Indholdsfortegnelse for November 2016 i Weg! Ry & Sleep

Tel jy ook die dae af? Die Desembervakansie en Kersfees is om die draai en vir van ons (en hopelik ook jy) is dit tyd om die kampplanne finaal agtermekaar te kry. Verlede jaar dié tyd het ons saam met ’n klompie buitelewehandelaars vir 45 gelukkige lesers kampgoed vir Kersfees persent gegee. Die goeie nuus is: Ons en die handelaars maak vanjaar weer so. Al wat jy hoef te doen is om vir ons en Kersvader te laat weet watse stuk kamptoerusting jy graag in jou Kerskous wil hê. En nee, Koos, ons praat nou ongelukkig nie van goed soos Jurgens se splinternuwe Deluxe nie. (Vir ’n lusmaker gaan kyk op bl. 48.) Vir daardie een moet jy self spaar. Ons praat van goed soos ’n kampstoel, koelboks, Leatherman of…

Pos die bed vir pakplek Ons is al amper vier jaar op pensioen en toer deesdae só baie met ons Sprite Swing dat ons omtrent net drie maande van die jaar by die huis is. As ’n mens só kamp, is dit belangrik om dinge in te rig dat jy so gemaklik as moontlik kan leef. Soos die meeste kampeerders het my vrou, Hester, ook eers erg gekla oor pakplek en veral die min hangplek vir haar klere in ons woonwa. Ons het die storie bekyk en op ’n plan ooreengekom. Ons het begin deur die kleiner bed by die deur uit te haal. Ons het toe langs die yskas ’n hangkas met bykans ’n meter se hangplek gebou. Teen die wa se agterkant af het ons drie oopmaakkassies met…

“... almal in die kampeerbedryf moet nuut begin dink en doen. Ons moet besef goed wat vyf jaar gelede gewerk het, is oudmodies of uitgedien.’’ My vriend Sarel lewer ’n unieke diens aan woonwa-eienaars en hou sy vingers op die pols van die kampeerbedryf. Hy kan vir jou presies sê wie sukkel om kop bo water te hou of wie het ’n volhoubare onderneming. Maar hy sien ook dinge raak. Oor die jare was hy nogal in die kol oor wie oneerlik is en wie met swendelpraktyke in die kampbedryf besig is. Nou die dag bel die altyd positiewe Sarel my en hy klink beswaard. Hy sê die bedryf stagneer en het dringend ’n breinoorplanting nodig. Anders is dit doodsake. Hy vergelyk die dalende ledetalle van ons klubs met Europa…

Dis William Shakespeare se Juliet wat gevra het: “Wat is in ’n naam?”. Sy het natuurlik na Romeo se familienaam verwys, maar oor plekname kan ’n mens dieselfde vra. Elke pleknaam vertel ’n storie en soms is dit die waarheid en soms legende. Die Waterberg-omgewing in Limpopo is propvol plekke met interessante name en legendes. Bela-Bela, die ou Warm-bad, is die Tswana-woord vir “die pot wat kook” en albei name verwys na die warmwaterbron hier. Modimolleberg is ’n Sepedinaam wat beteken “God het geëet”, en verwys na klimmers wat dié berg sal uitklim en nooit terugkeer nie. Net noord van Bela-Bela lê Deon en Martie Beukes se Bosfontein-woonwaoord op ’n klein plaas. Dié oord het sy naam gekry van die fontein op die plaas, een van twee in dié geweste.…

Die Fortuner is ’n ou bekende en ’n groot gunsteling in Suid-Afrika, ook voor ’n woonwa: Suid-Afrikaners sleep al die afgelope dekade met hom. Die gewilde Hilux-bakkie van Toyota het as bloudruk gedien vir dié nutsvoertuig, maar intussen het die nuwe geslag Hilux sy buiging gemaak. ’n Mens moet mooi kyk om die nuwe Hilux van die oue te onderskei, maar met die Fortuner lyk dinge anders. Jy sien nog trekke van die vorige geslag, maar dis asof Toyota die hulp van ’n skoonheidsdeskundige ingeroep het. As ’n mens dit kan waag om die nuwe Fortuner met die skoner geslag te vergelyk: Die For-tuner is beeldskoon! Én dan het die nuweling nog ’n beter sleepvermoë ook. Wys jou haak ’n Groot deel van die Brinksleepstang steek onder die bakwerk uit.…

Geroosterde kekerertjies Heuning-kraaklekkers Knibbel aan heilsame lekkergoed terwyl jy see toe sleep. Jy benodig (genoeg vir 4) • 1 blikkie (400 g) kekerertjies, gedreineer• 1 eetlepel olyfolie• 2 eetlepels heuning• ½ teelepel kaneel• ¼ teelepel neutmuskaat• ½ teelepel gemmer• ½ teelepel sout Só maak jy 1 Voorverhit die oond tot 180ºC en voer ’n bakplaat met bakpapier uit. 2 Druk die kekerertjies met kombuispapier droog en versprei hulle eweredig op die bakplaat. Giet olyfolie oor en bak dit vir sowat ’n driekwartier tot hulle goudbruin en krakerig is. 3 Meng die heuning, kaneel, neutmuskaat, gemmer en sout saam in ’n groot mengbak en meng dan die geroosterde kekerertjies deur dié mengsel. Bak die kekerertjies vir nog sowat 10 minute tot hulle geurig en gekaramelliseer is. WegSleep sê: Maak maar ’n klomp, want as jy eers…

“Ons het ses jaar gelede afgetree en is nou al net meer as ’n jaar voltyds aan die kamp. Ons ry die wêreld plat met ons Jeep Cherokee 3.7 4x4 en Jurgens Exclusive, en het al van die Kaap af tot in die Kruger gekamp. Maar ons gunstelingkampplek tot dusver is loshande die Dibiki-oord buite Hartenbos. Hoekom hou julle so baie van Dibiki? Ons het al by verskeie plekke gekamp en sommige was beter as ander. ’n Mens leer om met die plekke saam te leef wat nie so goed is nie, maar Dibiki is ’n oord waar alles net reg voel. Die omgewing is pragtig, die mense fantasties en daar skort absoluut niks met die kampterrein nie. Die oord het nie ’n winkel nie, maar daar is twee supermarkte…

Almarie van Wyngaardt van Virginia is die wenner van ’n Escape Gear-geskenkstel ter waarde van R1 530 vir haar korrekte blokraai-inskrywing in ons Oktober-uitgawe. Baie geluk! Dieselfde prys is vandeesmaand weer op die spel – neem ’n foto van jou voltooide poging en stuur hom na wegsleep@weg.co.za . Ons digitale intekenare kan die blokraai aanlyn invul. Besoek http://bit.ly/2e1cLtJ Jy’s ‘n wenner! As jy hierdie blokraai korrek voltooi en vir ons stuur, staan jy die kans om dié geskenkstel van Escape Gear ter waarde van R1 530 te wen. Dit sluit ’n 65 l-reissak en ’n aanhaaksak vir jou motorsitplek se rugleuning in.…

Ons honde gaan vroegoggend aan die blaf toe die bode die WegSleep in die posbus sit. Ons is al op pad werk toe en tydskriflees moet wag tot ná werk. Terug by die huis blaai ek stadig deur. Ek geniet elke brief en bestudeer die artikels met ’n vergrootglas. Ek kyk na die nuwe woonwaens, die uitspanplekke, en ja, lees selfs die advertensies. WegSleep is ’n groot lekkerte en maak ’n mens lus vir kamp, selfs in die koue. Ek sien “Blyderivier” staan op die voorblad. Ons was laas by Swadini toe ons kinders nog klein was, seker 20 jaar gelede. Dis waar ons dogter leer fietsry het en ’n keer erg seergekry het toe sy val. Maande ná die val het klippies nog uit haar vel gesweer. Ook op…

Ek en my vrou, Gail, kamp al jare en probeer by soveel as moontlik nuwe kampplekke uitkom. Willem’s Rus is ’n paar kilometer noord van Pretoria en geleë in die Dinokeng-reservaat, ’n reservaat waar jy die Groot Vyf kan sien. Ons het die afgelope twee maande twee keer hier kom kamp, en ná dese is dit ons gunstelingkampplek. Die opwasgeriewe en badkamers is van die skoonste wat ons al teëgekom het en verdien vyf sterre. Selfs die braaiers het ons beïndruk en is ordentlik skoongemaak. Verder is die staanplekke netjies uitgelê en van ’n paar plekke af kan jy die watergat sien. Selfs ’n olifantbul het een Saterdagoggend hier ’n draai gemaak. Dis rustig, en dit het baie te make met die bosveldatmosfeer. Boonop is Willem’s Rus se personeel vriendelik…

Ná ’n heerlike vakansie in Julie by Tshipise kry ons op pad huis toe teëspoed. Ek sleep my Sprite Solar met ’n Mercedes-Benz Vito en ons ry met die R521, wat deur plekke soos Vivo en Dendron na Polokwane loop. Die Vito is nie meer standaard nie en ek het die Merc-enjin met ’n Lexus-V8 vervang. Dele van die pad voor Polokwane het reggemaakte stukke en is stamperig as jy daaroor ry. Elke keer as ons oor so ’n regmaakplek ry, hoor ek iets skuur. Ná die vierde gelapte naat in die pad sien ek in die truspieël die woonwa se voorruit sit heelwat laer as gewoonlik, en dit lyk of die romp van die wa op en af wieg. Skielik skreeu my seun, Ruan:“Pa, die woonwa se neus sleep…

’n Mens soek altyd raad vir muskiete, en ons het al gevind daardie groen spiraalweerders werk die beste. Die probleem is jy kry net een lendelam plaatjie saam met 10 spirale, en dié is gewoonlik soek nadat jy die eerste een uitgebrand het. My seun Nic Strauss het ’n blink plan bedink. Hy het ’n outydse kersblaker vir R10 gaan koop by die Crazy Store en plaas ’n kort stukkie kers in die blaker wat hy aan die brand steek. Hy gebruik die kersvlam om die spiraal aan te steek en druk dan die binnekant van die spiraal in die gesmelte kerswas waar hy lekker stewig vasplak. Die brandende spiraal kan nou veilig heen en weer geskuif word en die as val boonop netjies in die blaker. Jy kan ook…

Die naam Bartolomeu Dias was een van die eerste lang name wat ons op skool onder die knie moes kry. Wanneer die onderwyser vir ons van dié Portugese ontdekkingsreisiger vertel het, het hy met die bordpasser se punt op die kaart van Afrika gedruk en ’n denkbeeldige sirkel rondom L’Agulhas aan die onderpunt van die vasteland getrek. Terwyl die seevaarders 500 jaar gelede hulle pad om dié punt moes kry, het die kompasnaald soos ’n riet in die wind gedans en kon hulle nie onderskei tussen ware noord en magnetiese noord nie. Dis hoekom Dias die plek L’Agulhas – Kaap van Naalde – gedoop het. Deur die eeue heen het talle skepe in hierdie suidelike waters vergaan en ’n magdom seemanne hulle lewe verloor, Dias inkluis. Vandag staan hier ’n…

WegSleep het die afgelope jare al verskeie innovasies in die woonwa- en kampeerwêreld bekend gestel, en nou het ons, saam met CaraSure, nóg ’n produk wat vir ons lesers van waarde kan wees: sleepversekering! Met die versekeringsproduk WegSleep Sleepseker het ons ’n spesiale tarief vir lesers beding. Die versekering dek woonwaens, boswaens en ryhuise. Daar is twee pakkette beskikbaar: SleepSeker Prestige SleepSeker-dekking SleepSeker-inhoud (van R30000) SleepWeg-padhulp SleepSeker Ekono SleepSeker-dekking SleepWeg-padhulp Die voordele behels Sleepdekking: Die rytuig het omvattende versekering wat ongelukke, kwaadwillige skade, stormskade, diefstal, kaping én brand dek. SleepSeker-inhoud: Dekking vir besittings ter waarde van altesame R30 000 word by die Prestige-pakket ingesluit. Jy het die opsie om teen ’n ekstra premie jou inhoud tot R45 000 of R60 000 te verseker. Dit sluit in: beddegoed, kombuisware,…

Wat sê die boekie? Brandstof: Diesel Enjin: 2,755 l Silinders: 4 inlyn Krag: 130 kW @ 3 400 r.p.m. Wringkrag: 450 Nm @ 1 600-2 400 r.p.m. Ratkas: 6-spoed (outomaties) Aandrywing: Agter- of vierwiel met hoë- en laestrek asook ’n ewenaarslot op die agteras, vastrapbeheer en sleepwaswaaibeheer. Tarra: 2 044 kg BVM: 2 750 kg BKM: 5 750 kg Dravermoë: 706 kg Waaddiepte: Nie beskikbaar nie. Sleepvermoë vir geremde sleepding: Tot 3 000 kg. Afmetings: 4 795 mm (l); 1 855 mm (b); 1 835 mm (h) Wielbasis: 2 745 mm Spoorwydte: 1 545 mm (voor); 1 555 mm (agter) Grondvryhoogte: 279 mm Brandstoftenk: 80 l Prys (nuut): Vanaf R613 200 Prys (tweedehands): Vanaf R549 900 vir ’n 2016-model met 1 500 km op die klok (outomaties, maar nie 4x4)…

Twee WegSleep-lesers , Andrien en Christo Meyer van Morgenzon, sê op Facebook hulle het op die harde manier geleer ’n mens moet voorbereid wees op sterk rukwinde en stormweer wanneer jy kamp. Hulle het by die Forever-oord by Swadini gekamp toe ’n storm hulle tref, en volgens Andrien-hulle was hulle glad nie toegerus vir dié moeilikheid nie. Hulle vra raad oor wat ’n mens alles kan doen om seker te maak jou kamphuis bly staande as die elemente effens omgekrap raak. Op die WegSleep-forum kuier die nuweling PoppieDik saam met ’n klomp hardebaardslepers en vra min of meer dieselfde. Hoe gemaak om jou tent staande te hou as die wind erger as Elvis begin ruk en rol? Eerstens is daar ’n reeks produkte…

Territory merk sy gebied 2009 FORD TERRITORY ST As ’n sterk sleepvoertuig vir jou belangrik is, hoef jy nie verder as ’n Ford Territory te soek nie, sê Willem Brits van Pretoria. Julle sleep ’n Jurgens Exclusive? Ja, ons het die 2011-model en gaan kamp al ’n bietjie langer as vyf jaar met dié kombinasie. Hoeveel het jy vir die Ford betaal? Hy was ’n demonstrasiemodel en het my ’n raps meer as R354 000 gekos. Wat soek jy in ’n sleepvoertuig? Ek kan dit in een woord opsom: krag. Ons skrik nie vir sleep nie en het die afgelope agt jaar al meer as 36 000 km afgelê. En die een ding wat ononderhandelbaar is as ’n mens sulke afstande ry, is krag. Dan is dit ook lekker as…

Ek het my 2001 Jurgens Xplorer al amper 10 jaar, en by die huis het hy in die wind en weer gestaan. Die dak het laasjaar begin lek en ek moes dit laat herstel. Ek het gehoor van Swannie’s Caravan and Tent in Bellville en dit soontoe geneem. Die wa het houtvrot opgedoen... en ’n mens weet dis ’n duur storie. Die mense by Swannie’s het die een sy van die wa afgehaal en herbou. Die neuswiel is terselfdertyd vervang en daar moes na die kragstelsel gekyk word. Die herstelkoste het R2 320 beloop – vir my heel billik. By van die ander diensverskaffers is ek gewaarsku houtvrotskade kan heelwat meer beloop sodra ’n mens die panele oopmaak om die werklike skade te bepaal. Swannie’s het my gekwoteer en by…

Hoe noodsaaklik is ’n kragpunt in die kampterrein? Vermy jy oorde sonder elektrisiteit of verkies jy sulke plekke? Of gee jy bloot nie om nie? Ons Facebook-vriende sê hulle sê. Ann Nortje Dit is lekker om by plekke met kragpunte te kamp, maar dit pla ons nie as ons ’n aand of twee daarsonder moet klaarkom nie. Henry W. Oosthuizen Ons is snobs wanneer dit by kamp kom en soek elektrisiteit. Hoe anders moet ons my vrou se haardroër aan die gang kry? Marina Nieuwoudt Grobler Ek gee nie om om sonder krag te kamp nie, maar ek kan nie onder koue water stort nie. Conradt W. Fred Stoltz Ons vermy oorde met krag. Sodoende geniet ons ’n rustiger vakansie. Andre Lourens Om krag te hê is goed, maar dit…

Jy hoef nie ver te ry om die Kalahari se rooi en wit duine, die groen Oranjeriviervallei en die Boesmanlandse bossie-, gras-, bergen klipveld te sien en beleef nie. In Groblershoop se geweste sit hulle ineengeweef langs mekaar. Haak jou wa en pak jou tent en gaan saal af in die Witsand-natuurreservaat met sy bekende brulsand (wat regtig brul); by die Kheis Riverside-lodge langs die Oranje; en by De Oude Putz onder ’n kameeldoringboom in die Boesmanlandse veld. WITSAND-NATUURRESERVAAT Kalahari op sy beste Hy raai die ouens met Fleetlines af om hierheen te kom, sê Petrus Khangela in Witsand se ontvangskantoor. “Die pad is op plekke rof, en ons wil nie hê hulle moet hier aankom met ’n gemoed wat ook geskommel is nie.” Maar al is die grondpad Witsand…

Jurgens se Exclusive-woonwa is presies wat sy naam sê: die ene weelde. Dis Jurgens se topmodel en jy kan uit twee weergawes kies: Die standaardmodel of die Deluxe. Tussen die twee modelle is die slaapplek die grootste verskil. Die standaardmodel het plek vir vier mense, terwyl die Deluxe vir twee ingerig is. As jy die waens van nader bekyk, sien jy waarvoor die Deluxe-naam staan. Teenoor die standaardmodel is die Deluxe onder meer met ’n buitestoof pleks van ’n binnestoof toegerus; die ruite is dubbel geïsoleer én die mikrogolfoond is groter (34 l teenoor 19 l). Natuurlik moet ook jou hand ’n bietjie dieper in jou sak steek, want die Deluxe is R40 000 duurder as die standaardmodel. Maar die gerief van lugreëling in die dak vergoed daarvoor. Albei modelle…

Ons wil nou nie slapende honde wakker maak nie, maar dit wil voel of ons lanklaas oor beurtkrag gekla het. Wanneer laas het jou foon gebiep (ons almal het die app afgelaai) om jou te waarsku jou buurt gaan tussen seweuur en halfnege sonder krag wees? Ons is almal deur die stappe om vrede te maak met Eskom se manewales. Van skok en woede moes ons aanbeweeg na aanvaarding en uiteindelik ’n punt bereik waar ons geleer het om daarmee saam te leef. Jy was later bly om te sien die krag by die huis gaan af wees terwyl jy by die werk is. En slaggerreed as beurtkrag vroegoggend jou lot is terwyl almal moet regmaak vir skool. Die een groot guns wat Eskom ons wel gedoen het, was om…

Echo se Chobe is terug Echo 4x4 het sy Chobe-boswoonwamodel tien jaar gelede gestaak en op hulle twee nuwer boswoonwaens, die Kavango en Namib, gefokus. Die Chobe is egter nou weer terug, sê Willie Grobler, die eienaar van Echo 4x4. Die Chobe is kleiner as sy twee jonger broers en ’n slim toevoeging wat kopers nou weer ’n groter keuse bied. Hy is gegrond op die Kavango, met onder meer ’n soortgelyke onderstel. Dis ’n deurwinterde veringstelsel wat gebruik word op die Echo 5- en 6-boswa én die waens wat Echo 4x4 na Europa uitvoer. Afhangend van die uitleg wat jy kies, het die Chobe slaapplek vir 2-5 mense. Terwyl die twee groter broers se deure aan die kant sit, sit die Chobe s’n agter. Die Chobe het wel ’n…

Hengelgerei Vlieg jou aas diep in Baie oewer- en strandhengelaars maak lankal nie meer net op ’n behendige gooi staat om hulle aas in die water te kry nie. Langs die viswaters sien jy manne en vroue met aasketties, aasbote en van daardie aaskanonne wat soos bazoekas lyk. Deesdae sien jy selfs hengelaars wat hulle aas met ’n hommeltuig oor die water vlieg en loslaat. Van die eerste aashommeltuie het nie lekker gewerk nie. Swaar aas, hoeke en sinkers wat los onder die tuie swaai, het die tuie onstabiel gemaak, en soms het die lyn in die skroewe verstrengel geraak. Seevoëls het ook swaaiende aas in die lug gegryp. Toe kom Hobby Centre in Kempton Park met ’n oplossing: Hulle bou die Cuta-Copter met ’n geslote aasboks onderaan. Dié aasboks,…