Landbouweekblad 10/15/2020

LENTEGESKENK Die Theewaterskloofdam, die grootste dam in die Wes-Kaap, het begin Oktober begin oorloop – vir die eerste keer sedert die 2013-’14-boekjaar. Vroeg in 2018 het die dam se vlak tot 12,9% gedaal weens ’n rekorddroogte wat gedreig het om Kaapstad en omstreke se krane te laat opdroog. Die dam het ’n kapasiteit van 480,4 miljoen kubieke meter en beslaan 5 059 hektaar, luidens ’n verklaring van die Wes-Kaapse departement van plaaslike regering, omgewingsake en ontwikkelingsbeplanning. Die foto bo is in 2018 geneem, en die een onder verlede maand. FOTO: STAD KAAPSTAD BESETTING-TERUGSLAG Die Stad Kaapstad is verlof tot appèl geweier teen ’n hooggeregshofuitspraak wat die verwydering van onwettige, onbewoonde strukture van grondbesetters sonder ’n hofbevel verbied. Die stad maak, op grond van advies van die nasionale departement van menslike…

90c Die groothandelprys van diesel met ’n swaelinhoud van 0,05% is vandeesmaand 90c/liter goedkoper, en dié van diesel met ’n 0,005%-swaelinhoud 93c/liter goedkoper. Die prys van 95-oktaan petrol daal met 23c/liter en dié van 93-oktaan met 32c/liter. Die laer dieselprys kom net betyds vir planttyd wat in die somersaaigebiede afskop. Die rand het versterk van gemiddeld R17,28 teenoor die dollar na gemiddeld R16,72 in die periode wat die Oktober-brandstofpryse bepaal. – Beeld 2,2 miljoen Suid-Afrika het 2,2 miljoen werkgeleenthede in die tweede kwartaal verloor weens Covid-19-inperkings. Dit het die werkloosheidsyfer ingevolge Statistieke SA se uitgebreide definisie tot bo 40% laat styg. Slegs 14,1 miljoen mense het werk – die minste sedert 2011. Tog het die amptelike werkloosheidskoers gedaal van 30,1% in die eerste kwartaal tot 23,3% in die tweede, omdat…

STOFPARADE. Hier jaag mnr. AC du Plooy van Rietgat-boerdery in die Noorsveld naby Jansenville in die Oos-Kaap, sowat 1 400 Merinoooie aan wat na ’n nuwe kamp geskuif word. Die plaas is opgedeel in kleiner kampe, waar Du Plooy ’n drukbeweidingstelsel volg en die Merinokudde opvolg met Angorakapaters. Hy boer met Merino’s vir wol- en vleisproduksie, en boer semi-intensief op ’n agtmaandestelsel. Lammers word afgerond in die plaas se voerkraal. “Weidingsbestuur is baie hoog op ons prioriteitslys. Dit bepaal ons sukses,” sê Du Plooy. Hoewel dié gebied steeds baie droog is, het hulle kort voor druktyd ’n baie welkome 8 mm reën gehad. Du Plooy sê opvolgreën is in hierdie stadium deurslaggewend.…

DIE koolstofbelasting wat op 1 Junie 2019 in werking getree het, word gehef op grond van ’n kort en haastig geskryfde Wet op Koolstofbelasting (Wet 15 van 2019), wat behoort aan te sluit by regulasies wat die nasionale kweekhuisgasinventaris tot stand gebring het, maar dit is nie die geval nie. Die wet voorsien dat die belastingbetaler net vir koolstofbelasting moet registreer as sy kweekhuisgasvrystellings bo ’n gespesifiseerde drempel is. Die drempel vir talle aktiwiteite word egter in megawatt-kapasiteit uitgedruk. Terwyl die wet mense dus verplig om te registreer as hul kweekhuisgasvrystelling die gegewe drempel oorskry, het die drempels niks te doen met die meting van kweekhuisgasvrystellings nie. Vir ’n kommersiële of institusionele “aktiwiteit” is die kweekhuisgasdrempel “10 megawatt termies”. Hoe veroorsaak ’n 10 megawatt termiese dieselenjin gasvrystellings? Dit sou sweerlik…

‘Hoewel La Niña gewoonlik met bonormale reënval gepaardgaan, is daardie verhouding nie linieêr nie.’ DR. CHRISTIEN ENGELBRECHT, senior weernavorser van die Suid-Afrikaanse Weerdiens, oor weervooruitsigte die komende somer. Bl. 16 ‘Dit is ’n belangrike oorwinning vir voedselveiligheid.’ MNR. IZAAK BREITENBACH, hoofbestuurder van die Suid-Afrikaanse Pluimveevereniging (SAPV) se braaihoenderorganisasie, oor ’n beplande verbod op vae oorsprong-etikette op ingevoerde hoender. Bl. 18 ‘Ongelukkig is daar baie min terugvoer van sommige ondersoekbeamptes.’ ME. SANDY LA MARQUE, uitvoerende hoof van Kwanalu, oor die polisie-ondersoeke na sabotasie op plase. Bl. 21 ‘‘Die Suidwes-boek is die grootste bydraer tot die niepresterende lenings, hoofsaaklik weens aanhoudende droogtes, siekte-uitbrekings en swak landboutoestande in Noordwes.’ DIE LAND BANK, in ’n voorlegging aan aandeelhouers, oor sy skuldverknorsing. Bl. 14 ‘Die katastrofale ekonomiese impak wat Amerika getref het, (gaan) waarskynlik ons…

Moenie die waarde daarvan onderskat om in beproewende toestande planne en geld te moet maak nie. Om ’n boer in Suid-Afrika te wees, maak jou reeds van die bestes ter wêreld. Die hede bepaal die toekoms. Maar sou dit darem nie lekker gewees om net ’n slag ’n bietjie makliker te kan boer nie? Neem Suid-Afrika se vrugte-uitvoer. Die land is ver agter ál sy mededingers wanneer dit by toegang tot uitvoermarkte kom. Almal, selfs Chili, het voordelige uitvoerprotokolle. Net Suid-Afrika nie. Hoekom, ná 26 jaar, moet sulke buitensporige invoertariewe steeds op die land se produkte betaal word? Maar die land se boere maak steeds geld. Die verswakkende rand moet egter nie hul mededingende voordeel raak nie. Daar moet eerder na strukturele swakhede, soos hawevermoëns, gekyk word. Daar is darem…