Indholdsfortegnelse for December 2019 i Tuis

roep ’n ouerige man by my voorhek om hulp. Darem nie ’n paniekerige noodkreet nie, eerder gekwel, soos wanneer jy ’n “ligte mistykie” gemaak het. Jy weet, ’n koffiekol op jou wit hemp net voor ’n belangrike vergadering. Of een bruin, een swart sokkie aan jou voete. Of wanneer jy besef die kinders drink pons uit die grootmense se bak met die vodka... Ek staal my vir ’n vergesogte “Kersverhaal”. Dis immers middel Desember. “Ek het verdwaal,” begin hy halfverleë verduidelik. “Ek was op soek na ’n ou herinnering, maar ek het my misgis en dit raak nou vinnig donker. Ek het gewonder of jy my die kortste pad na my gastehuis kan beduie.” Oor iemand my kort tevore “onnodig sinies” genoem het (ek hou vol ek is nie sinies…

JAKARANDA-KINDERHUIS SE LIGGIEFEES 1–31 Desember: Pretoria Vier die feestyd met ’n besoek aan die jaarlikse Liggiefees by die Jakaranda-kinderhuis. Die 21 huise word dan met duisende liggies versier en oopgestel vir die publiek. Besoekers kan ook uitsien na lewende vermaak, ’n Kersmark, gesinspret en vele meer. Besoek jacarandachildren.co.za vir inligting oor kaartjies of skakel 012 800 4700 vir besonderhede. LIGKUNS BY SPIER 8 Desember–19 Januarie: Stellenbosch Besoek die geskiedkundige plaas Spier vir ’n uitstalling van lig- en klankkunswerke. Kom kyk tydens ’n rustige stappie na die 18 besonderse kunswerke versprei oor die plaas. Toegang is gratis, maar bespreek vooraf ’n ete of piekniek. Besoek spier.co.za of skakel 021 809 1100. AANDSTAPPIE IN DURBAN SE BOTANIESE TUIN 12–30 Desember: Durban Geniet die betowering van ’n aandwandeling al met die verligte tuinpaadjies langs…

’n Blink gedagte Wanneer jy opdrag kry om ’n sjef se kombuis te herontwerp en op te knap, beter jy sorg dat dit nie net mooi is nie, maar so funksioneel moontlik. Dit was die ontwerper Kyle Coetzee van House2home se taak toe hy gevra is om Ivor en Roxy Jones se huis in Plumstead, Kaapstad, te vernuwe. Met ’n kombinasie van viniel met ’n warm houtvoorkoms, en skakerings van grys en mat swart vir ’n moderne kinkel, het Kyle dit beslis reggekry! Ivor, die hoofsjef by Chefs Warehouse Beau Constantia, en Roxy het reeds die oulike kroegstoeltjies gehad wat lyk soos die doppie wat ’n sjampanjeprop vashou; hulle het net meer geelkoper-aksente bygevoeg met die kashandvatsels, warm geel gloeilampe en ’n bling drankietrollie vir ’n bietjie glans. “Ons wou…

WIE Hennie en Jolanda Aggenbach en hul dogters, Mila (18), Jana (15) en Yanke (8) WAAR Durbanville Kersdag in die Aggenbach-huis is tyd vir besinning. Daar brand altyd ’n vuur of twee en die feesmaal bestaan uit geregte wat moeiteloos is en vooraf berei kan word. “Ons is nie ingestel op geskenke nie; eerder die atmosfeer en die saamkuier,” vertel Jolanda, die gasvrou en kreatiewe gees agter dié Kerssamesyn. “Dis ’n dankbaarheidsfees en daar is niks vreemds op die tafel nie. Ons maak eintlik net elke lid in die gesin se gunsteling-gereg.” Dit is daarom nie vreemd om name soos “Jana se sout-aartappels”, “Jolanda se wilde koolslaai” en “Yanke se wortelkoek” op die spyskaart te sien nie. “Hennie se takbokfilet à la Wellington” is ook daar, want wildsvleis is elke…

1 WEEKLIKSE TAKE As jou rusbank los kussings het, maak tyd om dit op te pof: Plaas die kussing op een sy en druk-druk die sye van die linker- en regterkant binnetoe. Herhaal die proses met al vier sye, skud die kussing om die opstopsel eweredig te versprei en stryk dan die oortreksel glad met jou hand. Maak seker die rusbank staan op ’n gelyk oppervlak, vee die stoffering glad en verwyder enige wolletjies. Borsel jou rusbank weekliks met ’n sagte borsel: Dit stimuleer die pool en help om oneweredighede en kleurverskille weens druk op die materiaal uit te stryk. Moenie ’n leerbank borsel nie; stof dit liewer weekliks af. 2 MAANDELIKSE TAKE Stofsuig jou rusbank deeglik en draai die kussings een keer elke maand om. Sit jou stofsuier op…

’n Lieflike engel Jolanda van Staden van Kempton Park skryf Ek wil graag meer weet oor dié hout-engel. My oupagrootjie het dit tydens die Tweede Wêreldoorlog vir ’n paar skoene verruil in die destydse Ceylon (nou Sri Lanka). Die beeld is van geelhout, die grootte is 600mm H x 750mm B x 15mm D, en dit het geen stempels of waarmerke nie. Anton Welz van Stephan Welz & Co. antwoord Dit lyk baie Europees en die kerfwerk is baie goed. Die Sri Lankane is bekend as baie bekwame kerwers, daarom is dit heel moontlik ’n plaaslik vervaardigde stuk. Dit het ’n goeie grootte en ’n lieflike patina. OUDERDOM Laat 19de–vroeë 20ste eeu WAARDE R5 000–R7 000 op ’n veiling KONTAK ct@stephanwelzandco.co.za…

IsoBoard bied jou ’n isolasie-oplossing vir nuwe én bestaande geboue, en dis een wat jy self kan installeer. Nou kan jou huis enige temperatuurskommelings sonder moeite hanteer en kan jy jou leef- en werkruimtes gemaklik hou vir die volle leeftyd van die gebou. Dié omgewingsvriendelike termiese isolasie is geskik vir al die onderskeie dele van jou huis en is net so veelsydig as wat dit doeltreffend is. Dit hou jou huis se temperatuur konstant, wat beteken jy gebruik minder elektrisiteit vir verwarming en verkoeling. Vir nog wenke, planne en inligting, besoek isoboard.com, “like” ons op facebook.com/isoboard en volg ons op Twitter by @isoboard. LAAT HOOR VAN JOU! KAAPSTAD 021 983 1140, southsales@isoboard.com DURBAN 031 569 1800, dbnsales@isoboard.com PRETORIA 012 653 8204, northsales@isoboard.com IsoBoard is maklik om te installeer; kyk die…

Hoera vir Kersfees! Laat jou liggie skyn Khalisie en haar menseboetie Euan is die ene glimlagte! – Lucinda van der Walt, Graskop, Mpumalanga Sit handjie by Rian is gereed om die boom te versier. – Chanel Jacobs, Vaalwater, Limpopo Sit jou hoed op Chopsticks die mopshond werk hard aan haar Kersfees-luim. – Sally Barrett, Howick Lui die klokkie Nyala lyk alte oulik in haar rooi halsband. – Nicolette van Wyk, Bloemfontein Kersvader se helpers Kersfees is Bello en Leah se gunstelingtyd van die jaar. – Nicole Young, Kriel Beste maats Klein Benji die Bengaalse kat meen Emmie die Franse bulhond is die beste geskenk ooit. – Zanne Nel, Greyton WEN! Die eienaars van die diere wie se foto’s hier verskyn, wen ’n middelslag-Dream Pod vir honde of ’n Nap Sack…

Toe ek vir Gwen Fagan bel om te gesels, is sy by die werk – op 95 steeds op haar pos in die kantoor van haar man, Gawie Fagan, se argiteksfirma. Hier werk sy al meer as 50 jaar lank. Gwen het in 1949 as mediese dokter gekwalifiseer, maar haar liefde vir landskapwerk en plante het oor jare haar beroep én lewe geword. Sy vertel meer oor haarself en haar reis met rose ... Waar het jy grootgeword? As klein dogtertjie het ek op die plaas Klipvlei in die Moorreesburg-distrik by my oom Gielie-hulle gewoon. My ma het sanglesse in Stellenbosch gegee. Hul plaaswerf was nie net ons speelplek nie, maar my hele lewe. Die kinders op die plaas was my speelmaatjies en hulle het by my ’n liefde vir…

1 KOOK Sit ’n gerookte ontbeende varkboud (sowat 2kg), 2 gekapte wortels, 2 grofgekapte selderystingels en 1 ui, geskil en in kwarte gesny, saam met 3 lourierblare in ’n groot kastrol en bedek met koue water. Bring tot kookpunt, draai dan die hitte laer en laat prut vir sowat 2 uur. Laat die boud in die kookvloeistof afkoel vir nog ’n uur. Haal nou die vleis uit die vloeistof (hou sowat 125ml eenkant) en laat afkoel tot hanteerbaar. 2 GLASEERSEL Sit 300g klein kersietamaties, 1 heel brandrissie en 250ml kookwater in ’n klein kastrol op die stoof en kook vir sowat 15 minute tot die tamatie en rissie begin sag word. Voeg 250ml suiker en ’n takkie tiemie of origanum by en roer tot die suiker opgelos is. Kook tot…

Op my hoge ouderdom bevind ek my skielik weer in speelgoedwinkels met Kerstyd. Nie vir ’n kleinkind, soos jy sou verwag nie, maar vir ’n oumens. My moeder. Met elke jaar dat die tyd haar nader aan ’n honderd tik, verdwyn die skapies uit haar gryse ou kop (ou dames hou mos nie varkies aan daar bo nie, by hulle is dit skapies). Stil-stil sluip die outjies weg, enkelgelid, elk met ’n ietsie onder die blad wat hy uit die arsenaal van ’n leeftyd se vlyt en vaardigheid gesteel het. Kort-kort merk ek dat daar nóg iets kosbaars weg is. Sy’t ophou onthou hoe ’n telefoon werk. Of haar dierbare ou hande het vergeet van brei, selfs van kraletjies ryg. En nou’s dit Krismis en ek soek ’n toepaslike geskenkie…

WENBRIEF Opknap vir die siel Zanelle Wessels van Pretoria skryf Ek deel graag ’n paar voor- en ná-foto’s van ons familie-strandhuis naby Groot-Brakrivier, wat ek onlangs opgeknap het. Die projek was vir my nie net ’n sielsreis nie, maar ook ongelooflik bevredigend en ’n mate van troos. Ek en my suster het die strandhuis in 2014 geërf, maar sy is op Kersdag 2016 tragies oorlede. Ek het die projek aangepak om ’n ekstra inkomste te verdien, asook om die huis te onderhou. Vanjaar sal dit ons eerste Desember-vakansie in die “nuwe” huis wees, en al weet ek my suster kan dit nie met my deel nie, leef sy voort in die nuwe herinneringe wat ons daar gaan maak. Hiermee wil ek sommer ook dankie sê vir die inspirasie wat Tuis…

IETS UIT NIETS WIE Bernard Swart WAAR Centurion, Gauteng BESIGHEID Afrithorn SY WERK Bernard Swart, ’n geoktrooieerde rekenmeester, het eendag tydens ’n staptog in die Waterberg afgekom op ’n boomstomp wat ná ’n oorstroming uitgespoel het – en net daar het die inspirasie hom getref. “Ek het geweet dié stomp het die potensiaal om ’n pragtige meubelstuk te word – trouens, dit kon selfs ’n kunswerk wees!” Hy het aan die werk gespring, en die kreatiewe proses só geniet dat hy besluit het om sy stokperdjie, houtwerk, in ’n besigheid te omskep. So is Afrithorn toe in 2018 gebore. Bernard maak ’n verskeidenheid dekorstukke, waaronder lampe, kandelabers, kanttafels en eetkamertafels. Met sy ontwerpe benut hy die natuurlike fatsoen en onvolmaakthede van die hout ten beste. Al sy meubels word behandel…

WIE WOON HIER? Lynda Burgess, Nic Real en Declan (18) en Shaelyn (16) WAAR West Beach, Kaapstad GROOTTE 300m² Wonderlike herinneringe aan familievieringe tydens die feestyd inspireer Lynda Burgess vandag nog. “Kersfees was vir my altyd so wonderlik met al die liefde, opwinding en afwagting,” vertel sy. “Ek is in my hart nog ’n kind en dit het my nog altyd bygebly. Dis so lekker om Kersfees deur ’n kind se oë te sien en ek maak nog elke Oukersaand ’n wens wanneer ek die eerste ster sien.” Die Kersboom word gewoonlik vroeg in Desember staangemaak en mooigemaak met versierings wat deur die jare versamel is. “Ek gebruik graag room en goud saam met ‘sneeuvlokkies’ en titsels rooi hier en daar. Die basis van my Kers-dekor is baie groenigheid saam…

• Gebruik loof en takke uit die tuin – veral olyftakke en lourierblare werk baie goed. • Ek versamel mooi blikkies en boksies gedurende die jaar en vul dit met koekies en klein geskenkies. Opmekaargestapel lyk dit soos ’n Kersboom en as die geskenke uitgedeel is, is die “boom” sommer klaar “opgepak”! • Steek kerse aan en laat stringliggies brand, selfs in die dag, want dit skep heerlike atmosfeer. • Waag met interessante, speelse kombinasies. ’n Tuindwerg met ’n Kersmus op sal almal laat glimlag. • Gee aandag aan garnering en hoe jy geregte voorsit. Mooi kos smaak lekkerder, al is dit hoe eenvoudig.…

Die probleem Moira Strydom van Roodepoort skryf Ons het ’n tuiskantoor (in sy vorige lewe ’n dubbelmotorhuis), maar dit het nou stoorplek geword vir alles wat nie plek in die huis het nie. Ek wil dit graag as ’n gastekamer inrig; daar is reeds ’n badkamer. Die plan is om ’n bed met bedkassies, en dalk ’n stoel of twee in te bring en die beligting te verander. Ek oorweeg ook blou as aksentkleur. Wat dink julle? Die oplossing Jenny Collins van Red Cat Design antwoord As jy dié ruimte se volle potensiaal ontgin, sal dit beslis waarde tot jou eiendom toevoeg. Hier is ’n paar idees: MEUBELS As jy genoeg plek het, koop twee driekwartbeddens wat apart gebruik kan word óf teen mekaar geskuif kan word vir ’n koninggroottebed.…

Wanneer jy jou huis wil verkoop, wil jy dit vinnig en teen die hoogste prys moontlik doen, reg? Maar dan moet die eiendom nie te lank in die mark wees nie, want dit lei dikwels tot laer aanbiedinge. En in die huidige Suid-Afrikaanse ekonomie en eiendomsmark is die druk groot. “Die eiendomsmark is tans gunstig vir kopers,” sê die FNBeiendomsekonoom Siphamandla Mkhwanazi. “Die aanbod is groter as die vraag, wat kopers ’n groot verskeidenheid keuses gee en hulle in staat stel om te soek na wat hulle wil hê. Hulle het die oorhand tydens onderhandelinge en kan dikwels ’n goeie afslag beding. Op die oomblik word 90% van transaksies in die pryssegmente bo R2,3 miljoen onder die aanvanklike vra-prys beklink. Dit beteken verkopers sal nege uit tien keer hul prys…

Dankie vir ’n kleurvolle jaar! Mag elkeen se feesgety veilig en voorspoedig wees. – Van almal by Tjhoko Paint 1 Maak ’n swartbord-‘loper’ Laat jou gaste hulself help met speelse bordkryt-aanwysings op ’n geverfde blad. WAT JY NODIG HET • veselbord (“MDF”) in die regte grootte • Tjhoko Paint in Matt Black • bokhaarroller en verfpan • bordkryt SÓ MAAK JY ... Verf jou veselbord met Tjhoko Paint in die kleur Matt Black (maar onthou, jy kan op enige Tjhoko Paint-kleur skryf). Wag tot die verf droog is en skryf dan ’n paar prettige aanwysings met bordkryt daarop. 2 Stensil jou onderborde Druk jou eie stempel af en dek jou tafel met onderborde-en-plekmatjies in een. WAT JY NODIG HET • hout-plekmatjies • mandala- en eetgerei-stensil van Tjhoko Paint • stensilkwas…

Vier die sonskyn! Midsomerdag is die langste dag van die somer, en in die Suidelike Halfrond is die somersonstilstand vanjaar op 21 Desember om 06:19. Voor die tyd van horlosies het mense die son se beweging gevolg om die tyd te bepaal. Die vroegste aangetekende sonwysers is skadu-wysers uit die antieke Egiptiese en Babiloniese sterrekunde, met die wêreld se oudste sonwyser (circa 1500 v.C.) wat in Egipte se Vallei van die Konings ontdek is. Die antieke Grieke het sonwysers ontwerp met verbinde sirkels en ’n pylvormige wyserpen; horisontale sonwysers het ’n plat oppervlak en is gewoonlik op ’n voetstuk gemonteer. ’n Sonwyser moet staangemaak word waar dit volson gaan kry, met die wyserpen wat op die regte breedteligging gestel is. In die Suidelike Halfrond moet dit na ware suid wys.…

WIE WOON HIER? Ian en Jessie Walton, hul dogter Katie, skoonseun Matt Lotz en kleinseun Benjamin (18 maande) WAAR Die plaas Restanwold, Grabouw GROOTTE VAN TUIN EN KWEKERY Sowat 1ha GRONDTIPE Klei met ’n bietjie koffieklip* * Koffieklip is ’n sedimentêre grondmengsel met ’n ysteroksiedkors As jou ma die rooskenner Gwen Fagan is, kan jy nie anders as om ’n liefde vir ouwêreldse rose te hê nie. “Hoewel ek vandag baie rose in my tuin het, was dit nie altyd my eerste liefde nie. My ma is die een wat die liefdesverhouding met ou rose het en met verloop van tyd het dit my ook beïnvloed. Vandag is ek mal oor die massa ou rose wat elke lente in my tuin blom!” sê Jessie Walton, wat op ’n plaas naby…

Macaroni-en-kaasmuffins met ham Onder R110 • Maak 12 muffins • Bereidingstyd: 30 minute Gaarmaaktyd: 15 minute • Oondtemperatuur: 180°C • 12 groot ronde skyfies sigeunerham • 30ml botter • 1 prei, gekap • 1 knoffelhuisie, gekap • 30ml meel • 300ml melk, warm • knippie neutmuskaat • 250ml mieliepitte • 250ml gerasperde kaas • 2 eiers • sowat 250g macaroni, gaar • 125ml panko-krummels • 30ml botter 1 Voorverhit die oond. Spuit die holtes van ’n gewone muffinpan met kleefwerende kossproei en sit ’n sny ham in elke holte. 2 Smelt die botter in ’n kastrol en braai die prei en knoffel saam vir ’n minuut of twee. Klits die meel by met ’n ballonklitser en braai die mengsel vir nog ’n minuut. Klits volgende die melk geleidelik by tot glad. Kook vir sowat 5 minute tot mooi dik en glad; roer af en…

OP DIE KASSIE Op Deadline Design (seisoen 1 begin 23 Desember op The Home Channel, kanaal 176 op DStv), nooi Shaynna Blaze ons in by die kreatiewe wêreld van binneontwerp. In elke episode sien ons hoe ’n huiseienaar Shaynna se firma opdrag gee om hul huis te vernuwe en beleef ons al die drama saam met haar span. Hulle moet hulle tydens die opknap by allerhande karakters, huistipes, smake en begrotings aanpas – en seker maak hulle kry alles binne die spertyd klaar! KERSMARKTE GAUTENG • 29 Nov.– 1 Des.: Die Parkview-welsynsmark in Johannesburg het geskenke, kosstalletjies, ’n jenewer-kroeg en biertent. Die opbrengs gaan aan die Nicarela-welsynsorganisasie (nicarela.org). Skakel 082 445 3525. KZN • 7–16: By die Hoërskool Hillcrest se feesmark in Durban gaan daar meer as 100 tafels kreun onder die handgemaakte…

1 Met Tuis se eerste dagboek, ’n heerlike hardeband-uitgawe van 192 bladsye met kalenders vir elke maand van die jaar, meer as genoeg skryfplek vir notas, en 100 van ons mooiste tuinfoto’s oor die jare, wil ons jou help kophou in die nuwe jaar. Dié dagboek is ’n fantastiese geskenk – des te meer omdat dit ’n paar tuinhandskoene insluit. Kry joune by winkels landwyd vir net R155 – dis een geskenk minder waaroor jy hoef te wonder! 2 Dié geskenkboks vir Tuis-lesers word verpak deur TO BE Gift Boxes – net die ding as jy graag ’n geliefde wil bederf. Dit kom netjies verpak aan by die ontvanger; al wat jy moet doen, is klik en betaal. Makliker kan dit nie wees nie. In Tuis se eerste geskenkboks teen…

WIE WOON HIER? Elzabe en Piet Malan WAAR Southdownslandgoed, Centurion GROOTTE 700m² By die Malans se ingang drapeer ’n vyeboom sy grys takke  oor die rooi baksteenmuur, sy blaredak propvol klein groenpers vytjies. Stap jy deur die sierlike roesbruin tuinhek wag ’n fees op die oog: ’n groot koi-dam met reuse-inwoners, netjies gemanikuurde buksboom-heininkies en sementpaadjies, ’n kruipvy wat teen die hoë mure opklouter, ’n imposante beeld teen die oorkantse muur... Elzabe Malan verwelkom jou by die voordeur. Sy is gasvry en hartlik – en tipies kunstenaar. Elke hoekie in haar tuin en huis skep ’n prentjiemooi beeld. Sy en haar man, Piet, het twee jaar lank aan dié huis in die Southdowns-landgoed in Centurion beplan voor hulle in 2007 ingetrek het. Met die kinders reeds uit die huis –…

V: Waar kan ek stoele soos dié op bladsy 60 van die April 2019-uitgawe koop? – Alana Niewoudt, Pretoria A: Dié stoele is van Block & Chisel (blockandchisel.co.za), maar jy sal soortgelyke stoele by Cielo (cielo.co.za) en SHF (shf.co.za) kan kry. V: Waar kan ek ’n hanglamp soos die een op bladsy 56 van die September 2018-uitgawe kry? – Freda Coetzee, Garies A: Kyk uit vir sulke lampe by Eagle Lighting (eaglelighting.co.za), Builders (builders.co.za), The Lighting Warehouse (lightingwarehouse.co.za) of K. Light (klight.co.za). V: Waar kom die mat op bladsy 25 van die Junie 2018-uitgawe vandaan? – Fiona Abbott, George A: Die mat is van MRP Home; kyk by Rugs & Such (rugsandsuch.co.za) en Airloom (airloom.co.za) vir iets soortgelyks. V: Waar kry ek ’n mat soos die een op bladsy 63…

PROJEKGIDS  Harde werk 4/10 Vaardigheidsvlak 4/10 Tyd nodig 1 tot 2 uur Maak dit vir onder R1500: hout R450, skroewe R50, gegalvaniseerde pyp R730, vernis R135, verf R90 Wat jy nodig het INKOPIELYS • 18mm-laaghout, in die volgende stukke gesaag: vier 750 x 50mm (rakstutte) een 750 x 350mm (rak) twee 750 x 100mm (bottelrak) een 700 x 50mm (glasrak se rugkant) twee 132 x 50mm (glasrak se sye) een 700 x 150mm (glashanger) twee 950 x 400mm (blad) • gegalvaniseerde waterpype (15mm) ses 750 mm-lengtes vier 150 mm-lengtes vier T-sokke agt flense • een pakkie 6 mm x 50 mmspaanderbordskroewe • een pakkie 8 mm x 30 mmspaanderbordskroewe • een pakkie 8mm x 40 mm-spoorskroewe • een pakkie wasters • houtlym (Alcolin Fast Set Wood Glue) • houtvuller •…

PROJEKGIDS Harde werk 1/10 Vaardigheidsvlak 2/10 Tyd nodig 2 uur Maak dit self vir R340 (die prys van 5 houtkissies) Ki(t)skuns Versier houtkissies van verskillende groottes en stapel dit op mekaar in die vorm van ’n Kersboom – dis ook ideaal om geskenke in te sit! Wat jy nodig het GEREEDSKAP • kunstenaarskwaste • mes • ster-koekiedrukker INKOPIELYS • maskeerband • oorskietverf • merkpenne • wynproppe • aartappel Só maak jy... Kissie 1 Plak strepe van verskeie breedtes met die maskeerband en verf dit in verskillende kleure. Trek die maskeerband af en herhaal met nog lyne. Kissie 2 Plak driehoeke aan een sy van die kissie en verf dit in verskillende kleure. Trek die maskeerband af wanneer die verf droog is en plak nog driehoeke wat met die eerstes oorvleuel.…

• Die Verenigde Oos-Indiese Kompanjie-sonwyser, gedateer 1781, in die Kompanjiestuin in Kaapstad. • Die sonwyser in die Kirstenbosch Nasionale Botaniese Tuin, wat J.R. Miller in 1920 by die Koninklike Sterrewag in Kaapstad gemaak het en aan die tuin geskenk is. • ’n Uiters ongewone sonwyser by die Nasionale Dieretuin in Pretoria. • ’n Groot vertikale sonwyser wat Danie du Toit in 1965 op Napier staangemaak het. • Die sonwyser by die digter C.J. Langenhoven se huis, die nasionale gedenkwaardigheid Arbeidsgenot, op Oudtshoorn. • ’n Groot sonwyser by Hankey, wat in 1989 gemaak is.…

• Besproeiing Jessie maak haar rose nat met drupbesproeiing. “Ons skakel dit een of twee keer per week in die somer aan. In die winter kry ons genoeg reën. Die voordeel van drupbesproeiing is dat dit die rose goed nat maak, maar minder water as oorhoofse besproeiing gebruik. Ons water kom uit ’n boorgat en ’n besproeiingskema op die plaas.” • Deklae Om te keer dat die grond uitdroog en om onkruidgroei te onderdruk gooi Jessie in die winter ’n dik deklaag van houtsnysels of ou strooi in die beddings. “Ek los ook die blare van bladwisselende bome net so in die beddings. Dié wat buite die beddings gaan lê, vee ek terug. Dit verrot en vorm ’n natuurlike deklaag.” • Plaagbeheer Jessie spuit glad nie die rose nie. “Die…

VANIELJEKOEKIES Dié bros koekie is almal se gunsteling; as jy nie lus het om die deeg uit te rol en in vorms te sny nie, rol dit eenvoudig in balletjies van okkerneutgrootte en druk plat met ’n vurk soos die grondboontjiebotterkoekies op bl. 120. Maak genoeg vir ’n sterrehemel vol Bereidingstyd: 1 uur (rustyd ingesluit) Baktyd: sowat 8–10 minute per bakplaat Oondtemperatuur: 180°C • 180g botter • 80 g (160 ml) versiersuiker • 1 groot eier • 5ml vanieljegeursel • 280 g (500 ml) meel 1 Klits die botter en suiker saam in ’n mengbak tot lig en romerig (’n elektriese klitser maak dit makliker). Klits die eier en die vanieljegeursel by. Meng laaste die meel met die hand by totdat die deeg bymekaarkom. Keer uit op ’n skoon werkoppervlak en knie tot dit net…

Vier iets spesiaals Die Lourensford-landgoed in Somerset-Wes het pas sy Limited Release Cuveé 108 bekendgestel. Dit word gemaak van druiwe wat meer as ’n dekade gelede geoes is en daarna vir 108 maande op die moer gelê het. Net 419 bottels van dié komplekse dog elegante vonkelwyn is ná die eerste ontgisting uitgereik. Koop dit by die Lourensford-proelokaal (Maandag tot Sondag, 09:00–17:00) teen R660. Besoek lourensford.co.za. DIE VOLGENDE GENERASIE Met inspirasie uit Soweto, Mama D en haar ouma se kos, het Nthabiseng Ramaboa, ook bekend as Sjef Nti, besef sy moet ou bekende geure op ’n vars manier inspan om die jonger generasie se aandag te trek. Haar eerste kookboek, My Modern African Kitchen (R350, Quivertree), fokus juis op dié nuwe aanslag en vier die kosse wat trots Suid-Afrikaans is.…