Indholdsfortegnelse for May - June 2021 i SARIE

Die groot ou plataanboom voor my woonstel in Kaapstad verander van kleur, dag vir dag. Dis ’n betowerende skouspel. Van somer se digte koelteboom – my welkome skans teen die wêreld daarbuite en speelplek vir ’n swetterjoel glasogies wat wip-wip tussen die takke – tot nou, byna broos in geel en bruin; blare wat vir oulaas in die bries ritsel voordat hulle grond toe val en die trotse boom gestroop laat vir nog ’n winter. Hierdie is my gunsteling-tyd van die jaar. Daar’s ’n stilte wat herfs en koeler dae bring, en dis sielsalig. Meteens wonder ek, wie onthou lukwarte? Self kan ek nie dink wanneer laas ek daardie wondervruggie gesien of geproe het nie. Soos ek dit het, is wintertyd lukwarttyd. Ek onthou met verlange dié boom in ons…

’N DAG SE TOUSTAAN Ek sit met ’n klompie neute in die holte van my hand. ’n Tenger vrou met ’n pragtige doek om haar kop het gedeel wat sy gehad het met die vreemdelinge rondom haar. En ek dink by myself hoe gelukkig ek is om deel te wees van hierdie dag. Vandag het ek die geleentheid gehad om vir die hele dag, van tienuur tot halfsewe, by my plaaslike munisipaliteit tou te staan. Dit was ’n baie lang ry met baie diverse mense. Daar is die onderwyseres wat sommer daar, in die ry, ’n Zoom-klas aanbied. Gryskop wat vir sy verkreukelde vrou ietsie te ete aandra en Pienkhemp wat almal laat skater met sy kwinkslae. Elkeen met sy of haar eie kommernisse wat hulle gedwing het tot hier…

Vir jare geniet ons die werk van ons bekendste en talentvolste akteurs – daardie mense wat in ons hart kruip, ons bly verras en beïndruk, later legendaries word. Nooit kan ons dink dat ander hul plek sal inneem nie, en dan, op ’n dag, word jy bewus van nuwe name, nuwe talent wat ontluik en ál meer gehoor en gesien word. Dís waar die aktrises Trix Vivier, Jawaahier Petersen en Mila Guy hulle nou bevind – elkeen besig om op hul eie manier te wys watter talent hulle het en indruk te maak, ten spyte van die onvoorspelbare tye waarin werk skaars is . . . Hulle is op pad boontoe, en mense neem kennis.…

Jy het al gesê toneelspel laat jou vergeet van die regte wêreld. Is dit deels ontvlugting? Toneelspel gee my die kans om net in die oomblik te wees, sonder om om te gee wat enigiemand van my dink. Ek kan net myself wees, sonder om ’n front voor te hou. Net ek – nie ek en die samelewing se verwagtinge van my nie. Jy gebruik jou verstand die aand vooraf om jou woorde te leer, ja, maar as jy daar is, kom dit uit jou maag – alles is ’n reaksie op die oomblik. Jy kan net wéés en dis so bevrydend. Was die drang om hier toneel te speel sterker as die verlange toe jy jou familie in Nieu-Seeland agterlaat? Ek het glad nie so daaroor gedink nie. Ná…

“Ons swem in ysige Arktiese waters en riviere wat wemel van piranhas om ons grense te toets. Ons swem vir plesier, vir oefening, vir genesing. [. . .] Ons evolusionêre voorgeslagte het vir oorlewing geleer swem; nou, in die 21ste eeu, is dit een van die gewildste aktiwiteite in die wêreld.” Só skryf Bonnie Tsui in haar boek Why We Swim. Dís waarom ons swem, sê die menslike ysbeer Lewis Pugh, aktrise Tanya van Graan en “seekatfluisteraar” Craig Foster. Dís waarom ons terugkeer, weer en weer. Almal het as kinders die water geniet, maar mettertyd het swem vir hulle ’n ander betekenis gekry. Dit lyk na net nog ’n fliek oor seediere. Dan, 20 minute ná die aanvang, word ’n tentakel uitgerol en Craig Foster se hand gegryp. ET? Nee,…

TROTS My trots het my aanvanklik gepootjie – moenie dat joune jou terughou nie. As jy betyds hulp vra, kan jy vinniger terugbons. Ek moes leer ek hoef nie Superwoman te wees en alles self te doen nie. CHAOS Jy kan nie fokus op wat belangrik is as daar te veel onopgeloste dinge in jou lewe is nie. Handel af wat jy kan, fisiek en emosioneel, as jy sukkel om van ’n terugslag te herstel. SWAK SELFBEELD My egskeiding het my met ’n swak selfbeeld gelaat waaraan ek moes werk. Wees sagter met jouself, gee erkenning aan jouself vir wat jy al bereik het, en as jy steeds sukkel, kry hulp. Ek dink ook mense moet ’n tree terugstaan van sosiale media – niemand het volmaakte lewens, perfekte kinders en…

As die dogter van akteur Stephen Baldwin en sedert 2018 getroud met die Kanadese Grammy-wenner Justin Bieber, is Hailey Bieber gewoond aan die kollig. Hoewel die 24-jarige se droom om ’n prima ballerina te word in haar laat tienerjare aan skerwe gespat het weens ’n voetbesering, kon sy ’n loopbaan as model uitkerf en het al in advertensieveldtogte vir name soos Guess, Ralph Lauren en Tommy Hilfiger verskyn. Op 1,71 m is sy nie juis lank nie, maar danksy haar grasie en soepelheid is sy pas aangewys as die Italiaanse tekkievervaardiger Superga se gesig (en lyf) van 2021. Sy word gereeld deur steelfotograwe afgeneem danksy haar unieke straatstyl – klassiek maar prettig; volgens Superga nog ’n rede waarom sy vir hul veldtog gekies is. Vir Hailey, ’n groot voorstander van…

40's  Dié ruitpatroon-jas in Chanel se Cruise 2020-reeks het uitgetroon op die loopplank by die Paryse Modeweek. Jy kan ’n item met ’n ruitpatroon maklik meng en pas met ander patrone soos wat aktrise Tracee Ellis Ross (48) hier doen. 50's ’n Kwiltjas in Jason Wu se Herfs/Winter 2021-’22-reeks het aandag getrek by die New Yorkse Modeweek. Aktrise Sarah Jessica Parker (56) se kleurryke kwiltjas laat ’n grys winter dadelik vrolik lyk. 60's Die klassieke oorgroot jas het by die Milaanse Modeweek die kollig gesteel. Dié een was te sien in Dolce & Gabbana se Herfs/Winter 2020-’21-reeks. Aktrise Sharon Stone (63) in ’n klassieke lang swart jas. Dis altyd ’n treffer. Ons wys jou die nuutste tendense vir ’n stylvolle, snoesige winter asook hoe om dit te dra 70's Dié…

MARZANNE HOU VAN Jy hoef nie net ontwerpersklere te dra nie, jy kan nou ontwerperskos eet ook. Dolce & Gabbana het in samewerking met Pasta di Martino ’n reeks pastas bekend gestel in verpakking wat versier is met beroemde Italiaanse landmerke soos die Duomo in Milaan, die Kolosseum en die toring van Pisa. Die gelukkige gesin wat saam om ’n tafel pasta geniet, verteenwoordig Domenico Dolce en Stefano Gabbana se waardes van familie en liefde. MET DIE hef IN DIE HAND Skerp, prakties en broodnodig in enige kombuis. Die donkerpienk Victorinoxvleismes met sy 19 cm-lem sny maklik en egalig deur enige vleis. R799 by yuppiechef.com of by kombuiswinkels landwyd PRETTIGE BAKKIE Sit peuselhappies in styl voor in hierdie roospienk keramiekbakkie (11 cm) van Pret-a-Pot. R120 by Poetry DRINK MOOI Moeg gesoek…

Vashti Prins, bekend vir haar rol as die ambisieuse Danni Hendricks in die kykNET-sepie Suidooster, beskou haarself as ’n ster uit eie reg wat binne haar vermoë steeds geskitter het tydens die pandemie. “Die grendeltyd het my die geleentheid gegee om meer oor myself te leer en in ’n verhouding met myself te belê. Ek het ontdek dat ek baie meer het om te bied as wat ek voorheen geglo het.” Haar vaste werk in dié uitdagende bedryf is vir haar iets om op trots te wees. Sy put ook krag uit die feit dat sy in 2017 op ’n jeugdige ouderdom vir ’n kykNET Fiësta vir Beste Opkomende Kunstenaar benoem is. Vashti droom gróót. Sy glo vas wat vir haar bedoel is, sal haar vind. “My droom is om…

My man het sy korporatiewe werk gelos en sy eie onderneming begin. Nou voel hy hy kan sy mening vrylik op sosiale media deel en “net homself” wees. Dit sluit kommentaar in op vriende se plasings van ’n politieke aard – dikwels op ’n afbrekende manier. Hy moet soos ’n egoïstiese veelweter lyk. Hy het ook al kru en onvanpaste aanmerkings aanlyn gemaak. Toe ek die saak aanroer, het hy gesê dis ’n grappie en “tog net Facebook”. Hoe laat ek hom verstaan hoe dit my ontstel? En kan ek hom “unfriend” of gaan ek net dinge vererger?…

1796 Edward Jenner ontwikkel die wêreld se eerste entstof, teen pokke 1879 Louis Pasteur ontwikkel die eerste entstof (teen hoendercholera, oftewel Pasteurella multocida) in ’n laboratorium 1882 Stemme begin in Amerika opgaan teen inenting 1909 Op 20 Junie 1909 word Mary Mallon deur die nuusblad New York American “Typhoid Mary” gedoop 1938 Daar word begin met die vervaardiging van ’n kinkhoesentstof, ontwikkel deur die Amerikaanse bakterioloë drs. Pearl Kendrick en Grace Eldering, met chemikus Loney Clinton Gordon deel van die navorsingspan 1945 Die eerste griep-entstof word in Amerika vir militêre gebruik en ’n jaar daarna vir burgerlike gebruik goedgekeur, 27 jaar ná 1918 se vernietigende Groot Griep 1980 Eureka! Pokke is uitgewis, verklaar die WGO op 8 Mei 1980 1988 Die WGO stel sy visier op die uitwissing van polio,…

ek wil ’n ander lewe hê waarin ek onbevange aanraak en onverganklik omgee Uit Antjie Krog se gedig “ode vir ’n ander lewe” in die bundel ’n Vry vrou (Human & Rousseau, R300) Underdogs Colin Crowdey (Orion, R240) Die foto’s in dié pragboek het my onmiddellik opgebeur. Ek’s mal oor honde en kan my verkyk aan my eie bulterriër as sy uitgelate op die mat rondrol. Sy is ook gek daarna om bene in die lug op haar rug te lê en slaap. Maar ek het nog nooit soos Colin Crowdey probeer om haar op ’n glasbladtafel te laat poseer, sodat ek haar van onder af kan fotografeer nie. Watter unieke perspektief op die mens se beste vriend! Crowdey vertel sommige honde het sommer self opgespring en soos wafferse modelle…

Dolly het saam met ons Pretoria toe getrek, waarvoor ek verskriklik dankbaar was. Alles was so oorweldigend vreemd, nie net die nuwe skool en die nuwe maats nie, maar ook die onbekende bome en plante in die tuine, die donderstorms in die somer en die ryp op die grond vroegoggend in die winter, die onindrukwekkende heuwels op die horison wat as “berge” beskryf is, die feit dat ek te ver van die see af gewoon het om ooit ’n seemeeu te hoor krys. Maar die wete dat Dolly elke middag ná skool vir my in die kombuis sou wag, geklee in haar pienk “overall” met ’n pienk kopdoek laag oor haar voorkop afgetrek, het my elke oggend opnuut moed gegee. Dolly het vir my die simbool geword van alles wat…

My stem, MY STERKTE As Lady Gaga vir een ding staan, is dit individualiteit. Eie denke, ’n eie stem, wat sy nie skroom om te gebruik nie. Dís haar krag as kunstenaar. Valentino se nuwe parfuum, Voce Viva, ’n houtagtige blommegeur wat sprankel met bergamot, mandaryn en ’n tikkie gemmer, straal dieselfde energie en selfvertroue uit as dié unieke kunstenaar. Sy is die volmaakte gesig vir die tydlose en innoverende parfuumhuis se nuwe skepping. Hulle deel die slagspreuk: My stem, my sterkte. Prys: R1 650 vir 50 ml EDP. Beskikbaar vanaf Mei by uitsoektakke van Edgars en Truworths VYE SE PURPER Rooi kersies, rykroom meringue, wolkwit katoen, saggroen salie, geel nektar . . . ’n wêreld se kleurinspirasie vir Le Creuset se vele kombuisprodukte. Maar min klop die diep purper…

Elke dogtertjie het soort van geweet van menopouse. Die tannies watt altyd by die venster gestaan en hulself met ’n tydskrif of enigiets wat ’n lugstroom kon opwek, koel gewaai het, was moeilik om te ignoreer. Maar niemand het jou oor jou middeljarige lyf gewaarsku nie. Soos ’n Lindtsjokoladeballetjie wat te lank in die son gestaan het . . . sag orals. Ek is ’n dokter, ek het nog altyd geglo alles in die liggaam het ’n doel. Maar hoekom moet ons selluliet om ons arms kry en hoekom moet die arms los velle kry? Sou die rede vir boude wat begin hang, dalk wees dat ons minderr moet sit? Dan los ek die belangrikste vir laaste – die rol om jou maag wat maak dat jy permanent jou maag…

Aktrise Denise Newman vra: Wanneer het jy geweet drama gaan jou loopbaan wees? Ek het regtig net nog altyd gewéét. Op drie jaar het ek begin ballet doen en op skool aan elke eisteddfod deelgeneem. Dit was ’n manier om uiting te gee aan my emosionele wêreld. Daar was net so vyf minute in matriek wat ek getwyfel het, bang was my entoesiasme oorskry my talent. Snaaks genoeg was Denise ’n beoordelaar by ons tienertoneelkompetisies. Toe ons in 2018 saam werk by Suidooster, het ek vir haar gesê ek voel asof ek my broek gaan natmaak, ek is so senuweeagtig om saam met haar te speel. Toe sê sy: “Die senuwees gaan nooit weg nie – ek is ook nervous om saam met ’n nuwe aktrise te werk!” Denise vra…

DAAR IS HOOP Probeer agterkom hoekom dit nie vir jou werk nie. Praat daaroor met vriende en familie. Gaan spreek ’n terapeut of sakeafrigter en stel ’n plan op om dit te probeer verbeter. Dalk is jou ondersteuningsnetwerk nie goed genoeg nie. As jy voel jou eggenoot (of ma, huismaat, huishulp) kan meer help, werk ’n plan uit. Miskien voel jy jou werkgewer verwag dieselfde uitsette maar gee soms minder insette of ’n korter spertyd . . . almal is onder druk. Bespreek dit met haar. Jy meen dalk jy het nie toegang tot voldoende tegnologie of data nie. Bespreek dit met jou leier. Miskien kan julle iets uitwerk. Probeer aansluit by ’n ondersteuningsgroep – al is dit ’n paar vriendinne wat een keer per week bymekaarkom en jul werkservarings…

ONTMOET koningin DIE  VAN KOEKTENDENSE DEUR MARZANNE SCHOEMAN Sosiale media is ’n wonderlike ruimte vir kostendense om hul buiging te maak en te floreer. Dink maar aan die vuurwarm tamatie-en-feta-pasta, die gewilde dalgona-koffie en selfs die wolkbrood met woema. Nou is daar ’n nuwe obsessie: die tsoenami-koek. Tsoenami-koeke, ook bekend as die “pull-me-up”- koek, bestaan uit ’n dekadente koek met vloeibare versiersel wat soos ’n waterval langs die kante afloop. Dis ’n fees vir die oog en smaakknoppies! Hierdie nuwe tendens sal enige suikertand se hart laat bokspring en dit is boonop maklik om jou eie tsoenami te skep. SÓ MAAK JY Sodra die koeklae afgekoel het, versier dit gewoonweg met botterversiersel en draai ’n asetaat-koekomhulsel (acetate cake collar) om die gestapelde lae. Giet dan vloeibare versiersel bo-oor – sjokolade-ganache…

7de Laan word 21! Om dit te vier het ons ses van die ‘ou manne’ vir die eerste keer in jare saam afgeneem. Dié keer voor die modekamera om iets van hul persoonlike styl te verklap. Almal se lewe het intussen wye draaie geloop, maar vir ’n dag lank het hulle weer soos ou vriende gekuier FRANK RAUTENBACH Sy passies is gholf, kitaarspeel asook ’n goeie paar leerskoene. Frank is elegant-stylvol en sê sonder ’n snyersbaadjie kan hy nie leef nie. Blou baadjie met elmboogdetail (R899), H&M. Steenkleur gholfhemp met wit kraag as detail (R499), Zara. Liggrys langbroek met ruitpatroon (R629), H&M. Bruin leerinsteekskoene (R2 699), Aldo. Bruin leerbelt (R250), Old Khaki. GROOTTES Baadjie: 32R – 48R Hemp: XS – XL Broek: 28R – 42R NEIL SANDILANDS Neil beskryf homself…

1 KIES ’N LIGTER HAARKLEUR Ligter haarkleurskakerings verdoesel die voorkoms van hare wat by jou paadjie en haarlyn verdun en maak jou kopvel minder sigbaar. 2 SNY JOU HARE IN ’N KORT OF MEDIUM LENGTE Lang haarstyle is geneig om jou hare yler te laat lyk as wat dit is, terwyl kort of medium lengtes meer volume skep. 3 MASSEER JOU KOPVEL Deur jou kopvel te masseer terwyl jy jou hare was, stimuleer jy bloedvloei na die follikels, wat haargroei bevorder. 4 SKILFER JOU KOPVEL AF Jou hare groei beter op ’n skoon, gesonde kopvel. Skilfer so een keer ’n week jou kopvel af met ’n haarmasker. 5 EET REG Kos ryk aan gesonde vette, soos avokado’s, olieryke vis en sade, stimuleer die bloedsirkulasie na jou kopvel en bevorder só…

Die glansryke Hollywood-ster Marilyn Monroe het in die vyftigerjare in ’n onderhoud sonder skroom verklaar dat sy nét Chanel No.5 dra wanneer sy saans onder die lakens inkruip. Nou het dié Franse modehuis hul nuutste Coco Mademoiselle-parfuum, L’eau Privée (R2 400 vir 100 ml), geskep as ’n geur spesiaal vir die aand. Maak jouself gereed vir die bed met note van roos, jasmyn, patsjoelie en muskus wat ’n verleidelike aroma skep en op jou vel, satynkamerjas en vars lakens sal draal. En dink net hoe mooi sal die elegante matglas-parfuumbottel met goue detail op jou bedkassie lyk? Die Switserse horlosiemaker Tag Heuer span weer saam met Porsche, nog ’n meester van ikoniese ontwerp, vir hul nuwe reeks slimhorlosies. Slimhorlosies raak toenemend gewild soos al hoe meer mense streef na ’n…

Die hoofhuis dateer uit 1852 en bo die voordeur pryk IWDV, die voorletters van die destydse eienaar, Isak Wilhelm van der Vyver. Aanvanklik is hier met onder meer vrugte en druiwe geboer, maar in die laat 1800’s hoofsaaklik met volstruise. Deesdae is Buffelsdrift ’n olyfplaas. Greg Truen, ’n argitek en ’n direkteur van die argiteksfirma SAOTA, het hierdie pragtige historiese plaas, waarvan die huis en buitegeboue basies nog in ’n goeie toestand was, in 2016 gekoop. Hy het Jaco Booyens, ’n bekroonde argitek en kleispesialis, genader en saam het hulle die restourasie aangepak. In die huis was daar tekens dat dit in die 1970’s opgeknap is, maar dié is gestroop om plek te maak vir ’n moderne kombuis en badkamer. Om die oorspronklike karakter te behou het hulle ’n dun…

Ek is al 22 jaar getroud met ’n liewe en sagte maar baie negatiewe man. Hy tjommel oor oudword, geld (dat ons gebrek gaan ly op ons oudag omdat die ekonomie mos gaan ineenstort), die swaar verkeer, vriende wat te veel kom kuier, die wind wat te veel waai . . . Ek sien lig aan die einde van die tonnel, hy sien ’n trein. Hy kan eenvoudig net nie in die oomblik lewe nie. Ek verstaan dit nie, ek is baie positief en kan oor die kleinste dingetjies opgewonde raak. Eers het ek ferm gesê: As jy nie positief kan wees nie, wil ek dit nie hoor nie. En dan het die vonke gespat. Deesdae draai ek net om en loop. Is dit verkeerd?…

Wat wil jy bereik? Vra jouself dus watter probleem jy wil oplos. Doen soveel as moontlik navorsing om te besluit wat is die beste manier om die regte keuse uit te oefen. Maak ’n lys van moontlike alternatiewe. Jy hét nou ’n lys van oplossings vasgestel. Kyk wat elke besluit se moontlike uitkoms is, sodat jy kan bepaal wat die beste besluit vir jou unieke probleem sal wees. Wees baie eerlik wanneer jy die voor- en nadele teen mekaar opweeg, want jý moet gemaklik wees met die uiteindelike keuse (en uitkoms). Nou kan jy jou besluit uitoefen. Vertrou jou instink. Jy hét die navorsing (kopgedeelte) gedoen. ’n Mens weet immers nooit honderd persent of jy die regte besluit neem nie. Jy wonder dalk selfs wanneer jy dit maak of dit…

“Ek het op die blink gepoetste vloer van die lughawe se vertreksaal gestaan en my hart uitgesnik. Die stroom mense het om my verdeel en verder aan weer een geword. My reisgenoot het stilletjies tussen hulle verdwyn. Minute tevore het ’n skoonmaker met ’n besem uit die toilette gehol – en ’n verskrikte muis voor my oë papgeslaan.” Mina, hier aan die woord, kan nie enige wese, mens of dier, se pyn hanteer nie. Selfs ’n boom wat afgekap word, krap haar om. Eenkeer het ’n verdwaasde vark op die hoofweg voor haar oë van ’n bakkie afgeval en dit het haar byna geknak. Nou is daar seker iemand in ons almal se lewe wat hopeloos te veel vóél. Soos May in Sue Monk Kidd se blitsverkoper, The Secret Life…

14% Die persentasie van mense wat antibiotika by die huis berg. Sowat ’n kwart van hulle sê hulle sal dit in die toekoms gebruik sonder om die dokter te raadpleeg. Dis dalk nie die regte behandeling vir jou kwaal nie, en kan boonop lei tot antibiotika-weerstandige “superkieme”. Op dieselfde noot: Die meeste mense gebruik min of geen van die opioïede wat ná chirurgie voorgeskryf word. Sowat 90% bêre dit oop en bloot in plekke soos die medisynekassie. Dit terwyl die misbruik van voorgeskrewe medisyne die opioïed-krisis dryf. Bron: prevention.com ALTYD MOEG? Die oplossing is dalk heel eenvoudig: oefening. Miskien nie die antwoord wat jy wil hoor nie! Maar gereelde matige oefening kan moeë volwassenes ’n energie-inspuiting gee, het navorsing bevind. In een studie het deelnemers 20 minute lank teen ’n…

Nala’s World , Dean Nicholson (Hodder & Stoughton, R355) Dean Nicholson het ek toevallig op sosiale media raakgeloop. As eienaar van vier katte het ek dadelik aanklank gevind by die groot Skot wie se pad op sy wêreldreis dié van ’n weggooikat gekruis het. Dean wou die wêreld op sy fiets gaan verken om meer te leer van die geknelde planeet waarop ons woon. In die derde maand van sy reis, op ’n afgeleë bergpad in Bosnië, het ’n klaaglike gemiaau sy aandag getrek. Die bedremmelde katjie het sy hartsnare geroer; hy kon haar nie net daar los nie. En so het sy verhouding met Nala, die rondreisende kat, begin. In dié vermaaklike boek vertel hy die hele verhaal van hoe Nala haar eie paspoort moes kry sodat sy…

5 gelukkige SARIElesers kan elk Elisabet se oorlog deur Helene de Kock (Human & Rousseau, R310) wen. Dis 1938 en Elisabet Uys se onrus oor haar voorgenome huwelik broei saam met die gerugte dat daar dalk ’n tweede Groot Oorlog mag uitbreek. Gepantser met Ouma Liesbet se raad besluit sy kort voor haar troue om die verlowing met Johannes Barnard te verbreek. Sy neem ’n wilsbesluit om vroualleen na Europa te reis, ongeag die tradisies en verwagtinge wat aan haar voorgeskryf is. Sal Elisabet in die oorloggeteisterde Londen vind waarna sy soek? En sal die dokter met die dringende donkerblink blik vir haar die vryheid en sekerheid kan bied wat met onvoorwaardelike liefde saamgaan? Nog 5 gelukkige SARIE-lesers kan elk Op soek na Saartjie deur Dominique Malherbe (Tafelberg, R320) wen.…

Maandag. Vanoggend besluit Andrew hy bestel ’n huurmotor, ’n pikswart Londense huurmotor met ekstra afstand tussen hom en die bestuurder. Dis soveel duurder as Uber, maar die verpligting om geselsies aan te knoop is heeltemal te veeleisend. Motors bring gereeld verligting, hy is nie in direkte kontak met ’n gebou of straat nie. Andrew groet. Do you mind the radio? vra die bestuurder en kyk na hom in die spieëltjie. Andrew skud sy kop. Hy kyk hoe die lieflike laning bome verbyvlieg, hy sien luukse hotelle met glasdeure en gekeilde lakeie, die rye jong moeders op pad na die parke met hul kinderwaentjies. Iemand lees die nuus. Mynwerkers sit vas, betogers is geskiet, ’n rugsak het op ’n stasie ontplof, vrouens word steeds gestenig in ’n land met olie. Hy…

Ag, die Kaap, my hart!Jawaahier Aktrise Brümilda van Rensburg vra: Hoekom wou jy graag sepiewerk doen? Ek was ’n Suidooster-aanhanger sedert die eerste episode omdat hulle die Kaap en Suid-Afrika vier, met al ons kulture en dialekte, die nuwe demokrasie verwesenlik. Ek het vier keer oudisies afgelê en nie die rol gekry nie. Terwyl ek met die telenovelle Arendsvlei besig was, bel my agent en sê daar’s ’n oudisie vir die rol van Kaashifa Mansour. Ek het gesê ek kan nie nog ’n nee hanteer nie, maar sy’t my oorreed om tog te gaan. Toe hulle my die dag bel en die rol aanbied, was ek by die lughawe om my broer op te laai en ek het amper die dak afgegil! Brümilda wil ook weet: Bekendheid kan soms uitdagend…

Einde 2020 het ons Stella ontmoet. ’n Energieke 21-jarige met blink oë wat kamtig vir die Afrikaanse TV-kanaal kykNET werk. Wie is Deoudoné as sy nie Stella in haar geel-en-blou pakkies speel nie? Gebore en getoë in Pretoria. Ek’s die derde oudste van ses dogters: Rodette, Baudine, Deoudoné, Dehandri, Donique en Jenoté. Ja, my ouers hou van interessante name! Wat is húl name? Net doodgewone Sonja en Willem [lag]. Ses dogters! Klink kompleet soos die Afrikaanse weergawe van Little Women. Wel, van die ses is ek beslis my pa se “seun”. Die rabbedoe. Die een wat altyd die haai, monster of heks moes wees. Ai, ek het tot eendag myself per ongeluk as “Willem se seun” voorgestel . . . dit was by ’n werksgeselligheid van my pa en daar…

Wat as jy nie so produktief was nie? Of ’n verskil gemaak het nie? As jy heeldag in jou pajamas gebly het? Dis ook oukei, sê prof. Retha Bloem, ’n dosent aan die NWU se sentrum vir jeug- en familiestudies. “Mense is nie almal ewe veerkragtig nie. Moet nie jou proses van kophou met ander s’n vergelyk nie. Almal se omstandighede verskil. Ons kyk so vas in helde en sterre dat dit ’n ongesonde maatstaf geword het. Ja, laat dit jou inspireer. Maar moenie dat dit jou definieer nie.” Ons almal se geestesgesondheid het ’n knou gekry, meen die terapeut dr. André Kilian van Soulful Leadership & Living. “Om net kop te gehou het of vir jou gesin te sorg was dalk jou grootste heldedaad.” In jou eie klein wêreld…

Stres en dieet ’n Streng dieet en periodes van uitermatige stres of trauma soos onder meer mediese prosedures of ’n siekte waar jy hoë koors ervaar, is van die algemeenste snellers vir skielike haarverlies. Sodra jou liggaam aangepas het, behoort jou hare se groeifases terug te keer na normaal. Hormoonskommelinge ’n Verandering in hormoonvlakke tydens swangerskap, menopouse of wanneer jy sekere soorte medikasie soos voorbehoedingmiddels staak, kan tot haarverlies lei. Jou hare voel yler en jy let op dat daar meer los hare as gewoonlik op jou kopkussing, haarborsel of in die stort agterbly. Outo-immuunreaksie Soms kan eksterne faktore ’n outoimmuunreaksie ontlok en veroorsaak dat jou liggaam jou haarfollikels begin aanval. Dié tipe haarverlies staan bekend as alopesie areata en die eerste tekens daarvan is muntgrootte kaal kolletjies op jou…

Ons weet die son is een van die grootste sondaars wat jou vel se jeugdigheid steel. Maar al hoe meer kenners meen daaglikse besoedeling speel net so ’n groot rol in velveroudering. Om dié moderne aanslag te takel het die bekende plaaslike velsorghuis Environ vanjaar hul Focus Care Comfort+ -reeks produkte bekend gestel. SARIE gesels met die stigter en wetenskapdirekteur van Environ, plastiese chirurg dr. Des Fernandes, oor hoekom jou vel unieke sorg teen besoedeling benodig. 1. Hoekom fokus op besoedeling? Wanneer ons verwys na besoedeling, praat ons nie net van uitlaatgasse en partikels in die lug nie, maar ook van sigbare lig, ultraviolet- en infrarooi-strale. Daarby ervaar ons nie net besoedeling in die buitelug nie, maar ook binnenshuis in die vorm van bakterieë, fungus, stof en die blou lig…

Spyskaart TROLLIE MET NEUTE: warm geroosterde neute BROODTROLLIE: vyebrood met roosbotter SOPTROLLIE: ertjie-en-hamsop VLEISTROLLIE: lamskerrie met lensie-dhal SOETTROLLIE: appeltert met karamel en roomys My 6 trolliewenke om jou kuier anders te maak 1 Kies kos wat langer warm bly as dit in klein porsies voorgesit word. Sop en bredies is byvoorbeeld goeie keuses vir klein bakkies. 2 Gebruik terselfdertyd jou trollie as dekor vir jou kuier en plaas enkelsteel-blomme of groen blare in mooi vase tussen die bakkies kos. Dink aan jou trollie as ’n tafel wat jy dek, so maak elkeen spesiaal. 3 Plaas eetgerei in glaspotte of mooi bakkies op die trollie. Maak ook seker daar is plek waar gaste gebruikte bakkies en eetgerei kan neersit. 4 Jy kan ook die kos op groot skinkborde bedien of selfs…

In die pienk gastehuis op die plaas Buffelsdrift is ekstra vensters in die en suite-badkamer ingebou vir genoeg natuurlike lig en ’n onbelemmerde uitsig op die olyfboord. Ronde vorms word herhaal in verskillende teksture vir ’n skoon, kalmerende voorkoms. Sien ook bl. 104-109…

Marlize Heppell, kliniese sielkundige van Klerksdorp, antwoord: Jou man is naïef oor die rol van sosiale media. Hoewel hy dink hy maak onskuldige opmerkings, kan dit op lang termyn vir julle almal gevolge inhou. Jy en jul kinders kan op grond van sy opmerkings geëtiketteer word. Probeer om rustig met hom te gesels en te verduidelik sosiale media kan gevaarlik wees. As hy ’n vrye sê het oor netelige kwessies soos ras, kan hy byvoorbeeld by die Menseregtekommissie aangekla word. Hy moet verstaan hy kan nie alles op Facebook sê wat hy voel of dink nie. Almal voel nie dieselfde nie en mense is sensitief oor sekere sake. Hy moet beter oordeel aan die dag probeer lê en sensitiewe kwessies eerder tydens persoonlike gesprekke met sy nabye vriende bespreek. Probeer…

Jy dink dit sal nie met jou gebeur nie. Veral nie as jy self ’n ma is wat as kind gemolesteer is nie. Hoe kon jy die waarskuwingstekens miskyk? Die situasie was egter meer kompleks as wat Santie haar kon voorstel toe hulle in 2017 agterkom dat haar oudste seun reeds twee jaar lank deur ’n huisvriend gemolesteer en verkrag word. “Hierdie seer en verwyte gaan ek vir die res van my lewe moet saamdra. Ek voel soos ’n slegte ma. Ek het misluk as ouer. Onwetend het ons hom aan ’n manipulerende monster blootgestel wat ek met my hele lewe vertrou het. Ek hoop wel dat ons deur ons verhaal ander kan waarsku, en dat hulle sal besef dat so iets jou totaal onverhoeds betrap,” vertel sy. Dit was…

A @home 086 083 4834, home.co.za Accessorize accessorize.com Aldo 010 300 6888, aldoshoes.co.za B Burberry 011 326 7835, 021 425 8933, burberry.com C Call It Spring 010 300 6888, callitspring.co.za Chair Crazy 021 465 9991, chaircrazy.co.za Country Road 0860 022 002, woolworths.co.za D Daniel Wellington danielwellington.com/za Diesel 087 357 2018, diesel.co.za E Eurosuit 011 783 1593, 012 998 0252, 021 555 4008, eurosuit.co.za F Forever New 010 224 0196, 021 555 3713, forevernew.co.za H H&M 086 069 0707, hm.com/za K K.Light 021 552 4370, klight.co.za L Lovisa 011 268 0257, 021 551 1051 Lunar 064 002 1449, lunarlife.myshopify.com M Mango shop.mango.com Masquerade 021 876 3944, masquerade.co.za Mr Price 080 021 2535, mrp.com MRP Home 080 021 2535, mrphome.com O Okha Design & Interiors 021 461 7233, okha.com Old Khaki 086…

Terwyl die coronavirus ons drome van oorsee reis tydelik op die lange baan skuif, neem die gewildheid van virtuele reise via webkamera toe. Jy kan selfs (enige tyd, enige plek) help soek na Nessie, die ontwykende monster van Loch Ness in Skotland. Dié 24-uur- regstreekse uitsending vanaf ’n heuwel in die Skotse Hoogland bied ’n idilliese blik op ’n skaapweiveld (en so af en toe ’n skaap), met die meer op die agtergrond. Gegewe die rustigheid van die water behoort dit nie moeilik te wees om ’n reusagtige seemonster deur die oppervlak te sien breek nie. Selfs al sien jy nooit die geheimsinnige ondier nie, kan dit ’n kalmerende toevoeging tot jou rekenaarskerm wees. Besoek: lochness.co.uk/livecam.html…

“As ’n ma oor haar eie lewe ’n brief aan haar dogter skryf, moet sy dit in die taal van haar hart doen. So eenvoudig soos dit.” Só sê Marita van der Vyver oor ’n Baie lang brief aan my dogter, wat sy in Afrikaans aan haar Franse dogter, Mia, geskryf het. Dié memoires oor haar jeugjare wou sy nie in Engels of Frans, die tale van haar verstand, skryf nie, verduidelik sy. Dis ’n outydse brief uit haar hart en daarvoor moes sy haar moedertaal inspan. Toe sy boonop begin skryf, het sy besef die mededelings is nie net vir haar dogter bedoel nie; dis ook vir die mense van haar geboorteland, almal wat Afrikaans magtig is. Marita se “briefskrywery” kom al ’n lang pad. Sy het immers haar…

“Ek was ’n moeilike kind,” sê my vriendin. Ek kyk na haar en ek lag, want ek kan my goed indink dat dié vrou met haar sterk persoonlikheid en sensitiewe geaardheid as kind moeilik was. Ons sit by ’n koffiewinkel se tuintafel onder ’n appelkoosboom. Die boom is geil gelaai met appelkose wat besig is om ryp te word. Die uitgeswelde vrugte se kleure is groen en liggeel en volgeel. Sommige gloei soos oranje vuurtjies tussen die donker blare. Daar is ook ’n paar wat vrotgeel is, een het pas op die tafel tussen ons geval en ’n lekker goor blerts gemaak, oor ons koffiebekers, oor ons. Vervaard gryp ons na servette en probeer die spatsels afvee. My ouma het ook só ’n boom gehad, sê my vriendin. Dis hoekom…