Indholdsfortegnelse for February - March 2021 i Weg!

Ek is ’n man van min talente, maar baie liefdes. Ek doen menige ding treurig, maar ek doen dit met oorgawe. Een hiervan is fietsry. In sy boek Need for the Bike skryf die Franse digter en filosoof Paul Fournel: “Ek ry om te rus en myself uit te put; Ek ry om te droom; Ek ry om myself goed te doen en myself te straf; Ek ry om alleen te wees en die pad met my vriende te deel; Meestal ry ek om te ry.” Ek stem saam met alles wat Fournel sê, maar sou byvoeg: Ek ry om in die natuur te wees. My gereelde bergfietspaadjies rondom Stellenbosch is ver verwyder van die grootwild se tuisveld, maar daar gaan nie ’n rit verby waar ek nie iets wonderliks…

Elke maand beantwoord ons kenners lesers se vrae oor voëls, insekte en diere. Stuur jou vrae gerus na redakteur@weg.co.za LOURAINE LOUW van Kenhardt skryf: Dié ystervark het alte heerlik in ons groentetuin gewei. My man, Chris, het dit in ’n hok gevang en in die veld gaan aflaai. Hoekom is die ystervark wit en hoe hou ons hom uit ons groentetuin? Die wildlewekenner L.D. van Essen antwoord: Siende dié Kaapse ystervark in die Boesmanland bly, het die son hom dalk wit verbrand! Op ’n meer ernstige noot: Hoewel alle diere kleurvariasies toon, is dié ystervark heel moontlik leukisties. Leukisme word veroorsaak deur ’n tekort aan melanien vanweë ’n genetiese afwyking. Daar is geen beduidende wetenskaplike bewyse dat leukistiese diere ’n skraler kans op oorlewing het nie en veral in die…

Kuier julle hierdie somer in die KwaZulu-Natalse Middelland? Ry dan uit na Lions River en loer in by hierdie nuwe padstal in ’n ou spoorweghuis. In die 1800’s toe die spoorlyn tussen Gauteng en Durban gebou is, het heelwat van die Natalse Regeringspoorweë se personeellede in sulke huise gewoon; hulle het toegesien dat die treinspoor onderhou word. Dié huis behoort deesdae aan Joni en Wayne Warburton, en hulle het die plek mooi opgeknap. Joni verduidelik sonder die breër familie was hier nie ’n padstal nie – die biltong, soetgoed en piekels kom immers uit die kombuise en droogkaste van broers, susters en skoonfamilie! Die strooidakhuis skep ’n mooi prentjie teen die omliggende akkerbome. Wanneer ’n mens oor die drumpel tree, verras die moderne binnekant jou – ewe met ’n spoggerige…

Knysna lê tussen woud en water. Tog besoek toeriste dikwels net die waterfront en die bekende Knysnakoppe. Ek en my man, Robert, het egter jare gelede reeds die stilte van die woud ontdek en keer gereeld terug. Dié woud is vol geskiedenis, soos vertel deur Dalene Matthee inKringe in die Bos, Moerbeibos en Fiela se Kind, oor olifante wat tot uitwissing gejag is en die houtkappers se sukkelbestaan. Maar daar is ook stories van hoop – toe goud ontdek is, die bewaring van die woud, en die beloftes van ’n beter toekoms. Vandag lê tekens van dié verlede steeds weggesteek in die bos. Ja, oor honderde jare heen het die bos dit sélf bewaar. Die Rooted in Time-selfryroete bestaan uit tien historiese punte waar jy die Knysnawoud se stories beter…

OUPA COETZEE IG: @oupacoetzee Nikon D700 Nikon 14-24 mm-lens OUPA VERTEL: Hierdie foto is omstreeks tienuur die aand op Stuurmansfontein geneem. Dis ’n bekende gasteplaas in die Carnarvon-distrik waar ’n mens in ’n tradisionele korbeelhuis kan oornag. Ek het natuurlik my driepoot gebruik, en my afstandbeheersluiter. Die lens was wyd gestel op 14 mm, en ek het ’n sluiterspoed gebruik van 30 sekondes met die lensopening f5.6 en ISO op 200. Die “white balance” was op “bewolk” gestel. Ek het ook die korbeelhuis vir sowat 10 sekondes met my flouerige kopliggie verlig. Ek het later op die rekenaar ekstra redigering gedoen om die Melkweg beter te laat uitstaan. TOAST SÊ: Pragtig! Ver van die stede se ligbesoedeling kry ons nagruim kans om te blom en die Karoo is een van…

DOER ONDER Rip Curl Bondi Metallic Die Aussies is nie altyd ons gunsteling op die rugby- en krieketveld nie, maar hulle geniet die buitelewe amper net soveel soos Suid-Afrikaners. Australiese maatskappye soos Rip Curl is bekend dat hulle uitstekende swemklere en branderry-toerusting maak. Hierdie plakkie is genoem na Bondi in Sydney, een van die bekendste strande in die wêreld. Dit herinner aan Clifton, maar die water is baie warmer. Die Bondi kry ’n klomp dinge reg: Die voetbed van skuimrubber is baie gemaklik; die toonriem is gemaak van ’n duursame stof wat lánk gaan hou; en dit kos net R200 – heelwat minder as die Havaianas wat elke tweede San en haar bestie dra. Ook is dit stylvol genoeg om die oorgang van strand na strandrestaurant te maak. R200 ripcurl.co.za…

Smita Waghmarae, argitek “Ek het nog nooit ’n boskamp teëgekom wat só goed ontwerp is nie, om nie te praat van die privaatkamp se ligging tussen die bome, die opelugstorte en die eienaars se geesdrif nie!” Deon Pienaar, stigter van Love Limpopo “Limpopo is ’n buitelugliefhebber se droom. Een van my gunstelingplekke is die Crimeabewaringsgebied ( 079 582 1023) se 4x4-boskamp in die voue van die Westelike Soutpansberg. Die eienaars wil graag die gebied se biodiversiteit bewaar en beoog om veeldagroetes te ontwikkel wat stappers oor die hele bergreeks heen sal lei.”…

TULIBLOK, BOTSWANA Vriende van ons nooi my en my vrou een of twee keer ’n jaar na die Tuliblok. Ons is gewoonlik ’n groep van tien mense en hierdie keer het ons by die Sethora Game Lodge in die Mashatu-wildreservaat gebly. Ons het op ’n laatmiddagwildrit gegaan en toe ’n jagluiperdwyfie en haar welpies ’n rukkie lank gevolg. Die ma het in ’n stadium gaan lê om te rus terwyl die kleingoed in die bome geklim en gespeel het. Daar was heelwat ander diere in die ronde, maar niks om te vreet nie – of só het ons gedink. Een van die welpies het skielik opgespring 1 en ’n sebra wat sowat 300 m verder gewei het, begin jaag. Die trop sebras het in alle rigtings gespat, met die jong…

Dit gebeur nie aldag dat jy die enigste mens op die hangbrug oor die Stormsrivier in die Tsitsikammadeel van die Tuinroete- nasionale park is nie. Gryp die oomblik aan en kyk rond. Draai jou rug op die see en korrel stroomop, ín die ravyn in: Dis ’n toneel wat weer lewe sal blaas jou stadsmoeë gemoed. Dis asof jy terugkyk in die verlede toe ons voorgangers nog hulle aandete moes jag en donker strome soos hierdie ’n pad oopgekerf het deur woude. Dié twee roeiers in hulle helderkleurige bootjies het my gedagtes kortgeknip en ’n oomblik later het die brug onder my voete begin swaai toe ’n groep toeriste naderstap – die magiese oomblik was verby. Maar net toe ek wou waai, het die skor gromroep van ’n knysnaloerie my…

Mosterd-en-heuninghoendervlerkies Maak 12 vlerkies Bereidingstyd 5 minute Gaarmaaktyd 15 minute Jy benodig • 12 hoendervlerkies • 1-2 teelepels van jou gunsteling-braaisout VIR DIE SOUS •1/3 koppie dijonmosterd • ¼koppie heuning • 1eetlepel srirachasous • 1eetlepel appelasyn • ’n knippie rissiepoeier • 1 teelepel sojasous Só maak jy 1 Knip die hoendervlerkies se punte af – dit sit gewoonlik net in die rooster vas en maak dit moeiliker om te braai. Ryg hulle dan een-een op sosatiestokkies wat jy vooraf in water geweek het (dit is sodat die stokkies nie oor die kole vlamvat nie). Geur die vlerkies met sout en braai dit vir 10 minute oor matige kole totdat dit lyk asof die vleis al gaar is, maar die vel nog bleek. 2 Klits al die sousbestanddele saam. Doop die gaar vlerkies in die sous en braai…

Hoe het jy ’n illustreerder geword? Toe ek en my man, Mark, in 2011 die knoop deurhak, het ek byna alles vir ons troue met die hand gemaak. Ek het papiersterre vir die konfetti gevou, papierblomme gemaak, die uitnodigings geïllustreer en selfs geskenkies vir die gaste gemaak. Nie lank daarna nie het Mark ’n stalletjie by die Oude Libertas-mark op Stellenbosch bespreek en my produkte het verbasend goed verkoop. Later het mense my genader om portrette te teken en winkeleienaars het kaartjies en illustrasies bestel. Ek het in 2016 my eerste kontrak as boekillustreerder gekry – dit was om die sketse vir Refiloe Moahloli se kinderboek How Many Ways Can You Say Hello? te teken. My vierde kinderboek, How Many Ways Can You Say Goodbye? is pas klaar. Wat van…

Die boomslang is, soos sy naam sê, meestal ’n boombewoner en jy kan hom maklik aan sy groot oë, bonkige kop en die duidelik gekielde skubbe eien. (Dit beteken die skubbe het ’n riffie in die middel langs wat die slang se lyf ’n growwe tekstuur gee.) Die slang se kleur wissel afhangende van waar jy hom aantref: In die Wes- en Oos-Kaap is die mannetjies gewoonlik donkergrys of swart met geel, oranje of groen sye; wyfies is bruin. In die res van Suider-Afrika is die mannetjies soms heldergroen – dikwels met swart lyntjies tussen die skubbe, wat aan die lyf ’n geruite voorkoms gee. Weer eens is die wyfies meestal bruin. ’n Jong slang is korter as 80 cm en nooit groen van kleur nie, maar eerder grys tot…

Meditating with Rhinos Deur Helena Kriel, Melinda Ferguson Books R260 in boekwinkels Helena Kriel het ’n suksesvolle loopbaan as draaiboekskrywer in Los Angeles gebou, maar nadat haar huwelik op die rotse beland en ’n staking van die Amerikaanse Skrywersgilde haar werkplanne in die wiele ry, keer sy vir ’n ruk terug na Johannesburg. Hier moet sy – ver van die blink liggies van Hollywood – ’n nuwe begin maak. Sy besluit om haar toe te spits op bewaring en begin as vrywilliger by ’n rehabilitasiesentrum vir renosters naby die Krugerwildtuin werk. Gou raak sy verlief op die weesrenostertjies wat hier versorg word omdat hulle ma’s deur stropers doodgemaak is. In dié roerende memoir vertel Kriel hoe sy die dikwels getraumatiseerde renosterkalfies se vertroue op ’n baie ongewone manier wen…

1 Hoor die duine brul Moenie dadelik teen die groot duin by die Brulsandparkeerterrein opklim nie – soek eers ’n deel van die duin waar ander besoekers nog nie voetspore gelos het nie. As die sand warm, droog en skoon is, sal dit ’n duidelike brulgeluid maak wanneer dit teen die helling van die duin afgly of as jy daaroor loop. Jy sal dit ook snags kan hoor wanneer die wind reg waai – die brulgeluid kan tot 400 m ver trek. Kies jou tyd reg: Die sand brul net in die warm maande – September tot April – en net wanneer dit droog is. Gaan rondom 1 nm. as jy kan. Besoek die inligtingsentrum by die ontvangskantoor vir meer oor die navorsing wat al oor die duine gedoen is.…

HOEKOM? Ons plaas elke maand ’n keur van lesersfoto’s. Moenie skaam wees nie – krap ’n bietjie daai foto’s uit wat jy op jou rekenaar opgaar en stuur hulle vir ons! WAT? Ons hou van omtrent énigiets: natuurlewe, landskappe, portrette, vakansiefoto’s of goggas en blomme in jou tuin. HOE? Stuur jou beste foto’s na menseselense@weg.co.za Moenie lêers stuur wat groter as 4 MB is nie – as ons ’n groter weergawe soek, sal ons daarvoor vra. Gee die fotograaf se naam, van, tuisdorp en kontaknommer. Stuur ook inligting oor waar en hoe die foto geneem is en watter toerusting gebruik is. As jy die foto op enige manier gemanipuleer het, vertel ons wat jy gedoen het. DIE FYNSKRIF Ons behou die reg voor om jou foto’s elders in die tydskrif, op…

Vir die meeste mense lyk Villiersdorp na net nóg ’n stillerige dorpie in die Overberg. Maar, besef ek terwyl ek oor die Theewaterskloofdam se wal soontoe ry, die inwoners verkies dit só. Want die oomblik wanneer ’n geluksalige plek ontdek word, gaan dit verlore... Ja-nee, Villiersdorp wil onder die radar bly. Indien jy op ’n kaart ’n kring om Franschhoek, Grabouw, Caledon, Worcester en McGregor trek, lê Villiersdorp omtrent in die middel daarvan. Die bou van die Theewaterskloofdam in 1979 het aan die dorp ’n eiesoortige, koeler mikroklimaat gegee soortgelyk aan die Elginvallei (wat nader aan die see lê). Vrugteboerdery gedy dus hier – die pakstore begroet jou aan die rand van dorp: Betko, Arbeidsvreugd, Ideafruit... Oestyd is in die somer en dan is die dorp in rep en roer:…

GRENDELTYD-GHOEROES Dis nou al byna ’n jaar gelede, maar ek is seker jy sal nog alte goed onthou hoe daardie eerste paar weke van die grendeltyd gevoel het. ’n Beangste fluistering het oor die wêreld neergedaal. Dit het skoon eienaardig gevoel, byna waaghalsig, om iets alledaags te doen soos om kruideniersware te koop. En onthou jy nog hoe ingehok jy in jou eie huis gevoel het? Vir neushoringvoëls – daardie koddige dog ikoniese inwoners van die savanne – is só ’n bestaan egter niks nuuts nie. ’n Grendeltyd is élke jaar deel van hulle kalender en gevolglik iets wat hulle tot ’n kuns verfyn het. Eerstens kies die neushoringvoël ’n geskikte plek vir sy nes. Vir die meeste spesies is ’n natuurlike holte in ’n boom goed genoeg. Die Monteirose…

Ná 14 uur op ’n oornagtrein kom ons vroegoggend aan op die dorpie Ninh Binh in die noorde van Viëtnam. Jy het waarskynlik al foto’s gesien van grys kalksteenkoppe oortrek met tropiese plantegroei wat uittoring tussen ryslanderye met riviere wat tussendeur kronkel... Ninh Binh, sowat 95 km suid van Viëtnam se hoofstad, Hanoi, lê in die middel van dié eiesoortige landskap. Boonop is hier bekostigbare verblyf en ’n verskeidenheid doendinge – dié wenkombinasie lok die afgelope paar jare al meer toeriste hierheen. Van die treinstasie af ry ons met ’n taxi die sowat 10 km na die kleiner toeristedorpie Tam Coc. Ons gaan twee dae by die Tam Coc Bungalow afsaal saam met ons vriende Wessel van Wyk en Shivani Ghai. Die gastehuis is versteek tussen bome langs ’n rivier…

Aartappelnessies met spek en eier Vir 4 Voorbereityd 60 minute Gaarmaaktyd 15 minute Aartappels word gereeld gebruik as aanvulling – waarom dit nie ook vir ’n stewiger ontbyt inspan nie? Jy benodig • 2heel aartappels • 4repe spek • 4teelepels roomkaas • 4klein eiers • 4eetlepels gerasperde cheddar • sout na smaak • gemaalde swartpeper na smaak Só maak jy 1 Voorverhit die oond tot 200 ºC. Prik die aartappels met ’n vurk en bak dit vir sowat 40 minute tot gaar. (Die heel aartappels kan ook gekook of in die mikrogolf gaargemaak word.) Laat die aartappels afkoel. 2 Braai intussen die spek tot gaar maar nie bros nie. 3 Sny elke aartappel in die lengte middeldeur en skep in elke helfte in ’n holtetjie uit. Wees versigtig en hou die skil in een stuk. 4 Vul…

Gestopte picanhasteak Dié sappige stuk vleis is gewild in Brasilië en jy sien dit ál meer hier in die slagter se venster. Dié driehoekige homp vleis word gesny van die bopunt van die kruisskyf (rump) en of jy dit heel gaarmaak of in steaks sny, dis koningskos. Vir 8 Voorbereiding 20 minute Gaarmaaktyd 45-60 minute Jy benodig • 1 picanharoosterstuk van sowat 1,2 kg • sout en varsgemaalde swartpeper • sowat 8 sondroogtamatiekwarte in vinaigrette, fyngekap • ½koppie volvetroomkaas • 250 g spekrepe, brosgebraai Só maak jy 1 Steek solank die vuur aan in die ketelbraai, want jy gaan nounou kole nodig hê. 2 Sit die picanha met die vetkant na bo op ’n skoon kapplank. Sny met ’n skerp mes ’n geruite patroon in die vet (moenie deursny tot ín die vleis nie). Sny…

Marakele is ’n wonderkuur! Ek en my man, Juandré, het ’n paar maande gelede na Thabazimbi getrek en ons het met ’n swaar hart ons familie in Hartbeespoort agtergelaat. Maar ons het gou iets gekry om die verlange te stil: Die Marakele- nasionale park is net tien minute se ry ver. Sou die park ooit pryse vir die mees gereelde besoekers uitdeel, sal ons loshande wen. Ons het vinnig ’n liefde vir voëlkyk ontwikkel en ons lysie staan tans op 110 spesies – kyk net hierdie mooi paradysvlieëvanger! Die voëls het gou familie geword en die berge van Thabazimbi voel nou soos huis. MARDENE DU TOIT, Thabazimbi Harties sê nurk! As jy langs die Hartbeespoortdam bly, hoef jy nie te ver te soek na ’n mooi natuurtoneel nie. In Junie…

Flamink Afgelei van die Latynse woord vir “vlam” (flamma). Dit verwys na die donkerpienk kleur van flaminke se vere. Seekoei Die oorspronklike Grieks het dié diere letterlik “rivierperde” genoem; hippos beteken perd en potámios wat dui op ’n rivier. Dolfyn Nóg ’n naam met ’n Griekse oorsprong. Die woord delphus beteken “baarmoeder” en die dolfyn is inderdaad ’n soogdier. Luiperd Die oumense het geglo dat ’n luiperd ’n kruising tussen ’n leeu (leo in Grieks) en ’n panter (ook Grieks) is. Dis waar die Engelse leopard vandaan kom. Ons weet natuurlik nou dat die luiperd ’n spesie op sy eie is, maar die naam het bly staan. Lemur Dié diertjie van Madagaskar kry sy naam van die Latynse woord vir die rustelose geeste van die afgestorwenes: lemures. Lemurs is –…

FEBRUARIE LAASTE KWARTIER 4 FEBRUARIE DOOIEGETY: 6 FEBRUARIE HOOGGETY: 10.34 VM. & 11.45 NM. NUWEMAAN 11 FEBRUARIE SPRINGGETY: 12 FEBRUARIE HOOGGETY: 3.57 VM. & 4.08 NM. EERSTE KWARTIER 19 FEBRUARIE DOOIEGETY: 21 FEBRUARIE HOOGGETY: 10.38 VM. & 11.56 NM. VOLMAAN (DASSIEMAAN) 27 FEBRUARIE SPRINGGETY: 1 MAART HOOGGETY: 4.41 VM. & 5.01 NM. MAART LAASTE KWARTIER 6 MAART DOOIEGETY: 7 MAART HOOGGETY: 10.26 VM. & 11.43 NM. NUWEMAAN 13 MAART SPRINGGETY: 14 MAART HOOGGETY: 4.02 VM. & 4.14 NM. EERSTE KWARTIER 21 MAART DOOIEGETY: 22 MAART HOOGGETY: 9.37 VM. & 11.01 NM. VOLMAAN ›OESMAAN› 28 MAART SPRINGGETY: 30 MAART HOOGGETY: 4.16 VM. & 4.41 NM. Hierdie is die hoogwatertye vir Kaapstad. Vir ander plekke tel jy minute by of trek dit af. (Let wel, hierdie is benaderde tye): Saldanha: +5; Hermanus:…

Julle het albei reeds aan kinderboeke met ’n natuurtema gewerk. Waar kom julle liefde vir die natuur vandaan? Liza: My ouers, Len en Karen de Vente, het my en my sibbe aan die natuur blootgestel. Ons het baie vakansies Krugerwildtuin toe gegaan en het in die Pretoria- botaniese tuin of die Magaliesberg gaan stap. Omgewingstydskrifte, boeke en kursusse by die nasionale dieretuin in Pretoria het my liefde verder laat groei. Judy: Ek het in Harare, Zimbabwe, grootgeword en was altyd lief vir die buitelewe en diere, veral die verkleurmannetjies wat ek as troeteldiere aangehou het. Toe ek my dierestories begin skryf en illustreer het, het ek altyd ’n afdeling bygesit oor hoe om jou troeteldiere te versorg. Ek het egter gou besef daar is baie bedreigde diere en dat ons…

Was jy op ’n vakansie wat jy dink ander Weg-lesers ook sal geniet? Skryf oor die ervaring en ons publiseer dalk jou storie. Hou dit asseblief kort (maksimum 1 500 woorde) en stuur ’n paar voorbeeldfoto’s. As ons wel besluit om die storie te gebruik, gaan ons oorspronklike hoëresolusiefoto’s nodig hê; maak dus seker jou kamera is op die regte verstelling.Stuur jou storie na redakteur@weg.co.za. Ons behou die reg voor om jou foto’s elders in die tydskrif, op ons webblad of in bemarkingsmateriaal te gebruik. Lees die bepalings en voorwaardes by weg.co.za…

Enige fotograaf wat sy sout werd is, sorg dat sy toerusting beskerm word. Jy kan jou kamera en lense veilig hou in hierdie sak van seil met ’n sagte binnevoering. Een gelukkige Weg-leser kan volgende maand só ’n sak wen. Hoe? Stuur eenvoudig jou beste reis- en natuurfoto’s na menseselense@weg.co.za – ons kies die wenner, wat dan in “Mense se lense” gepubliseer word. Dié produk is beskikbaar by winkel.weg.co.za…

Romerige tamatiehoenderpot Vir 6 Voorbereityd 20 minute Gaarmaaktyd 1 uur 20 minute Jy benodig • 6 hoenderkwarte • 1 eetlepel kerriepoeier • sout en varsgemaalde peper na smaak • 1 eetlepel meel • 30 ml elk olyfolie en botter • 1 eetlepel tamatiepasta • 8 groot tamaties, gehalveer en ontpit • 1 koppie room • ½ koppie aftreksel • 800 g gemengde groente in happiegroot blokkies (pampoen, soetpatat, uitjies, soetrissies, murgpampoentjies en sampioene is heerlik) Só maak jy 1 Gebruik ’n skerp mes en sny sowat vyf diep diagonale kepe deur elke hoenderstuk se vel – dit help dat die geure goed intrek. Vryf dan die hoender in met die kerriepoeier, sout, peper en meel. 2 Verhit die olie en botter in ’n driepootpotjie en braai die hoenderstukke tot oraloor goudbruin. Voeg die tamatiepasta en tamaties by en meng deur.…

Matamba Bush Campsite, Vaalwater Sowat tien jaar gelede het Sue en Alan Jarman (links) die Goudstad se liggies vir die getjir van Vaalwater se sonbesies verruil. Die Jarmans is tuis op plekke waar slegs ’n 4x4 kan uitkom, soos die Botswana-kant van die Kgalagadi-oorgrenspark, of die Khaudum in Namibië. En as dié twee gesoute Afrika-reisigers ’n boskamp gebou het, kan jy maar weet: Dit gaan besonders wees. Hulle weet watter geriewe ’n moeë reisiger waardeer sonder om aan die wilderniservaring afbreuk te doen. En dis waarom ouens op pad na Botswana, of mense wat vir die naweek regtig wil wégkom, Matamba kies. Die kampterrein is nie omhein nie en swartwitpense, sebras en rooibokke drentel gereeld verby. Kampeerders het twee opsies: die eksklusiewe Mara-kamp óf die Tau-kamp met vier private staanplekke.…

MICHAEL KHANGALANI MAKENANA Opsigter by die Anglikaanse Kerk “Hier is heelwat kerke op die dorp, die een so mooi soos die ander. Ek onderhou dié kerk se tuin al langer as ses jaar – hou gerus stil en kom stap deur!” MARELIZE VAN HEERDEN Onderwyseres, kunstenaar en bloemiste “Ons het ’n ruk lank in Kanada gewoon waar my man as ’n dokter gewerk het. Terug in Suid-Afrika het ons verlief geraak op Villiersdorp se skoonheid én sy mense. Ek het wonderlike vriende hier kom maak!” GUSTAV BESTER Kunstenaar “Ek het my kleinhoewe vir ’n appel en ’n ei gekoop en was nog nie ’n dag spyt dat ek hier kom woon het nie. Villiersdorp is ’n wonderlike plek vir kreatiewe siele.” HELDERSTROOM›ALPAKKAS  Maak ’n afspraak om by die Notleys en…

Cheddamelt-burgers Genoeg vir 4 Bereidingstyd 40 minute Gaarmaaktyd 15 minute Moenie skrik vir die brandrissies in hierdie resep se tamatiesous nie. Die sousie het ’n rokerige smaak. Jy benodig • 1 rooi soetrissie • 2 groot rooi brandrissies • ½ koppie geblikte tamatie-en-uiesmoor • 2 eetlepels vars koljanderblare • 500 g maalvleis • ½ rooiui, fyngekap • 1 teelepel braaivleisspesery • 2 eetlepels droë broodkrummels • 8 skyfies salami • 4 dik skywe cheddar • 4 vetkoeke of broodrolletjies • mayonnaise of mosterd • 1 avokado, in skyfies gesny • babaspinasieblare Só maak jy 1 Rooster die soet- en brandrissies direk oor ’n vlam tot dit oraloor geskroei en sag is. Sit dit sommer met die pitjies saam met die smoor en koljander in ’n voedselverwerker en pols dit tot ’n growwe braaisous. Verhit die tamatiesous in ’n kastrolletjie tot kookpunt. Geur dit na…

Pampoenspiraal Dié pastei het al die lekker van ’n pampoenkoekie sonder die moeite om individuele koekies te bak. Maak 1 x23 cm-pastei Bereidingstyd 25 minute Gaarmaaktyd Sowat 30 minute Jy benodig • ½ koppie botter • 6 salieblare • sowat 3 koppies gaar pampoen of botterskorsie • ½koppie bruismeel • 2eetlepels suiker • 1eier • 4velle filodeeg Só maak jy 1 Smelt die botter saam met die salieblare tot die botter ligbruin van kleur en die blare bros is. Hou dit eenkant. 2 Druk die gaar pampoen fyn met ’n vurk tot ’n growwe kapok. Meng die meel, suiker en eier by en hou dit dan reg. 3 Sit twee velle filodeeg langs mekaar neer sodat die kort kante effens oorvleuel om ’n lang strook te vorm. Verf dit oraloor met die saliebotter. Skep die helfte van…

Oliebol-tiramisukoekstruif Vir 10 Voorbereityd 20 minute Gaarmaaktyd 20 minute plus afkoeltyd Jou kinders gaan hierdie koekstruif vir ewig onthou. Dit is belangrik om baie sterk koffie van ’n goeie gehalte (varsgemaakte espresso is selfs beter) te gebruik om die soet te balanseer. Jy benodig • 500 g mascarpone • ¾ koppie strooisuiker • ¼ koppie Kahlúa-likeur • 2 eetlepels vanieljegeursel • 1 koppie room • 10-12 onversierde oliebolle • 1½ koppie baie sterk moerkoffie, afgekoel VIR DIE KOFFIESTROOP • ¼ koppie moerkoffie • ¼ koppie strooisuiker Só maak jy 1 Klits die mascarpone, ½ koppie van die strooisuiker, likeur en vanielje tot romerig en dik sonder enige klonte. 2 Klits die room in ’n aparte bak totdat sagte punte vorm, en meng die oorblywende ¼ koppie strooisuiker daarby. 3 Sny die oliebolle horisontaal in die helfte, doop die stukke…