Indholdsfortegnelse for 21 March 2024 i Huisgenoot

1 ZETSKE EN ALTUS SE HUWELIK OP DIE ROTSE Zetske van Pletzen en Altus Theart gaan skei, het Zetske bevestig, maar sy beklemtoon hulle is op goeie voet en respekteer mekaar Niemand trou om te skei nie. Wanneer liefde begin kwyn, is dit die beste om uitmekaar te gaan. Vele paartjies verander, en dit veroorsaak negatiewe dinge vir die huwelik. Julle sal weer geluk vind. Sterkte vir albei. ERNISTINE Zetske, nuwe bladsy! Julle was so ’n mooi paartjie, maar as ’n mens as vriende uitmekaar gaan, is dit goed. Moenie jou steur aan mense wat lelike opmerkings maak en jou wil vertel hoe om jou lewe te lei nie. MELANI Egskeidings is wat ’n mens daarvan maak. ’n Mens kan mekaar met respek hanteer sonder om vuil wasgoed in die openbaar…

Waarmee hou jy jou die graagste besig? Met stap. Hike. Wat verveel jou? Mense met te veel opinies. Waaroor is jy spyt? Dat ek my suster se troue misgeloop het. Wat sou jy anders doen as jy jou lewe kon oorhê? Niks. Alles moet wees soos dit is. Hoe sal die mense wat jou goed ken jou beskryf? Iemand wat baie stupid grappies maak. Baie vloek. Daarvan hou om rooiwyn te drink. Met watter slegte eienskap in ander kan jy saamleef? Ons almal kry ’n dag wat ons ongeduldig en geïrriteerd is, so dis fine, maar moenie aanhou daarmee nie. Wat beïndruk jou in ander mense? Mense wat selfless is – wat gee sonder om iets terug te verwag. Wie sou jy die graagste vir ete wou nooi? Ek wil…

TEENSPOED en pyn hoef nie die laaste woorde in ’n mens se storie te wees nie. Daar kan altyd nog ’n hoofstuk volg – jou storie ánderkant die seer. En net omdat ander mense dink hulle ken jou verhaal, beteken dit nie hulle weet wat in die boek van jou binneste geskryf is nie. Vra maar vir Karlien van Jaarsveld. Daar was al talle kere dat sy in sak en as sou kon gaan sit het, maar vandag straal haar sagte bruin oë rus en vrede. “As ek nou terugkyk na my loopbaan en lewe, sien ek groei,” sê sy. “Ek sal dit beskryf as ’n blom wat in ’n dor plek groei, amper soos daai resurrection plant wat lyk of dit geen kans op oorlewing het nie. Dit sal…

’N MORSIGE poniestert hoef nie jou voorland te wees terwyl jy oefen nie. Jip, jy kan tegelyk sportief én stylvol wees. Hier’s vier maklike style om jou hare uit jou gesig te hou terwyl jy jou lyf laat sweet tydens verskillende soorte oefeninge. GEBRUIK HAARNAALDE MET EKSTRA BINNEGROEFIES. DIE RIFFIES SAL ’N GOEIE GREEP OP DIE HARE HÊ EN DIE STYL LANGER LAAT HOU DIE BALLETBOLLA Hierdie teruggetrekte haarstyl is prakties en pragtig. Dit sal jou netjies afgerond laat lyk in jou volgende balletklas. Maak só 1 Begin deur jou droë hare oraloor met ’n krultang te krul (1). 2 Sodra jou hare heeltemal afgekoel het, borsel die krulle liggies uit met ’n groot, plat borsel om ’n golwende en donsige tekstuur te skep. Budi Juspandi, die haarstilis wat hierdie…

Glo dit of nie, geluk is nie net touchy-feely nie – dis iets wat deur geleerdes aan universiteite bestudeer word. Trouens, navorsers aan die Universiteit van Kalifornië in Berkeley het in 2022 selfs ’n projek genaamd The Big Joy op die been gebring. Die doel? Om te kyk hoe mense met klein dingetjies vir hulself vreugde kan skep. “Dit behels oefeninge en aktiwiteite waarmee jy die vaardighede slyp wat jou gelukkiger maak,” sê Emiliana Simon-Thomas, een van die navorsers wat deel is van die projek. Hul bevindings was verrassend eenvoudig – en dit wys daar is maklike dinge wat jy kan doen om gelukkiger te voel. ◗ WEES OOP VIR VERWONDERING Wees oop en ontvanklik vir die mooi en spesiale dinge in die lewe. Sien dit raak, en laat toe…

GROOT BLOKRAAI WEN ’N BOEK VAN HUMAN & ROUSSEAU PLUS KOM IN AANMERKING VIR DIE MAANDELIKSE TREKKING VAN R1 000. N0 2 536 KOMPETISIEVRAAG Watter musiekinstrument is ter sprake? As jy vashaak, kan jy gerus ander lesers se raad vra op ons Facebookblad met die naam Huisgenoot-Blokraaie. Dié week wen een leser Marinda Engelbrecht se Marinda kook met blikkies en pakkies (H&R, R290). As jy soms voor jou koskas staan en kopkrap vir inspirasie, het Marinda Engelbrecht die antwoord vir jou. In haar derde boek wys sy hoe jy gewone blikkieskos en pakkies kan omtower in spoggerige disse wat jy met selfvertroue kan voorsit. Min mense sal die verskil kan proe tussen die watertandlekker-boontjiesop wat jy met blikkies en pakkies berei het en die ware Jakob. Met ’n paar koskasbestanddele en…

1 Joe word Djo Djo? Klink soos die Suid-Afrikaanse sêding wanneer iets ons oë laat rek. Nee, dis ’n sanger se naam hierdie. Jy ken dalk nie sy verhoognaam nie, maar jy sal beslis weet wie hy is. Joe Keery ken ons as Steve Harrington in Stranger Things. “Djo” is ’n skuilnaam om sy musiek van sy TV-karakter apart te hou. Joe is nie meer net ’n bekende en geliefde akteur nie – sy musiekloopbaan is ook nogal iets om te aanskou. Hy was begin-Maart die gewildste sanger op TikTok met “End of Beginning”. 2 Sy groot deurbraak Al maak hy sedert 2019 musiek onder die naam Djo, was dit “End of Beginning” wat hom nou ’n wegholsukses en ’n musiekster op ons radar gemaak het. Dis sy heel eerste…

TEEN die einde van die Ystertydperk het die klassieke Oudheid aangebreek, ’n era waarin die stad Rome, vandag in Italië, talle kulture rondom die Middellandse See begin verower en eindelik die Romeinse Ryk gevestig het. Die sterre van die Romeinse Ryk was sy legioensoldate, wat die heel beste weermag in die wêreld was. Hul werk was om nuwe gebiede te verower en te verdedig, en hulle het die Ryk tot so ver as Brittanje help uitbrei. Die Romeinse Ryk het tot 476 n.C. geduur.…

OP 18 Februarie 1993 het Fritz von Erich, ’n legendariese rofstoeier en bemarker, op sy plaas in Denton County, Texas, op die lyk van sy seun Kerry von Erich afgekom. Kerry (33) het teen ’n boom regop gesit. Hy het hom met sy pa se .44 deur die hart geskiet, ’n daad wat dekades later steeds by stoeiers spook. Wat dit nog meer ontstellend gemaak het, is dat Kerry die vyfde van Fritz se seuns was wat dood is, en die derde wat hul eie lewe geneem het. “Pa het hom gekry. Hy het gesê hy het nog nooit so ’n vreedsame uitdrukking op Kerry se gesig gesien nie,” sê Kevin, die enigste oorlewende Von Erich- broer. In die vroeë 1980’s was Kerry von Erich een van die grootste rofstoeisterre…

DIS moeilik om jou in te dink hoe bang ’n kind met kanker moet wees. Die gedurige pyn en die onsekerheid oor môre is vir grootmense traumaties – wat nog te sê kinders wat dalk nie mooi verstaan wat met hulle gebeur nie. Selfs die vreemde mediese toerusting en behandeling kan vreesaanjaend wees. Vra maar vir Janica Smit, ’n radioterapeut by die Life Eugene Marais-hospitaal in Pretoria. Want sy word byna elke dag met die vrese van siek kinders in die onkologieafdeling gekonfronteer. Vir pasiëntjies met gewasse in die kop of keel is daar een spesifieke ontbering: die termoplastiese maskers wat hulle moet dra. Dis deursigtig maar noupassend, want dit word individueel oor die gesig en nek van elke kind gevorm. Die doel is om beweging te verhoed sodat die…

SOOS altyd wanneer sy gesig wys, het die mense ge-oe en ge-aa. Hierdie keer was hulle selfs meer begeesterd omdat hulle haar so lank laas gesien het – almal se geliefde Kate, prinses van Wallis, omring deur haar spruite, op ’n foto wat spesiaal vir Engeland se Moedersdag geneem is. Hopelik sou die foto ’n einde aan al die samesweringsteorieë maak, ’n bewys dat al die giftonge verkeerd is met hul skinderstories dat die een of ander dodelike siekte of skande daarvoor verantwoordelik is dat Kate vir die laaste maande uit die openbare oog verdwyn het. Maar helaas het die paleis se plan nie gewerk nie. Pleks daarvan dat die foto die vlamme van omstredenheid geblus het, het hulle hoër as ooit begin knetter. Binne ure nadat dit deur die…

AMANDA EN DAVID “Ek en David het mekaar in 1982 ontmoet toe ons saam met Coenie de Villiers vir die destydse kunsteraad deur die Vrystaat getoer het,” vertel Amanda. David se produksie Ver in die wêreld Kittie is vanjaar as die beste musiekgedrewe produksie (teater) aangewys. “Ek en Coenie was sy opening act – hy was so gewild, ons het eintlik geweet die mense kom kyk vir hom en nie vir ons nie.” David is “een van die grootste kreatiewe geeste” wat sy ken. “Hy is ’n nederige mens en lojale vriend. Hy het iets reggekry wat min kunstenaars al reggekry het: Hy het die mense wie se stories ons nooit geken het nie – die onderdruktes – vir ons op die mees kreatiewe en kleurryke maniere kom vertel.” David…

MATCH-BOX op matchbox hierso op die kaal Cape Flats-sand, hierso waar die South Easter op sy worst waai … Here, where flowers an’ grass jus’ don’t grow. Dis asof Adam Small hier op Middelpos, Saldanha, gestaan het toe Joshlin een middag verbyhardloop. Haar ligte hare is in ’n vlegsel vasgemaak en haar groenblou oë glinster in die son. Sy hou van vlegsels. Sy’s op pad skool toe. En vanmiddag gaan sy saam met die buurt se kinders kom speel. Soms kry sy ’n geldjie, dan gaan sy gou huiskafee toe vir lekkergoed. Vir ’n rand kan sy darem ietsie kleins kry om te kou. Haar grootste plesier is om in die middag by ’n tannie te gaan kuier wat sy al van kleintyd af ken. Daar kyk sy tekenprente op…

SY IS die lewende bewys dat jou oë kán bedrieg. Want uiterlik is dit ’n bejaarde vrou wat jy hier voor jou sien sit, haar vel soos brose perkament oor die tenger lyf gespan. Maar wanneer sy gesels, besef jy opnuut daar is ’n lewenslustige tiener binne dié liggaam – en sy het vir jou houding, hoor! “Ek lyk dalk anders,” begin sy die gesprek, “en my liggaam lyk dalk ouer as wat ek is. Maar ek staan my man, hoor. Vra maar rond op TikTok, my comebacks is vinnig!” En met die ys nou gebreek, maak die glimlaggende Beandri Booysen haar op die bonkige rusbank gemaklik vir die groot gesels. Selfoon, blou energiedrankie en lipsalf binne bereik, soos enige ander tiener. Beandri het min bekendstelling nodig. Die land het…

BOTTERSKORSIEGROENKERRIE BEREIDING EN GAARMAAK: 30 MIN. / GENOEG VIR 4 MENSE SOJA-GEGLASEERDE BOTTERSKORSIE ◗ 2 e sonneblomolie◗ 1 middelslag-botterskorsie, en in happiegroot blokkies gesny◗ 3 e ligte sojasous GROENKERRIE-BASIS ◗ 1 e sonneblomolie◗ 1 stingel sitroengras, gekneus◗ 2 e Thai-groenkerriepasta (maak seker dis vegan!)◗ 2 x 400 m-blikke volroom-klappermelk◗ ’n hand vol suikerertjies, gehalveer◗ ’n hand vol aspersies, harde punte afgesny◗ ’n hand vol groenbone, punte afgesny◗ 2 e bevrore of vars edamame-bone◗ sap van 1 lemmetjie, plus vars wiggies vir voorsit◗ ’n hand vol vars koljander, rofweg geskeur◗ 1 rooi brandrissie, saad verwyder en in skyfies gesny◗ 1 sprietui, fyngekap 1 Botterskorsie Verhit die olie in ’n wok terwyl jy die botterskorsieblokkies met die sojasous meng.2 Braai die sojabedekte botterskorsie 10 min. of tot sag en verbruin oor matige…

KRY DIT HIER BABYLONSTOREN.COM 021-863-3852; BLOOMSPACE.CO.ZA 068-064-0277; ETHOS-STORE.CO.ZA 010-110-7722; HERTEXHAUS.CO.ZA 021-948-4764; KNUS.CO.ZA 021-300-2702; LAVISHD.COM 011-609-8303; MRPHOME.COM 064-584-1000; STOREANDMORE.CO.ZA 011-314-0002 HOEWEL ONS ALLES IN ONS VERMOË DOEN OM KORREKTE PRYSE TE VERSKAF, KAN FOUTE VOORKOM WAARVOOR HUISGENOOT EN DIE VERSKAFFER NIE VERANTWOORDELIK GEHOU KAN WORD NIE.…

Het jy seer? Dalk is dit daai ou vyand inflammasie. Maar dis nie net die vyand nie – dis ook ’n vriend. Want inflammasie kan ’n sleutelrol speel in jou liggaam se beskerming teen siektes of in sy herstelproses ná beserings. Dit behels in ’n neutedop jou immuunstelsel se reaksie op iets wat jou lyf as vyandig ervaar. DIE VERSKIL TUSSEN DIE TWEE 1 Akute inflammasie duur vir ’n kort rukkie, en verdwyn dikwels binne twee weke. Dis die soort wat jy kry ná ’n besering of as jy siek was. 2 Chroniese inflammasie duur langer – soms langer as ses weke. Dit kan ontstaan selfs al was jy nie siek nie of het jy nie seergekry nie, of dit kan aanhou lank nadat jy weer gesond of op die…

GEBORE UIT ’N HUNKERING Jy sal haar stem teen dié tyd al goed ken – sy is immers al lank as omroeper op RSG bekend. Maar nou het FRIEDA VAN DEN HEEVER pas haar debuutalbum, Spoorsny, uitgereik. “Ek moes eers leef voor ek daaroor kon sing,” sê Frieda oor dié werk. Spoorsny bevat 11 snitte en is oorspronklik geskep vir die musiekproduksie Skoonveld wat in 2022 by die Woordfees te sien was. Daar het Frieda sulke goeie terugvoer van gehore gekry, dat sy besluit het om die musiek in ’n album te omskep. Die eerste snit op die album, “Bon Voyage”, is ’n duet saam met Die Heuwels Fantasties se hoofsanger PIERRE GREEFF. Vir haar is dié snit ’n ode aan die Britse musiekgroep Underworld se album Trainspotting van 1996,…

FLIEKS THE CASAGRANDES MOVIE Op Netflix vanaf 22 Maart Nadat ’n verrassende gesinsuitstappie Mexiko toe Ronnie Anne se verjaardagplanne in die wiele ry, is sy vasbeslote om te bewys sy’s oud genoeg om haar eie ding te doen. In haar geval beteken dit om antieke halfgod te konfronteer wie se angsaanvalle die potensiaal het om die wêreld te vernietig. En dan bevry sy hom per ongeluk… HET JY GEWEET? Hierdie is die eerste fliek gegrond op die supergewilde Nickelodeon-animasiereeks The Casagrandes op DStv. KUNG FU PANDA 4 In teaters vanaf 22 Maart Dié aksiepanda wat so lief is vir eet is terug vir ’n vierde keer. Dis hoog tyd – die laaste fliek is in 2016 uitgereik. In dié nuwe fliek volg ons Po se avonture deur antieke China. Hy…

Kry die volledige lys wenners op Huisgenoot.com.…

Kol. Athlenda Mathe, nasionale polisiewoordvoerder, sê 348 kinders onder 18 jaar is tussen September 2023 en Februarie 2024 in Suid- Afrika as vermis aangemeld. Altesaam 207 van die kinders is gevind, terwyl 141 steeds vermis is. Die syfers op die Missing Children South Africa (die MCSA) -webtuiste vertel ’n ander storie. In 2013 het die Buro vir Vermiste Kinders bevind ’n kind verdwyn elke vyf uur in Suid-Afrika. Dié data is sedertdien nog nie bygewerk nie. Volgens die MCSA se mees onlangse syfers word 77% van vermiste kinders opgespoor. Die res word nooit gekry nie óf word slagoffers van mensehandel óf word dood gevind. Bianca van Aswegen van die MCSA sê mense is geneig om in syfers vas te kyk: Dié getalle is net ’n druppel aan die emmer. “Daar…

DIE toekoms was vol belofte. Hulle wou ’n klein, intieme troue hê. Hulle het sel fs oor die moontlikheid van kinders gepraat. Toe, verlede Junie, sterf Adriaan Holtzhausen in sy bed aan ’n hartaanval. Skielik moes Jeandré de Beer van Pretoria sy lewensmaat se roudiens beplan eerder as hul troudag. Maar Adriaan (33) se laaste wens – dat sy as by Palm Beach in Kwa-Zulu-Natal gestrooi moes word – is steeds onvervul. “Dit was sy gunstelingstrand. Hy het altyd gesê dis so vreedsaam, dis nog ongerepte natuur en glad nie gekommersialiseer nie,” vertel Jeandré (27) hartseer. Maar die seremonie op die strand, wat so klein en intiem soos hul troue sou wees, is vir eers ontspoor weens ’n regstryd met Adriaan se familie oor sy as. Adriaan se ma, Leonetta…

Oulike oudhede Babydoll-skoene Hierdie skoene pas goed by ’n antieksjiek styl, maar is ook ’n elegante afronding vir amper enige ander voorkoms. Pastelmaats Prettttig preppie Balletskoene Kies hierdie seisoen gemak en styl met immergewilde balletskoene. Vol frille KRY DIE HIER COTTON ON 087-550-4383; IDENTITY 021-460-2400; FOREVER NEW 0860-018-014; MANGO.COM; OPARI.CO.ZA; SUPERBALIST.COM; TAKEALOT.COM; THE FIX 0860-834-834; TRUWORTHS 021-460-2300; ZARA.COM HOEWEL ONS ALLES IN ONS VERMOË DOEN OM KORREKTE PRYSE TE VERSKAF, KAN FOUTE VOORKOM WAARVOOR HUISGENOOT EN DIE VERSKAFFERS NIE VERANTWOORDELIK GEHOU KAN WORD NIE.…

MY SKOONOUERS WIL ONS LEWE OORNEEM V Ons is sowat ’n jaar getroud en nog in die wittebroodsfase. Dit beteken ons is baie gelukkig, ek weet net nie vir hoe lank nog nie. Sien, my skoonouers het vir ’n naweek kom kuier en tot ons verbasing bouplanne oopgegooi op die tafel. Hulle het my totaal geïgnoreer en aan my man gewys hoe nog ’n groot tweede huis agter op ons erf sal pas en hoe lekker ons almal saam kan bly. Hulle albei tree af aan die einde van die jaar. My man was baie ongemaklik, en ek was woedend. Dít nou van mense wat nie maklik ’n goeie woord oor my kan kwytraak nie. My man is gekant teen die hele idee. Wat hulle nie weet nie, is dat…

1 HOEVEEL KAN JY KRY? Dit wissel van R38 878 tot R169 264. Hoe minder jou inkomste, hoe hoër kan die subsidie wees. Gebruik die glyskaal op die First Home Finance-webwerf (nhfc.co.za) om te bereken hoeveel jy moontlik kan kry. 2 WAT IS DIE VOORWAARDES? Dis slegs beskikbaar vir Suid-Afrikaanse burgers ouer as 18, met óf ’n enkele óf gesamentlike bruto huishoudelike inkomste van R3 501 tot R22 000 per maand. Dit moet jou eerste eiendom wees, en jy mag nie voorheen ’n staatsbehuisingsubsidie ontvang het nie. As jy getroud of in ’n saamwoonverhouding is, moet die eiendom in albei se naam geregistreer wees. Enkellopendes met finansiële afhanklikes kan ook aansoek doen. Aansoekers moet bewys hul huisleningsaansoek is in beginsel deur ’n geakkrediteerde Suid-Afrikaanse finansiële instelling goedgekeur, of watter ander finansiering hulle…

RAM 21 MAART – 19 APRIL Verhoudingsprobleme kom op die voorgrond. Dit kan soos maak of breek voel – veral as ’n belangrike besluit opdoem. Jy wil nie in ’n posisie wees waar ’n besluit op jou afgedwing word nie. Jy moet besef die volmaan op die 25ste kan die keerpunt wees. Wees ’n tydelike gebrek aan selfvertroue te wagte wanneer Mars op die 23ste van teken verwissel. VISSE 19 FEB – 20 MRT Die Visse is nou die middelpunt van die aandag, al verkies jy dit dalk nie so nie. Venus en Saturnus ontmoet op die 22ste in jou teken, en ’n verhouding kom onder die vergrootglas om die gehalte en opregtheid daarvan te toets. Veels geluk as jy die toets slaag, dit beteken die romanse is bestem om…

ANDERSTE GROENIGHEID Hoe weet jy wanneer jy in ’n oujongkêrel se huis is? Al die potplante is dood, maar daar groei iets op die kaas in die yskas. ANTON, BELLVILLE VINGERFOUT Sarel is al weer in die moeilikheid by sy vrou en besluit om vir haar blomme te stuur. Hy vra toe die bloemis om die boodskap “Ek is jammer. Ek is lief vir jou” op die kaartjie te skryf. Maar toe hy ná werk ewe kordaat in die huis instap, gee sy vrou hom ’n klap en gooi die blomme na hom. Verbaas kyk Sarel na die kaartjie en sien toe die bloemis het geskryf: “Ek is jammer ek is lief vir jou.” ANTON, BELVILLE EISJ Jan: Gehoor van die Eskimo wie se igloe gesmelt het? Gert: Was dit…

1 Waarmee meet ons die temperatuur? 2 Watter kleurvolle tropiese voëls kan menslike spraak namaak? 3 Wat is die grootste reënwoud in die wêreld? 4 Watter vorm is ’n stopteken? 5 In watter stad sal jy die Suid-Afrikaanse konstitusionele hof vind? ANTWOORDE 1 Termometer 2 Papegaai 3 Die Amasone in Suid-Amerika 4 Oktagoon 5 Johannesburg BRONNE CNN, THE GUARDIAN, BBC, SMITHSONIANMAG.COM, KIDSNEWS.COM.AU, ABC.NET.AU, BRITANNICA.COM, NATIONALGEOGRAPHIC.COM, THEATHLETIC.COM, ETYMOLOGIEBANK.NL…

WETENSKAPLIKES skat die ouderdom van die Aarde op sowat 4,5 miljard jaar. Daarteenoor reken hulle die mens en sy aapagtige voorsate bewandel die planeet maar net die afgelope 3,4 miljoen jaar. Dit is maar ’n fraksie van ’n baie lang geskiedenis. Met ander woorde – ons is die nuwelinge in die buurt! Die mensdom het nietemin gedurende die paar miljoen jaar sedert ons op die Aarde is groot vordering gemaak in hoe ons leef en wat ons alles kan doen. Onthou, in ’n stadium van ons geskiedenis was die wiel die jongste tegnologie. Die tyd voor ons al ons kennis begin neerskryf het, was die prehistoriese tydperk (voortyd). Dit word in drie argeologiese tydperke ingedeel: die Steentydperk, Bronstydperk en Ystertydperk. Dié periodes het hul name te danke aan hoe die…

Nog ’n prettige seisoen van Die Babbelbende is nou volstoom aan die gang! Kyk saam na seisoen 2 op huisgenoot.com. In dié aanlyn kinderreeks ondersoek die vriende Bibi, Ben, Paloeka die leeu en Palawa die kameelperd saam interessante dinge terwyl hulle speel-speel meer oor ons wêreld leer. Besoek huisgenoot.com, kliek op “HG Junior” heel bo en daarna “Die Babbelbende” om al die episodes te kry. Of kyk elke dag aanlyn op jou selfoon, rekenaar of tablet ’n nuwe episode op ons tuisblad. Elke episode is 12 minute lank. Oor naweke deel ons ’n omnibus van vyf episodes. Dis nie nodig om ingeteken te wees op Netwerk24 om Die Babbelbende te kyk nie. Besoek ook media24shop.com om jou eie Paloeka- of Palawapop of die Babbelbende se Groot Storieboek te bestel. Bly…

DIE kwik is aan die styg in Mexiko, en ons praat nie net van die weer nie. LUPITA NYONG’O en JOSHUA JACKSON geniet tans ’n vuurwarm wegbreek in Puerto Vallarta om die aktrise, onder meer bekend vir Black Panther, se 41ste verjaardag te vier. Die paartjie het hul verhouding privaat gehou sedert hulle einde verlede jaar saam is, maar dis duidelik hulle gee nie meer om dat die wêreld sien hulle is verlief nie. In Mexiko is hulle afgeneem waar hulle romantiese wandelings langs die see geneem het, saam in die branders ingehardloop en mekaar omhels het, en mekaar passievol op ’n seiljag soen. “Hulle het dolverlief gelyk, asof hulle nie genoeg van mekaar kan kry nie,” het een omstander aan E! News gesê. Lupita en Joshua se romanse het…

WANNEER jy genooi word om in DREW BARRYMORE se geselsprogram ’n draai te gooi, moet jy jou maar vir ’n goeie dosis nabye kontak regmaak. Drew (49) skuif gereeld tot teenaan haar gaste of gaan staan op haar knieë voor hulle. “Ek hou van hoe Drew so in mense in leef,” het ’n aanhanger onlangs oor ’n videogreep van die program gesê. “Sy’s baie betrokke; dis wonderlik!” Party mense hou van Drew se intieme benadering wanneer sy onderhoude voer, maar ander sê dis baie indringend, selfs tot so ’n mate dat dit hulle soms laat ineenkrimp. Drew sê dis maar net omdat sy ’n “magnetiese aantrekking” tot haar gaste het. “Ek dink aan hoe ek my lewe lank gevoel het en ek probeer my net indink hoe opgewonde ek sou…