslike verkope en tevrede klante bevestig dat AgriCAD se span dinge reg doen. “Boere beskou hul werktuie eerder as ’n belegging as ’n uitgawe. Betroubaarheid en diens is ook belangrik omdat onvoorsiene onderhoud en herstelwerk tydrowend en duur is,” sê mnr. Eddie Neuhoff van AgriCAD. “Ons werktuie is tegnologies en ergonomies korrek ontwerp deur meganiese ingenieurs en tegniese tekenaars. Tydens vervaardiging lê ons klem op akkuraatheid en gehalte.” Danksy finale gehaltetoetse voldoen die werktuig voor aflewering aan die hoogste vereistes. Naverkopediens en tevrede klante is net so belangrik. PRODUKREEKS AgriCAD se tapkarre bied bekostigbare graanhanteringsoplossings. Die graantapkar is beskikbaar in verskeie groottes, maar die gewildste in die reeks is die TF240 (24 000 liter…

DIE jaarlikse voorsaaidag van Skog (die Swartland-koringontwikkelingsgroep) maak boere gereed vir saaityd met ses opwindende sprekers. Die dag word op 15 Maart in die Jan Basson-sentrum op Moorreesburg gehou. Die hoofspreker is mnr. Brand Pretorius, voormalige hoof uitvoerende beampte van McCarthy Bpk., wat riglyne vir volhoubare sukses in ’n vinnig veranderende Suid-Afrika sal gee. Mnr. Conrad Basson, ’n nagraadse student aan die Universiteit Stellenbosch, gaan ’n finansiële ontleding van veebestuursbenaderings in verskillende wisselboustelsels aanbied, terwyl mnr. Gideon Schreuder van Equalizer neigings in plant- en saaitegnieke gaan bespreek. Mnr. Ian Freemantle, ’n meganiese ingenieur wat in die filmbedryf werk, sal boere toespreek oor hommeltuie en hul gebruik in die landbou. Mnr. Corné Louw, landbou-ekonoom van Graan SA, sal verduidelik hoe die teling- en tegnologieheffing graanboere meer beheer oor hul eie bedryf…

Perske-uitvoer in die produksiejaar 2016-’17 (tot einde Februarie) was sowat 5% laer teenoor die ooreenstemmende tyd verlede jaar. Dit staan tans op 1 863 536 ekwivalente kartonhouers (2,5 kg elk). Die streke Bergrivier (33%), Ceres (32%) en Stellenbosch (6%) het gesamentlik 71% tot die totale uitvoer bygedra. Met die einde van die produksiejaar in sig, word die laaste bietjie Fairtimeperskes tans uitgevoer. Mnr. Jacques du Preez, hoofbestuurder van handel en markte by Hortgro, sê die belangrikste rede vir die afname is dat sekere kultivars, soos Transvalia, in onguns by kleinhandelaars en verbruikers verval het. Sowat 68% van die to-tale perske-oes (dessert en taaipit), asook nektariens, word in die inmaakbedryf aangewend, terwyl 22% vir die plaaslike varsmark en 5% vir uitvoer bestem is. In die geval van dessertperskes en nektariens beloop…

Die komende winter gaan moontlik ’n bietjie goeie nuus vir vrugteboere bring: Die prys van snoeiskêre gaan moontlik dieselfde wees as verlede jaar of hoogstens in ooreenstemming met inflasie styg. Só sê mnr. Gys Liebenberg, uitvoerende hoof van Felco Suider-Afrika. “Die rand het sedert die ooreenstemmende tyd verlede jaar baie versterk, wat beteken dat snoeitoerusting teen ’n goeie prys ingevoer kan word. Die mate waarin pryse sal verander al dan nie, hang natuurlik af van die tydsberekening van invoerders en wat die wisselkoers in daardie stadium gedoen het. Ek kan egter nie sien hoe enige styging van meer as inflasie geregverdig is nie,” sê hy. Vooruitgang in snoeitegnologie was die afgelope jaar meestal toegespits op die verbetering van die langlewendheid van die batterye van elektriese skêre. “Die dae van lugdrukskêre…

MAART OTTOSDAL 7-9, Ottosdal-vriendskapskou. Beeste: Willem Weldhagen, sel 082 863 6690.Skape: Wimpie Rossouw, sel 083 305 0090. Industriële uitstallers: John Tait, sel 082 572 3951. Stalletjies, vermaak en algemene navrae: Lizette Scholtz, otdskou@lantic.net of tel. 018 571 0104. HERTZOGVILLE 16-18, Hertzogvillelandboufees (70ste herdenkingsfees). Perde: Saalperd, Friesperd: Sarel Bornman, sel 072 268 3919. Beeste: Angus, Brangus, Dexter, Brahman: RC Malherbe, sel 084 851 8262. Kleinvee: Dorpers, Vleismerino, Suffolk, Boerbok: Japie van Bergen, sel 082 803 2498. Stalletjies, uitstallers, vermaak, driegang-braaikompetisie, skoonheidskompetisie. Algemene navrae: Rudi, sel 083 453 5220; Na-Mari, sel 082 344 9130. HOFMEYR 17-18, Hofmeyr-landbouskou. Kaapse Boerperd en Amerikaanse Saalperd: Gert Lötter, Karoobos. lotter@gmail.com of sel 071 678 7431. Merino en Dohne-Merino: Matt Philps, sel 082 378 7138. Slaglam: Bennie, sel 082 667 2355. Stalletjies: Annarine van der Merwe, sel 083…

10% ’n Bykomende 10% waterbeperking is op die landbou in die Wes-Kaap ingestel ná damvlakke teen 27 Februarie tot 32,4% gedaal het. Die Voëlvleidam was 33,2% vol, die Theewaterskloofdam 27,6%, die Brandvleidam 23%, die Clanwilliamdam 34,4%, die Kwaggaskloofdam 25,9% en die Bergrivierdam 40,8%. Die waterbeperkings vir die landbou sal geld tot die provinsie se damvlakke 85% bereik. – Joylene van Wyk 13% Daar is tot dusver hierdie oesjaar 13,2% meer tafeldruiwe in Suid-Afrika gelewer as verlede jaar. Teen die einde van die sewende oesweek het dié syfer gestaan op 54 518 242 kartonhouers van 4,5 kg tafeldruiwe, teenoor 48 171 231 kartonhouers die ooreenstemmende tyd verlede jaar. Uitvoer vir dieselfde tyd het op 49 834 689 kartonhouers gestaan. – SA Tafeldruifbedryf 2x meer Kopers van kleur het vanaf 2010 tot…

‘Dit is alles weg. Die vloedwaters vat boonop die bolaag van ons grond saam weg.’ MNR. HENK SCHUTTE, boer van Thabazimbi, oor 65 ha suikerbone wat ’n dag ná dit geplant is deur vloedwaters in die Krokodilrivier weggespoel is. Bl. 14 ‘Om hierdie rede is dit vir ons onmoontlik om by spesiale opheffings- en bemagtigingsprojekte op individuele plase betrokke te raak.’ ME. SASHA-MONIQUE ELVIK van die Noorweegse wynmonopolie oor ’n vereiste dat die land alle wynleweransiers op dieselfde manier behandel. Bl. 18 ‘Die nuwe model moenie strategiese vlugvoetigheid inboet nie, maar moet strategies rats wees en in belang van boere die nodige kan doen.’ DR. KOBUS LAUBSCHER, landbou-ekonoom, oor die beplande samesmelting van GWK en BKB. Bl. 18 ‘Ons moet hoender stort tot hulle huil.’ ME. ROSINA SEMENYA, voorsitter van…

‘BOERE GAAN TE STADIG BANKROT’ Een van die ernstige probleme in die landbou is die feit dat boere te stadig bankrot gaan. Dié stelling deur prof. W.E.Kassier, landbou-ekonoom aan die Universiteit van Stellenbosch, onlangs op ’n vergadering van Durbanville se boerevereniging het boere se oë groot laat rek, skryf Manie in die rubriek “Soos ek dit sien”. “Maar”, skryf Manie, “ek het ook al geleer dat ’n mens hierdie flinke professor nie sommer dadelik op sy woorde moet takseer nie. Hy sê partykeer dinge wat ’n mens, veral ons ouer boere, net-net wil laat vlam vat. Laat jy hom egter verder praat, kom jy agter dat hy tog meestal reg is. “So is dit ook met sy bankrotskap-storie.” Kassier sê ’n gewone sakeman kan taamlik gou agterkom dat hy op…

LANDBOULEIERS het die staat se Operasie Phakisa, gemik op versne ldelandbou-ontwikkeling en grondhervorming, verwelkom, maar terselfdertyd gewaarsku dit moet nie vir politieke gewin misbruik word nie. “Agri SA is verbind tot die Phakisa-proses, maar sal nie toelaat dat dit ontspoor word deur onverantwoordelike en ongrondwetlike politieke uitlatings nie,” was mnr. Johannes Möller, voorsitter van Agri SA se reaksie op Phakisa se bekendstelling. “Ons sal die President in die hof sien as daar pogings is om wetgewing wat verwoestend vir die landbou sal wees, by Phakisa se agterdeur te probeer inbring.” Pres. Jacob Zuma se omstrede uitlatings oor grondhervorming op die bekendstelling buite Pretoria het gunstige elemente van die plan oorskadu. Zuma het die voorneme van onteiening sonder vergoeding herhaal en gesê “werklike versoening sal nie moontlik wees as die grondprobleem…

‘Die oorlewing van die bedryf, die land se voedselsekerheid, die landelike ekonomie, asook 130 000 werkers en hul gesinne is nou grootliks in die hand van die Regering.’ MET ’n goed gebalanseerde regulatoriese omgewing sal Suid-Afrika nie hoendervleis hoef in te voer nie. Die vernaamste rede vir die huidige krisis in die plaaslike hoenderbedryf is weens die invoer van hoendervleis uit die Europese Unie (EU). Só het mnr. Kevin Lovell, uitvoerende hoof van die Suid-Afrikaanse Pluimveevereniging, aan die Parlement se portefeuljekomitee vir landbou, bosbou en visserye gesê. Die land verloor 1 069 regstreekse en onregstreekse werksgeleenthede vir elke 10 000 ton hoendervleis wat hy minder lewer. Sonder ingevoerde hoendervleis kan 50 000 werksgeleenthede geskep word. Die oorlewing van die bedryf, die land se voedselsekerheid, die landelike ekonomie, asook 130 000…

AS BKB en GWK slaag met planne om hul eiers in een mandjie te sit, kan dit help om boerderye winsgewender en volhoubaarder te maak. Dís die mening van dr. Kobus Laubscher, landbou-ekonoom en voorsitter van FarmVision. “Ek twyfel of die ooreenkoms gaan lei tot ’n totaal nuwe bakkie met ses wiele, maar dit gaan eerder twee bakkies wees wat die land op verskillende paaie gaan aanpak. Dit kan tot groot voordeel van die landbou wees.” Die direksies van BKB en GWK het hul aandeelhouers ingelig dat hulle geleenthede ondersoek om hul besighede tot wedersydse voordeel te kombineer. Luidens die aankondiging sal dit lei tot die vestiging van ’n nuwe landbougroep van wêreldgehalte wat wesenlike waarde vir aandeelhouers en ander belanghebbendes sal ontsluit. “Enige nuwe ontwikkelinge in hierdie verband sal…

1 ZAMBIË | Perke op buitelanders in hoendermark Die Zambiese regering het onlangs buitelanders verbied om lewende hoenders te verkoop. Me. Margaret Mwanakatwe, die land se minister van handel, sê enige buitelander wat voortaan lewende hoenders verkoop, kan beboet word of selfs tronkstraf opgelê word. Die verbod geld groot- én kleinhandelverkope, en kom ná onvoorspelbare winste in die plaaslike pluimveebedryf weens hoë insetkoste en gesubsidieerde pluimvee-invoer. Weens dié probleme het die pluimveevereniging van Zambië (PAZ) die regering gevra om maatreëls in te stel wat die plaaslike bedryf sal beskerm. – African Farming 2 NIGERIË| Min hoop vir landboufinansiering Skeptisisme heers oor die Nigeriese sentrale bank se onlangse aankondiging dat banke 5% van hul wins ná belasting eenkant moet sit om die landbou en nie-olie-uitvoer te finansier. Die dagblad The Vanguard…

DIE ANC sal nie die 6% pasella steun wat die EFF aanbied, aangryp ten einde die nodige tweederdemeerderheid in die Parlement te kry om die eiendomsklousule in die Grondwet te wysig nie. Dié wysiging is nodig om grondonteiening sonder vergoeding moontlik te maak. Die EFF het verlede week ’n mosie ingedien waarin hy vra dat die Parlement erken artikel 25 (1) van die Grondwet, wat private eiendomsreg beskerm, is die rede hoekom die grondkwessie onopgelos bly. Die mosie vra ook dat die Parlement ’n ad hoc-komitee op die been bring om die eiendomsklousule in die Grondwet te wysig sodat die staat grond sonder vergoeding in die openbare belang kan onteien. Die Nasionale Vergadering het met 261 stemme teen 33 teen die mosie gestem. Twee LP’s het buite stemming gebly. ALBATROS…

Die jaarlikse staatsbegroting wat op 22 Februarie deur die Minister van Finansies in die Parlement ter tafel gelê is, bevestig dat Suid-Afrika stadig maar seker op die pad van kruipende sosialisme is, ten spyte van sekere kommentators se mooi woorde. Die belasting op die inkomste op individue (veral hoërinkomstegroepe) en ondernemings (veral mediumgroot ondernemings en boerderye) is aansienlik verhoog. Dit is ’n neiging wat in die jongste aantal jare aan die gang is. Dit het veral versnel sedert mnr. Trevor Manuel nie meer Minister van Finansies was nie. Uiteindelik het die risiko’s van ’n kredietafgradering omdat staatskuld te vinnig groei die neiging effens laat briek aandraai. (Onthou, mnr. Pravin Gordhan was vantevore ook Minister van Finansies met Jacob Zuma as President.) Die projeksies in die begrotingsdokumentasie dui daarop dat Gordhan…

Hoekom praat ons van volhoubare landbou? Hoekom wil ons afgetakelde grond in stand hou? Só vra mnr. Gabe Brown, veeboer en dekgewas-pionier van die Amerikaanse deelstaat Noord-Dakota. Hy is deel van ’n toenemende beweging wat die term herlewingslandbou (regenerative ag r iculture) verkies – ’n verwysing na praktyke wat nie bloot daarop gemik is om die agteruitgang van grondgesondheid te keer nie, maar om dit tot hoër as historiese vlakke te laat herleef. Die doelwit is om landbougrond se produksiepotensiaal nie net in stand te hou nie, maar om dit te verhoog deur die koolstofinhoud toenemend aan te vul. Dít word terselfdertyd as een van ons belangrikste wapens teen aardverwarming beskou omdat herlewingsboerderypraktyke deur die normale natuursiklusse verseker dat die kweekhuisgas koolstofdioksied uit die atmosfeer onttrek en as koolstof in…

Hoe kry julle dit reg om elke dag van die jaar wortels te oes? Ons saai gereeld nuwe landerye sodat daar voortdurend wortels is om te oes. In die somer saai ons minder gereeld as in die winter, want in die winter het wortels meer tyd nodig om oesgereed te raak. Ons siklus is dus twaalf maande van die jaar, bykans elke liewe dag, met ’n somer- en winteroestyd. Hoe dra kultivars by tot die lang produksietyd? Daar is verskeie kultivars wat in sekere areas beter doen as in ander. Tans is ons topkultivar Dordoyne. Dit lewer goeie opbrengste en jy kan die kultivar reg deur die jaar verbou. Dit lewer wortels van goeie gehalte: Goeie blaaraanhegting, ’n mooi vorm en ’n kern wat byna dieselfde kleur as die buitenste…

Hoe het jou onderneming ontstaan? Ek is op Ladybrand gebore – my ouers is saaiboere hier – en ek het tien jaar gelede ’n restaurant begin. Ná my troue met Vlok, ’n Oos-Kaapse boer, het ons Lady Grey toe getrek en ek wou nooit weer ’n restaurant hê nie. Ek was egter nog altyd lief vir kos en diere, en toe ons 2½ jaar gelede teruggekom het Ladybrand toe, was daar ’n kans om die Living Life Station Café oor te neem. Ek het al saam met die vorige eienaar, Klaradyn Grobler, gewerk. Sy het die restaurant in ’n ou skuur ingerig en ek het die dekor gehou. Ek het ook ’n deli by die Ladybrand-akademie begin. Is daar sinergie tussen jou gastehuis en die restaurant? Die Station House bied…

Die liefde weet wanneer om ‘nee’ te sê en wanneer om ‘ja’ te sê. Die woord wat waarskynlik die meeste misbruik word, is “lief-de”. Dis moeilik om te beskryf hoe groot daardie misbruik is. Dit gaan nie net oor mense se optrede tenoor mekaar nie, maar dit raak ook mense se verstaan van die liefde wat God vir ons het, en hoe Hy dit toepas in ons daaglikse lewe. Ons vind ’n skokkende voorbeeld van menslike misbruik van die liefde in die tragiese verhaal van Amnon, wat onder die skyn van liefde sy halfsuster Tamar verkrag. Die feit dat hy haar onmiddellik ná sy afskuwelike daad wegjaag, is genoegsame bewys dat dit beslis nie liefde was wat hom gedryf het nie (2 Sam. 13). Ware liefde sal nooit só maak…

DIE rede waarom plase maklike teikens is vir rooftogte, is dat dit dikwels geïsoleerd is, geleë is op plekke waar polisiedienste wisselvallig is, daar dikwels ouer mense gehuisves word en dit gesien word as plekke waar vuurwapens gesteel kan word. Dit is egter moeiliker om die brutaliteit van dié aanvalle te verduidelik. Dr. Johan Burger, navorser by die Instituut vir Sekerheidstudies, sê navorsers het in onderhoude met plaasaanvallers in aanhouding gevind marteling word soms gebruik in situasies waar die aanvallers vermoed geld of besittings word van hulle weggesteek, soos in ’n geheime kluis. Ander faktore mag egter ’n rol speel. Die gedagte dat sommige plaasaanvalle deur haat en woede gemotiveer word, is polities plofbaar, maar kan nie uitgesluit word nie. Tydens die moord-en-roofverhoor van mnr. Knowledge Paulus Mandlazi in verband…

Operasie Phakisa is ’n resultaatgedrewe inisiatief onder leiding van die Presidensie. Phakisa is ’n Sotho-woord wat “maak gou” beteken en het die spoedige bereiking van voorrangdoelwitte, soos uiteengesit in die Nasionale Ontwikkelingsplan, ten doel. Die eerste stap was om sleutelbelanghebbendes uit die openbare, private, akademiese en burgerlike sektor byeen te bring om saam te werk. Een van die voorvereistes was dat Agri SA ál die provinsiale en 24 geaffilieerde bedryfsorganisasies en kundiges vyf weke lank heeltyds moes beskikbaar stel om inisiatiewe te ontwikkel. Nou ja, het dit nie ’n konsternasie veroorsaak nie! Almal was reeds heeltyds aktief betrokke by onderhandelinge met staatsdepartemente, die reël van kongresse, besoeke aan landbouverenigings, droogtehulp, ensovoorts. So ook Agri SA se personeel. Uiteindelik is ooreengekom dat Agri SA ’n span van drie kundiges sou beskikbaar…

JZ WIL GROND VAT: IS BOERE NOU WAKKER? Noudat pres. Jacob Zuma gesê het die Regering wil kommersiële plase sonder vergoeding vat, sal die georganiseerde landbou hopelik uit sy gerustheid wakker skrik, sê dr. Frans Cronjé van die Suid-Afrikaanse Instituut vir Rasseverhoudinge. Hy skryf in ’n meningstuk op Netwerk24 dat die Regering kommersiële boere een voor is. Kommersiële boere het by hierdie punt gekom deur drie strategiese foute te begaan, waarvan die eerste was dat die georganiseerde landbou gedink het hy kan met die Regering onderhandel oor hoeveel van boere se grond gekonfiskeer behoort te word. SEKELBOS skryf: My indruk van Agri SA is dat hy effens naïef is wanneer hy met die Regering onderhandel. Verlede jaar se droogtehulp is een voorbeeld. Ek het van die begin af geweet ons…

DIE grootste gevaar wat die uitheemse herfskommandowurm vir die somersaaigebiede inhou, is nou verby, sê mnr. Corné Louw, senior ekonoom van GraanSA. “Die wurm rig skade aan in die reproduktiewe stadium van die plant se lewensiklus. Ons is reeds verby hierdie stadium. Die risiko van skade is dus nou laag. “Ons sal egter eers teen oestyd weet hoeveel tonne hierdie wurm ons regtig gekos het,” sê hy. Boere van die Settlers-omgewing in Limpopo kon skade aan hul sorghumlande doeltreffend beperk teen R600 per hektaar, sê mnr. Willem Groothof, wat daar boer. Die meeste boere in die omgewing het hul landerye bespuit toe die wurm die eerste keer gewaar is. Die wurm was aanvanklik eers in die mielies, maar het toe na die sorghum gemigreer. “Die Bt-geen is vir ons ’n…

SUID -AFRIK A het verlede jaar byna 25% meer hoenderstukke aan die been ingevoer as in 2015, en 81% daarvan het uit die Europese Unie (EU) gekom. Altesaam 239 589 ton hoendervleis is ingevoer, waarvan 194 399 ton uit die EU gekom het. Die vry-aan-boord-waarde van die invoer verlede jaar was amper 24% hoër as in 2015 – R3,363 miljard, vergeleke met 2015 se R2,72 miljard. Mnr. Kevin Lovell, uitvoerende hoof van die Suid-Afrikaanse Pluimveevereniging, sê die hoeveelheid stukke aan die been wat verlede jaar ingevoer is, is meer as die totale produksie van Country Bird Holdings, die land se derde grootste produsent. Die groei in invoer uit die EU was ondanks teenstortingstariewe wat sedert 2015 vir stukke aan die been van sekere maatskappye in Duitsland, Nederland en Brittanje geld.…

’N MENS hoef niks verder as die Parlement se register vir geskenke en ander belange te kyk om te sien watter landbouverwante portefeulje die warmste politieke patat is nie. Die enigste geskenk wat mnr. Senzeni Zokwana, die Minister van Landbou, Bosbou en Visserye, verlede jaar verklaar het, was ’n koei ter waarde van R12 000. Mnr. Gugile Nkwinti (foto), Minister van Landelike Ontwikkeling en Grondhervorming, het egter hope landbouverwante geskenke gekry –onder meer skape, ’n jong koei, hoëgraad-kaviaar van Poolse visboere en kaas, jogurt en wyn van Suid-Afrika se Landbounavorsingsraad (LNR). Hy het die jong koei gekry by een van die land se mees omstrede koninklikes, en boonop die grootste grondeienaar in Kwa-Zulu-Natal, koning Goodwill Zwelithini, die enigste trustee van die Ingonyama-trust. Mnr. Krzysztof Jurgiel, minister van landbou van Pole,…

Dertien plase is in kwarantyn nadat verskeie gevalle van brucellose die afgelope paar weke in die Oos-Kaap aangemeld en beeskuddes positief vir die siekte getoets is. Van dié kuddes was tien in die Nelson Mandelabaai-metro en die distriksmunisipaliteit Sarah Baartman. Twee plase in die distriksmunisipaliteit Chris Hani en een in die Fort Beaufort-Amathole-gebied was ook in kwarantyn. Dr. Lubabalo Mrwebi, die provinsie se veeartsenyhoof, sê dit is ‘n uiters gevaarlike siekte wat aan mense oorgedra kan word, en as hulle nie gou behandeling kry nie, kan dit die sentrale senuweestelsel aantas. Daar is geen behandeling vir die siekte by beeste nie. Diere wat positief getoets word, moet dadelik geslag word. “Boere wie se plase in kwarantyn is, mag nie hul diere vervoer nie. Besmette diere kan onder toesig van ’n…

Planne van die Departement van Landbou, Bosbou en Visserye om die ganse varsproduktebedryf te inspekteer, kry die wind van voor. Talle bedryfsorganisasies het gesê hulle gaan die wettigheid van die inspeksiediens, waarvoor Prokon as diensverskaffer aangewys is, betwis. ’n Woordvoerder namens verskeie bedryfsorganisasies — onder meer die Tamatieprodusente-organisasie, Hortgro, Subtrop en die Sitruskwekersvereniging — wat gevra het om anoniem te bly, sê die proses se administratiewe geregtigheid is te betwyfel. “Dit was ’n ondeursigtige, arbitrêre proses wat gevolg is. Enige argument of voorstelle van ons kant af word bloot geignoreer. Daar was gebrekkige skakeling met die bedrywe en die proses word nou inderhaas afgedwing.” Die woordvoerder sê bedrywe is nie gekant teen inspeksies as sodanig nie, maar teen die metodiek. “ ’n Duur eindpunt-inspeksiemetode wat nêrens ter wêreld meer gebruik…

Dit het 40 jaar en verskeie regsgedinge geneem, maar uiteindelik is ’n Oos-Kaapse boer vergoed vir grond wat ingevolge die apartheidsregering se tuislandbeleid onteien is. Mnr. Ivor Phillips (82) van Port Alfred se familieplase Thibet Park en Keys Poort, in die distrikte Tarkastad en Queenstown, is in 1977 onteien om dit by die destydse Ciskei in te lyf. Phillips en sy broers wou nie die familiegrond, wat sedert 1891 in hulle besit was, verkoop nie, maar dit is vir R475 000 deur die Suid-Afrikaanse Ontwikkelingstrust oorgeneem. Die plase vorm vandag deel van die Tsolwana-wildreservaat. Phillips het in ’n 1998 grondeis aangevoer dat hy destyds nie billik vergoed is nie. Ses jaar later het die Oos-Kaapse Grondeisekommissaris die eis in 2004 as geldig aanvaar. In 2008 is Phillips R6,9 miljoen aangebied,…

Elke testament moet ’n paar standaard-paragrawe bevat. ’n Erflater, testamentmaker of testateur/testatrise moet weet hoe ’n testament se inhoud behoort te lyk. ’n Basiese testament behoort die volgende paragrawe of bepalings te bevat. AANHEF. Dit moet die volgende insluit: – Identiteit van die testateur/testatrise (naam en identiteitsnommer). – Huwelikstatus van die testateur/testatrise: Ongetroud, weduwee, wewenaar, gades getroud buite gemeenskap van goedere met/sonder die aanwasbedeling, gades getroud binne gemeenskap van goedere. – Domicilium: Dorp/stad woonagtig tydens afsterwe. – Herroeping van die vorige testament en kodisille. ■ ERFLATING. Legate en die restant of volle boedel word vererf deur die eerssterwende. Bepalings word gedoen in die geval van erflatings by gelyktydige afsterwe (of 30 dae ná mekaar) en gesinsuitwissing. ■ MORTIS CAUSA TRUST. Indien erfgename minderjarig is, word hul erfenisse eerder na ’n…

Die uitheemse herfskommandowurm, wat Suid-Afrika vanjaar die eerste keer ingeval het, sluit hom aan by vier ander kommandowurm-spesies wat reeds die plaaslike landbou van tyd tot tyd teister. Me. Des van Heerden, tegniese gewasdeskundige van Syngenta Suid-Afrika, verduidelik: Die herfskommandowurm (Spodoptera frugiperda) is verlede jaar die eerste keer in Afrika opgemerk – in Wes- en Sentraal-Afrika. Dit kom al jare lank in Noord- en Suid-Amerika voor. Dit kan gewasse, soos mielies, sojabone, droëbone, graansorghum, sonneblomme, koring, gars en grondbone, aanval, asook gras, weidinggewasse en groente, soos kool en die rissie-groepe. Mielies is hul voorkeurgewas, hoewel die gasheerreeks nog in Suid-Afrika bevestig moet word. Eiers word in groot groepe op blare gelê, tussen 50 en 250 eiers in ’n pakkie wat met motskubbe en hare bedek word. Larwes se kleur wissel…

“Suid-Afrika kan nie verwag dat nuwelingboere die mynveld van die moderne boerdery sonder die nodige opleiding en steun betree nie,” sê mnr. Nick Serfontein, voorsitter van die Sernick-groep, van die plaas Liebenbergstroom by Edenville. Dié megaboer het pas opleidingsgeriewe vir 24 landboustudente op sy plaas voltooi as deel van sy poging om sy medeboere vanjaar te mobiliseer om hand in eie boesem te steek om nuwelinge suksesvol in die landbou te vestig. Die opleidingsentrum is vir Nick ’n droom wat bewaarheid is en nie net leë praatjies nie. Dit bestaan uit ’n lesinglokaal en slaap- en eetgeriewe vir 24 mense. Kursusse in algemene boerderypraktyke en veeboerdery word deur die Batho Pelegroep daar aangebied, met die samewerking van die Landbousektor se Opvoeding-enopleidingsowerheid (AgriSeta). Twee groepe van 25 mense is reeds deur…

“Ja, dis lekker om die pryse te ontvang. Dit gee erkenning aan jou harde werk en dit motiveer ’n man so ’n bietjie,” vertel mnr. Norman Cornellissen van die Vaaldam-boerdery naby die Heuningneskloof-stasie (tussen Kimberley en Hopetown), waar hy op die stoep van sy nuutgeboude huis sit. Sy familie is al meer as 100 jaar in die omgewing en deur die verloop van die geskiedenis het sy voorgeslagte dit bekom. Norman het destyds as kontrakteur en in die myne in die Noord-Kaap gewerk, maar weens ’n ongeluk het hy en sy vrou, Claudette, op 28-jarige ouderdom gaan boer. Toe hul kinders moes skool toe, het hulle vir eers naweekboere geword en op Kimberley gaan woon tot hul studies klaar is. Maar nou is Norman en Claudette en sy ouers, David…

1 Orpington. Beste groot sagteveerhoender. Kategoriewenner, raskampioen asook die beste hoender op die skou. Eienaar: Me. Nelmarie Neethling (sel 082 870 2783), Struisbaai. 2 Leghorn-haan. Kategoriewenner: Beste sagteveerhoender (ligte ras) en raskampioen. Eienaar: Mnr. Pieter Stoffberg (sel 082 835 7643), Rawsonville. 3 Bantam-Leghorn. Kategoriewenner: Beste sagteveer-bantam op die skou en raskampioen. Eienaar: Mnr. Albert Lingenvelder (sel 082 461 1967), Villiersdorp. 4 Rooskam. Kategoriewenner en raskampioen: Die beste egte bantam op die skou. Eienaar: Mnr. Hannes du Plessis (sel 082 574 5916), Krugersdorp. 5 Indiese Veghoender (donkerkleurig). Kategoriewenner: Beste groot hardeveerhoender en raskampioen. Eienaar: Mnr. Hannes du Plessis, Krugersdorp. 6 Ou Engelse Veghoender. Kategoriewenner: Beste hardeveer-bantam en raskampioen. Eienaar: Mnr. Jannie Botha (sel 073 607 8032), Gezina. 7 O Shamo. Kategoriewenner: Beste Asiatiese hardeveerhoender. Eienaar: Mnr. Hannes du Plessis, Krugersdorp. 8…

My vriend Lehan Mulder is jonk, aangenaam, hardwerkend, vol stories, eet graag steak en drink ’n brandewyn. Dié kêrel sit egter nie sy lippe aan slaai nie. Hy sê jy kry twee soorte mense: ’n Slegs-braaier en ’n braaier-en-slaaier. Hy verduidelik dit só: Die eerste groep is daardie mense wat die tjops van die rooster af eet en hul hande aan hul broeke afvee terwyl hulle hul vroue in die oë kyk. Die braaier-en-slaaiers hou van ’n bietjie verskeidenheid by hul braai. Dié groepie is gewoonlik wyndrinkers (moontlik rooi) en voor die aand verby is, sal hulle jou vertel hoeveel die bottel kos, hoeveel die kos kos en in watter lande hulle oral was. Ek val darem nie in die laaste kategorie nie, al geniet ek ’n slaai by my…

Wilma, oorspronklik daar van Riebeek-Wes se wêreld, het vir etlike jare die onderwys gedien. Sy het letterlik van die Kaap tot die Oranjerivier se wal onderwysposte beklee. In daardie dae het die jong manne die nuwe, jong onderwyseresse deeglik deurgekyk vir geskikte troumateriaal, maar Wilma was slim. Sy het haar nie laat vang deur enige troulustige man nie. Toe beland sy egter op Laingsburg en daar vang slim sy baas en loop sy haar rieme styf toe Sol sy visier instel en aanlê. Sommer gou-gou lui die trouklokke en vestig sy haar in die distrik. Wilma se niggie, Ena, was getroud met ’n boer uit die Koup-streek. Die niggies het op Riebeek-Wes saam skoolgegaan en is sedertdien ook boesemvriende. En so kom kuier Wilma se suster, Etta, uit die stad…

Beesboere het in die afgelope paar jaar swaar getrek om die droogte te oorleef. Kuddegetalle is drasties verminder en weidings is nog in ’n herstelfase. Hoe raak dit die verbruiker en die volhoubaarheid van vleisproduksie in die land? Kyk wat sê die bedryf oor dié sake en die aksieplanne wat nou nodig is om beesvleisproduksie weer op dreef te kry. Die ateljeegas, dr. Michael Bradfield, hoof van Breedplan, gesels oor hoe die bedryf besig is om homself te verbeter. Die beskikbaarheid, prys, gehalte en voedingswaarde van beesvleis word bespreek. Die Nasie in Gesprek-span kuier ook in die Bosveld by mnr. Eric van Wyk op sy plaas naby Mareetsane om meer te hoor van die moeilike én goeie tye wat rooivleisprodusente en hul werknemers die afgelope paar jaar beleef het. Die…

‘N SAAIPROJEK op Porterville wat al 13 jaar lank bestaan, sorg dat nie net die landbousektor in die gebied “goeie oesjare” beleef nie, maar ook die dorp se kinders en bejaardes. Die inkomste uit die projek word verdien deur koring op ’n stuk meentgrond van 25 ha te verbou en die oes te verkoop. Die Bergrivier-munisipaliteit stel die grond gratis aan die vereniging beskikbaar. Nou word ook beoog om kanola te plant. Dié projek – wat in 2004 deur die Porterville-gemeenskapsvereniging begin is om behoeftige instansies by te staan – kon verlede maand R140 000 aan vier verdienstelike organisasies in die dorp skenk danksy verlede jaar se oes. Dit is die grootste skenking wat die vereniging tot nog toe gemaak het. Die opbrengs van verlede jaar se oes was 2,973…

INTERNASIONAAL: Die mielieprys het met 1,8%, of $2,68/t (R34,91/t), tot $145,03/t (R1 889/t) teenoor die vorige week gedaal. Op ’n jaargrondslag is dit 1,8%, of $2,54/t (R33,09/t), hoër. Verwagte pryse: Maart – $143,14/t (R1 865/t), April – $146,06/t (R1 903/t), Mei – $148,97/t (R1 940/t), Julie – $151,57/t (R1 974/t). PLAASLIK: Die Safex-prys van wit mielies het met 1,8%, of R54/t, tot R2 886/t teenoor die vorige week gedaal. Die prys van geel mielies het met 0,4%, of R10/t, tot R2 795/t gestyg. Op ’n jaargrondslag is wit mielies se prys 42,1%, of R2 099/t, laer, terwyl geel mielies 17,9%, of R611/t, goedkoper is. Verwagte witmieliepryse: Maart – R2 886/t, April – R2 450/t, Mei – R2 030/t, Julie – R1 946/t. Verwagte geelmieliepryse: Maart – R2 795/t, April –…

Voornemende melkbokboere moet hul huiswerk baie goed doen voor hulle die bedryf betree, sê mnr. Donald Mouton, voorsitter van die Suid-Afrikaanse Melkboktelersgenootskap. “Melkboerdery, hetsy met bokke of koeie, is ’n oopdeur-tronk. Jy werk 24 uur per dag, sewe dae van die week, 365 dae van die jaar.” Volgens me. Rina Belcher van die Belnori-boetiekkaasmakery by Babsfontein in Gauteng het baie kleinhoewe-melkbokboere en -kaasmakers daar die bedryf verlaat. Mouton sê voornemende boere moet besef hul diere het ’n gebalanseerde rantsoen en goeie ruvoer nodig om goeie produksie te handhaaf. Sy raad is verder: “Koop jou bokke van ’n erkende teler wat produksie-aantekening het. Vind uit of daar ’n mark vir jou produk is. Vra jouself af of die gehalte van jou produkte konstant is. Een ongunstige ondervinding deur ’n klant kan…

GAUTENG NIGEL GROOTVLEI (453) 451 ha, aan Groenewald-familietrust, van L.H. Botha, R3 005 000. HAVERKLIP (265) 72 ha, aan Agro-Farming Inv (Edms.) Bpk., van A.J.T. Nel, R1 300 000. ELANDSFONTEIN (90) 355 ha en ELANDSFONTEIN (108) 76 ha, aan Redefine Prop Bpk., van S&J Land Inv (Edms.) Bpk., R356 172 157. PRETORIA BRANDBACH (471) 42 ha, aan Scorpion Torch SA (Edms.) Bpk., van E.M. van den Ende, R650 000. KLIPDRIFT (90) 54 ha, aan B.G. McLachlan, van Brugail Inv (Edms.) Bpk., R1 500 000. KLIPDRIFT (90) 54 ha, aan Fairy Land Estate, van B.G. McLachlan, R3 500 000. WELGEVONDEN (124) 21 ha, aanH.E.duToitenR.J.duToit, van Dinokeng Leisure Prop Forty One, R2 100 000. KWAZULU-NATAL LADYSMITH RIET KUIL (1181) 317 ha, aan Crest Exports, van L.S. Buys, R2 000 000. PIETERMARITZBURG LOT…

Altesame 22 van 42 distrikte in die Vrystaat het stygende grondprysneigings van Januarie tot Desember verlede jaar getoon. Die ontleding van grondverkope in die tabel is vir grond van meer as 10 ha. In dié tyd is 705 ooreenkomste in 42 distrikte gesluit, wat 310 118 ha teen R4,311 miljard behels het. Daarvan was 57 transaksies van kleur – 8,1% van die totaal. Dié soort transaksies sluit in verhandelings tussen individue (39), regeringsaankope (3) en grond verkry vir stedelike ontwikkeling (6). Dit het 14 067 ha (4,5%) teen R784 miljoen – 18,2 % van die totale waarde – behels. Van die totaal was 58 transaksies vir grond van minder as 50 ha (8,2%), met die meeste transaksies (356 of 50,5%) vir grond van 300 ha of meer. Statistieke vir ál…

R2,9 MILJOEN REKORDOMSET VIR KONSORTIUM Die duurste prys nóg (R80 000) op Konsortium Merino se produksieveiling op Victoria-Wes is op dié groep se 32ste produksieveiling geëwenaar. Die gemiddelde rampryse het boonop ’n SA rekord-omset van R2 971 400 opgelewer. Ál 353 ramme op die veiling is teen ’n puik gemiddelde prys van R8 418 stuk verkoop. Die 554 ooie op die veiling is teen gemiddeld R2 346 stuk verkoop, met ’n hoogste prys van R2 600 stuk vir tweetand-handelsmerkooie. Astra Deals, Prieska, het hulle gekoop. Die duurste ram (op foto) is aan die Mikneiah-boerdery van mnre. Johan en Roelof Theron, Murraysburg, en mnr. Johan Moolman van Dunedin, Beaufort-Wes, verkoop. By die ram is, van links, mnre. Vetties Esterhuizen, Konsortium Merinoteler, Hannes Esterhuizen van Segard Masurel-wolmakelaars, Jakkie Nel, afslaer, Roelof Theron…

Die Brangusbeesras het deur die droogte sy staal getoon. Dié ras het danksy sy aanpasbaarheid, poena-eienskap en goeie reproduksie as mediumraamdier baie veld onder Suid-Afrikaanse telers gewen. Mnr. John Rafferty, rasdirekteur van die Brangus-beestelersgenootskap van Suid-Afrika, sê die rasgetalle is bestendig met sowat 38 000 geregistreerde diere van 175 telers. Die genootskap het min telers in die gebied noord van Pretoria, wat deur hartwater geteister word. Daar is egter nou enkele telers wat hul diere teen dié siekte voorberei. Op die nasionale veiling op Harrismith verlede Augustus is bulle teen gemiddeld R59 000 stuk verhandel. Die prys van koeie het op ander veilings einde verlede jaar effens gedaal tot R14 000 stuk, met verse wat gemiddeld R11 000 stuk en bulle wat gemiddeld R33 000 stuk behaal het. “Ek meen…

ALGEMEEN 11 MAART: Durbanville-plaasfees. Diemersdal-wynlandgoed. E-pos: plaasfees@bergsigdv.co.za 16 MAART: Pluimveeprodusentevereniging se jaarvergadering en ope dag, raadsaal, Namibiese Landbou-unie, Windhoek. Rina Hough. E-pos: rina@agrinamibia.com.na; tel. 00264 61 237 838. 23 MAART: Monsanto-inligtingsdag. Bothaville. E-pos: magda. du.toit@monsanto.com 24-25 MAART: Namibiese Landbou-unie se landbou-braaikompetisie. Uhlenhorst-boerevereniging, Bitterwasser Lodge, Uhlenhorst. Hoekus van Niekerk. E-pos: hoecon@afol.com.na; sel 00264 81 294 4676. 24-25 MAART : Groot Pampoenfees. Heidelberg (Wes-Kaap). www.pumpkinfestival.co.za 28-30 APRIL: Suid-Afrikaanse Kaasfees. Sandringham, Stellenbosch. Agri-Expo. E-pos: admin@agriexpo.co.za; web: www.cheesefestival.co.za; tel. 021 975 4440. BOEREDAE 9 MAART: Droëboonprodusente-organisasie se inligting-en-gewasdag. Gideon Anderson, Zonnebloem-boerdery, Middelburg (Mpumalanga). E-pos: info@beans.co.za 11 MAART: Onderstepoort-boeredag (Brahman). Lizemari Terblanche. E-pos: lizemari.ter@gmail.com; tel 072 380 0846. 14 MAART: Inligtingsdag en volstruisveiling. Oudtshoorn-navorsingsplaas. Tel. 044 203 9404, 044 203 9420. 23 MAART: Voermol-boeredag by die nasionale Beesboer van die Jaar, Heinrich Bruwer. Lovedale, Vryburg.…