Indholdsfortegnelse for Weg Namibie 2024 i Weg!

Vanjaar was ek geseënd om twee uithoeke (en uiterstes) van Namibië te ervaar. Ons gesin het gedurende die Desembervakansie laasjaar vir drie weke deur die Kavango-oos- en Zambesistreek (voorheen die Caprivi) tot by die Choberivier getoer. Sjoe, dié deel van Namibië is ruig, grasgroen en water is volop. Daar’s min van die stilte waarvoor ons buurland so bekend is. Nee, in daardie dun vinger word die lewe gevier, veral in die somer wanneer verskeie trekvoëls daar afsaal en die middae gekenmerk word deur helder blitse en donderslae! In Aprilmaand het ek van die St. Nowhere-oord noord van Hentiesbaai deur die Skedelkus tot by die mond van die Kunenerivier gereis. ’n Gans ander ervaring. Eers dink jy: Genade, St. Nowhere se naam is baie gepas. Dan kom jy by Möwebaai en…

Dis Januarie en bloedig warm. Die 21 Dunes Campsite se bordjie op die D1042 is amper swart gebrand. ’n Plaaspaadjie neem jou van dié hoofpad tussen die duine in. Hier en daar is ’n groen opslag tussendeur die rooi sand, bewyse van reën, maar behalwe die driedoringbosse wat op plekke ruig en vol wit blommetjies langs die pad staan, is dit nog droog vir dié tyd van die jaar. Die kampplek is bo-op een van die Kalahari se bekende rooi sandduine. Hier is net twee kampplekke en die ander een is leeg. Ek is stoksielalleen in ’n see van duine. Teen skemertyd steek ek ’n vuurtjie aan. Uit die wolke wat al heel middag dreig, begin ’n paar sagte druppels val. Ek trek my skoene uit en wikkel my voete…

“Hoe ver nog?” vra ek. “Seker sowat 2 km,” sê Phil van Wyk, ’n toerleier van Unbounded Namibia Safaris & Tours. Die Toyota Land Cruiser se wiele gly oor die sand. Op linkerhand waai die suidwestewind die Atlantiese Oseaan deurmekaar. Ek kry my selfoon gereed om ’n video te neem van die groot oomblik. Eers sien jy net ’n oranjebruin vlek in die malende donkerblou massa van die see. En dan verskyn ’n breë oranjebruin strook op die landskap. Dis die Kunenerivier wat sy pad oopstoei see toe. Die rivier ontspring in die Angolese hooglande en mond sowat 1 000 km verder hier langs Namibië se Skedelkus uit. ’n Sestal witpelikane stap senuagtig eenkant toe, nader aan ’n geselskap witborsduikers. Voor ons sleep die wind in strepe oor die sand…

“Zambiese immigrasie by Kazungula is glo ’n nagmerrie,” sê die vrou vir haar man by die tafel oorkant ons by die Chobe River Camp in Namibië. Ek spits my ore. “Hulle moes ál hulle skoene in die ontsmettingsmiddel druk.” Tot op daardie oomblik het ek, behalwe om blyplek te bespreek, nog nie veel aandag gegee aan die uitstappie wat ons gesin na Livingstone vir die volgende oggend beplan nie. Die kinders se paspoorte en geboortesertifikate is in ’n lêer saam met die kar se registrasiepapiere. Dis sekerlik genoeg? Ons suiker nader om meer uit te vind. Megan Zondagh van Windhoek vertel dat vriende pas laat weet het dat hulle vreeslik gesukkel het met al die voertuigpapierwerk by die Kazungula-grenspos. Trouens, die stomme mense het eers 9 nm. by hulle blyplek…

Ek en my dogter Bella het vroeg vir ’n mokororit opgedaag, en dit het begin motreën. Maar dit was somer in Namibië en die reënbuie hou gou op. Daarby het die roeigids Evans Sikabongo twee sambrele saamgebring. Ons was skaars twee minute op die rivier toe ’n donderstorm losbars en Bella se sambreel uit haar hand vlie’. Ná 20 minute hou Evans stil en beduie ons moet uitklim. Gaan ons ’n skemerkelkie in die reën drink, wonder ek. Nee, Mevrou, roep hy, ek moet water uit die mokoro skep! Sowat 40 minute later is ons terug by die lodge. Daar hoor ons hoe die volgende skof se bestuurder wat pas aan diens gekom het, uitgehardloop het om ons te keer. Ek is bly ons het hom nie gehoor nie –…

PARKTARIEWE Dié tariewe is tans: Vir SAOG-lede: R100 p.p., R50 per kind jonger as 16 jaar en vanaf R50 per voertuig in die |Ai|Ais-, Etosha-, Namib-Naukluft-, Dorob-, Waterbergplato- en Skedelkus- nasionale park, Sperrgebiet en die Kaap Kruis-reservaat. Vir die ander parke is die parktarief R70 p.p., R30 per kind en vanaf R50 per voertuig. Onthou dus om ook vir dié bedrae per dag te begroot wanneer julle in ’n nasionale park oornag. KRY ’N KAART! NAMLEISURE-KAART Met ’n NamLeisure-kaart in jou beursie kry jy 25% afslag op Namibia Wildlife Resorts se blyplekke, maaltye en aktiwiteite – ons het die plekke met “NWR” in die blyplekkegids aangedui. Dit sluit kampplekke uit. ’n Enkelkaart kos R500 p.p. en ’n gesinskaart (2 ouers en 2 kinders tussen 13 en 17) kos R1 400.…

KALAHARI Kalahari Farmhouse, Stampriet Die C15-grondpad is die hoofslagaar van die westelike helfte van die Kalahari-woestyn in Namibië. Jy kan dit volg van Hoachanas suidooswaarts tot by die Mata Mata-grenspos teen die Kgalagadi-oorgrenspark. Dié roete volg die loop van die droë Auobrivier, want die rivierbedding en sy oewers bied die beste bouplek vir plaashuise en dorpies. Sodra jy wes of oos uitwyk van die Auob, is jy dadelik kniediep in die rooiduine. Stampriet is die woeligste van die dorpies langs die C15, dalk omdat die C20-teerpad van Mariental (sowat 62 km na die weste) deur Stampriet draf na Aranos (81 km) in die ooste. Die bekende Elnatan- private skool op Stampriet lok Afrikaanssprekende skoliere van reg oor die land wat veral op sportdae baie mense dorp toe bring. Danksy die…

’n Mens se lewe flits glo deur jou gedagtes in die oomblik voordat jy sterf. Jy kry nog een maal ’n kykie in al daai oomblikke wat saakgemaak het, soos wanneer jy deur ’n fotoalbum blaai. Maar waar ek nou in my kampstoel sit, met die slurp van ’n vyfton-olifant só na aan my dat ek haar asemhaling kan hoor, word ek nie getrakteer op prentjies van my tiende verjaardagpartytjie nie. Al waaraan ek dink, is dat ek dríngend moet badkamer toe… Al was Nyae Nyae – ook bekend as die Boesmanland – die eerste gemeenskapsbewaringsgebied in Namibië (dis in 1998 geproklameer) is dit steeds báie wild! Hierdie gebied van 8 992 km² is, naas die nabye N#a-Jaqna-bewarea van net-net meer as 9 000 km², die grootste van sy soort…

DAVID LIVINGSTONE-MUSEUM Bring gerus ’n oggend deur saam met die opgeruimde en kundige Linus Mukwata. Sy stories maak die omgewing se geskiedenis lewendig. Toegang is gratis, maar skenkings is welkom. 00 264 81 397 2185 MASHI CRAFTS Skaf ’n aandenking aan by dié winkel. Kies uit ’n verskeidenheid geweefde produkte soos mandjies, plekmatjies en skinkborde of houtsneewerk wat deur die plaaslike mense gemaak word. Hoe klink ’n klein houtmokoro vir jou vrugte of ’n sebra vir die bedkassie?…

As ’n mens hier stilhou ná ’n lang dag op die pad slaak jy ’n sug van verligting. Rondom jou lyk dit soos ’n botaniese tuin met appelblaar-, hardekool-, vaal- en apiesdoringbome omhoog. Plek-plek staan voëlbakke. Dis duidelik iemand is baie lief vir dié ruskamp. By jou selfsorghuis is die sand gehark en die braaiplek silwerskoon. Die binnekant is alte fraai versier met mooi beddegoed, kussings en kralewerk, en baie hakies om goed op te hang. Langs die potblou swembad staan dekstoele en hier’s ’n mooi boma waar Miley Cyrus, die mak bosveldpapegaai, waghou. “Dit was net bos. Dit hele plek het só gelyk,” vertel die eienaar, Ansie Pool, en beduie na die dig begroeide oewer aan die oorkant van die Kavangorivier. “Ons het alles self gebou, en is nou…

NOODSAAKLIKE PAPIERE PASPOORT Dit moet vir nog ses maande of langer geldig wees ná jou vertrekdatum uit Namibië en moet minstens twee skoon bladsye hê. SERTIFIKATE Kinders jonger as 18 moet ’n oorspronklike, volledige geboortesertikaat hê behalwe as hulle ’n nuwe paspoort het wat hulle ouers se name lys. RYBEWYS Jou Suid-Afrikaanse een is geldig in Namibië – hou dit byderhand. VOERTUIGREGISTRASIEDOKUMENTE Dit moet oorspronklike dokumente of gesertifiseerde afdrukke wees. Onthou ook die dokumente vir jou sleep- of woonwa. MAGTIGINGSBRIEF As jy nog aan jou kar afbetaal, moet jy ’n brief van die bank hê wat jou toestemming gee om die kar oor die grens te neem. Indien jy iemand se ryding leen, moet jy ’n getekende toestemmingsbrief van daai persoon kry. Dié brief moet die kar se registrasienommer, die…

BEKOSTIGBAAR (Sien bl. 13) HELMERINGHAUSEN & TIRASBERG 1 Namtib-biosfeerreservaat Die D707 is bekend as die grondpad met die mooiste uitsigte in Namibië. Dis dus reeds iets besonders net om tot by die ingang van dié private reservaat te ry. Die Little Hunter’s Rest-kampterrein is 3 km van die lodge af. Jy kyk uit oor die Tirasberg en rooiduine van die Namibwoestyn na die weste. Kamp: R250 p.p. (geen krag, braaiplekke, warm storte, ’n gemeenskaplike windskuiling vir woeste aande). Lodgekamers vanaf R1 980 p.p. met ontbyt en aandete. Jy kan op gemerkte roetes in die veld stap of ’n piek uitklim (gratis). 00 264 63 683 055namtib.net 2 Ranch Koiimasis Op dié plaas kan jy stap en op begeleide perdry- en e-fietsritte gaan. Slegs toeganklik van die D707 af. Kamp (5…

Beste ontbyt Wild Rocket Café is dié plek waar ek en my vriende mekaar graag vir ontbyt ontmoet. Dis in die dorpskern en hoewel modern steeds knus. Besoekers kan binne of buite sit, tussen potplante en lanterns. Oorweeg die Mexikaanse eggs benedict of die salmon dome. Loer ook op die Facebook-blad – hier word gereeld bingo-aande gehou! 00 264 64 461 046“Wild Rocket”op Facebook Beste gebak Chrismann at the Trading Post het die flair van ’n Europese straatkafee. Bestel gerus die varsgebakte suurdeeg- of rogbrood of ’n mengelslaai. Neem ’n selfie voor die muurskildery van die dorp se bekendste bakens net buite die deur. 00 264 64 405 081 ’n Mens kan ook nie werklik sê dat jy al op Swakop was as jy nie Café Anton se swartwoudkoek geproe…

1 Soek diere in Etosha Bespreek ten minste vyf aande in dié gewilde nasionale park: Twee in Okaukuejo vir tyd by die Ombika-, Olifantsbad en Nebrownii-watergat; twee in Halali vir tot teenaan die pan ry en by die Suedawatergat vir roofvoëls wag, en ’n laaste aand by die stiller Namutoni. As jy baie verlof het, mik na die Olifantsrusruskamp met net 10 staanplekke. Dagtarief R100 p.p.; R50 per voertuig. 2 Gaan op ’n sonsondergangrit Bederf jouself en bespreek ’n sonsondergangvaart op die Kavango-, Kwando-, Zambesi- én Choberivier. Jy sien watervoëls by dosyne, en dalk selfs krokodille, seekoeie en olifante. Dit kos tussen R350 p.p. en R700 p.p. Die meeste blyplekke het ’n boot – vroegopstaners kan vra vir ’n vroegoggendrit. 3 Staan verstom voor die Epupawaterval Kom kyk hoe die…

Bo en behalwe van die mooiste woestynagtige landskappe op aarde is Namibië ook bekend vir stilte. Maar somer in die Kavango-Oos- en Zambesistreek (voorheen die Caprivi) is nóóit stil nie. Bosveldvisvangers huldig die dag in. ’n Rooibekfisant kekkel besete en steek ’n haan of twee aan. Iets pla die kroonkiewiete langs die oewer en hulle skop ook ’n bohaai op. In die bos “doe-doe-doe” ’n grootvleiloerie. Koeie kla, donkies balk. En deurgaans zoem en tjir die goggas. So gaan dit heeldag en sodra die son sak, begin die paddas. Hoe nader ’n mens aan ’n rivier bly, hoe meer oorverdowend word dié klikke en kwake. Soggens is daar ’n gogga in jou koffiebeker. Groot motte fladder uit jou handdoek as jy dit optel om te gaan swem. Die streek is…