Finweek - Afrikaans 11-may-17

in 2005 is ek as junior tegnologieverslaggewer na Tunisië om verslag te doen oor ’n VN-konferensie oor die inligtingsamelewing. ’n Hoogtepunt was die bekendstelling van die “Een skootrekenaar per kind”-inisiatief wat daarop gemik was om ’n goedkoop en betroubare skootrekenaar met – die heel belangrikste – ’n internetkonneksie aan elke kind in die ontwikkelende wêreld te gee. Die internet is die potlood van die toekoms, het iemand gesê, en elke kind moet toegang tot een hê. Dit het baie ambisieus geklink – persoonlik kon ek nie ’n skootrekenaar bekostig nie, wat nog een met internetkonneksie. Om artikels van daardie konferensie te stuur was afhanklik van die toestand van die hotel se antieke lessenaarrekenaar met ’n Franse sleutelbord en onbetroubare internetkonneksie. Ek is hieraan herinner toe ek in die afgelope twee…

Wanneer jy moeg gehuil is oor wat in ons geliefde land aangaan, is al wat oorbly om te lag. Dis vir jou Suid- Afrika, waar daar veel is om oor te lag, veral omdat ons politieke leierskap klaarblyklik in ’n klugspel ontaard het. Onlangs is die hoofrolle in dié klugspel vertolk deur die geskorste hoof van die Valke, Berning Ntlemeza, en die minister van polisie, Fikile Mbalula. Ntlemeza het – tot Mbalula se afgryse – ’n hofbevel en die minister se streng opdrag om weg te bly verontagsaam deur steeds ongenooid by die Valke se hoofkantoor op te daag. Die hof het vroeër Ntlemeza se aansoek om verlof tot appèl teen die tersydestelling van sy aanstelling van die hand gewys. Mbalula het in ’n perskonferensie op 25 April sy weergawe…

transparency International publiseer ’n jaarlikse korrupsiepersepsie-indeks (KPI) wat “waargenome vlakke van korrupsie, soos bepaal deur deskundige evaluasies en meningsopnames” in 175 lande meet. Die KPI se definisie van korrupsie is die wangebruik van openbare mag vir private voordeel. Dit fokus dus hoofsaaklik op korrupsie in en deur die openbare sektor. In 2015 het Suid-Afrika die 61ste plek onder 168 lande beklee met ’n telling van 44 uit 100. ’n Telling van 100 beteken dat ’n land bykans geen korrupsie het nie en ’n telling van 1 beteken die land is heeltemal korrup. Wat veral ontstellend in Suid-Afrika is, is dat senior politieke leiers hul magsposisies en verdagte metodes gebruik om hulself te verryk deur byvoorbeeld tenders aan familielede toe te ken, en staatsgeld te gebruik vir hul persoonlike behoeftes. Willie…

die woord nasionalisering word deesdae toenemend roekeloos gebruik in Suid-Afrika. Die basiese definisie daarvan is om ’n belangrike deel van die nywerheid of handel van private na staatseienaarskap of -beheer oor te dra. Party mense wil banke, myne en grond nasionaliseer; ander wil hê dat die staat sy eie weergawes van sekere entiteite stig, en vergeet dalk dat daar reeds ondernemings in staatsbesit op dié terreine is, soos die Ontwikkelingsbank van Suider-Afrika en Alexkor. Dit is waarskynlik nuttig om eers te dink aan hoekom regerings by die nywerheid betrokke raak. Die hoofrede, en na my mening die enigste geldige een, is dat die staat betrokke raak by sektore waarby die private sektor nie betrokke wil raak nie. Dit is gewoonlik in sektore waar die private sektor - wat aanspreeklik is…

“OM INSTELLINGS OP TE BOU, VERG TYD. OM DIT TE VERNIETIG, IS OORNAG MOONTLIK.” − Pravin Gordhan, voormalige minister van finansies, in ’n wydlopende onderhoud met Daily Maverick oor sy en sy adjunk Mcebisi Jonas se ontslag, waarná twee kredietgraderingsagentskappe Suid-Afrika tot rommelstatus afgegradeer het. Die herskommeling het ’n “ontwrigtende invloed op senior personeel by die tesourie gehad, en wanneer Fuzile (die lank dienende direkteur-generaal Lungisa Fuzile) later vandeesmaand weggaan, sal dit nogmaal ’n negatiewe uitwerking hê,” het Gordhan volgens Daily Maverick gesê. “Die gevaar dat ons ontsetel sal word, is groter wanneer ons verdeeld is. Faksievorming dwarsboom ons missie om in die behoeftes van ons mense te voorsien.” − Zweli Mkhize, tesourier-generaal van die ANC, het betogers by Cosatu se Meidagvieringe in Kaapstad gewaarsku dat as die party en…

die Mededingingskommissie is van mening dat deregulering van die prys vir vloeibare petroleumgas (LPG) tot groter mededinging en laer pryse vir verbruikers kan lei, wat die opname van die produk sal bevorder. Hy sê egter die Suid- Afrikaanse LPG-mark is nog nie gereed vir deregulering nie. Hy doen trouens ’n beroep om meer kontrolering en regulering. ’n Opname van die departement van energie in 2012 toon aan dat slegs ’n klein aantal hoë-inkomstehuishoudings gas vir kook en verwarming gebruik. Dit was een van die bekommernisse van die kommissie toe hy in 2014 ’n marknavorsingsondersoek in die sektor ingestel het. In sy finale verslag, wat verlede week vrygestel is, beweer die kommissie die sektor se struktuur is bevorderlik vir samespanning en daar is talle knelpunte wat aangespreek moet word. Die kommissie…