Indholdsfortegnelse for Tuis Opknap 2020 i Tuis

REDAKTEUR Wicus Pretorius • redakteur@tuis.co.za Kaapstad-posadres Posbus 1802, Kaapstad 8000 Kantoorbestuurder Amina Essop 021 406 2401 REDAKSIE Artikelredakteur Shané Barnard • shane.barnard@media24.com Kreatiewe redakteur Marian van Wyk Kosredakteur Johané Neilson • johane.neilson@tuis.co.za Uitlegkunstenaars Jade Cupido en Andrew Maritz Teksredakteur Johletta Brits Digitale redakteur Amy Johnson Multimediajoernalis Suné Esterhuizen Fotograaf Francois Oberholster Foto-opknapper René Nortjé Produksiebestuurder Kerry Nash MEDEWERKERS Bielle Bellingham, Candice Botha, Elza Cooper, Greg Cox, Cornel Dunn, Marié Esterhuyse, Desiree Hartney, Marlene Malan, Beatrice Moore-Nöthnagel, Marie Opperman, Jan Ras, Elna van der Merwe, Amanda van Wyngaardt, Henrique Wilding ADVERTENSIES Hoof: Advertensieverkope (Kaapstad en KZN) Sarah Curtis-Bowles 021 461 2396 Sleutelklantbestuurders (Kaapstad) Charlene Meyer 082 928 5970 Daniela De Giovanni 083 709 7040 Verkoopbestuurder (Johannesburg) Susan Pienaar 083 281 7300 Toonvenster-advertensies Evonne Mehl 021 461 2396 MEDIA24 LIVE Handelshoof (projekte) Francois Malan 021 406 2376 Borgskappe Nikki Ruttiman 011 713 9147 Bemarkings-en-funksiebestuurder Andile Nkosi 021 406 2257 LEEFSTYL-ATELJEE Skeppende direkteur Michael…

Nadat ’n regte Karoo-plaashuis – spesifiek een wat gesmeek het om ’n opknap – jare lank op sy wenslys was, loop Adrian Lombard dit in 2016 op Prins Albert raak: ’n Ruim hoekhuis in die hoofstraat met ’n reuse-wildevy in die agterplaas en ’n uitgestrekte voor-, sy- en agterstoep. “Dié dorp is die perfekte ontsnapplek om my kreatiewe idees te laat floreer,” vertel Adrian, ’n handelsmerkstrateeg en produkontwikkelaar van Kaapstad. “En die lig! Dis een van die beste eienskappe van die Karoo – behalwe die skoon, helder lug, ook sy asemrowende lig.” Byna vier jaar nadat hy die ou huis aangeskaf het, is dit steeds ’n work in progress, soos hy dit noem. Maar die belangrikste – die kuier-en onthaaldeel, sowel as die vooraansig – is afgehandel. ’n Tweede tuiste…

Sy wou bitter graag ’n plaaskombuis hê van waar sy die idilliese prentjie kon aanskou van spelende kinders en skape wat wei, vertel Sanita. Toe sien sy die bouvallige ou huis op die plaas wat haar man, Brady, wou koop. Waar haar kombuis sou wees, was net ’n mankolieke afdak. “Ons het al in ’n plaashuis gewoon wat ons moes opknap,” vertel sy. “Maar dié huis, met die naam The Abbey en gebou rondom 1905, was regtig net ’n bouval. Selfs die kinders het dit ‘die stukkende huisie’ genoem.” Dit het jare lank leeg gestaan omdat niemand die eiendom wou koop nie, vertel sy. “En geen bouer het kans gesien om die huis op te knap nie. Om só ’n ou gebou af te breek, het ’n mens spesiale toestemming…

Daar’s geen twyfel dat die kombuis die middelpunt van ’n huis is nie. “Die belangrikste oorweging vir ’n kombuis is dat dit funksioneel moet wees,” sê die binne-ontwerper Kim Williams. Soos met enige ander projek is dit ’n goeie idee om te weet wat jou behoeftes en vereistes van ’n kombuis is, hoe die hele gesin die ruimte gaan benut, en natuurlik om te weet wat binne jou smaak val voordat jy enigiets aankoop. “Kyk na die beskikbare ruimte en pas die ontwerp aan volgens die gevoel wat jy uiteindelik wil bewerkstellig,” sê Kim. “Neem in ag dat loodgieterswerk en afwerkings soos teëls en beligting langtermynkeuses is en dikwels ook die duurste veranderinge uitmaak. Iets soos verf of plakpapier kan weer makliker en goedkoper verander word. “Die kombuis moet inskakel…

“Vraghouers was nog altyd ’n gewilde keuse vir verskuifbare strukture, maar dit kan ook by permanente huise ingewerk word,” sê Stephen Hitchcock van Stretch Architects. Een van die voordele is dat die grootste deel van die werk elders in ’n beheerde omgewing gebeur, sê hy. “Beter gehaltebeheer en minder boutyd op die perseel self beteken dit kan ’n goedkoper alternatief vir tradisionele boumetodes wees.” Indien jy besluit om met vraghouers te bou, gebruik dit sover moontlik in sy oorspronklike vorm, is sy raad. Vraghouers wat vir blyplek ingespan word, moet vuurvas en waterdig gemaak en goed geïsoleer word. Die houers kan lewenslank hou mits dit reg onderhou word: Kies ’n A-graad-vraghouer, want dit neem langer en kos meer om die B-graad-houers na jou smaak reg te ruk. Behandel roeskolle sodra…

Met die regte gereedskap is amper enige taak kinderspeletjies, sal enige Jan Knaphand jou vertel. ’n Gereedskapkis is ’n persoonlike keuse wat jy kan uitbrei namate jou behoeftes en beursie groei. Die versameling gereedskap wat ons hier wys, bestaan grootliks uit tange, sae, skroewedraaiers en maatbande – om net ’n paar te noem – maar dis ’n goeie idee om ook verskeie soorte kleefmiddels, spykers (en ’n paar pleisters vir daardie voos vingers!) aan te hou. Veiligheidstoerusting is ewe belangrik. Koop liefs produkte van gehalte – dit sal verseker dat jy nie gou weer hoef te gaan inkopies doen nie. SKUURBLOKKIE Dis noodsaaklik om skuurwerk vinnig en gemaklik af te handel. Jy kan ook los skuurpapier daarrondom draai. VERFKWASTE Verfkwaste is redelik goedkoop en het al byna weggooibare items geword…

6 van die bestes Dié ses kompakte dog funksionele en suite-badkamers in Annamarie en wyle Dirk Blom se woonhuis op Bettysbaai het elkeen sy eie identiteit – en met goeie rede. Die Bloms het vier volwasse seuns wat elkeen ’n lewensmaat het, asook ses kleinkinders. Dis meer as ’n dosyn gaste wat vakansietye die huis op horings neem! Elke badkamer se palet pas by sy slaapkamer se dekor, en die kamers maak almal op ’n binnehof oop. Vir ’n woonhuis wat ook as vakansiehuis dien, werk dit uitstekend, want niemand hoef ooit tou te staan vir die badkamer nie. Dié oulike ontwerpidee was hul oudste seun, Theuns, s’n. En nadat die hele familie oor en weer koppe bymekaargesit het, het die idee van die vierkantige teëltjies agter elke wasbak as…

Toe vriende en familie hoor Sumari en Alexander wil die twee vervalle silo’s voor hul huis op ’n plaas naby Klapmuts in gasteverblyf omskep, was almal baie verbaas – maar ook nuuskierig en opgewonde. Hulle ken Sumari immers as ’n vrou van durf en daad en iemand wat so ’n projek met die nodige deernis sou aanpak ten einde die erfenis van die geskiedkundige wynplaas wat uit 1715 dateer, te eerbiedig. “Die silo’s is in 1935, nog voor die Tweede Wêreldoorlog, gebou en is oorspronklik vir die opberg van graan gebruik,” vertel sy. “Toe Alexander se oupa Mordaunt Milner die plaas in 1969 koop, het hy dit in perdestalle omskep as deel van sy groot passie om renperde te teel.” Die silo’s het byna 30 jaar lank as perdestalle gedien,…

Ibrahim en Brenjin Bester se drome van ’n landelike Franse kombuis het by die nuwe oond en plate begin wat hulle vyf jaar gelede gekoop het. Maar dié drome het saam met die oond in ’n pakkamer by hul huis in die Kaapse buurt Richwood tot rus gekom. As eienaar van The Barn Door Shack, wat pasgemaakte skuurdeure vervaardig, is Ibby, soos sy vriende hom noem, heeldag met kraggereedskap doenig. Vir hul eie kombuisprojek was daar net nooit tyd nie. Maar toe die grendeltyd in Maart aanbreek en hy meer tyd tuis deurbring, het hul kombuis uit die jare tagtig weer sy hande laat jeuk. Met fase vyf van die inperking in volle gang het die Besters met hul regrukprojek laat waai. Al die ysterwarewinkels was toe en geen hulp…

Wat jy nodig het INKOPIELYS • afvalstukke hout vir die raam waarin die beton gegiet word • spykers • plastiek • wapeningstawe (“rebar”) • silikoon • sementmengsel • ekstra sement om die mengsel te versterk • seëlaar van jou keuse GEREEDSKAP • hamer • kruiwa • graaf • waterpas • troffel • wentelskuurder Só het hulle dit gedoen … [PROJEKNOTAS] Voor Andrew die blaaie gegiet het, het hy die proses deeglik nagevors. “As jy in Amerika of Brittanje woon, kan jy ’n spesiale sementmengsel en vorms koop waarmee jy maklik jou eie werkblaaie kan maak,” vertel hy. “Maar omdat ons in Suid-Afrika woon en geld nie aan bome groei nie, moes ons die gewone klaar gemengde sement gebruik en ons eie gietvorms maak. “Die gekoopte sementmengsels bestaan uit aggregaat, sand en…

OORWEEG JY ’N REGRUK IN OF OM JOU HUIS? Ons het by kenners gaan kers opsteek oor belangrike aspekte wat huiseienaars in gedagte moet hou wanneer hulle begin met ’n opknap, gemeet aan inskrywings vir ons jaarlikse Regruk met Flair-wedstryd. Kom put inspirasie, steel met die oog en teken aan watter take op jou eie ruimte van toepassing is ……

Om ’n rustige slaapkamer te skep is makliker as wat jy dink, sê Micke de Villiers van Tuis se aanlyn-ontwerpdiens Welkom Tuis. “Daar is ’n paar basiese elemente wat trefkrag gee, soos ’n kopstuk wat jou bed afrond en vensterbekleding wat privaatheid gee en atmosfeer skep.” In ’n slaapkamer is ingeboude kaste die mees praktiese oplossing, sê sy. “Jy kan wel in ’n gastekamer wegkom met ’n losstaande kas omdat minder pakplek daar nodig is.” Beplan fyn wanneer dit kom by elektriese punte en ligskakelaars, want dit kan duur wees om later aan te pas; ’n mens wil ook nie sukkel met verlengkabels nie. Helder beligting is dikwels onnodig in ’n slaapkamer. “Jy wil eerder beligting gebruik om ’n sagte atmosfeer te skep,” verduidelik Micke. “Bedlampies hoef ook nie op…

Die belangrikste bousteen van ’n funksionele stoep is die regte oriëntasie, sê die interieurontwerper Trisch Barnard van Project Works. “Dit moet in die winter genoeg son kry en in die somer koelte verskaf. ’n Mens kuier ure lank op ’n stoep, veral as daar ’n ingeboude braaikaggel is. Gemaklike sitplek is dus ’n vereiste!” As jou stoep enigsins aan reën blootgestel word, maak seker daar is ’n effense helling sodat die water kan wegloop. En wanneer dit kom by materiale vir die vloer en dak, oorweeg die voor-en nadele van elkeen. “Die meeste soorte hout, buiten hardehout soos balau, verg onderhoud; oorweeg saamgestelde hout van houtvesel, herwinde plastiek en ’n bindingsmiddel as jy graag ’n dek wil hê. Indien jy sement of teëls kies, maak seker die materiaal is glyvas,”…

Kothuis WIE WOON HIER? Herman en Mia Lintvelt WAAR Wildernis Ons het die potensiaal raakgesien om die afgeleefde boothuis op ons erf in iets spesiaals te verander. Dit het langer geneem as verwag en ek het in ’n stadium ’n bietjie hulp ingekry, maar ek is baie trots op die eindresultaat! Ons het ons eerste gaste op 17 Desember 2018 verwelkom. Fasade WIE WOON HIER? Rynhardt en Rolandi Mostert WAAR Randburg In September 2018 ry ons verby ’n vernielde huis in ’n afgesperde straat naby ’n voëlreservaat. Ons het dadelik verlief geraak op die buurt en hoe veilig dit is. Maar die huis was ’n heel ander storie. Asof die heelal ons nie genoeg geterg het met die werk wat op ons gewag het nie, moes ons deur ’n koopproses…

Ryan en Carla Jardine was nog altyd aangetrokke tot plattelandse huise met ’n ryk geskiedenis, propvol karakter en artikels uit toeka se tye. Toe hulle uiteindelik hul droom verwesenlik deur ’n huis op ’n Weskus-dorpie te koop, het hulle besef hulle kon die oorspronklike hoefsmid se stal op die werf omskep in ’n gesellige selfsorghuisie waar hulle self kon woon terwyl hulle die grootste opknapwerk aan die hoofhuis klaarmaak. “Hopefield is net ’n uur se ry van Kaapstad, maar geheel en al verwyder van die stadsgedruis,” sê Carla. “Die dorp spog met ’n jaarlikse blomfees en heelparty kunstenaars wat hier woon, maar die meeste mense vlug eintlik hierheen agter die rustigheid aan. Dis die oudste dorp aan die Weskus, gestig in 1853. En die titelakte van hierdie eiendom dateer uit…

Hulle sou eers net die vloere van hul kombuis en eetkamer oordoen, maar halfpad deur het die Nels besluit om die hele ruimte reg te ruk. “So ons projek het nie op ’n goed deurdagte noot weggespring nie,” erken HJ. Hy is die een wat uiteindelik die meeste werk self gedoen het. Die gesin woon sedert April 2018 in die amper halfeeu oue huis in Franklin Roosevelt Park en hulle knap dit vertrek vir vertrek op. Soos in baie ou huise was die kombuis verouderd en die roomkleurige kaste wat van muur tot muur gestrek het, was nie meer mooi nie. Hoewel daar nie fout was met die funksionaliteit van die ruimte nie, wou hulle dit graag meer eietyds maak met ’n oopplanvloei. “Ons droom was ’n moderne ruimte met…

Ek weet duidelik nie wanneer om op te hou opknap en verander nie!” sê Ronelle Muir, wat saam met haar man, Vince, mede-eienaar van Holly Wood Kitchens and Furniture is. Sedert hulle 17 jaar gelede by hul Kaapse huis ingetrek het, het hulle heelwat aan die ontwerp verander, soos in dié klein badkamer. “Ons het dit al geverf en nuwe teëls en toebehore ingesit, maar die sanitêre ware was oud en alles het net gesmeek om vernuwing!” Toe die strengste Covid-19-inperkingsmaatreëls begin verslap, het die Muirs die badkamer oor ’n tydperk van enkele weke omskep in ’n kontemporêre toevlug wat subtiel aansluit by die Skandinawiese styl in die res van die huis. Die grootste verandering was om so te sê die hele uitleg te verander – net die wasbak het…

Die ontwerp van jou huis se fasade kan die eerste indruk van jou huis maak of breek, of jy nou gaste verwelkom of jou huis in die mark wil sit. Ongeag die styl van jou huis kan jy óf eenvoudige óf ingrypende veranderinge aanbring en dit sodoende ’n vars voorkoms van buite gee. “Indien jy van plan is om nog jare in jou huis te woon, kan jy grootskaalse veranderinge oorweeg soos om die dak te vervang of nuwe vensters in te sit,” sê Nadine Naidoo van Meik Architects. “Win altyd professionele raad in wanneer jy enige strukturele veranderinge – soos ’n nuwe dak of die aanbou van ’n stoep – aanpak. En onthou: Enige aanbouing moet deur die owerhede goedgekeur word, anders loop jy die risiko dat versekeraars dit…

’n Badkamer moet funksioneel wees en aan elke gesinslid se behoeftes voldoen. “Gehalte-materiale, energiedoeltreffende beligting en alternatiewe verhittingsmetodes soos songeisers of hittepompe kan jou oor jare baie water en elektrisiteit spaar,” sê Celeste le Roux, hoof van die spesialisdiens React24. “‘Goedkoop is duur koop’, ook as dit by diensverskaffers kom. Moenie die eerste die beste kwotasie aanvaar nie en kry verwysings van kontrakteurs voor jy hulle aanstel. Maak ook seker hulle het die nodige akkreditasie in hul veld. “Sanitêre ware en krane van goeie gehalte verseker langer gebruiksduur van jou hele badkamer,” meen Celeste. “Minderwaardige produkte kan kraak, lek en tot ondoeltreffende waterverbruik lei.” Die grootste oorweging by ’n badkamerprojek is die loodgieterswerk. “Beplan versigtig aan die uitleg voor die projek begin,” sê sy. “Die mees kostedoeltreffende manier is om…