Indholdsfortegnelse for August 2019 i Weg!

Weg-lesers ervaar ons land deur die oë van ons skrywers: Of dit nou ’n blommetoer deur Namakwaland of ’n besoek aan die Bergkwagga- nasionale park in die Oos-Kaap is. En baiekeer volg julle in ons voetspore – met die tydskrif as gids – omdat die lees ’n nuuskierigheid oor ’n spesifieke plek in julle gemoed losgewikkel het. Maar dis net so lekker om as passasiers die wêreld saam met julle te verken, die verafgeleë plekke waar ons dalk nooit gaan kom nie (maar bittergraag wil): Patagonië, Turkye, Nepal, Viëtnam, Portugal, Noorweë. Daar gaan nie ’n week verby dat ons nié ’n foto ontvang van ’n leser wat êrens in die wêreld met ’n Weg in die hand breed glimlag nie. En ons besef weer ons lesers skrik nie vir ’n…

Die Groot Vyf van die naghemel In Suid-Afrika het ons die Groot Vyf op die grond – hoekom nie ook in die hemelruim nie? Daarom het die Astronomievereniging van Suider-Afrika (ASSA) die “Big Five of the African Sky” geskep, kompleet met ’n webruimte ( assa.saao.ac.za) oor hoe jy die vyf kan opspoor. Elkeen van die Groot Vyf is ’n uitstekende voorbeeld van die vyf hemelliggame wat die verskillende voorwerpe die beste uitbeeld: Suidelike Plejades (oop sterswerm); Omega Centauri (bolvormige sterswerm); Eta Carinae (’n helder newel); Kolesak (’n donker newel) en die Melkweg (sterrestelsel). Augustus is ’n goeie maand om al vyf af te merk. Begin jou speurtog sodra dit donker word. Probeer wegkom uit die stad uit – lugbesoedeling is vir sterre soos lang gras in die Kruger. Jy kan…

Die meeste slangbyte gebeur snags en in die somer – die slagoffer trap per ongeluk op die niksvermoedende reptiel. Wees versigtig: Dra altyd skoene en hou ’n flits byderhand. Maar indien ’n slang iemand pik, kry die persoon so gou as moontlik by die naaste hospitaal, en bly kalm. Dit geld vir álle slangbyte – jy dink dalk dis ’n molslang, maar dan’s dit ’n jong kobra. Swartmambas en Kaapse kobras se byt is neurotoksies – dié soort gif verswak die liggaam stelselmatig en kan asemhaling beïnvloed. Die proses kan tussen 1½ tot 6 uur duur; daar was al gevalle wat dit binne ’n halfuur gebeur. Slagoffers moet dringend by ’n hospitaal uitkom en aan ’n asemhalingsmasjien gekoppel word. Indien julle op ’n afgeleë plek is, draai ’n immobiliserende drukverband…

Losing Earth deur Nathaniel Rich Picador, R330 In Augustus 2018 het The New York Times Magazine ’n grensverskuiwende artikel van 30000 woorde (ja, jy’t reg gelees...) gepubliseer. Dié artikel, Losing Earth –The Decade We Almost Stopped Climate Change, was ’n omvattende navorsingsprojek wat 18 maande geduur het. Dit fokus op ’n groep Amerikaanse wetenskaplikes, aktiviste en politici se pogings tussen 1979 en 1989 om ’n klimaatsverwarmingkatastrofe te voorkom. Die skrywer, Nathaniel Rich, het byna oornag ’n invloedryke stem in die debat oor klimaatsverandering geword. Die reaksie op sy artikel was oorweldigend en ’n dokumentêre TV-reeks word tans vervaardig. Nou het Rich sy artikel uitgebou tot ’n boek wat in groter detail na hierdie belangrike era in ons onlangse geskiedenis kyk – en die groot kans wat verspeel is. Een van…

Paryse dagboek deur Jan Rabie (versorg deur André P. Brink) Human & Rousseau, 1998 Maart 1948, 27 jaar oud. Skeepskaartjie en £150 in my sak, kamera, tikmasjien, woordeboeke, tot ’n donker kerkpak (my aandpak het ek net betyds op die kaai verkoop). Bors uit, ken omhoog, skoon arrogant van nuuskierigheid. Twee weke ter see, tyd genoeg om verlief te raak, maar darem vry te bly. Al warmer en toe al killer dae. Las Palmas. Southampton. Calais. Europa. Afrika, my moeder; Europa, my springlewendige ouma. Mensdom, wat ’n leerskool was dit nie vir my nie! […] Die eerste dag het ek my bagasie in Gare St. Lazare gelos, ’n ete met ’n heel bottel wyn weggeslaan – die kelner kon nie verstaan dat ek net ’n halfbottel wyn wou hê nie…

MATJIESFONTEIN Die De Lande-gastehuis (slaapplek vir 8), Jan Voorman se huisie (slaapplek vir 4), ’n pikante rooi huisie op sy eie in die veld, en die Matjiesfontein-gastehuis (slaapplek vir 2) word bedryf deur Papkuilsfontein; dus kan jy dieselfde vyfster-bederf hier verwag. Koste De Lande en Jan Voorman: R1 150 p.p.; Matjiesfontein: R1 335 p.p. Dit sluit ’n driegangmaaltyd en ontbyt in. Waar? Sowat 14 km suid van Nieuwoudtville op die Suidbokveldpad. Kontak 072 555 1416; papkuilsfontein.com BLOMROETE Ry die Matjiesfonteinroete (13 km) verby plate gousblomme op die landerye en verskeie soorte bolplante soos aandblomme, satynblomme en katsterte verder veld-in. Oop vir dagbesoekers. Dit kos R25 p.p. en R150 vir ’n begeleide toer. Kontak vooraf vir Leana van Wyk as julle ’n groot groep is. 027 218 1217; 082 813 2805…

Agter links staan Shaun Puffett en Donna Hoppe met Rebecca Hoppe (10), en agter regs staan Tania en Emile Bessinger met Mila (13). Voor sit Aaron Hoppe (12) en Luka Bessinger (10). Hulle is almal van Port Elizabeth. “Dis ons eerste keer hier, en ons geniet dit nogal! Ons wens net ons het ’n 4x4 gehad sodat ons oral kon ry. Die kampterrein is veilig vir die kinders, want hier’s ’n draad rondom. Die swembad is lieflik, asook die piekniekplekke elders in die park. “Ons groep reis sowat drie of vier keer per jaar saam. Omdat ons by die see bly, verkies ons om bos toe te gaan, of plase te besoek. Dis net lekker om in die natuur te wees! Ari (sr.) & Ari (jr.) Bezuidenhout, Port Elizabeth &…

Min mense kry ooit die voorreg om ’n Afrika-wildehond te sien. Dié diere word gesien as gespuis en daar word voortdurend jag gemaak op hulle. Binne minder as ’n eeu het die getal wildehonde van ongeveer 500 000 afgeneem tot 6 000 . Onlangs het gerugte die ronde gedoen dat dié spesies tot wolwe herdoop gaan word omdat die naam “wildehonde” hulle in ’n negatiewe lig plaas. “Indien almal na hulle verwys as skilderwolwe, sal dit ’n verskil maak aan hulle reputasie én oorlewing,” het sir Richard Branson gesê oor sy gunstelingdier. Bewaringskundiges wat hulle vir wildehonde se saak beywer, is egter bekommerd dat die naamsverandering die saak skade kan doen. Die fotograaf Villiers Steyn is ’n aanhanger van dié honde ongeag hulle naam. Baie jare al werk hy as…

JBL Endurance Sprint-oorfone Jou oor is amper so uniek soos jou vingerafdruk. Die oorfoon wat vir my knus pas, pas dus nie noodwendig vir die volgende ou nie. Hierdie paar is spesifiek ontwerp vir sport, maar jy kan dit natuurlik by die werk of gim ook dra. Eerstens is dit ten volle waterbestand; dus kan jy laat waai op ’n reëndag ook. Twee-dens het dit ’n Twist-Lock, wat verseker dat die oorfoon perfek in jou oor pas. Dit sal nie uit jou ore val as jy Saterdagoggend die park run gaan doen nie. Die twee oorstukke is verbind met ’n liggewig kabel wat in jou nek rus. Dis ook slim genoeg om vanself af te skakel wanneer jy dit nie gebruik nie. R700 by Sportsmans Warehouse Body Glove Endurance Sport…

ROETE 1 DIE LAASTE 115 KM VAN DIE FRANSE WEG Wanneer? 2 tot 11 September Koste Vanaf R23 285 In ’n neutedop Daar is minstens sewe Camino-roetes, maar die Franse Weg bly loshande die gewildste. Meer as 250 000 pelgrims stap jaarliks hierdie roete wat by St. -Jean-Pied-de-Port in Frankryk begin en oor die dwarsste van noordelike Spanje loop. As jy net een Camino in jou lewe gaan doen, moet jy hierdie een kies. WAT BEHELS DIE TOER? Dag 1 Vertrek uit Suid-Afrika Dag 2 Land in Porto, Portugal, waarvandaan die groep per bus die sowat 300 km na Sarria geneem word. Die stap begin die volgende oggend in dié pragtige dorpie en jy’s dadelik omring deur verskeie geboue wat besondere betekenis dra. Hier’s ook winkels waar jy Camino-aandenkings of…

• ZAMBESIRIVIER BY LIVINGSTONE • KASANKA- NASIONALE PARK • BANGWEULU-VLEILANDE • KUNDALILA-WATERVAL DATUM  1-15 November 2019 (15 dae, 14 nagte) BLYPLEK  Tente KOSTE  R26 392,50 per volwassene; halfprys vir kinders jonger as tien; maksimum agt voertuie INGESLUIT • Tweerigtingradio’s vir alle voertuie • Spesialisgids en bemanning • Alle kamp- en toegangstariewe • Tente en kamptoerusting • Driee maaltye ’n dag, plus koffie en tee WAT MOET EK BRING? • Eie voertuig en brandstof • Matras, opslaanbed en slaapsak • Drankies en padkos • Reisversekering en mediese ontruimingsversekering is verpligtend • Grenstariewe en padbelasting Bespreek nou! 044 535 9033 bookings@bhejane.com; bhejane.com…

Op Graskop sien ’n mens hoofsaaklik vier soorte verkeer in die strate: Oorsese toeriste op pad na Harrie’s Pancakes; curio-verkopers wat dié toeriste se aandag probeer trek; oorlaaide houttrokke wat deur die dorp rammel; en koeie. Ek staan in die Sunlight Art Gallery in Hoofstraat; ’n bees drentel verby. Griet van der Meulen, die galery-eienaar, ook bekend as Griet van Graskop, bars uit van die lag toe die koei stilstaan op die sypaadjie, geraam deur die winkelvenster. Is dit nou lewende kuns? “Toe ek jonk was, het ek myself belowe ek gaan wegkom uit dié dorpie,” sê Griet laggend. “Maar om eerlik te wees, dit voel amper asof die plek aan my behoort. My oupagrootjie was immers een van die stigters.” Max Leibnitz het in 1889 uit Duitsland gekom. Hy…

Ek is in KwaZulu-Natal gebore en getoë. My grootouers het ons kleinkinders van vroeg af reeds geleer om lief te wees vir die bos. Ná universiteit het ek as gids by &Beyond in die Phindawildreservaat in KZN begin werk. Later het ek drie jaar in Sabi Sand as gids gewerk voordat ek weer stad toe getrek het. Die afgelope vier jaar werk ek as ’n private gids. Ek en ’n vriend bedryf ’n safari-maatskappy Escape Safari Co wat luukse safari’s in Afrika aanbied. Elke dag is verskillend en geen twee wildritte is dieselfde nie. Die bos stimuleer my geweldig en my loopbaan as gids is baie bevredigend.…

Aangesien daar al toeriste-aanvalle in die verlede was, is die Egiptiese polisie paraat. Daar is oral padblokkades: Jou paspoort en voertuiglisensie word nagegaan, en die voertuig word deursoek. Ons moes drie keer met polisiebegeleiding reis. Dis effens irriterend, want jy kan nie foto’s neem waar jy wil nie. Jy het die reg om nee te sê vir sekerheidsbegeleiding – jy moet dan net ’n vorm teken. Vra daarvoor by ’n padblokkade. Ons het plaaslike SIM-kaarte gekoop en ons selnommer aan beamptes gegee by elke padblokkade. Hulle het ons wel op die vreemdste tye in die nag gebel. Maar, buiten die aand met die Soedannese myners, het ons nooit onveilig gevoel nie.…

Ken jy die omgewing? Ja! Ek het in Nelspruit grootgeword. Ek en my man het onlangs teruggekeer nadat ons agt jaar op Makhanda (Grahamstad) gewoon het. Ons bly nou op ’n plaas ’n uur en ’n half buite Graskop. Ek ken dus die meeste watervalle – ons gesin het gereeld hier kom uitspan. Tog was die Lisbon- en Motitsi-waterval nuwes wat ek van my lys kon afmerk! Die atmosfeer op Graskop is ... Graskop lyk soos ’n rustige plattelandse dorpie, maar as jy jou weer kom kry, wemel dit van toeriste en aktiwiteite. En soos die meeste plattelandse dorpies lok dit allerlei interessante karakters en kunstenaars. Die eienaar van Joe Bangle’s Leather Craft, Joe Risseeuw, dra altyd net ’n sarong om sy middel en ’n moonbag. Die storie loop dat…

NUWEMAAN 1 & 30 AUGUSTUS SPRINGGETY: 2 AUGUSTUS HOOGGETY: 4.02 VM. & 4.27 NM. VOLMAAN 15 AUGUSTUS  SPRINGGETY: 16 AUGUSTUS HOOGGETY: 3.45 VM. & 4.06 NM. EERSTE KWARTIER 7 AUGUSTUS DOOIEGETY: 7 AUGUSTUS HOOGGETY: 8.10 VM. & 8.36 NM. LAASTE KWARTIER 23 AUGUSTUS  DOOIEGETY: 23 AUGUSTUS HOOGGETY: 7.50 VM. & 8.24 NM. Hierdie is die hoogwatertye vir Kaapstad. Vir ander plekke tel jy die minute by of trek dit af (let wel, hierdie is benaderde tye): Saldanha: +5; Hermanus: -4; Port Elizabeth: +19; Durban: +26 Bron Gety-inligting met die vergunning van die Hidrograaf, SA Vloot. Die Hidrograaf is nie verantwoordelik vir enige transkripsiefoute nie. sanho.co.za SONOP & SONSONDER (16 AUGUSTUS) Kaapstad 7.24 vm. en 6.17 nm. Bloemfontein 6.47 vm. en 5.52 nm. Johannesburg 6.36 vm. en 5.48 nm. Durban 6.29…

Waarom was dit vir jou belangrik om hierdie boek te skryf? Karel Schoeman en ander skrywers het Philippolis se aanvangsgeskiedenis deeglik vasgepen, maar die latere geskiedenis (tot die onlangse verlede) is grootliks nog nie geboekstaaf nie. Ek wou hulde bring aan Philippolisers wat nog leef en steeds diep spore in die samelewing trap. Die boek is daarom opgedra aan my ouers, Jens (77) en wyle Naómi Friis. My pa woon steeds op die dorp – hy bestuur Die Groenhuis-gastehuis. Wat was vir jou die lekkerste deel van die navorsings- en skryfproses? Skryfwerk maak jou sigbaar aan jouself. Deur brokstukke inligting, foto’s en ervarings te orden en in konteks te plaas verduidelik ’n mens ál skrywend dinge omtrent jouself en die wêreld waarin dit afgespeel het. Dít verskaf aan my ’n…

Antjie se eetplek Moenie vyfstermaaltye verwag nie; dis waarskynlik die kleinste eetplek op die dorp met net ’n paar tafels op die stoep en een of twee binne. Oorweeg gerus die steak roll: twee dik snye gebotterde brood met ’n stukkie steak tussenin. Smidswinkel-restaurant Die blomme doen eintlik eers sake ná 10 vm. as die son hoog sit; dus is daar tyd vir ’n behoorlike ontbyt op die dorp: eiers, worsies, spek en roosterbrood (R100 p.p.). Jy betaal ’n heffing om in die tuin te sit, maar binne heers ’n gawe atmosfeer met vlae wat uit die dak hang, saam met kuns en ou boeke teen die mure. 027 218 1535 1897 Nedersettinggastehuis-en-restaurant Smul aan ’n stuk wortelkoek terwyl die eienares, Wessie van der Westhuysen, jou meer van die blomme…

Enige fotograaf wat sy sout werd is, sorg dat sy toerusting beskerm word. Jy kan jou kamera en lense veilig hou in hierdie sak van seil met ’n sagte binnevoering. Een gelukkige Weg-leser kan volgende maand só ’n sak wen. Hoe? Stuur eenvoudig jou beste reis- en natuurfoto’s na menseselense@weg.co.za – ons kies die wenner, wat in “Mense se lense” gepubliseer word. Dié produk is beskikbaar by winkel.weg.co.za…

Gestopte picanhasteak Dié sappige stuk vleis is gewild in Brasilië en jy sien dit ál meer hier in die slagter se venster. Dié driehoekige homp vleis word gesny van die bopunt van die kruisskyf (rump) en of jy dit heel gaarmaak of in steaks sny, dis koningskos. Vir 8 Voorbereiding 20 minute Gaarmaaktyd 45-60 minute Jy benodig • 1 picanha-roosterstuk van sowat 1,2 kg • sout en varsgemaalde swartpeper • sowat 8 sondroogtamatiekwarte in vinaigrette, fyngekap • ½ koppie volvetroomkaas • 250 g spekrepe, brosgebraai Só maak jy 1 Steek solank die vuur aan in die ketelbraai, want jy gaan nou-nou kole nodig hê. 2 Sit die picanha met die vetkant na bo op ’n skoon kapplank. Sny met ’n skerp mes ’n geruite patroon in die vet (moenie deursny tot ín die vleis nie).…

Ondanks die feit dat Subaru ’n relatiewe klein motormaatskappy is, het hy deur die jare ’n legendariese reputasie opgebou danksy veldrenne, vinnige straatkarre met groot luginlate op die enjinkap, en kanniedood stasiewaens. Die onder-die-radar Forester was nog altyd ’n gunsteling onder veral motorjoernaliste, en die goeie nuus is dat die nuwe model in elke opsig beter is as sy voorganger... met een uitsondering. Eerstens is die motor binne en buite opgekikker. Selfs die mees geharde Scooby-fanatikus moet erken dat die Forester nou nie juis die aantreklikste motor ooit is nie. Die nuwe een is ook nie ’n Michelangelo-skepping nie, maar die funksie het nog altyd die vorm oortref. Die verbeteringe help om alles op ’n meer gesofistikeerde en doeltreffende wyse te laat saamwerk – van die kontroles op die stuurwiel…

Verken die Okavangodelta, die groot riviere van die Caprivistrook en die magtige Victoriawaterval. Ons kundige gidse sal seker maak dat jy ten alle tye veilig, gevoed en gemaklik is. Hierdie selfrytoer is van die gewildste toere wat Bhejane aanbied. Die rede is eenvoudig: Jy ervaar ’n ware Afrika-avontuur teen ’n redelike prys, en jy het geen spesiale ryvaardighede nodig nie. Saam reis ons van die uitgestrekte Makgadikgadipanne om die Okavangodelta en op met die Pypsteel. Ons vertoef by die geheimsinnige Tsodilo-koppies, ’n wêreldbekende rotskunskol. Dan ry ons oos deur die Caprivi in Namibië en terug na Botswana oor die indrukwekkende Victoriawaterval in Zimbabwe. Die toer eindig met ’n bootreis op die Choberivier, waar jy ’n skemerkelkie geniet terwyl die olifante bad. Bhejane voorsien al die kamptoerusting, en slaan self kamp…

DLINZA- VERHEWE WOUDPLANKIESPAD, ESHOWE Ontsnap uit die humiditeit van die Noordkus en verken die binnelandse heuwelwoude buite die suikerrietdorp Eshowe. Gewoonlik kan ’n mens net die vloer van ’n woud verken en jy moet jou nek behoorlik strek om iets in die boomtoppe te gewaar. In dié woud kan jy midde-in daai boomtoppe stap op ’n stewige plankiespad van 125 m. Op die plankiespad kan jy ’n gans ander deel van die inheemse woud van 250 ha ervaar. Hier is ’n verstommende verskeidenheid voëls en heelwat klein diere wat hier woon. En hier’s nog ’n stuk geskiedenis ook: Blykbaar het koning Sjaka desjare vroue en kinders hier versteek toe sy vyand Zwide hom wou aanval. Jy begin stap op die welige woudvloer waar blouduikers rondtrippel, dan klim jy al in…

Canimambo Restaurant Die Portugese en Mosambiekse restaurant roem hom daarop dat hy die “hottest spot op Graskop” is. Die peri-peri-smeer saam met die komplimentêre broodmandjie bevestig dit – pasop vir hom! Die kos is smaaklik en bekostigbaar: ’n Romerige peri-peri-hoenderlewervoorgereg kos R68 (sterk, medium of matig) en ’n Portugese hamburger met gebraaide uie, chorizo, pesto-mayonnaise en tjips R95. Oop Elke dag van 11 vm. tot 9 nm. (van 12 vm. af op Vrydae) Waar? Hoek van Louis Trichardt-laan en Hoofstraat Kontak 013 767 1868; canimambo-restaurant-graskop. business.site Divine Foods at The View Dié eetplek het een van die beste uitsigte op die dorp, en die kos is nie te versmaai nie. Die restaurant is op die perseel van die Panorama Chalets and Rest Camp (sien blyplekke). Dis langs die swembad, wat…

Weg-joernaliste kan nie uitgepraat raak oor die Richtersveld in die Noord-Kaap nie. Hier vind ’n mens jou siel tussen die rotsknoetse en hoë kranse, sê hulle. Maar as gasskrywer kan ek eerlik wees: Die Richtersveld is ’n droë, stowwerige plek en so warm soos die hel. Trouens, in die middel van die dag is dit só malwarm jy kan net een van drie dinge doen: In die Oranjerivier dobber soos ’n opgeblase baber, in jou voertuig sit met die lugreëling op volsterkte of in ’n rots se skaduwee wegkruip. Tog, om die een of ander duistere rede, keer ek telkemale terug na dié ongenaakbare woesteny. As ek my kom kry, sit ek wraggies weer in die Kokerboomkloof-kampplek en wag dat die son sak sodat ek skaars geitjies met ’n kollig…

Ons het geweet Egipte gaan nie maklik wees nie. Omkopery (baksheesh) is net een van die uitdagings wat ons die hoof sou moes bied. Nadat ons wyd aanlyn oorlandforums gelees het, het ons geweet grenskruisings sou moeilik wees, dat ons oral kwanselaars sou teëkom en dat ons waarskynlik nie altyd veilig sal wees nie. Ons is ook aangeraai om nie alleen deur die Sinai-skiereiland te ry nie, en dat die Oase-roete (die mooiste woestynroete wat jou van een oase na ’n volgende neem) gevaarlik is – jy het militêre begeleiding nodig, volgens die forums. Tog het dinge goed vir ons verloop. Ons het dit maar toegeskryf aan ’n positiewe houding en ’n tikkie geluk. Binne net een uur het ons ons visums gekry van die Egiptiese konsulaat in die kusstad…

My hart is seer. Dit voel asof ek ’n dringende hartoorplanting sonder enige verdowing of narkose ondergaan het. Verlede week kom ek ouder gewoonte ná ’n lang dag by my woonstel aan. My voorkop is klam soos nat biltong en my enkels wankel onder my XL-lyf. Ek is moeg. Ek het verskeie rituele wat op dae soos dié in werking tree. ’n Soort doenlys wat ek afmerk – die proses help my om van die dag se stres ontslae te raak. Ek skakel gewoonlik eers die ketel aan en maak die agterdeur oop. Dan skakel ek agtergrondmusiek aan (so ’n bietjie David Gray, dalk...) en soek iewers ’n wierookstokkie om aan te steek – net vir ’n tikkie atmosfeer. Dan raak ek rustig, tensy daar ook toevallig ’n bottel whisky…

Anne Briggs deur Anne Briggs R39 by Google Play Store Deesdae kan jy van musiekstroming gebruik maak en danksy algoritmes na ’n eindelose vloei van musiek luister, gegrond op jou gunstelingtandepasta of wat jy laas by Build It gekoop het. Maar die gevolg is dikwels dat jy maar net na meer van dieselfde – dikwels méér vervelige – musiek van kunstenaars in dieselfde genre luister. Daarom is dit goed om elke nou en dan eerder self na van die albums te luister wat vroeër ’n genre help vestig het. Wanneer dit kom by Britse folk, is Anne Briggs omtrent so na as wat jy aan die “bron” sal kom. Sy is ’n kluisenaar en het dekades gelede al van die musiektoneel verdwyn. ’n Nuwe heruitreiking van haar gelyknamige album…

Was jy op ’n vakansie wat jy dink ander Weg-lesers ook sal geniet? Skryf oor die ervaring en ons publiseer dalk jou storie. Hou dit asseblief kort (maksimum 1 500 woorde) en stuur ’n paar voorbeeldfoto’s. As ons wel besluit om die storie te gebruik, gaan ons oorspronklike hoëresolusiefoto’s nodig hê; maak dus seker jou kamera is op die regte verstelling. Stuur jou storie na redakteur@weg. co.za. Ons behou die reg voor om jou foto’s elders in die tydskrif, op ons webblad of in bemarkingsmateriaal te gebruik. Lees die bepalings en voorwaardes by weg.co.za…

HOEKOM? Ons plaas elke maand ’n keur van lesersfoto’s. Moenie skaam wees nie – krap ’n bietjie daai foto’s uit wat jy op jou rekenaar opgaar en stuur hulle vir ons! WAT? Ons hou van omtrent énigiets: natuurlewe, landskappe, portrette, vakansiefoto’s of goggas en blomme in jou tuin. HOE? Stuur jou beste foto’s na menseselense@weg.co.za Moenie lêers stuur wat groter as 4 MB is nie – as ons ’n groter weergawe soek, sal ons daarvoor vra. Gee die fotograaf se naam, van, tuisdorp en kontaknommer. Stuur ook inligting oor waar en hoe die foto geneem is en watter toerusting gebruik is. As jy die foto op enige manier gemanipuleer het, vertel ons wat jy gedoen het. DIE FYNSKRIF Ons behou die reg voor om jou foto’s elders in die tydskrif, op…

Ek glo ’n mens kan ’n plek besoek deur net van sy wyn te drink, veral as dit ’n ongewone en eksotiese wyn is. Die meeste van ons is bekend met cabernet, chardonnay en sauvignon blanc, maar hoeveel van ons het al cinsault, grenache en trincadeira probeer? Namate klimaatsverandering ’n al hoe groter kwessie word, behoort ons dié variëteite te verken, want hierdie druiwe is taai. Probeer ’n bietjie dié nuwe geure: Die Steenberg Ruby Rosé 2018 (R93) is lekker en droog, vol rooibessies, en met ’n gawe skoot cinsault. Dis vars en pikant en ’n goeie pasmaat vir sushi of ’n ligte hoendergereg. Wit druiwe word maklik deur die weer beïnvloed, en daarom gebruik wynmakers deesdae innoverende wyn wat nie net van ’n enkele oes gemaak word nie. Die…

Jy kan baie lank praat, en praat, en práát oor jy lus is om ’n bietjie pad te vat. Maar dóén? Nee, dan kom die verskonings vinnig: Jy het werk wat jy moet klaarmaak, die kinders moet iewers wees, brandstof is duur... Maar jy hoef nie altyd drie weke lank weg te gaan om daardie gevoel van die ooptes van die pad te ervaar nie. Ja, dis lekker om te weet jy gaan hierdie jaar Namibië toe, dat jy die B1 onder die wiele gaan hoor fluit anderkant Keetmans, of dat jy jouself later op die D707 gaan bevind, met die Namib wat na een kant lê, en die Tirasberg na die ander. Jy hoef nie eens altyd vir ’n langnaweek weg te gaan nie, want al roep die Tankwa,…

Dié toer is saamgestel deur Bhejane en die spesialisgids Cronje Wessels. Dit neem jou in ’n wildernis van woude, vlaktes, mere, riviere en moerasse. Die avontuur begin in Livingstone en volg die Great North Road eers na die Kasanka- nasionale park en dan verder noord na waar die water letterlik die lugruim ontmoet. Hoewel dit een van Zambië se kleinste nasionale parke is, is Kansanka die tuiste van ’n diverse reeks diere, insluitend die skugter sitatunga, Afrika se raarste wildsbok. Dit het homself aangepas om by die wateromgewing aan te pas. Dis hier waar een van die skouspelagtigste migrasies in die wêreld plaasvind: Tussen Oktober en Desember migreer miljoene vrugtevlermuise uit oral in Afrika na ’n moeraswoud in die noorde van die park. Van Kasanka af reis ons noordooswaarts na…

11 dae/10 nagte (tent verblyf) Beginpunt Lethlakane, Botswana Eindpunt Kasane, Botswana DATUMS EN KOSTE 8 -18 Oktober 2019, R14 938,50 per volwassene; halfprys vir kinders jonger as tien 21-30 Maart 2020 R15 950 per volwassene; halfprys vir kinders jonger as tien INGESLUIT • Die dienste van ’n ervare veldgids • Tweerigtingradio’s in alle voertuie • Alle kamptariewe, toegangstariewe en geadverteerde aktiwiteite • Alle tente en kamptoerusting, asook breekgoed en eetgerei • Drie maaltye per dag, en koffie en tee elke dag WAT MOET EK BRING? • Jou eie voertuig en brandstof • Slaapsak, matras, kampstoele en ’n kamptafel • Padkos en drankies • Reisversekering en versekering vir noodontruiming (verplig) • Jy is verantwoordelik vir grenspostariewe en padbelasting BESPREEK NOU! 044 535 9033 bookings@bhejane.com; bhejane.com…

Stap, hardloop, trap ’n fat bike... Bring die kinders. Bring die hond. Die 6 km strandlangs tussen die kusdorpe Umhlanga en Umdloti noord van Durban kan op verskeie maniere verken word. Wandel rustig of laat die hartspoedmeter werk en draf soontoe en terug (12 km). Of maak ’n oggenduitstappie daarvan: Las ’n voetpaadjie deur die Umhlanga Lagoonnatuurreservaat én ’n welverdiende ontbyt by Caffé Java op Umdloti by (hoe klink rogbrood met geposjeerde eiers, roomkaas en avokadopeer?). Sodra jy deur die hek van die reservaat stap, kronkel ’n plankiespad voor jou uit. Dié 26 hareservaat is ’n belangrike bewaringsgebied vir vleiland- en kuswoudspesies soos reusereiers, blouduikers en mambas. Die plankiespad slinger tussendeur matjiesgoed en riete. uMhlanga beteken glo “plek van riete”, maar dié arme riete staan gebukkend; hulle nekke gebreek deur…