Indholdsfortegnelse for January - February 2022 i SARIE

Ek’s ’n vrou vir ’n plan, wel ’n plan van ’n soort. Want jy kan ook maklik dinge voos beplan en die lekker uit die lewe haal. Maar hier’s die ding, goeie beplanning orden tog jou gedagtes en wys hoe jy van A-Z moet kom. Soos dit tans in die wêreld gaan, klink dit ál meer na ’n blink gedagte, want nie een van ons kan nóg ’n Covid-jaar so half in afwagting, so half hoopvol, so half besluiteloos ingaan nie. In 2022 moet ons ’n plan hê! Wel, soort van. In my lange loopbaan in die media het ek al iets van als gesien. Mense wat vas en los met planne werk. Daar’s dié met gróót en belangrike planne. Hulle beïndruk met jaarplanne en vyfjaarplanne. Sukses, sê hulle, is…

Selfs finansiële ghoeroes moes leer en probeer . . . Edwin Theron, uitvoerende hoof van Sanlam Indie, verklap watter lesse hy wens hy al in sy vroeë 20’s geleer het: 1. Lewe binne jou vermoë. Gee net uit wat jy kan bekostig. 2. Betaal die skuld waarop jy die hoogste rente betaal eerste af, so gou jy kan. 3. Stel elke maand vir jouself ’n nie-onderhandelbare spaardoelwit. 4. Oorweeg lewensversekering as jy afhanklikes (ouers/grootouers/ kinders) én skuld het. 5. Wéét waarheen jou geld elke maand gaan. Lys alle uitgawes.…

Watter Disney- of Pixar-fliek kan jy oor en oor kyk? Patricia Theart Lion King (1994) Charlene Louw Thomas The Little Mermaid (1989), ek love die krap Daantjie Badenhorst Up (2009) en Cars (2006) Estelle Bester Viljoen Beauty and the Beast (1990) Louisemarié Combrink Bambi (1942) Jou vliegtuigkaartjie en verblyf is reeds betaal, al wat jy moet doen is om die bestemming te kies. Watter land sal jy graag wil verken? Avril Ford Italië, dis ’n lewenslange droom Riet van der Westhuizen Switserland Nelia Henning Duitsland, veral die Swartwoud Deirdre Fourie Nieu-Seeland! Ek mis my kinders so baie Rienie Viljoen Wel, ek wil toer! Amsterdam [Nederland], Antwerpen [België] en enige plek in Frankryk…

‘My pa was nog altyd ’n inspirasie. Hy het ons geleer hoe om krities te dink en avontuurlik te wees. Ek is elke dag dankbaar dat ek iemand het waarop ek 24/7 kan staatmaak.’ LAZELLE CROUCAMP, DOGTER ‘My pa was die brug tussen my naïwiteit oor die wêreld buite en my wilskrag om die lewe uit te daag. Hy is meer as ’n pa, hy is my steunkrag.’ SCHALK CROUCAMP, SEUN ‘Ek en Piet het in 1994 in Windhoek ontmoet. Ons was in dieselfde denkkraal: kwaad vir PW, apartheidabsurditeite en die Bosoorlog. “Andersdenkende” was ’n kompliment. Ons het saam geboer en saam getoer . . . in die VSA ’n pienk Ford gekoop en op die maat van die Traveling Wilburys van San Francisco na New York gery en dit…

Sy eie pad was nie maklik nie. Daarom glo radio-omroeper, TV-aanbieder en oud-rugbyspeler Ricky Schroeder hy het ’n verantwoordelikheid om hoop te bring – hy staan dan nog. Al kon hy nie sy Springbok-droom bewaarheid nie, is hy trots daarop dat hy ’n Junior Boktrui oor sy kop kon trek. “In die nuwe seisoen van my lewe wil ek ’n Springbok-mens wees. Dit beteken dat jy die beste speler in jóú posisie is. Ek wil ’n Springbok-pa wees, ’n Springbok-man vir my vrou, ’n Springbok-seun vir my pa, ’n Springbokbroer vir my broer. Ek wil altyd gehalte soos op Springbok-vlak lewer.” Ricky se onlangse rol as aanbieder van die kykNET-reeks Dankie, Lottoland was ’n hoogtepunt. En nou die insetsels wat hy vir kykNET&kie se geselsprogram Tussen ons doen. Sy rugbyloopbaan…

Die skoenlapper-ertjieblom (Clitoria ternatea) is ’n magiese blom van Suidoos-Asië waarvan die wonderlikste blou tee gemaak word. Dit word al eeue lank as ’n natuurlike kleurmiddel gebruik. Ons kombineer dit hier met dalgona-koffie om ’n skoenlapper-ertjieblom-latte te maak hand vol ys ¾ k melk van jou keuse 1 t skoenlapper-ertjieblom-poeiertee (blou matcha) 2 t kitskoffie 2 e suiker 2 e warm water eetbare blomme van jou keuse Gooi ys in ’n glas en voeg melk by. Voeg skoenlapperertjieblom-poeiertee by en roer tot ’n pers skakering vorm. Jy kan ekstra poeier byvoeg vir ’n donkerder kleur. Klits koffie, suiker en warm water saam tot dit romerige punte vorm. Skep dan 2 e van die koffiemengsel bo-op die melkmengsel en rond jou drankie af met eetbare blomme. Siedaar, ’n drankie so uit…

Met daardie breë glimlag was sy ’n wenner. Nou het Yolani Abrahams, SARIE Voorbladgesig 2017 (’n titel wat sy met Nadia de Wet gedeel het), ook Anwar Abdullatief se hart gewen. Hulle is in Oktober 2021 by Langkloof Roses buite Wellington getroud. En daar was twee trourokke: een van SarahC vir die Moslem-diens, en dié Enzoani-skepping van Brides of Somerset vir die Westerse seremonie. Yolani het op die venue verlief geraak toe die SABC2-kosprogram Spyskaart daar geskiet is. Sy is ’n mede-aanbieder. “Daar was ’n troue, soos iets uit ’n sprokiesverhaal, en dit het my laat dink aan Nice, Frankryk.” Sy en Anwar, ook ’n sjef, is naweke op Tulbagh, waar sy die restaurant Kole en Deeg het. In Desember was sy ook in een van twee spanne vir Via…

SOETE gemmer As jy lief is vir ’n parfuum met speserynote, is Twilly d’Hermès Eau Ginger (R2 500 vir 85 ml EDP) die somergeur vir jou. Die parfuum spog met net drie note: vars pinksterroos, soet versuikerde gemmer en warm sederhout. Saam skep dit ’n geur wat sonskyn, energie en jeugdigheid uitstraal. SLIM SONSKERMS 1. iS Clinical PerfecTint Powder SPF 40 (R1 584) is ’n sonskerm in poeiervorm, wat dit perfek maak vir deur die dag opknap. By uitsoek- estetiese salonne en -spa’s 2. Die formule van SVR Clairial Day Anti-Brown Spot Unifying Corrector SPF 30 (R690) is ontwikkel om aan te pas by jou velkleur sodra jy dit aanwend. By uitsoeksalonne en Takealot 3. ’n Alles-in-eensonskerm wat jou beskerm teen UV- en infrarooistrale, blou lig en besoedeling. Dis boonop…

SOOS heuning OM DIE MOND Hierdie veldblomheuning van Chaloner is 100% Suid-Afrikaans en heerlik saam met hawermoutpap, roosterbrood, pannekoek of jogurt en vrugte. Dit kan selfs as ’n antiseptiese salf gebruik word. R129 vir ’n 300 g-pot by Yuppiechef BEGIN JOU DAG OP ’N hoë noot Geniet ontbyt op sy lekkerste met Wazoogles se hawermoutpap vol plantgebaseerde superkosproteïene. Voeg net warm of koue water of neutmelk by. Ons hou veral van die sjokoladesplinterkoekiedeeg-geur. Vanaf R39 by wazoogles.com of gesondheidswinkels soos Faithful to Nature TYD VIR OOND SKOONMAAK Vergeet van al die onaangename dampe en skrop om van hardnekkige vlekke, vet en aangebrande kos in die oond ontslae te raak met die nuwe Oven Cleaner Active Gel van Dr. Beckmann. R89 by uitsoektakke van Pick n Pay, Checkers en Spar MARZANNE HOU…

Sy het al geleer om gemaklik met verwerping te wees. “Ek glo die rolle wat vir my bestem is, sal my vind,” sê aktrise, skrywer en regisseur Bianca Flanders. Uitdagings het haar juis gewys waartoe sy in staat is. Soos haar droom van twee kinderboeke, Prinses Pampoenpit en Pampoenpit se groen gevoel, wat bewaarheid is. “Ek skryf die verhale wat nie in my kinderjare beskikbaar was nie. As kunstenaar wil ek aktief betrokke wees om die wêreld te skep waarin ek graag wil leef, en Pampoenpit vorm deel daarvan.” Albei boeke is in Afrikaans sowel as Engels beskikbaar. “Ek probeer om gemaklik met ongemak te raak. Dis hoe ons groei. Afrikaans is my tweede taal. Ek is nie altyd gemaklik om daarin te werk nie, maar hoe meer ek dit…

“Ek kan net niks ruik nie. Die enigste manier waarop ek dit kan beskryf, is dat alles dieselfde, eentonige reuk het. Soos swael. Of ek nou verby ’n oop drein loop, of spek braai – die lekkerste reuk wat daar is – alles ruik dieselfde . . .” Anita George-Kuhn van Johannesburg is deur Covid-19 platgetrek en was baie siek. Dis sowat ses maande later en sy is steeds moeg, haar bors voel toegetrek . . . en haar reuksintuig is omgesukkel. Vreemd genoeg – en gelukkig – smaak kos nog soos voorheen. “Spek smaak soos spek. Dankie tog, want ek is lief vir kook. En die enigste manier waarop ek seker kan maak die kos is oukei, is deur daaraan te proe. Ek kan dit mos nie ruik nie!”…

PURE SONSKYN In 2017 het ’n 24-jarige patisseriesjef van die Wes-Kaap SARIE Voorbladgesig gewen. Pure sonskyn, het ons toe oor Yolani Abrahams gesê. Sy het reeds haar eie opskietbakkery op Ceres (deesdae Tulbagh) besit, en verklaar sy glo besluite bepaal jou toekoms. Sedertdien het Yolani ’n bekende gesig en aanbieder op TV geword, en is onlangs getroud met die Kaapse sjef Anwar Abdullatief. In twee rokke, om albei se geloof te vier, sê Yolani. Die een rok so mooi soos die ander. Sien ook bl. 53 Anwar is s uitvoerende sjef van die Siba-restaurant, Table Bay Hotel, V&A Waterfront, asook uitvoerende sjef van die produksiekombuis The Happy Uncles. PÊRELS SO NÓÚ Luuks, elegant, alte Coco Chanel en aktrise Audrey Hepburn. In 2022 is pêrels ook modern en pret, perfek…

Van skilderye en beeldhouwerk tot kralewerk, muurkuns en fotografie . . . Die werk van 40 uiteenlopende kunstenaars van reg oor Afrika, almal jonger as 40, is by die unieke 40 under 40-uitstalling op die historiese Twee Jonge Gezellen-landgoed buite Tulbagh te sien. Meeste van die werke is tydens die pandemie geskep. Die uitstalling begin by die Krone x WhatIfTheWorldgalery. Sestig werke is op sewe plekke oor die landgoed versprei. Dit duur tot einde Februarie. Vir meer: whatiftheworld.com/krone…

Wat is ’n kunstefees? Stalletjies by die honderde? Toneelopvoerings? Koue bier? Kos? Duisende mense? Ja, maar alles is niks sonder daardie een kunstenaar wat die duisende deur die hekke kon kry nie, daardie een wat mense koue Karoo-aande onder kombersies laat sit het vir daai laaste song nie, daardie een kunstenaar wat mense dubbeld laat betaal het vir koffie sonder dat hulle kla, daardie een kunstenaar wat duisende mense op hul voete kon kry ná ’n aand se afwagting, en dit jaar ná jaar reggekry het. Daardie een kunstenaar wat ouma en oupa al vroeg laat kom het vir ’n lekker plekkie, die tieners en studente al die jare voor teen die veiligheidsrelings kon hou, en teen die einde van die aand al daardie mense, oud en jonk, op hul…

So ’n paar jaar gelede het ’n gene-toets getoon dat aktrise Christel van den Bergh die sogenaamde “happy gene” het – haar liggaam vervaardig van nature serotonien. Min het sy geweet hoe nodig sy al daardie natuurlike serotonien sou kry, want die afgelope twee jaar was vir die aktrise ’n onvoorspelbare, moeilike tyd – met baie donker dae tussen die goeie dinge. Sy is onder meer deur ’n moeilike egskeiding, sy het onbepland swanger geraak, en haar kontrak by die gewilde kykNET-sepie Getroud met rugby is uit die bloute beëindig. Renate, die eksvrou van die Stryders-speler Simon Greeff, wat kykers die afgelope vyf en ’n half jaar geboei het met al die drama in haar lewe – onvrugbaarheid, aborsie, surrogaatskap, postnatale depressie, egskeiding . . . se laaste tonele is…

Toe Cyril Ramaphosa in Februarie 2018 die demokratiese Suid-Afrika se vyfde president word, moes ons as joernaliste behoorlik bontstaan om soveel as moontlik oor hom te probeer uitvind. Van die feite was welbekend – ons het immers geweet hy was destyds ’n vakbondleier, gesoute politieke onderhandelaar, later ’n skatryk sakeman en, in sy vrye tyd, ’n beesboer. Maar één onderwerp het ons bly ontglip: Die nuwe presidentsvrou. Tshepo Motsepe, Ramaphosa se eggenoot, is immers baie privaat. Sy maak selde openbare verskynings, en staan selfs nog minder media-onderhoude toe. Dit was kennelik nie net ons verslaggewers nie, maar ook gewone Suid-Afrikaners wat gebrand het om meer te weet van die kamerasku Motsepe: Ter viering van Google Trends se vyftiende bestaansjaar in 2021 het die soekenjin ’n lys van frases wat Suid-Afrikaners…

Hemels! En jy is nie alleen as jy so dink nie. Sjokolade se botaniese naam, Theobroma cacao, beteken “kos van die gode” in antieke Grieks. Kakaobone, sjokolade se basiese bestanddeel, is deur die Majas gerooster, fyngemaal en met water gedrink. Dis tweeduisend jaar later en baie het intussen verander – maar sjokolade is steeds tops. Die wêreld is aan’t herstel van die coronavirus en gooi stadig maar seker weer sy deure oop. Een van die tekens dat dinge terugkeer na normaal, is dat die vraag na sjokolade toeneem. Sjokolade was ’n slagoffer van die reisverbod: ’n Beduidende deel van verkope is afhanklik van die reisbedryf en impulsiewe kopies by lughawens se belastingvrye winkels, luidens Bloomberg.com. Het jy dít geweet? Sjokolade van goeie gehalte (70% of meer kakao) bevat min kafeïen.…

KORT EN KRAGTIG. Nie ’n lang preek nie. Laat blyk net die aanmerking of optrede is nie oukei nie. ’n Studie wat reaksies op homofobiese aanmerkings in die werkplek ondersoek het, het bevind die doeltreffendste soort konfrontasie is kalm maar direk: “Haai, dis nie cool nie.” ’n Soortgelyke benadering kan vir byna enige onaanvaarbare gedrag gebruik word. TREK DIE ANDER OU SE SKOENE AAN Probeer die wêreld vanuit iemand anders se perspektief sien, dan is dit makliker om te praat en die gevolge te dra. Sommige mense is van nature meer empaties, maar ons kan almal meer empatie kweek. Per slot van sake, as jy geboelie of seksueel aangerand word, sal jy nie wil hê iemand moet vir jou opstaan nie? IS DIT ’N GRAPPIE? Maak of jy dink ’n…

1 BYKOMSTIGHEDE Die regte bykomstighede kan jou uitrusting in ’n oogwink verander. Fokus veral op dié items: HORLOSIES Dis ’n klassieke item, maar deesdae speel dit ’n groot rol om ’n uitrusting af te rond. Wees op die uitkyk vir interessante vorms, kleure en style. ONTHOU: Jy hoef nie altyd ’n nuwe horlosie aan te skaf nie, soms is net ’n nuwe bandjie die antwoord. OORBELLE Dit gaan nie meer oor die grootste nie, maar eerder om dit interessant te stileer. Asimmetries is nou gewild: byvoorbeeld ’n knoppie-oorbel (stud) in die een gaatjie en ’n hangoorbel in die ander. Maar as jy dit klassiek wil hou, is ’n hoepeloorbel (klein of groot) altyd ’n staatmaker. HALSSNOERE Dra verskillende lengtes halssnoere saam om jou uitrusting op te kikker. BELDE Breë belde…

My roetine is eenvoudig: reiniger, oogserum en dan vogroom. Sonskyn of reën, ek sit sonroom aan. My gunstelingproduk is DermExcel Dermatint* – ’n ligte onderlaag gemeng met sonroom wat my vel steeds laat asemhaal en my sproete wys. * R650 by dermalhealth.store Haar skoonheidsmantra‘Dit kom van binne! Eet gesond, leef gesond en dan sal jou vel dit reflekteer’ Lees die volledige artikel op SARIE.com…

IN VOLLE BLOM Vergeet van die muurblommetjie wees, daar is ’n heerlike verskeidenheid blompatrone om uit te kies, en jy kan dit met gemak van kop tot toon dra. Fokus op een tipe blompatroon in ’n uitrusting. PLOOI-PLEIDOOI In 2022 wil almal plooie hê. Ook die gewilde, gemaklike wyepypbroek kry ’n nuwe aanslag met plooie. WENK Serpe gee sprankel aan ’n uitrusting, veral een in jou hare. Kyk op bl. 62 vir meer oor serpe TUSSEN DIE LYNE Coco Chanel het dit aan die wêreld bekend gestel en die klassieke streep is steeds een van jou beste vriendinne. Dra dit saam met ander teksture soos fraiings vir ’n vars aanslag. LUUKS IN LEER Leer gee altyd ’n luukse gevoel aan ’n uitrusting. Hoewel ’n leerbaadjie ’n klassieke moet-hê is, is…

1 HITTEBESKERMINGSPRODUK Net soos wat jy nie strand toe sal gaan sonder sonskerm nie, behoort jy nooit hitte op jou hare te gebruik sonder om vooraf eers ’n hittebeskermingsproduk aan te wend nie. Of dit ’n haardroër, haaryster of krultang is, hitte sonder beskerming beskadig jou hare en laat dit vaal en bros lyk, sê Karen Botha, plaaslike bemarkingsbestuurder van die haarsorgreeks INOAR. Dit laat jou haarkleur ook vinniger vervaag. Spuit ’n hittebeskermingsproduk op elke deel van jou hare aan en werk dit deur van wortel tot punt. 2 AANBLY-OPKNAPPER “Dit bly een van my gunsteling-haarprodukte en werk vir enige haartipe,” sê Anel Cloete, haarstileerder en eienaar van die C Connoisseurs Studio-haarsalon in Johannesburg. Ryker as ’n gewone opknapper, maar ligter as ’n masker. ’n Aanbly-opknapper (leave-in conditioner) lewer ekstra…

GROOTOOG ’n Leesbril is lankal nie meer net vir lees nie. Dit dien ook as beskerming vir jou oë noudat ons so baie tyd voor ons rekenaarskerms deurbring en gedurig na ons selfoon kyk. ’n Brilraam met ’n skilpaddopmotief is klassiek en pas veral goed by ligbruin hare. Reghoekige skilpaddopmotief-bril (R2 180), Armani Optical by Luxottica KIES DIE REGTE BRIL VOLGENS JOU oogkleur HASELNEUTBRUIN OË Dis ’n kombinasie van bruin, goue en groen oë, ’n taamlik skaars oogkleur wat verander saam met die lig en die klere wat jy dra. Dié verkleurmannetjieoogkleur is tegelyk “warm” en “koud”, wat dit makliker maak om ’n vleiende raamkleur te kry. Aardse kleure, soos taan, karamel, bruin en groen, is altyd ’n wenner. So ook goud, pienk en bessiekleure. BRUIN Die klassieke swart raam…

’n Vars en betowerende mansgeur wat die dieptes en misterie van die oseaan vasvang. Giorgio Armani Acqua di Giò Profondo Lights (R1 950 vir 75 ml EDP) is ’n herinterpretasie van die oorspronklike geur en spog met groen mandaryn, kardemom, laventel en patsjoelie om die kenmerkende seenote te komplementeer. Die laventel word eksklusief vir dié Italiaanse modehuis in Provence, Frankryk, geoes. Beskikbaar vir ’n beperkte tyd by Foschini Dit gons weer oor Gucci: Nie net het die luuksemodehuis in 2021 hul 100ste bestaansjaar gevier nie, maar die langverwagte fliek House of Gucci met Lady Gaga in die vroulike hoofrol is ook op 24 November uitgereik. En steeds sorg Gucci vir kuns op die modeplanke. Sedert Alessandro Michele in 2015 die kreatiewe direkteur geword het, blaas hy nuwe lewe in ikoniese…

Toe Illze as ’n pasgetroude op die plaas aangekom het, was daar reeds ’n nuwe vleuel aangebou om die huis ’n klassieke T-vorm te gee. Sy was verlief op die ruimte en die pragtige ou trap, maar die vloei van die vertrekke het nie gewerk nie. Om die twee vleuels te integreer het hulle die kombuis en die eet- en leefarea oopgebreek om een ruim vertrek te skep. Die reuse-kombuis en die eetkamer is nou die spil waarom die huis draai. Illze het ’n wonderlike talent om kosbare antieke meubels met kontemporêre stukke te vermeng. Om warmte en tekstuur te skep het sy natuurlike elemente soos grasmatte, koeivelle, leer en linne ingebring. Die lyne van die 180-jarige huis (soos die hemelhoë plafonne, antieke balke en vloere van breë planke) is…

Ek moes eers rou oor my werk Annette Botha , meteoroloog “Vanaand groet ek julle met ’n swaar hart, maar ná elke sonsak wag ’n mooier sonsopkoms. Mag dit reën waar jou bokke wei. In onweer of mooiweer, die Here bly in beheer . . .” eNuus-kykers is verlede jaar onkant betrap toe weeraanbieder en meteoroloog Annette Botha die aand se uitsending met dié woorde afsluit. Sy was nog self die aand geskok nadat sy en twee kollegas die vorige dag uit die bloute ingelig is dat hul kontrak met eNuus en eNCA summier gekanselleer is. Deesdae is Annette die meteoroloog en aanbieder van die splinternuwe aanlyn weerdiens Vox Weather, maar sy moes eers ’n pad stap voordat sy kon sê: Ek is oukei. “Ek het altyd gesê ek…

Hoe hanteer ek dit as my beste vriendin gekant is teen inenting? Christi Gadd, kliniese sielkundige van Pretoria: Die motiveringspreker Stephen Covey sê probeer eers die ander persoon se standpunt insien voordat jy jou eie probeer verduidelik. Jou vriendin vrees inenting. Probeer dit verstaan. Deel dan jóú vrese en gevoel van weerloosheid op ’n empatiese manier en verduidelik hoe dit jou oortuig het om ingeënt te word. Moenie haar probeer oortuig om van standpunt te verander nie. Om haar aan te val kan julle uitmekaardryf. Sê eerder vir haar jy is bekommerd oor jul albei se gesondheid wanneer julle in mekaar se geselskap is. Besin dan sáám oor ’n moontlike oplossing. Julle het immers nie beheer oor mekaar se lewenskeuses nie, wel oor waar en wanneer julle tyd saam kan…

ANOSMIE is ’n algehele verlies aan reuk. HIPOSMIE is ’n vermindering van die reuksin. PAROSMIE is wanneer normale reuke verwring word, gewoonlik in iets onaangenaams. Met FANTOSMIE ruik jy reuke wat nie daar is nie. PROE is wat die reseptore op die tong optel as sout, soet, suur, bitter en umami. SMAAK/GEUR is die totale sensoriese ervaring van kos. Al die sintuie is betrokke, maar reuk se bydrae is die belangrikste. Selfs al kan jy dus proe (tong), gaan reukverlies ernstig beïnvloed hoe kos smaak.…

Wat het jou die diepste geraak? Die Boesmanland met sy wrede prentjies van karkasse en die boer wat moet toekyk. ’n Boer en sy vrou wat ’n katplaag beleef en skaars vir hul diere kan sorg. By Calvinia het ek wedlope gesien tussen skape wat agter voer aanhardloop, asook ’n vroueboer wat saam met haar twee werkers alles probeer om nie by die voerkrippe omgestamp te word nie. By die Nqwebadam naby Graaff-Reinet het die toneel van duisende gevrekte visse op die dam se bodem my diep geraak. Ek glo elke stedeling móés al by voerskenking betrokke geraak het. Wat staan vir jou uit? Die tema van die boek is eintlik “Hoop ten spyte van die droogte”. Al was sommige gemeenskappe sonder water, het hulle telkens iets laat val wat…

In Wilna Adriaanse se nuwe roman, Vlug (Tafelberg, R320), wonder die hoofkarakter, Milla Roux, “hoe dit moontlik is om vreemdes so lief te kry asof julle bloed van mekaar is”. Dié veearts smee onwillekeurig bande met die mense by die rehabilitasiesentrum vir sjimpansees in die Demokratiese Republiek van die Kongo. Vyf jaar tevore het sy ’n traumatiese ervaring in Suid-Afrika beleef, en die pad gevat. Noordwaarts, sonder ’n plan. Sy wou net wegkom van haar hartseer. By die rehabilitasiesentrum is sy onvoorwaardelik aanvaar. Sonder dat sy wou, het sy emosioneel betrokke geraak by die sjimpansees en probeer nou deur haar werk ’n verskil maak aan die lot van dié bedreigde diere. Die onstuimige politieke klimaat bemoeilik egter die taak. Toe die sentrum in die kruisvuur van regeringstroepe en rebelle-organisasies beland,…

5 gelukkige SARIElesers kan elk die boek Vlam deur Sidney Gilroy (Human & Rousseau, R290) wen. Speursersant Mthembu se huwelik lê aan skerwe. Nyandi het die kinders gevat en is weg Lesotho toe. Terwyl Parkwegstasie se voorste speurder in ’n gastehuis wakker lê en tob oor sy aandeel, brand die Xanadu-galery, tuiste van die wêreldberoemde SA kunstenaar Aretha Hattingh, tot op die grond af. Haar oeuvre, ’n hoop as. En in die middel van die ruïne: die oorskot van ’n vrou, vermoedelik dié van Aretha. Was dit moord? Selfdood? Of bloot ’n fratsongeluk? Nog 5 SARIE-lesers kan elk Marinda se kinderkombuis deur Marinda Engelbrecht (Human & Rousseau, R260) wen. Benewens resepte in dié kleurryke kookboek, is daar ’n skatkis van wenke oor kookterapie en die voordele daarvan vir kinders, asook…

GEMAAK OM TE SKEP Ek het ’n vriendin, ver in die dorre, harde Karoo. Met haar kunstenaarshande skilder sy die mooiste, mooiste goed. Maar haar hele wêreld word stil, gestroop van kleur. Die skilderdoek word ingesluk deur stof, voerrekeninge, geen reën – droogte. Haar vingers ken die pad, opgesluit in kwas en kleur, maar die kombuis word haar nuwe ateljee. Want sy’s gemaak om te skep en met ’n onstuitbare gees neem die kuns sy vorm aan tussen oond en bak en pan. Vleis en deeg word haar nuwe meesterstuk. Met passie en deegkuns maak haar nuwe “skilderye” menige huisvrou se hart so bly. Ure word dae, dae word weke, die aanvraag ál groter, haar wange ál bleker. Die reuke uit die kombuis is lieflik, die ure agter haar voorskoot…

So groot en genesend as wat elke Kersfees vir baie mense is, so bly ’n nuwe jaar vir menige die blote gevolg van berekeninge, sterrekunde, seisoene en die behoefte aan ’n kalender. Vir die meerderheid van planeetbewoners is dit ’n terugkeer na ’n werkplek, ’n posisie en ’n roetine. Vir ander, dié wat vryskut moet oorleef en afhanklik is van publieke smaak, is dit (wel, tot onlangs) ’n energieke en benoude wegspring. Wat gaan ek doen wat oorspronklik is? Hoe gaan ek aandag trek? Sal my nuwe projek die voriges oortref? Is hierdie een uiteindelik mý jaar? Maar nou, hier in die huidige werklikheid, lê die nuwe jaar uitgestrek soos ’n lang, taai en ongenadige vraagteken. Gaan ons alles bly beplan net om elke paar maande in ’n nuwe krisis…

Sy ongewone voorkoms tref jou volskoot. Imposant vanaf die visplakkies en ingeleefde jeans en T-hemp aan sy lang lyf, tot by die astrante kopdoekkroon op 1,91 m. Ondertoe is sagter gelaatstrekke: grys spikkelbaard en groen oë wat stip vonkel oor sy brilletjie, halfmas op die neus. Sy sopraanstem en suiwer woordkuns rond hom bekoorlik af . . . Gesels hy eers begeesterd, wis jy gou Piet Croucamp is ’n stervangs uit die genepoel van interessantwees. Een wat hom nie maklik laat inkatrol nie. Die aweregse, en selfs sku, strepe is deurentyd daar, maar sy skerp verstaan van die lewenskuns en die kreatiewe inkleur daarvan hou hom vars. As politieke ontleder en TVaanbieder is Piet (59) een van ons bekendste en mees omstrede openbare gesigte. Wat genoeg mense die harnas injaag…

Hulle werk in die sektor vroeëkinderontwikkeling om vroue in informele nedersettings te help om geakkrediteerde kleuterskole en speelgroepies te stig – met ’n sukseskoers van 98%. “Ek het destyds besef daar’s soveel onwettige private kleuterskole,” verduidelik Motsepe. “Ons help nou hierdie vroue dat hulle aan die vereistes voldoen om te kan registreer. Wanneer hulle die nodige kursusse voltooi – hulle leer hoe om goed na jong kinders om te sien – kry hulle ook finansiering by die departement van maatskaplike werk.” Die stigting se harde werk het verskeie voordele: Nie net bemagtig dit dié vroue om sake-eienaars te word nie, dit skep ook ’n beter omgewing vir die peuters en kleuters wat die skole bywoon. “Die eerste jare van ’n kind se lewe is die belangrikste wat opvoeding betref,” sê…

Stel jou grense om jouself te beskerm, sê prof. Renata Schoeman. Watter gedrag is nie vir my aanvaarbaar nie? Dat jy my rondstamp, my vloek, in die eksamen gekul het? “As jy nie grense trek nie, stel jy jouself bloot aan emosionele of fisieke mishandeling. Grense gee jou ook selfrespek.” Dis gekoppel aan jou kernwaardes, soos deernis, integriteit, toegewydheid, lojaliteit en eerlikheid en verskil van mens tot mens. Jou waardes is ’n grens en as iemand dit oorsteek, kan jy daaroor praat, of iets daaraan doen. Doen jy dit nie, kan dit innerlike konflik veroorsaak en jou angstig, later selfs depressief maak. Waaroor mense praat, gaan dus verskil, na gelang van hul waardes. Jy kan dit na die werkplek toe deurtrek. As toegewydheid een van jou kernwaardes is, is dit…

In sy sesde kookboek wys SARIE-kosredakteur Herman Lensing weer waarom nostalgie die beste geurmiddel is. Huiskos (Penguin Random House, R390) is nou te koop en Liani Jansen van Rensburg het vir hom drie vrae gevra Wat is die een happie waarvoor jy nie nee kan sê nie? ’n Kaas-en-tamatietoebroodjie, vir so ’n paar draaie in die mikrogolfoond gesit. Dit moet witbrood wees. Jy kan enige drie bekendes nooi vir ete. Wie sal dit wees en watter Huiskos-geregte sal op die tafel wees? Cher! En Barack Obama, asook Camilla, hertogin van Cornwall. Op die spyskaart sal wees komkommer-stolslaai, die Koningin se Hoender en melktert. Cher is vir my soos ’n stolslaai – ferm en mooi, maar dit mag dalk net-net smelt! My ma [Susan] was mal oor die royals, ek is…

REECE CHLOÉ LEWIS EZRA RADEMEYER IN ARENDSVLEI Jy is ook ’n TikTok-ster met meer as 460 000 volgelinge. Hoe hou jy die balans tussen eg en net jouself wees en om jou privaatheid te beskerm? Deur te hou by my eie planne, beginsels en passies. En die wete dat nie elke comment met ’n antwoord ge-entertain hoef te word nie. Ek onthou altyd hoekom ek dansvideo’s maak, dis vir inspirasie en nie vir die likes nie. Ek probeer hou by my lys van prioriteite en somtyds behels dit ’n breek van sosialemedia-video’s . . . ’n mens benodig ook ’n bietjie ek-tyd. Jou grootste wenk vir iemand wat die TikTok-wêreld wil betree? Moenie so deur die sosiale media ingesluk word dat jy jou eie doelwitte, passies en nederigheid…

Wenk Kikker jou rok op met ’n groot serp om jou middel. Moenie bang wees om patrone te meng nie Wenk ’n Serp is ’n veelsydige bykomstigheid. Jy kan dit om jou nek, kop, arm, poniestert, handsak en ook om jou middel bind…

1 HOE WERK DIT? Tydens ’n laserhaarverwyderingsbehandeling stel ’n lasertoestel ’n ligstraal vry wat deur die melanien (kleurpigment) van die haarwortel geabsorbeer word. Dié lig-energie word omgesit in hitte-energie wat die haarwortel binnedring en gevolglik ook die haarfollikel beskadig om toekomstige haargroei te belemmer. 2 WERK DIT VIR ALLE HAARKLEURE? Donkerder hare bevat meer pigment, wat beteken die laserstraal word makliker na dié hare aangetrek. “Daarom werk laser veral goed vir die onderarms, bikinilyn en mans se gesighare, aangesien hierdie hare gewoonlik donkerder is en ’n growwer tekstuur het,” sê Tzvia Hermann, stigter en mede-eienaar van die estetiese kliniekgroep The Laser Beautique. 3 IS DIT SEER? Vanweë die hitte-energie wat gegenereer word, was die prosedure in die verlede dikwels pynlik. Maar danksy nuwe tegnologie kan die lasertoestel…

’n Leesbril is nie net vir lees nie, maar nuwe tegnologie bied ook beskerming vir jou oë teen die blou lig van toestelle soos selfone, tablette en rekenaars. “Dié hoë-energie-strale kan die binneste laag van die oog binnedring, daarom beveel ons lense aan wat blou lig blokkeer,” sê Adèle Camarena, optometris en direkteur van Spectacle World in Kaapstad. Laat toets jou oë gereeld, sodat oogprobleme betyds geïdentifiseer en behandel kan word, is haar raad. BRONNE: SARIE.com, coastal.com, classicspecs.com…

Skop VIR JOU SPYSVERTERING Kosse hoog in vesel sorg vir meer as net goeie spysvertering. Dit kan jou risiko vir hartsiekte, beroerte en diabetes help verminder, selfs help dat jy gewig afskud en dalk kolonkanker help voorkom. Vesel kom in alle plante voor, wat vrugte, groente, sade en peule insluit. Maar nie alle vesel is dieselfde nie: Die funksies en werking in jou lyf verskil. Sommige vesel los op in jou lyf (wateroplosbaar), soos dié in hawermout. Onoplosbare vesel (bv. die buitenste deel van ’n koringkorrel) gaan onveranderd deur jou dermkanaal en help dus om hardlywigheid te voorkom. Die kategorisering van vesel is gekompliseerd en nie alle vesel is óf oplosbaar óf onoplosbaar nie. Wat belangrik is, is dat jy baie en ’n verskeidenheid daarvan inkry. – Lydia van der…

A @home 086 083 4834, home.co.za Aldo 010 300 6888, aldoshoes.co.za B Birkenstock 021 461 7426, bashafrica.com Block & Chisel 011 442 0809, 010 593 9308, 021 712 5193, blockandchisel.co.za Bril 064 209 5261, hellobril.co.za C Coricraft coricraft.co.za Country Road 086 002 2002, woolworths.co.za E Eurolux 021 528 8400, eurolux.co.za H H&M 086 069 0707, hm.com/za J Judith Atelier 082 450 4217, judithatelier.co.za K KLûK CGDT 083 377 7780, klukcgdt.com L Love Shouts loveshouts.co.za Lovisa 011 268 0257, 021 551 1051 M Mango shop.mango/za Mantua 083 390 7450, mantua.co.za MMXMS 082 400 6542, mmxms.co.za Mr Price 080 021 2535, mrp.com N Nicci Boutique 011 783 7661, 021 425 0051, nicci.co.za Ninaskep instagram.com/ninaskep O Old Khaki 086 044 4429, oldkhaki.co.za P Phelan Footwear 021 852 4516, phelan.co.za Poetry 086 055 5529,…

Rene Naylor het al drie Rugbywêreldbekertoernooie agter die blad as die Springbokke se fisioterapeut, sy’t twee reekse tussen die Bokke en die Britse en Ierse Leeus beleef (albei in SA se guns beklink) en nog ’n magdom ander internasionale toere . . . maar sy kry stééds hoendervel elke keer as die span op die veld draf. “Ek is net so passievol oor die sport. Dis ’n voorreg om deel te wees van ’n Suid-Afrikaanse handelsmerk wat soveel vir die land beteken,” sê sy. Dis moeilik om te glo dat Rene al sedert 2008 deel van die Bokspan is. Sy lyk soos ’n student met haar hoë poniestert en op spanfoto’s word sy skoon verdwerg deur die spelers wat bokant haar uittoring. Maar moenie dat haar jeugdige voorkoms jou flous…

Normaal. Dit is omtrent almal se wens op die oomblik: Kan dinge asseblief net terugkeer na normaal? Kan ons weer optel waar ons moes los toe die pandemie begin het? Maar, sê Nikki Bush, kenner van menslike potensiaal, jy doen jouself nie ’n guns deur te wag vir dinge om te verander nie – al is dit met optimisme. “Dis ’n gejaag na wind. Nes jy nie jouself kan on-skei nadat jy geskei is of onafdank nadat jy jou werk verloor het nie, kan ons nie die wêreld on-Covid nie. Ja, jy kan weer trou en weer ’n werk kry, en die pandemie kan eindig, maar dit gaan nie verander aan wat reeds gebeur het nie. Dit het ons rééds verander. “En selfs as die buitewêreld weer lyk soos voorheen,…

Ons weet nog nie hoekom dit by mense met “lang Covid” voorkom nie. ’N TEORIE: Dis weens skade aan senuweevesels wat seine van die neusreseptore na “eindpunte” (bekend as glomeruli) van die reukbol in die brein oordra. As dit weer groei – ongeag of die skade aangerig is deur ’n motorongeluk of ’n virale of bakteriële infeksie – heg die vesels vermoedelik aan die verkeerde “eindpunt”. Die brein herken dus nie die reuk nie en is dalk geprogrammeer om dit dan as ’n gevaar te beskou. Die teorie is dat die brein meestal die probleem mettertyd sal regstel. Daar is nie juis data beskikbaar nie omdat so min mense voor Covid-19 parosmie gehad het. NOG ’N TEORIE is dat jy net sommige van die verbindings in ’n stof waarneem en…

Together Luke Adam Hawker (Kyle Books, R414) Dié inspirerende boek se boodskap van saamwees is die perfekte mantra om vanjaar met jou saam te dra. Die afgelope twee jaar is ons lewe ontwrig deur ’n storm in die vorm van ’n pandemie. Dié storm word op ’n eenvoudige manier, met min woorde en gevoelvolle illustrasies, deur Hawker uitgebeeld. Deur die oë van ’n man en sy hond beleef ons die emosies wat onsekerheid en verandering meebring: hoe moeilik dit is om afgesny te wees van ander, hoe alleen ons voel. Maar deur anders te kyk, met hoop en waardering, kan ons die positiewe sien. Die mooi van die natuur en die familie- en vriendskapsbande wat die gom is wat ons sterk hou. Dié boek moet langs jou bed lê sodat…

Bure van nature, Hennie van Deventer (Protea Boekhuis, R250) Dié afgetrede koerantredakteur en skrywer se gunstelingkuierplek is die huis wat hy en sy vrou, Tokkie, in ’n private natuurreservaat langs die Sabierivier naby die Paul Krugerhek besit. Sabiepark is al 20 jaar deel van hul familielewe. In die bundel vertel hy met passie van hul wedervaringe met hul bure van nature: van insekte, voëls en slange tot leeus en olifante. As jy hou van veldstories en mens en dier wat mekaar van naderby leer ken, is die boek vir jou. Deel van die lekkerlees-ervaring is die spitsvondige en lewendige wyse waarop Van Deventer sy liefde en respek vir die natuur deel. Feite word behendig by die vertellings ingeweef. Dit maak nie saak of jy ’n ou besoeker aan…

Milla wil opstaan, maar haar arms en bene verstaan nie die opdrag nie. Sy wens die geskree wil ophou sodat sy kan dink. Sy proe steeds stof en ruik iets wat brand. Om haar is daar ’n geskarrel, en dan voel sy hoe sy opgelig en haastig weggedra word. Dis vreemde hande, en ’n vreemde lyf wat haar vashou, en sy wil wegbeur. “Hou op spartel,” hoor sy Graham Saunders naby haar oor sê. “Sit my neer. Ek moet gaan help.” Sy is nie seker waarmee nie. Wat het gebeur? Waarmee was sy besig toe sy geval het? Sy sukkel om deur die dowwe kol in haar brein te dink. “Jy is gewond. Hoe meer jy woel, hoe meer bloed verloor jy.” Milla hoor sy woorde, maar dit maak nie…

Daar ry ’n spoggerige motor deur onse dorpie. Die mense op die sypaadjies gaan staan botstil om te kyk. Dié van ons wat op die koffiewinkel se stoep sit, vergeet om ons koffie te sluk. Die fietsers ry omkyk-omkyk verby, amper ry een ou in ’n lamppaal vas. Só ’n motor sien mens net in flieks en tydskrifte. Of outydse sigaretadvertensies. ’n Bloedrooi sportmotor. Afslaankap oop in die lentewind. Die enjin spin genoeglik, soos ’n groot kat. Ook ek kyk, met groeiende verstomming. Die bestuurder, wat nou voor die koffiewinkel parkeer, is ’n oompie so oud soos die berge. Sy benerige hande die ene plooie en ouderdomsvlekke. Die wind kan maar waai, sy yl grys haartjies bly soos dit is. Alles aan hierdie prentjie is verkéérd. Dit moet mos ten…