Indholdsfortegnelse for June 2016 i Weg!

EVELYN JOUBERT van Hartbeespoort skryf: Is hierdie lemoenskoenlapper met ’n gebrek gebore? Ek het die lemmetjieboom sowat twee maande gelede met ’n gifstof behandel. Die boom was erg oortrek met luise. Kan die gif die oorsaak wees? Die vlerk is nie afgeskeur of gebreek nie. Die patroon stem ooreen met die normale vlerk s’n. Die insekkenner DUNCAN MACFADYEN antwoord: Skoenlappers met misvormde vlerke kom soms voor in die natuur, maar dis gewoonlik as hulle in knap hoekies papies gemaak het en nie hulle vlerke genoegsaam kon oopvou nie. Maar dié een se vlerk het glad nie oopgevou nie – dit kan beslis as gevolg van die gif wees. Spuit liefs in die toekoms ’n organiese middel – ’n knoffel-en-brandrissieoplossing sal die plant minder aanloklik maak vir dié skoenlappers. NICO BARNARDT…

Hier’s nou ’n voël wat nie sommer met sy ID-boek loop en spog nie. Die skoenbekooievaar het ’n ietwat... ongewone noemnaam. Boonop is sy wetenskaplike naam Baleaniceps rex, wat koningwalviskop beteken... en as jy na ’n foto van hom kyk, sien jy sommer gou waar sy komieklike name vandaan kom. Om een in lewende lywe te sien moet jy ’n grenspos oorsteek. Die onmiskenbare groot grys voël met sy skoenagtige bek kom voor in groot vleilande en moerasse van Soedan tot Zambië – laasgenoemde die naaste plek vir Suid-Afrikaners om een te sien. Maar moenie sirkustoertjies verwag as jy een te siene kry nie. Onthou, Walviskop weet nie hoeveel moeite dit gekos het om by hom uit te kom nie. Die mannetjies en wyfies wei dikwels aan teenoorgestelde kante van…

Om sterre te kyk kan soms ’n eensame storie wees. Maar by georganiseerde “sterrepartytjies” tuur en kuier jy sáám met ander entoesiaste. Ondanks ons fantastiese donker naghemel was amptelike sterrepartytjies onbekend aan Suid-Afrikaanse amateur-sterrekundiges tot 2009. Die ys is daai jaar gebreek met die eerste Nasionale Karoo-sterrepartytjie wat in die Noord-Kaap gehou is, 20 km buite Britstown. Vanjaar vind die agtste byeenkoms plaas van 1 tot 4 Julie ( pretoria-astronomy.co.za). Hoewel sterrepartytjies gerig is op die meer ernstige amateur-sterrekundiges, is beginners welkom. Streng reëls oor die gebruik van lig geld by so ’n partytjie om nie die donker toestande te bederf nie. Selfs die slaapreëlings word gewoonlik só gedoen dat die wat deurnag, ’n bietjie slaap kan inhaal in die dag. Maak ’n draai by een van die partytjies: 3-5…

Hengel is ’n stokperdjie wat nie sommer laat los as dit jou eers gebyt het nie. Kort voor lank lê jy nagte wakker en wonder oor watse karpdoepa jy volgende keer aan jou paphoek gaan smeer om die net vol te kry by die Bloemhofdam. Maar dis tog ook lekker wanneer die vis nié byt nie, want dan kan jy net sit en kyk hoe torring die bontvisvangertjies doer anderkant by die riete rond. Rus ’n slag. Gits, dommel selfs ’n bietjie weg wanneer die middaguur se hitte jou in die nek begin vang. Maak seker jy sit gemaklik in Camp Master se stewige Angler 150-stoel (dit het moddervoete sodat jy nie ongesiens in die rivieroewer wegsak nie!), of kies die meer kompakte Angler 100-stoel indien jy gereeld van ingooiplek…

RUSTIG, MAGALIESBERG Dié plaas in die Hekpoortdistrik dateer uit die 1930’s en die oorspronklike plaashuis is in ’n gastehuis omskep. Rustig is presies wat die naam sê – as jou tassie eers uitgepak is, wil jy eintlik net ’n vuur maak en diep gaan sit. Of op ’n dekstoel langs die 25 m lange swembad stelling inneem en oor jou leesboek se rand loer hoe die eekhorings mekaar in die swierige tuin met sy eeue oue bome rondjaag. As jy wél iets wil doen, is hier ’n paar staproetes: Die Olienhout-(3 km) en Witstinkhout-sirkelroete (5 km) klim albei ’n ent teen die Magaliesberg uit, met laasgenoemde wat by ’n paar grotjies teen die hoër kranse gaan draai. Twee taaier opsies is die Karee-roete (13 km) en die Magalieskrans-roete (1 km).…

Hoe kom ek daar? Chrissiesmeer is sowat 247 km van Johannesburg (met die opgeknapte N17 oor Ermelo), 172 km van Nelspruit en sowat 80 km van Oshoek, die grenspos na Swaziland, af. Beste tyd van die jaar? Chrissiesmeer is ’n heeljaarbestemming met ’n kenmerkende Hoëveld-klimaat. Winters is baie koud, maar hier is geen tekort aan kaggels in die kuier- en oornagplekke nie. Veters vas. Stap deur die dorp, want dit is die beste manier om die talle sandsteengeboue behoorlik te bekyk. Die Matotolandekotoerisme het ’n voetpad na die meer oopgemaak; dit begin in Percystraat. Dis ’n maklike stappie en sowat 2 km lank uit en tuis. Speke en spane. Ry fiets op die grondpaaie rondom die dorp, maar vra toestemming as jy op die plaaspaadjies wil ry. Vra by The…

Terwyl Weg-joernaliste reis, bestaan kantoorure nie. En hulle moet dikwels buite hulle gemaksone beweeg om ’n goeie storie óf foto te kry. Vir vandeesmaand se Hartenbosstorie (bl. 52) het Erns Grundling ’n week voor Kersfees – in die spitsseisoen – op Hartenbos se ATKV-strandoord gaan kamp. “Ek het die Kapperjolgids as kompas gebruik en probeer om by soveel as moontlik van die vermaak uit te kom,” vertel hy. “Die Langarmdans en Skuimpartytjie het vroeg reeds my oog gevang. Ek was in my tienerjare maar ’n nerd en het ongemaklik rondgestaan by die sokkies op vakansiedorpe. “Toe ek dus een aand op Hartenbos hier teen halfelf by die Pretpark se Skoffelskuur inloer, het ek ’n terugflits gekry van my lomp langarmpogings in die jare negentig. Gelukkig was ek onder geen druk…

Semonkong is min of meer in die middel van Lesotho en dis een van die mees afgeleë en mooiste dele van die Bergkoninkryk. Op hierdie foto talm Basothoskaapwagters op die randjie van ’n krans wat oor die Maletsunyane-waterval uitkyk. As die Maletsunyanerivier vol genoeg is ná goeie somerreënval, skep hierdie 186 m hoë waterval ’n fyn sproeimis, wat Semonkong sy naam gee – “Plek van rook”. Lees in volgende maand se Weg meer oor Semonkong in ons Lesotho-storie.…

1 uit 5 van ons landsoogdierspesies is bedreig*. Een van die mees bedreigde soogdierspesies is die oewerkonyn (Bunolagus monticularis). Daar is minder as 250 van dié konyne in die natuur oor. 1 uit 5 van ons varswatervisspesies is bedreig. Daar is byvoorbeeld net een ongerepte skool van die kritiek bedreigde Barrydale-rooivlerkie (Pseudobarbus burchelli) oor in die natuur, in ’n 6,5 km-stuk van die Tradouwrivier. 1 uit 7 van ons paddaspesies is bedreig. Die Pickersgill-rietpadda is skaars 3 cm groot en kritiek bedreig – hulle kom net in ’n klein gebied voor van altesame 9 km² langs die KwaZulu-Natalse kus tussen Warnerstrand en St. Lucia. 1 uit 8 van ons plantspesies is bedreig. Die broodboomgroep is ons mees bedreigde plantspesie. SA het 7 broodboomspesies waarvan daar minder as 100 bome oor…

2-4 Junie TOPS at Spar-wynskou, Durban  Die wynskou roem hom daarop dat hy meer as net ’n wynproe is – eerder ’n “vertoning”, die tema is nogal vintage-burleske... Ja, natuurlik kan jy proe ook – sowat 40 wynkelders van regoor die land stal hier uit (en hier’s kos ook) – maar maak ook ’n draai by een van die wynteaters om te kyk of jy kwalifiseer as “Superproewer”. Waar? Sibaya-casino, Sibayaweg, Durban Koste R120 aanlyn; R140 by die deur; R200 vir ’n naweekkaartjie. Kaartjies by itickets.co.za Tyd 5 nm.-9 nm. (2 & 3 Junie); 12 nm.-9 nm. (4 Junie) Meer inligting wineshow.co.za 5 Junie Oos-Randse Motorskou, Benoni As ’n klassieke motor of die gebrul van ’n enjin wat oorgedoen is, jou opgewonde maak, teken die skou…

Enigiemand wat al op wilde plekke soos Mabuasehube in Botswana of Gonarezhou in Zimbabwe gekamp het, weet hoe moeilik dit is om daarna tent op te slaan in ’n “gewone” kampterrein in ’n natuurreservaat. Skielik is dinge te bedrywig en beknop, en blouape en bokkies is nou maar eenmaal nie soos vars leeuspore voor jou tent nie... En boonop voel jou kar soos ’n voëlkou nadat jy op vrye voete was in ’n wildernisgebied. Maar jy hoef nie ’n Land Cruiser met ’n daktent te huur of ’n grenspos te trotseer om in die wildernis te kamp nie. Kom Kruger toe – die SANParke-ereweldwagters se Nyarhiboskamp is góéd wild. Parkeer jou bakkie, slaan jou koepeltent op en soek olifante! DAG 1 Koebaai, beskawing Hoe dikwels het jy nie al gewens…

DIE TOERPRYS SLUIT IN • ’n Toerleier en veldgids • Alle verblyf • Alle parktariewe • Drie heerlike etes per dag • Beddegoed en handdoeke • Tweerigtingradio’s TOERINLIGTING Datums 20-26 September 2016; 05-11 Maart 2017 Hoe lank is die toer? 7 dae, 6 nagte. Van waar vertrek die toer? Rhodes, Oos-Kaap. Eindpunt Lusikisiki, Oos-Kaap. Waar slaap ons? Beach-lodge-en-gastehuis. Prys R9 850 p.p.(30% ekstra vir enkelbesprekings); R9 950 vir die 2017-toer WAARVOOR SORG EK? • ’n 4x4 om mee te ry • Brandstof • Drankies en snoepgoed • Persoonlike toerusting DIE TOER IN ’N NEUTEDOP Dag 1 Ons kry mekaar laatmiddag by die Walkerbouts Inn op Rhodes. Dag 2 Ons verken die valleie in die omgewing en ry ook verby die Tiffindell-ski-oord. Dag 3 Ons mik na die Wildekus, en gebruik agterpaaie…

Groot, blink masjiene tol deur die lug. Elke nou en dan weerklink ’n gillekoor deur die stil naglug. Veselglasperdjies wieg ritmies op ’n mallemeule. Vreemdelinge bots gelate teen mekaar in stampkarretjies. En in die agtergrond hoor jy daai roomyskombi-klankbaan wat vir kinders onweerstaanbaar is en vir almal anders diep neuroties klink. Ek staan in dié kleurvolle warboel in die pretpark by die Grootfonteinskou in Namibië. Hier is ook hoëoktaanmasjiene soos die flikkerende Hyper X Extreme wat lyk asof hy jou in ’n ander bloedgroep in gaan spin. Maar die indrukwekkendste een is die Inverter – ’n monstermasjien wat sy 24 gillende insittendes op ’n duiselingwekkende 360°-draai deur die lug swaai. “Die kinders het die Inverter al gery dat hulle neuse bloei,” vertel Deon van Blerk, die skoukomitee se ondervoorsitter. En…

Met die grootste reeks 12V-ys-vrieskaste ter wêreld is National Luna die enigste kommersiële vervaardiger van veldryvrieskaste in SA,en die voorkeurverskaffer van al die grootste verskaffers van bos- en woonwaens. Dié debat is so oud soos die berge: Koop jy spesialistoerusting wat die taak uitstekend doen, of kies jy veeldoelige toerusting wat ’n paar dinge redelik goed doen, maar beteken jy moet meer toe-rusting saamdra? Jy kom dalk voor dieselfde dilemma te staan wanneer jy jou eerste 12 V-kampyskas koop, en moet kies tussen ’n model met afsonderlike ys- en vrieskompartemente, of ’n enkelkompartement wat net een van die twee funksies kan verrig. Soos met die meeste kamptoerusting is dit ’n kwessie van hoeveel plek jy het, hoewel daar tog ’n paar werkverrigtingfaktore is wat jy in ag moet neem. National…

Mahindra XUV500 Is jy van mening dat alle sportnutsvoertuie eenders lyk? Mahindra sal jou opinie stellig verander. Wat stilering betref, het Mahindra nog altyd van die norm afgewyk. Die eerste XUV500 wat in 2011 aan Suid-Afrikaners bekend gestel is, het ’n hele paar wenkbroue laat lig. Maar elke pot kry sy deksel en ook die XUV500 met sy eiesoortige kurwes het aanklank gevind by heelparty mense. Sanjoy Gupta, Mahindra Suid-Afrika se grootbaas, sê die 2016-model lyk vir hom soos ’n cheetah. Mnr. Gupta moet dalk ’n Weg deurblaai om te sien hoe ’n jagluiperd eintlik lyk, maar hy is heeltemal reg wanneer hy sê dat die XUV500 ongeëwenaarde waarde bied as dit by weelde teenoor prys kom. Vir heelwat minder as R400 000 kry jy ’n netjiese, gitswart binneruim met…

GIOVANNI’S, EIKENDAL- WYNPLAAS, STELLENBOSCH Goed, dis jou verjaardag en jy wil álmal nooi – enkellopende vriende én dies met ’n rits kinders... Bespreek ’n la-a-ang tafel op die grasperk onder die bome by Giovanni’s op die Eikendal-wynplaas. Dis die soort plek waar ’n middagete oorspoel in aandete, veral op ’n warm somersdag – die gras is groen, die bome hoog en skaduryk (sommige is selfs klimbaar), en die wyn yskoud. Hier is nie ’n tekort aan kindervriendelike eetplekke in die wynland nie, maar dikwels is die speelplek ’n entjie weg van die tafels af, of om ’n draai. Giovanni’s is van die min plekke waar ma’s en pa’s rustig ’n glas sauvignon blanc kan drink terwyl Jossie enkele meter weg van hulle tafel af by die glyplank probeer opklouter. Die…

Dit hael wraggies in die woestyn! Sowat 130 mm – dís hoeveel reën geval het in die Nossob-ruskamp in die Kgalagadi-oorgrenspark – in één uur! Op 7 April rondom 2.20 nm. het ’n hengse haelstorm losgebars. Haelballe – sommige so groot soos gholfballe – het neergekletter op voertuie, tente, bome en diere. (Terloops, terug by die huis het die versekering ons voertuig afgeskryf.) Die hael het die ablusieblok en winkel se vensters gebreek, windskerms versplinter, tente geskeur en gazebo’s verniel. Die wind het tafels, breekware, tentpenne en seilskerms tot sover as 50 m weggeslinger! Ongelukkig het van die kleiner diere, soos grondeekhorings, voëls en selfs ’n pofadder in die slag gebly. Die SANParke-personeel het ekstra tente opgeslaan en die nat klere en komberse is in die waskamer gehang. Kampeerders moes…

Nou kan jy nuwe herinneringe met hul eie klankbaan skep danksy Samsung se unieke Wireless 360° Audio klankstelsel. Dit sal jou in staat stel om topgehalte musiek te ervaar, reg deur jou hele huis. Hierdie innoverende, wêreldgehalte klanksisteem is ontwerp deur die voorste klanknavorsers en ingenieurs, en ontwikkel in Samsung se nuwe, revolusionêre klanklaboratorium in die V.S.A. Die Wireless 360° Audio klankstelsel sal selfs die mees kieskeurige musiekkenner tevrede stel. Met die Wireless 360° Audio het Samsung‘n klanksisteem ontwerp wat almal in ‘n vertrek toelaat om dieselfde, hoë gehalte klank te geniet. In teenstelling met gewone luidsprekers wat eenrigting klank projekteer, bied die Wireless 360° Audio hoë gehalte klank in alle rigtings. Ring Radiator tegnologie verseker dat die klank die hele kamer vul om ‘n voller, ryker oudio ervaring te…

‘Larry se plek lyk soos ’n chaotiese weergawe van ’n haarsalon uit die sestigerjare. Alles is vintage en half eksentriek.’ Terug van vakansie maak ek ’n draai by my barbier, Larry The Budget Barber. Larry se plek is naby die winkelsentrum se ingang, ingedruk tussen die selfhelp-wassery en die roltrappe. Jare lank het ek my hare by Mister Heinz se salon skuins oorkant die Naspers-sentrum in Kaapstad laat sny. Sy vaardige vingers het ’n vlymskerp skêr oor jou kop laat flits. Toe Mister Heinz middestad se kant toe skuif, is ek agterna. Dié ou Duitse vakman het my herinner aan oom Dries, wat ons laerskoollaaities se hare destyds op Wolmaransstad met dieselfde presisie gesny het. Al verskil is dat oom Dries jou wolkop met ’n outydse handknipper tot pynlik netjiese…

ALIDA HEINE Nikon D7100 Nikon 10-20 mm-lens ALIDA SKRYF: Ek het dié foto vroeg vanjaar geneem met sonsondergang in die Kokerboomwoud buite Keetmanshoop, Namibië. Ek het nie ’n driepoot gebruik nie, maar sommer gelê en die kamera op ’n klip gestabiliseer. My kameraverstellings was: lensopening f14, sluiterspoed 1/8ste van ’n sekonde en ISO 100. TOAST SÊ: Keetmans se Kokerboomwoud is een van daardie plekke waar jy byna ’n goeie foto gewaarborg is. Kokerbome sorg vir interessantste fatsoene, en in die andersins strak Namibiese landskap staan hulle behoorlik uit soos takkerige spuitfonteine op ’n dor vlakte. Tog moet jy sekere dinge reg doen. Kyk hoe troon Alida se boom uit bo die landskap. Hou jou horison dop wanneer jy ’n foto van ’n kokerboom neem. Laat die takke bó die horison…

Pikante pasmaats Party mense sê bier, veral boetiekbier, pas beter by kerrie as wyn, en dit kan dalk net waar wees. Dit beteken nie wyn werk glad nie saam met kerrie nie, maar onthou net dit het meer alkohol as bier; moet dus nie groot slukke vat nie. Die beste wynmaats vir enige sterk kos is halfdroog wyne met ’n bietjie oorblywende suiker om die brandrissiegeure te omvou en balans te gee. Hier is drie om te probeer: Baie mense vermy die gewürztraminer-variëteit, want hulle kan dit nie uitspreek nie. Dis egter een van die beste wynpasmaats vir sterk kos. (Jy sê dit so: guh-vertz-trameener.) Die Paul Cluver Gewurtz 2015 (R80) is ’n goeie voorbeeld: Dis net-net halfdroog en gevul met lietsjie-, roosblaar- en gemmer-aromas. Dit pas goed by Thai-seekoskerries…

Is jy skaam vir jou effe uitfokus-foto’s en dat jy soms iemand se kop afsny? Sit net een dag opsy en kom leer saam met die fotograaf Sam Reinders, Weg se vorige fotoredakteur. Dis eenvoudig: Jy bring jou eie kamera en ons leer jou hoe jou kamera werk, waarvoor elke knoppie is en hoe om die meeste uit jou kamera te kry. Of jy nou in die wildtuin leeus afneem of die kinders se verjaardagpaartie, ons het raad! Dit maak ook nie saak of jy ’n langlens of mik-en-druk het nie – jy gaan baie leer! WAAR KAAPSTAD JOOSTENBERG-BISTRO, STELLENBOSCH PRETORIA (PLEK SAL BEVESTIG WORD) WANNEER KAAPSTAD 23 JULIE 2016 | 21 JANUARIE 2017 PRETORIA 30 JULIE 2016 | 28 JANUARIE 2017 KOSTE R1 650 PER PERSOON, MIDDAGETE INGESLUIT WIL…

OP DIE DORP Sien jy kans om in ’n sel te slaap? Bespreek plek by Jail Bird, toeka se tronk. In Percystraat, met slaapplek vir ses mense; selfsorg. R200 p.p. 082 929 1219; meraai950@ gmail.com  (Marietjie Blignaut). Bespreek by dieselfde nommer vir die Sandsteen Kothuisies in Campbellstraat in die bodorp. Hier is drie kothuise met slaapplek vir twee mense elk teen R300 p.p. en elkeen het sy eie braaiplek. WEG SE KEUSE Die Stasiemeester in King Edwardstraat is ’n selfsorghuis met drie slaap- en twee badkamers en ’n beskutte braaiplek buite. R350 p.p. 082 809 7962; stoffberg@ megaweb.co.za  (Marjorié Stoffberg) Outside Inn and Innside Out in King Edwardstraat het nege dubbelkamers waarvan agt en suite is. Sommige het ’n stoepie. Vanaf R400…