Indholdsfortegnelse for 23 November 2023 i Huisgenoot

1 TYD VIR VERANDERING IN HAAR LEWE, SÊ AMOR Sy’t onlangs haar pa verloor, haar verhouding het verbrokkel en sy’t uit haar jarelange gesinshuis getrek. Nou is dit tyd om aan te gaan, sê die sangeres Ek het nuwe respek vir jou gekry, Amor Vittone. Mense is gou om te kritiseer, maar ’n mens oordeel nie as jy nie al in dieselfde skoene moes stap nie. As jy nie iets goeds kan sê nie, hou liewer jou mond. Baie sterkte, Amor. HENDA Amor, jy is ’n engel. Moenie toelaat dat mense jou afkraak nie. Nie elke vrou sal na haar man kyk nadat hy haar verkul het nie. Jy kan met trots aanstap. En die regte man sal op die regte tyd opdaag. Alle voorspoed vorentoe. DEON Jy is net amazing…

IN STAPELS bokse in die sitkamer wag haar lewe om na Kaapstad verskuif te word. En ja, dis vir haar swaar, sê Ingrid Paulus. Want dis veel meer as net die Goudstad wat sy groet. Die trek is ook simbolies van 23 jaar in 7de Laan wat sy agterlaat. Totsiens aan die bekende stel wat soos haar eie huis geword het, totsiens aan geliefde kollegas, skrywers, reggiseurs, die kameraspan … En vaarwel aan haar karakter, Vanessa, in wie se vel sy so lank gelewe het. “Ek kom nog tot verhaal,” sê Ingrid (46) toe Huisgenoot by haar kuier presies ’n week nadat die laaste tonele van die sepie geskiet is. “Ek mis my mense … my Laanfamilie.” Dis nie asof sy nie gewoond is aan rondskuif nie. Sy en haar…

Die doel is om pyn te verminder deur jou bobeenspiere te versterk. Dié oefeninge sal dit ook vir jou makliker maak om te staan, uit stoele op te staan en te stap. DOEN DIT SO 1. Lê op ’n plat oppervlak met ’n opgerolde handdoek onder jou linkerknie. Buig die ander knie. 2. Sluit die knie deur hard af te druk op die handdoek tot jou voet van die grond af oplig. Lig jou tone in die rigting van jou gesig. 3. Hou jou been 10 sekondes lank reguit en opgelig. 4. Laat saak jou been stadig vir 3 sekondes. 5. Herhaal stappe 2 tot 4 tot jy moeg is en jou bobeen seer raak. Begin met 10 herhalings. 6. Doen dieselfde met jou ander been. SODRA DIT MAKLIKER BEGIN…

IN DIE WÊRELD VAN KARRE WAT SPIN Drie jaar gelede het sy haar debuut op die kassie gemaak as Bompie se kleinsus Angelique Galant in Arendsvlei. Nou speel dié Kapenaar die vroue-spinner Amber in die nuwe Showmax-reeks Spinners. Die reeks gaan oor die wêreld van tollende karre, wat as “spinning” bekendstaan. Dit volg die 17-jarige Ethan (Cantona James) wat vir ’n bende op die Kaapse Vlakte werk. Hy’t geen ander keuse nie, want hy moet sy jonger broer onderhou. Dan ontdek hy ’n moontlike uitweg deur by spinning betrokke te raak. Chelsea (23) se karakter is die spinner wat Ethan aanvanklik inspireer en aanmoedig om aan dié ekstreme sport deel te neem. Sy is die beste vroue-spinner in die land en jy kan dit sommer sien wanneer sy haar spiere…

HELP, HELP Deur NATANIËL. Human & Rousseau, R199* In Nataniël se wêreld woon daar vreemde wesens. Soos: Die Spelonk. “Haar naam is Mordel van Schalkwyk, haar oë sit baie diep en haar mond is ook ingetrek, soos wanneer ’n knoop in ’n rugleuning sit. Nou is daar ’n eggo as jy te naby staan.” Tannie Neeruam van Wellington. “Sy’t net haar naam omgedraai ná skool, sy’t gesê sy’t nog nooit gehoor van ’n Maureen wat goed getrou het nie.” Ballerine Vermaak wat pamflette skryf vir kerk-en leesgroepe oor hoe om te grimeer. “Sy het twee dae op ’n boot gewen met ’n tydskrifkompetisie, jy kan nie glo hoe lyk daai mense nie. En sy loop orals rond met ’n groot blomhoed soos by die perde. En sy het vir die…

SPOORVEROUDERD Die wynliefhebber van Johannesburg kla steen en been omdat dit deesdae so lank vat om iets met Transnet te laat verskeep. Hy het ’n ruk gelede ’n paar kissies Twee Jonge Gezellen van ’n Kaapse kelder bestel. Maar teen die tyd dat dit by sy huis opgedaag het, was dit alles Oude Meester. L. SAAYMAN SNAAKSE HAPPIE Hoekom was die kannibale se mae seer nadat hulle die komediant geëet het? Hulle kon nie ophou lag nie. SAN MARCHAND EETGEWOONTES Ek is op ’n ligte dieet. Ek eet by daglig, by maanlig en soms by yskaslig. DENISE, PRETORIA KEN JOU BOKKE Wat noem ’n mens ’n Springbok wat al die los balle wen? Kwagga! E. MOELICH BELOONSTELSEL Klein Jannie se ma vra kwaai: “Hoekom is daar ’n groot, ronde nul…

UIT Frans, molécule (wat “kleinste organiese deeltjie van 'n liggaam” beteken), en Latyn, molecula ('n verkleining van die woord moles, wat massa beteken) Die elemente bestaan uit atome. As verskillende atome van verskillende elemente met mekaar verbind, vorm hulle molekules. H2O, beter bekend as water, bestaan uit twee waterstofatome en een suurstofatoom. Die grootste molekule wat ons kan bou, se naam is PG5. Hy bestaan uit 20 miljoen atome – en jy kan dit steeds nie met die blote oog sien nie.…

1 Wat is die naam van die hoogste berg in Antarktika? 2 Wat is die hoofstad van Argentinië? 3 Watter voël lê die grootste eiers? 4 In Sesame Street, wie bly in ’n asblik? 5 Hoeveel Grand Slam-toernooie is daar in tennis? Antwoorde 1 Mount Vinson  2 Buenos Aires 3 Volstruis 4 Oscar the Grouch 5 Vier BRONNE: TCNN, THE GUARDIAN, NETWERK24, BBC, NEWSFORKIDS.NET, UPI.COM, EURACTIV.COM, GOODTHINGSGUY.COM, SAHISTORY.ORG.ZA, OMALLEY.NELSONMANDELA.ORG, BUSINESSINSIDER.COM, PEOPLE.COM…

VIR Suid-Afrikaners was 1994 ’n uiters belangrike jaar. Dit was die jaar toe ons land ’n ware demokrasie geword het. Ons beskou dit as ’n keerpunt in die storie van ons nasie. Die geskiedenis leer ons dat ’n demokratiese stelsel eers ná ’n lang en uitdagende pad bereik word. En die storie van ons demokrasie gaan eintlik ver terug tot in die tyd van die antieke Grieke! Ons leer jou wat ’n demokrasie is, waar dit vandaan kom en hoe dit die lewe van elke Suid-Afrikaner verander het. GESKIEDENIS ’n Demokrasie is ’n regeringsvorm waarin die burgers van ’n land ’n sê het in hoe die regering werk. Die woord is afgelei van twee Griekse woorde: demos, die mense, en kratos, mag. Hoewel daar waarskynlik vroeëre vorme van demokrasie was,…

CLEO JACOBS (40), AKTIVIS VIR VROUEGEVANGENES, MAITLAND ONS is almal soms vas. Dis dalk nie agter tralies nie, maar ons is almal geketting aan ons omstandighede. Ek werk al meer as 17 jaar by ’n bank. Daar’t ’n dag gekom waar ek vasgevang gevoel het in my werk. Agter tralies. My volle naam is Veliswa Cleopatra Jacobs, maar mense noem my Cleo. Ek is nou 40, en ek het drie seuns. Ek’s in Gugulethu gebore, maar ek’t die afgelope 20 jaar in Mouillepunt gewoon voor ek onlangs Maitland toe getrek het. In 2016 het ek die organisasie Beauty Behind Bars gestig. Ons vier nou ons sewende jaar. Beauty Behind Bars probeer om vroue van enige agtergrond te help. Om hulle op te bou en hulle mag vir hulle terug te…

HULLE was voorbereid op die geboorte van ’n kindjie met downsindroom. Toe sy 16 weke swanger was, het toetse gewys die kans daarvoor is hoog. Maar sy het dit nooit eens oorweeg om die dogtertjie nié te hê nie. “Ek is ’n baie emosionele mens. Ek het geweet ek sou die babatjie net so liefhê soos my twee ander kinders,” sê Nadia van Graan. Haar man, Stefan, sit langs haar op die rusbank. “My hart is soos ’n minibustaxi. Daar is altyd plek vir nog.” Maar toe word Leah gebore – en sy het nié downsindroom nie. Dit was ingewikkeld. Haar armpies en bene was kort. Haar koppie groot. En toe begin haar rugstring kromtrek soos ’n S. Die antwoord – wat makeer ons kind? – het bly ontwyk. “In…

DIE reeks van 52 episodes is in Valsbaai verfilm en sal van einde Januarie te sien wees. Summertide gaan oor die mariene bioloog Martin Field (Frank Rautenbach), wat ná die dood van sy vrou, Julia (Amalia Uys), saam met sy twee kinders Valsbaai toe trek. Hier begin hy ’n trust om die omgewing te bewaar, maar niks in die lewe verloop maklik nie. Frank is besonder opgewonde oor die reeks. “Ek’s in die sewende hemel. Ek hou daarvan om stories te vertel, veral stories oor gesinne. Summertide is die perfekte manier om dit te doen,” sê hy. Die reeks verken die lewe van die Field-gesin en die interessante karakters wat oor hul pad kom – elkeen met ’n duister agenda. Ons ontmoet Martin se ma, Wilma (Terry Norton), en pa,…

Hulle hou alles uiters privaat. Besonderhede oor hul verhouding is vir jare geheim gehou, en hulle verskyn selde saam. Maar SUKI WATER-HOUSE kon haar boepie nie wegsteek toe sy onlangs saam met haar kêrel, ROBERT PATTINSON, in Los Angeles gewaar is nie. Suki het ’n oorgroot langmoutop aangehad wat oënskynlik ’n bababoepie verbloem het. Dit het gerugte laat ontstaan dat sy en Rob met ’n gesin begin. Die twee het in 2018 begin uitgaan en het nog net ’n hand vol geleenthede saam bygewoon. Die Britse akteur praat nie graag oor sy liefdeslewe nie nadat sy verhouding met sy Twilight-medester Kristen Stewart pal in die kollig was en op ’n smerige skeiding uitgeloop het. “As jy mense inlaat, verminder dit die waarde van wat liefde is,” het Robert in 2019…

AS JOU lewensmaat ’n beroemde hartebreker is, kan dit moeilik wees om jou humeur te beteuel met lastige aanhangers. JENNIFER LOPEZ (54) is onlangs opgeneem waar sy op ’n uitstappie saam met haar man, BEN AFFLECK (51), ’n aanhanger behoorlik op haar plek gesit het. Nadat die aanhanger by die akteur aangelê het, het Jennifer vir haar gesê: “Back up, bitch!” voor sy van die lag uitgebars het. Die egpaar het pas uit die restaurant The Ivy in Los Angeles gestap. Ben het die kardeur vir JLo oopgehou toe sy die aanhanger speels voor stok gekry het. Al het die sangeres dalk die komiese kant van die situasie gesien, slaan sterre dikwels hard terug wanneer aanhangers die grense oorskry. FAITH HILL In 2007 het die countrysangeres (56) rooi gesien toe…

DIT was soos ’n romantiese fliek wat oornag in ’n riller ontaard het. Eers ’n vriendskap wat versigtig-versigtig iets meer word, boodskappe waarin liefde betuig word – en toe, meteens, ’n dwelmnes, ’n klopjag, alkoholmisbruik, dreigemente en agtervolging. Nou het Ashleigh Ogle (33) besluit om haar stilte oor haar verhouding met die rugbyspeler Elton Jantjies (33) te verbreek. Sy is deur hel, maar dis ’n stil Ashleigh wat in Media24 se kantoor voor ons sit. Sy was eers huiwerig om met ons te praat – sy sê sy leef reeds weke lank in vrees. “Ek het op 19 Oktober uitgevind Elton het my laat agtervolg,” vertel Ashleigh. Voor haar op die tafel lê sjokolade, salami-en-kaashappies en samoesas, maar dis asof sy hulle nie raaksien nie omdat sy haar storie wil…

RUGBY was 19 jaar lank sy alles – sy loopbaan, sy passie, sy uitlaatklep. G’n wonder hy kon skaars sy trane keer toe die eindfluitjie in die laaste wedstryd van die onlangse Wêreldbekertoernooi blaas, want terwyl die Springbokke gejubel het oor een van die grootste oorwinnings van hul lewe, was dit vir dié strydros van Suid-Afrikaanse rugby soveel meer. Dit was sy laaste wedstryd in die Groen-en-goud, en in sy hart het hy geweet sy wonderlike rugbyrit is nou verby. En dís mos nou bittersoet as daar ooit so iets was. “Ek het ’n tawwe tyd gehad,” sê Duane Vermeulen (37) oor vanjaar se toernooi in Frankryk. “Veral die week met die opbou na die finaal. Eers was dit die laaste Maandagoefening, dan die laaste Dinsdagoefening, en dan kry jy…

DIE groenterak in die winkels kreun tans onder heldergroen broccoli. Ons wys jou hoe om van tradisionele geregte tot verskeie kraakvars broccolislaaie te maak – volmaak vir ’n warm somersdag. ROMERIGE BROCCOLI-&-FETA-PASTA GENOEG VIR 4 MENSE / BEREIDING: 15 MIN. GAARMAAK: 25-30 MIN. ◗ 500 g pasta, van jou keuse ◗ sout, soos nodig SOUS ◗ 150-220 g broccoli◗ 60 ml (¼ k) geroosterde sonneblomsaad◗ 2 knoffelhuisies, gekap◗ 60 ml (¼ k) roketof basilieblare◗ 60 ml (¼ k) pietersielie◗ 60 ml (¼ k) olyfolie◗ 1 avokado, geskil en ontpit◗ 125 ml (½ k) gladde maaskaas◗ sap en fyngerasperde skil van 1 suurlemoen◗ sout en vars gemaalde peper AFRONDING ◗ 1 wiel feta◗ ’n hand vol vars basilieblare◗ olyfolie, vir oordrup 1 Verhit ’n groot kastrol gesoute water en bring tot…

BEDDEGOED Nuwe beddegoed met ’n interessante patroon sal dadelik jou slaapkamer transformeer. NETJIES WEGGEPAK Bêreplek is prakties, maar kan steeds stylvol wees – van houers vir snuisterye tot mandjies vir groter items. LIEFLIKE GEURE Vul jou huis met sagte geur wat die sintuie streel. MUURKUNS Maak jou ruimtes meer persoonlik met kaarte van spesiale plekke, afdrukke en foto’s van gunstelingherinneringe. TREFFENDE LAMPE Vergeet van vervelige lampe! Maak iets prettigs wat jy nie kan miskyk nie deel van jou dekor. PLANTE Bring die natuur huis toe met regte en kunsplante. Varsgeplukte blomme vertoon ook altyd mooi. ’N BIETJIE BLINK ’n Tikkie blink metaal hier en daar verleen elegansie. BESONDERSE DETAIL Maak seker nuwe dekor is nie net prakties nie – sorg ook dat dit mooi detail of ’n interessante ontwerp het.…

Skryf gerus vir my oor jou sake van die hart of moeilike persoonlike kwessies. Ek beantwoord hier vrae en briewe van lesers en gee graag raad. Ek sal nie jou naam bekend maak nie en jou identiteit bly vertroulik. Skryf vir my by: Vra vir Irma, Posbus 1802, Kaapstad 8000 of stuur jou e-pos na vravirirma@gmail.com of SMS Vra vir Irma gevolg deur jou vraag na 36489. BELEEF MY MAN ’N MANLIKE MENOPOUSE? V Die afgelope tyd doen my man die eienaardigste goed. Hy eet ewe skielik soetgoed, beplan elke naweek ’n ekskursie soos ’n kamp of ’n konsert, en toets nuwe motors by elke handelaar moontlik. Genadiglik het hy nog niks aangeskaf nie. Die grootste verrassing is dat hy by ’n gim aangesluit het. Nou is hy vyfuur soggens…

BOOGSKUTTER 22 NOV – 20 DES Maak plek vir Mars om by jou teken in te rol en sy strydlustige aard met hom saam te bring. Besluit of jy wil vyande of vriende maak en pas jou gedrag dienooreenkomstig aan as dit vir jou belangrik is om met mense in verbinding te wees. Gesagstryde by die huis is ’n gegewe, maar dit is nie die tyd om met ’n ystervuis te regeer nie. Jou geliefde is die goedhartige en medelydende een. Volg hul voorbeeld op ’n emosionele vlak. GELUKKIGE NOMMERS 14, 25, 35, 36, 31, 21 BOOGSKUTTER: JOU IDEALE WERKOMGEWING ◼ Jy het ’n liefde vir vryheid en kan regtig op enige plek werk. ◼ Ideaal gesproke moet jou werk reis behels. ◼ Verskillende muurhorlosies vir verskillende plekke sal jou…

53 Dis hoeveel jaar Paul Durietz (76) van Illinois al skoolhou – ’n wêreldrekord vir onderwysers. Hy gee “social studies” – ’n vak wat geskiedenis en aardrykskunde kombineer. Paul het op 11 besluit hy wil eendag klasgee toe hy stories gehoor het wat sy pa, ’n soldaat in die Eerste Wêreldoorlog, vertel het. Elke dag is steeds vir hom nuut, vars en anders, sê Paul. 25 Dis hoeveel name ’n Spaanse hertog en sy vrou hul dogtertjie gegee het. Die kleinding heet Sofía Fernanda Dolores Cayetana Teresa Ángela de la Cruz Micaela del Santísimo Sacramento del Perpetuo Socorro de la Santísima Trinidad y de Todos Los Santos. Die wet in Spanje sê egter kinders moet een saamgestelde of twee eenvoudige name hê. Dit beteken haar ouers gaan met ’n snoeiskêr…

‘WOW, WIE’S JY?’ Hy’t dit nooit sien kom dat hy eendag in die kollig sal skitter nie. Hy’t nie eens daarvan gedroom om voor ’n kamera te staan nie. Rugby was eintlik sy ding. “Ek wou eers rugby speel, maar toe die groter manne my in gr. 9 begin uitgroei, het daai droom vervaag,” sê die TikTokker Buks Scott (19). Sy regte naam is Reinier, maar op TikTok staan hy as Buksem bekend. “My hoërskoolloopbaan was ’n rollercoaster. In gr. 8 op Riversdal het ek vir die B-span rugby gespeel. Die rugbydroom was toe nog lewendig.” Maar in gr. 9 het die ander ouens se “uitgroei” hom ingehaal. “Ek was toe die kort vettetjie met die dun stemmetjie. Ek is omtrént gespot.” Die lockdown het die ding gedoen, sê Buks.…

Nóg ’n prettige seisoen van Die Babbelbende lê voor! Kom kyk saam na die tweede seisoen op huisgenoot.com. In dié aanlyn Afrikaanse kinderreeks ondersoek die vriende Bibi, Ben, Paloeka die leeu en Palawa die kameelperd saam interessante dinge terwyl hulle speel-speel meer oor ons wonderlike wêreld leer. Besoek huisgenoot.com, kliek op “HG Junior” heel bo en daarna “Die Babbelbende” om al die episodes te kry. Of kyk elke dag aanlyn op jou selfoon, rekenaar of tablet ’n nuwe episode op ons tuisblad. Elke episode is 12 minute lank. Oor naweke deel ons ’n omnibus van vyf episodes. Dis nie nodig om ingeteken te wees op Netwerk24 om Die Babbelbende te kyk nie. Besoek ook media24shop.com om jou eie Paloeka-of Palawa-pop of Die Babbelbende se Groot Storieboek te bestel. Kom leer…

SY HET eers gedink sy maak die pap darem ’n bietjie te dik aan toe sy met haar projek begin, maar almal wat haar skepping sien, stem saam dit vat nou nogal die koek. Die koekkunstenaar Emma Jayne Morris se lewensgroot eetbare weergawe van koning Charles is in ’n onlangse koekbakkompetisie in Engeland vertoon, en almal daar was dit eens: Die ambisieuse Britse bakker se skepping het die kroon gespan op die skou. Die reusagtige meesterstuk, wat amper 1,8 m lank is en meer as 60 kg weeg, is ’n merkwaardige lewensgetroue afbeelding van Charles soos wat hy vanjaar op sy kroning gelyk het, kompleet met septer en ryksappel in die hand, asook ’n kroon vol suikerjuwele. Maar om dit te maak was nie kinderspeletjies nie. Dit het Emma (53),…

DIS die gewone mense wat saam verhale van hoop bou wat haar aangryp. Want verval en redes om te kla sal jy altyd langs ons land se ver paaie kry, maar genadiglik kry jy ook doeners wat moue oprol en self hul dorp regruk. Vra maar die sangeres en aanbieder Leah van Niekerk (36), wat deesdae die land platry as die barmhartige engel van die kykNET-reeks Lottoland help ’n dorp. En met 13 dorpe in haar truspieëltjie kan sy nie uitgepraat raak oor die mense wat sy ontmoet het nie. Soos die man van Bloemfontein, “die enigste stad wat ons besoek het” onder al die dorpe. “Die persoon wat ingeskryf het se storie is aangrypend. Hy was ’n alkoholis, is gerehabiliteer en gee nou sy hele lewe vir daai…

EBEN & ANLIA ETZEBETH Die Bokslot het baie gehad om te vier – die Bokke se Wêreldbeker én dat hy en sy sangeresvrou, Anlia, binnekort ouers word. Die foto’s van sy hand op haar maag einde Oktober by die eindstryd in Frankryk het dié nuus verklap. “Seën op seën,” skryf Anlia op Instagram. Eben en Anlia het mekaar in 2021 op Melkbosstrand ontmoet. Dit was régtig liefde met die eerste oogopslag, het sy kort voor die Wêreldbekertoernooi aan Huisgenoot vertel. Die twee het einde verlede jaar Ballito toe getrek en woon nou daar terwyl Eben vir die Sharks speel. Hulle is in Februarie by La Paris op Franschhoek getroud. HANDRÉ & MARISE POLLARD Dié Springbok en sy vrou word ook ouers. Marise het die babanuus op Instagram bekendgemaak. Sy noem…

1 MEGAN FOX SE MISKRAAM In haar nuwe versameling gedigte stort die aktrise MEGAN FOX haar hart uit oor haar miskraam saam met haar verloofde, Machine Gun Kelly (33). Megan (37) skryf oor ’n ultraklank van ’n babadogtertjie op 10 weke. Sy het later oor haar trauma op Good Morning America gepraat. “Dit was moeilik vir ons albei,” het sy gesê. “En om dit te probeer verwerk, het dit ons op ’n baie wilde reis saam en afsonderlik gestuur: ‘Wat beteken dit?’ en ‘Hoekom het dit gebeur?’” 2 TIMBALAND VRA BRITNEY OM VERSKONING TIMBALAND moes sy woorde sluk nadat hy ’n opmerking gemaak het dat Justin Timberlake vir Britney Spears moet muilband, nadat sy in haar boek geskryf het dat sy ’n aborsie gehad het toe hulle uitgegaan het. Die musiekvervaardiger, wat al dikwels met…

HY KYK jou in die oë, amper asof hy jou uitdaag om eerste weg te kyk. Want Melvin Maxim (42) is daaraan gewoond dat mense wegkyk. Of hom aanstaar wanneer hulle dink hy weet dit nie. Hy het ’n toestand waar oorgroeide letselweefsel, oftewel keloïede, soos trosse dadels aan weerskante van sy vriendelike, oop gesig hang. Hy is gewoond aan die kyke, die mense wat hom aanstaar. Hulle sien net die bultende weefsel in sy nek – van die keloïede wat op sy rug, borskas en skouers groei, weet hulle nie eens nie. “Dit laat my sleg slaap,” vertel hy. “Ek moet op my maag slaap, want die keloïede op my rug is seerder as dié op my gesig. Dis jeukerig.” Dan glimlag Melvin, en sy vriendelike oë en breë…

DIE EENSTUK DIE TWEESTUK IETS VIR BO-OOR BYKOMSTIGHEDE KRY DIT HIER BASH.COM; COTTON ON 087-550-4383; DECATHLON.CO.ZA; EDGARS 0860-111-826; FABULOUSFINDSBOUTIQUE.CO.ZA; FOSCHINI 0860-834-834; GALAXY & CO 0860-834-834; H&M 086-0690-707; MAKRO 0860-600-999; MILADYS 080-021-2535; MR PRICE 080-021-2535; PICK N PAY CLOTHING 0860-303-030; SEXYBEACHES.CO.ZA; SHOE CITY 0860-900-400; SPEEDO.COM; SUPERBALIST.COM; TAKEALOT.COM; THEFITZSTUDIO.COM; THE FIX 0860-834-834; THEPERFECTTOUCH.CO.ZA; TRUWORTHS 021-460-2300; WOOLWORTHS 0860-022-002; ZANDO.COM; ZARA.COM; QUEENSPARK 021-460-9400 HOEWEL ONS ALLES IN ONS VERMOË DOEN OM KORREKTE PRYSE TE VERSKAF, KAN FOUTE VOORKOM WAARVOOR HUISGENOOT EN DIE VERSKAFFERS NIE VERANTWOORDELIK GEHOU KAN WORD NIE.…

IS BEGROTINGS moeilik vir jou? Probeer dan gerus Kakeibo, oftewel “bedagsame besteding” – die ou Japannese benadering wat weer gewild geword het omdat dit geldbestuur eenvoudiger maak. Dit gaan oor beter bestedings- en spaargewoontes op lang termyn, eerder as ’n streng begroting. 1 WAT HET EK NODIG? ● ’n Notaboek en pen. Geen apps, geen begrotingsprogram of selfs ’n sigblad nie. ● Die selfdissipline om tyd daarvoor te maak. Net ’n paar minute per week (of elke dag, wat ook al die beste vir jou werk) en aan die einde van die maand. ● Eerlikheid. Sodat jy jou foute kan raaksien en beter bestedingsgewoontes kan aanleer. 2 HOE WERK DIT? Skryf elke maand jou inkomste in jou notaboek neer – of jy nou een salaris of verskillende inkomstestrome het. Jou uitgawes kom…

GROOT BLOKRAAI WEN ’N BOEK VAN HUMAN & ROUSSEAU PLUS KOM IN AANMERKING VIR DIE MAANDELIKSE TREKKING VAN R1 000. NO 2 519 KOMPETISIEVRAAG Watter aandoening is ter sprake? As jy vashaak, kan jy gerus ander lesers se raad vra op ons Facebookblad met die naam Huisgenoot-Blokraaie. Dié week wen een leser Donkerdrif deur Deon Meyer (H&R, R390). Die briljante Bennie Griessel is terug in Donkerdrif. Dié roman se intrige en spanning verskaf leesplesier soos nét Deon Meyer kan. Daar is ’n koelbloedige moord by die Kaapse Waterfront. Dit hou heel moontlik verband met geheimsinnige briewe wat die geskorste luitenante Bennie Griessel en Vaughn Cupido ontvang het. Maar eers moet Bennie-hulle in Stellenbosch gaan soek na ’n vermiste student. Hulle moet ook die spoor vat van die eiendoms-agent wat die kooptransaksie…

Vroeg die oggend van 18 November 1993 het afgevaardigdes by die Meervoudige Onderhandelingsforum ’n tussentydse grondwet vir Suid-Afrika goedgekeur. Die proses om dié grondwet saam te stel het eintlik al in 1991 begin met die eerste Konvensie vir ’n Demokratiese Suid-Afrika (Kodesa). Die partye het ’n ooreenkoms onderteken wat al die elemente ingesluit het waaruit die nuwe grondwet moet bestaan. Dit het ook beskryf hoe ’n tussentydse regering moet werk en wat moes gebeur met ou stelsels wat verander moes word. Die proses is amper ontspoor toe geweld in dele van die land uitgebreek het. Ons huidige president, Cyril Ramaphosa, en Roelf Meyer van die Nasionale Party het toe gesprekke gevoer wat gelei het tot die Meervoudige Onderhandelingsforum. Die onderhandelingsforum het bestaan uit lede van 26 politieke groepe. Die finale…

DAAR sit hy, die kaptein van die viermalige wêreldkampioene, en luister terwyl hy die leviete voorgelees word. “Siya Kolisi, kyk jy ooit na my boodskappe?” word hy betig. En toe skaterlag die ganse Suid-Afrika. Want dis nie Rassie Erasmus of Jacques Nienaber wat aan die woord is nie. Dis Desmond “Desi” Koolen, die bekendste sewejarige laaitie in die land. Die boodskap waarvan hy praat, het hy halfpad deur die Wêreldbekertoernooi aan Siya gerig: “Jy moenie die bal net vashou en vorentoe dra nie. Jy moet meer uitgee.” Die video van dié stukkie wysheid op Jacaranda FM se ontbytprogram is al byna ’n miljoen keer op sosiale media gekyk – en baie rugbyaanhangers het die outjie se parmantigheid geniet. Maar Desi het darem woorde van lof ook gehad vir Siya en…