Indholdsfortegnelse for May 2016 i Weg! Ry & Sleep

Hier het jy jou nuwe WegSleep in die hand. In hierdie uitgawe sleep Leon Botha saam met jou Laeveld toe. Nelspruit is ’n gewilde kampbestemming met ’n klomp gewilde kampplekke. Ons het egter besluit om hierdie keer by drie van Nelspruit se nuwer en stiller kampplekke te gaan afhaak. Leon sê dit was só lekker, hierdie plekke sal hom weer sien. Dalk loop jy hom vorentoe daar raak. Ons het ook die pad Noord-Kaap toe gevat en in die Oranjeriviervallei by drie plekke tussen Groblershoop en Kakamas kamp opgeslaan. As jy nog nie hierdie deel van die land beleef en nog nie die son oor die Oranjerivier sien ondergaan het nie, kan jy maar planne maak om aan te haak en soontoe te sleep. En terwyl…

Baie van die nuwer kampplekke spog met blink afwerkings en netjiese tuine – en ons almal geniet dit. Tog is daar ouer plekke waar jy net so lekker kan ontspan. Sulke kampplekke voel ingesout. Jy trap in ou kampspore en jy kan nie anders as om welkom te voel nie. Die Rhemardo-oord naby Mookgophong is een van dié soort plekke. Ons het in Februarie weer hier gekamp, en soos met elke vorige besoek was dit ’n gesinsfees. Die kinders is reeds voor die wegbreek opgewonde oor die buiteslapery en swem. Ook omdat Ouma van Pretoria óók daar gaan wees. Vroegoggend, ná koffie, is die warmwaterswembad salig en die glybaan bly ’n hoogtepunt. Ons maak ons woonwa graag staan op een van die vyf luukse staanplekke waar ’n mens jou eie…

Is jy iemand wat ’n stabiliseerder gebruik as jy sleep? Hoeveel help dit nou werklik? Of is jy een van dié wat glo dis nie nodig nie? Tertius Perelaer Ek gebruik ’n Yellow Blade-stabiliseerder om my Sprite Splash te sleep. Dit help baie as die wind sterk waai – en ek verkies die gemoedsrus ingeval een van my wa se bande die dag bars. Paul Kotze Selfs al het my Ford Ranger ’n funksie wat my wa se swaai teenwerk, sleep ek steeds met ’n Tando. Vir my is dit ’n geval van liewers Bang Jan as Dooie Jan. Rinus de la Rie Wanneer ek my woonwa aanhaak, gebruik ek ’n Yellow Blade. Maar as ek net die Ventertjie sleep, is dit nie nodig vir ’n stabiliseerder nie. Mario Christiaan…

55 LITER Beskrywing: Enkelkompartement-ys-vrieskas. Prys: R9 700 (aluminium) of R10 250 (vlekvrye staal, drie mandjies ingesluit). Isolasie: Oraloor 60 mm in die sywande. Batterybeskerming: Hoog, medium en laag. Kragverrigting:12 Vgs, 24 Vgs en 100-240 Vws. Gewig: 22,4 kg (aluminium) of 26,6 kg (vlekvrye staal). Opsionele ekstras: Mandjies en oortreksel. Gemiddelde kragverbruik*: 27,343 Amps @ 12 Vgs. * Gemeet oor 24 uur teen drie verskillende buitetemperature (onderskeidelik 21 ºC, 32 ºC en 43 ºC) en met die eenheid op ’n konstante -10 ºC. 60 LITER Beskrywing: Dubbelkompartement-ys-vrieskas met onafhanklike termostate. Prys: R10 500 (aluminium) of R11 950 (vlekvrye staal, vyf mandjies ingesluit). Isolasie: Sywande van 42 mm rondom die yskaskompartement, en 60 mm rondom die vrieskas. Batterybeskerming: Hoog, medium en laag. Kragverrigting: 12 Vgs, 24 Vgs en 100-240 Vws. Gewig: 23,7…

Die Bosveld is ’n voorkeurbestemming vir kampeerders, met talle oorde, wildsplase, private reservate en woonwaparke waar jy kan afhaak en tentpenne inslaan. Die natuurskoon, wild, sonsondergange en matige winters dra alles by tot die gewildheid van dié streek. Boonop is dit sommer om die draai as jy in Johannesburg of Pretoria woon: Jy mik jou kar se neus noord en binne ’n uur of twee kan jy in die koelte van ’n groot Bosveldboom uitspan en van jou stadsorge vergeet. Kort voor Kersfees laasjaar het die Thabaledi-lodge, net noord van Brits, sy hekke vir kampeerders oopgegooi. Nog voor Kersvader die takbokke voor sy slee kon inspan, is die eerste tente by die nuwe Thabaledi-kampplek opgeslaan. Neels Beyer en sy vrou, Catheleen, is nou al ’n jaar aan die stuur van…

Jy onthou nog daardie ou TV-advertensie waarin David Kramer met sy rooi vellies saamryplek vir hom én sy dikwiel kry in ’n volgepakte rooi Kombi? En die een waar David en ’n klomp mense met ’n Kombi ’n stukkende brandweerwa sonder sukkel teen die Tierkloofpas uitsleep? Dis juis oor dié soort veeldoeligheid dat die Volksiebus ’n Kombi genoem word: Kombi staan vir “Kombinationskraftwagen”, oftewel ’n voertuig wat goed genoeg is vir verskillende take. Meer as ’n kwartmiljoen Volksie-busse is oor die jare in Suid-Afrika verkoop, om mense én vrag te karwei. Van die vorige T5 is 2 miljoen in die wêreld verkoop – ’n goeie 25 000 van hulle hier by ons in Suid-Afrika. Nou het Volkswagen die sesde geslag van sy immergroen Kombi bekend gestel. Die nuwe T6 het…

Gestoomde mielieen-bierbroodjies Stomende toneel Jy hoef nie net te bak of braai nie; stoom vir jou ’n lekker broodjie gaar. Jy benodig (maak 12 broodjies) • 500 g (sowat 4 koppies) bruismeel• 1 botteltjie (340 ml) bier• 1 blikkie (410 g) heelpitmielies• ½ teelepel (2,5 ml) sout Só maak jy 1 Kry water aan die kook in ’n oondbak waarin ’n groot kolwyntjiepan (een met 12 holtes) sal pas. Die water moet so 5 cm diep wees. 2 Meng die bestanddele. Vul die kolwyntjiepan se gesmeerde holtes met deeg en maak tinfoelie-stutte waarop die pan net bo die kokende water kan staan. Die kolwyntjiepan moenie aan die water raak nie. 3 Bedek die stoombak en kolwyntjiepan met ’n vel foelie en stoom die broodjies vir sowat 30 minute oor die kole tot hulle gaar…

Pajero sleep soos ’n droom 2014 MITSUBISHI PAJERO SPORT 2.5 DIESEL (OUTOMATIES) Wanneer hy sy Pajero voor sy boswa inspan, is dit sleepgenot uit die boonste rak, sê Johann Kotzé van Onrusrivier. Wat sleep julle? Ons het ’n Metalian Maxi-boswa, die 2012-model. Waarna soek jy in ’n sleepvoertuig? Hy moet genoeg krag en ’n goeie grondvryhoogte hê, hy moet lig op brandstof wees en genoeg pakplek hê. En dan moet hy natuurlik ook bekostigbaar wees. Hoe lank sleep jy al met die Pajero? Net meer as ’n jaar. Ek het hom nuut gekoop vir R444 554. Ek het die Mercedes-Benz ML en Audi Q5 ook oorweeg, maar albei se grondvryhoogte is laer, hulle binneruim is kleiner en hulle kos ook heelwat meer as die Pajero. Jy is dus heel tevrede…

Ons gaan kamp om ’n bietjie te ontsnap van die werklikhede van ons alledaagse bestaan. Om net vir ’n paar dae waardevolle tyd saam met ons geliefdes deur te bring en terselfdetyd sommer ook van die mooiste dele van ons land te ervaar. En ja, al is jy supertrots op jou blinknuwe boswa, weet ons almal dit is nie jou kosbaarste besitting nie. Daardie eer (hoop ons) is jou gesin beskore. Maar hoe beskerm jy hulle – veral die kinders – wanneer julle gaan kamp? Ons het met ons lesers, vakansieoorde en ander kenners gesels en dié tien wenke gekry om jou geliefdes en kinders veilig en uit die moeilikheid te hou. 1 As dit donker raak, is jy terug by die wa Dit blyk die goue reël te wees.…

WegSlepers wat lede van Willem en Surette Brits se Wil-Sur-kampgroep is, het onlangs op Petershof, een van die groeplede se plaas, saam gekuier. Willem vertel altesame agt paartjies en hulle kinders het op die plaas, sowat 40 km wes van Musina, bymekaargekom. Die WilSur-groep het as ’n omgeegroep begin en het tans amper 100 lede wat van heinde en ver kom – van Botswana tot in die Kaap. Willem sê dit lol maar om almal (of selfs net die helfte van die groep) bymekaar te kry vir ’n saamtrek, maar dis altyd lekker om saam te kuier. Dit is veral die lede in die noorde van die land wat kort-kort bymekaarkom vir ’n kuiernaweek. Hulle beplan nog twee groot kampe vanjaar. In die winter gaan hulle in Noordwes by Kokoriba…

‘Kampeer eerder by ’n oord wat jou nog nooit in die steek gelaat het nie. En as jy daar is, ry rond en gaan kyk na ander oorde in die omgewing.’ Op Facebook-groepe, internet-forums en in buitelewetydskrifte kry jy ’n goeie idee watter oorde en kampplekke hoog of laag op kampeerders se voorkeurlys is. ’n Onlangse gesprek op ’n internetkampforum het só afgeskop: “Julle opinies asseblief! Ons wil in April, Mei in die KZN Noordkus-omgewing kamp. Het kwotasies gekry by Oord A en Oord B, met laasgenoemde se tarief net mooi dubbel as Oord A se kwotasie! Nog nooit by enige van die twee gekamp nie. Ek verstaan Oord B is uitstekend, maar sal julle Oord A teen die helfte van die prys aanbeveel?” Binne minute was daar lofsangers wat…

Mense noem die wêreld rondom Nelspruit ons vrugtemandjie. Hier groei enigiets van lemoene, mango’s en piesangs tot advokadopere en neute sonder sukkel. Die winters voel eerder soos koel somers, en in die amper tropiese klimaat is die plantegroei welig. In dié omgewing is ’n klompie bekende en gewilde kampplekke, maar daar is ook ’n paar minder bekende oorde waar jy in stilte en rustigheid in die natuur kan kamp. Net duskant Nelspruit kan jy omtrent met ’n familie seekoeie skouers skuur by die Hippo Water Front­gasteherberg. ’n Kilometer of twee buite Hazyview, by die Kiaat­bungalows­en­woonwapark, kan jy jou kampstoel in ’n spogtuin oopslaan. En weg van Hazyview, in Sabie se rigting by Mackers River Bend, kamp jy in die hartjie van die oorspronklike bos wat nog nie deur plantasies verswelg…

Jy kan boswaens op net soveel maniere bou, en tipies van dié soort wa is dit ’n sleepwa waarop ’n daktent pas. Hier en daar sien jy modelle waar die bed uit die romp kant toe slaan – met hulle klim jy in die wa en dan tot op die bed. Die Invader Duo is een van hierdie soort waens, sonder hoë lere om tot op die bed te klouter. Jy klim bloot met ’n tweetrapleer by die deur in en met nog een trap is jy op die bed. Hiermee saam het die Duo nog ’n klompie slim planne ingebou. Dis ook een van die min waens wat voel of hy bykans 100% op sy wiele gebalanseer is. Hy is lig genoeg as jy hom manalleen op die staanplek…

Adventure begin volgende avontuur Adventure Trailers in Springs het ’n nuwe blaadjie omgeslaan. Die vier modelle staalgeboude boswaens wat hulle vervaardig het – die Zulu, Impi, Enduro en Adventurer – maak volgens Albert van Niekerk plek vir aluminiumwaens. Hulle eerste aluminiumboswa, die Adventure XT, is reeds gebou. Die Adventure XT-standaardmodel kos R130 000 en is toegerus met geriewe soos ’n 80 l-ys-vrieskas, tweeplaatgasstoof, breekware en eetgerei, ’n 105 Ahdiepsiklusbattery, 50 lgemonteerde watertenk en vier kampstoele. Hoe lyk die syfers? Tarragewig 650 kg; dravermoë 850 kg; BVM 1 500 kg; 2,15 (l – bakwerk) x 1,82 (b) x 1,6 m (h) Kontak: 082 775 5346 of 083 276 1255; adventuretrailer@gmail.com ; adventuretrailers.co.za Nuwe huismaats Die Oos-Randse tak van die boswavervaardiger Conqueror en die 4x4-toerustinggroep Opposite Lock…

Die stilte onder ons groepie stappers is intens: Jy hóór amper hoe almal asem ophou. Met oë vasgenael op die trop buffels voor ons verroer niemand ’n spier nie. Die trop het ons natuurlik al lankal gewaar en ’n bul of twee staar ons stip aan. Daar’s ’n beroering in die trop. Een bul mik-mik in ons rigting en ons veldwagter lei ons vinnig agter ’n klompie mopanies in. Ek kyk die dun boompies so en wonder of hulle gaan help teen ’n buffel wat storm. Gelukkig sal ons nooit weet nie, want die volgende oomblik hoor jy net hoewe klap en die trop hardloop die mopanies in. Ek is hier op uitnodiging van Sanparke se ereveldwagters. Ons is ’n klein groep wat saam in die wildtuin kuier en stap…

1 As dit donker raak is jy terug by die woonwa 2 Stap deur die kampplek en kyk vir gevare soos slange, skerpioene en goggas 3 Moet nooit sonder ’n noodhulpkissie kamp nie 4 Hou hulle besig 5 Kamp in ’n groep – dit maak dit makliker om ’n ogie oor die kinders te hou 6 Moenie klein kinders alleen laat swem nie en moenie groter kinders aansê om na klein kinders te kyk by die swembad nie 7 Hou belangrike foonnommers byderhand 8 Moenie sonder ’n hoed en sonroom gaan kamp nie 9 Maak seker kinders wat oud genoeg is om ’n foon te gebruik het dit altyd by hulle 10 Trek ’n denkbeeldige grens om jou kampplek en wys vir jou kinders presies waar hulle nié mag gaan…

Ons is mal oor kamp. In die vroeë jare tagtig het ek ’n Sprite Musketeer aangeskaf en ons het by verskeie oorde gekamp – destyds was die kampgeld R5-R25 per dag. Ons het op ’n punt gekom waar ons die Musketeer moes verkoop, maar ons het onsself belowe dat wanneer ek en my vrou, Jackie, aftree, gaan ons weer lekker kamp. Ek het 3 jaar lank die Weg-Sleep gekoop en is die laaste jaar al ’n intekenaar. Nou droom ons oor die kampeerdery en doen gereeld navorsing oor oorde. Ons maak somme en vergelyk dit met ons uitgawes by die huis, maar sekere oorde se prysstruktuur is vaag. Ons sien byvoorbeeld ’n oord vra R300 p.n. vir vier mense, maar ons is net twee en gaan nie nog twee mense…

Dié wasgoedlyn is ’n treffer Ons gaan kamp gereeld met ons Jurgens Xcape en het altyd ’n gewone kampwasgoedlyn gebruik wat ’n mens in winkels koop. Maar dié ding het my vreeslik geïrriteer, want dit vat lank om hom op te slaan en as die wind opsteek, waai hy sommer om. Ek het toe besluit om self ’n wasgoedlyn vir ons boswa te bou, sommer met materiaal wat ek in die garage gehad het. Ek het twee stukke 19 mm-vierkantpyp gevat en hulle elkeen aan die een kant platgedruk. Ek het twee 8 mm-boute gevat en die bokante rond gesny en ’n gleuf in die kant van elkeen gesny. Daardie platgedrukte kante van die vierkantpyp het ek toe in die gleufies in die boute gehardsoldeer ( braze ).…

Van Groblershoop af kronkel die N10 vir 118 km langs die Oranjerivier tot by Upington, en van daar af loop die N14 altesame 96 km rivierlangs na Kakamas. Dis ’n landskap vol kontraste – van grasveld, doringveld, vaal klipkoppe, klipgebergtes en duineveld tot groen wingerde, boorde en landerye. Kwartpad (43 km) van Groblershoop af na Upington lê Grootdrink aan die linkerkant van die N10. As jy na die ander kant toe afdraai op die grondpad, ry jy oor ’n enkelbaanbetonbrug oor die Oranje. Naby die brug lê die Duin-in-die-Weggasteplaas met ’n lowergroen koeltekampplek langs ’n enorme sandduin. Buite Upington loop die R360 pylreguit na die Kgalagadi en Namibië in die noorde. ’n Kwartier se ry buite Upington (13,4 km) lê die Kalahari Monate-lodge met sy groot woonwapark aan die linkerkant…

Lengte: 3,75 m Breedte: 1,8 m Hoogte: 1,75 m Vloer-tot-dakhoogte: 2,18 m Netto gewig: 820 kg Dravermoë: 680 kg BVM: 1 500 kg Neusgewig: 74 kg Prys: Vanaf R195 000; en R215 000 volledig toegerus. Kontak: 021 948 9920 of 082 781 3977; info@invader.co.za; invader.co.za Plus Die dak lig met ’n lugstelsel; makliker kan dit nie wees nie. Die sny-oppervlak in die werkblad is ’n slim plan. Volop pakruimte in die wa, veral vir bonkige goed. Jy kan hom maklik manalleen op- en afslaan. Minus As jy groot vingers het, gaan jy dalk sukkel met die deurknippe. Die multiprop is moeilik bereikbaar as die stoof uitgeslaan is. Die bed is nie van die grootste nie. WegSleep sê: Die Duo is, soos sy naam sê, ’n wa vir twee.…

“ Ek en my vrou, Johanna, is veteraankampeerders en ons het ons pragtige land al van hoek tot kant deurkruis met ons Jurgens Expo. Ons raak altyd opgewonde as ons nuwe plekke ontdek en Edwaleni, net meer as 40km buite Mooirivier, is só ’n plek. Hoekom was julle so in julle noppies? Die oord se woonwapark voldoen aan die behoeftes van elke besoeker wat smag na rus en vrede – teen ’n billike prys. Dis heerlik ontspanne hier en die staanplekke is boomryk en beskut teen die elemente. Daar word ook spesiale aandag gegee aan detail – baie van die inheemse bome het byvoorbeeld naamplaatjies. Die voëllewe is iets besonders, en ’n mens sien gereeld diere soos tarentale, hase, steenbokkies en duikers in die lusernland langs die kamp. Ek moet…

Hengelgerei Kry vir jou ’n bokstert Die “bucktail jig” – daardie gekleurde loodkop met ’n lyf van dierehare, vere of sintetiese materiaal – is al dekades met ons. In die Tweede Wêreldoorlog was hy deel van die Amerikaanse soldate se oorlewingstoerusting, en in baie gesoute hengelaars se gereikas sal jy altyd ’n “bucktail jig” of drie kry. Daar is selfs hengelaars wat vir jou sal sê dis ná al die jare steeds die beste kunsaas wat jy kry. Maar wat maak hierdie stukkie kunsaas só gewild? Mark Stotesbury van TW Lures in Kaapstad, wat ’n paar Suid-Afrikaanse hengelrekords op sy kerfstok het en handgemaakte kunsaas aan die internasionale mark lewer, sê die “bucktail jig” se geheim lê in sy eenvoud en veelsydigheid – en in die sukses wat hengelaars met…