Finweek - Afrikaans 30-aug-18

maatskappyresultate vertel ons oor die algemeen van ’n spesifieke maatskappy se finansiële gesondheid. As die betrokke maatskappy egter een is wat kruideniersware aan miljoene laerinkomste-Suid-Afrikaners verkoop en byna 150 000 werknemers het, kan dit ook ’n maatstaf van sy klante se finansiële gesondheid wees. Dít is die geval met Shoprite Holdings, die grootste voedselkleinhandelaar op die vasteland. Sy onlangse resultate is ’n goeie aanduiding van hoe swaar verbruikers kry. Dit wys ook hoe moeilik die sakeomgewing tans is. Wanneer Pieter Engelbrecht, uitvoerende hoof van die maatskappy, sê dat dit die moeilikste jaar is wat hy kan onthou, moet mens hom waarskynlik glo. Shoprite se handelswins het met 1,4% tot R8 miljard gedaal, terwyl die verwaterde verdienste per aandeel met 3,8% tot 968,7 sent gedaal het. En terwyl ’n handelswins van…

elke drie jaar vergader ekonomiese historici van oor die wêreld om die nuutste navorsing op die gebied van ekonomiese geskiedenis te bespreek. Vroeg in Augustus het meer as 1 400 interdissiplinêre wetenskaplikes by MIT in Boston byeengekom vir die nuutste World Economic History Congress (WEHC). Dié groep is gewoonlik vriendelike en ietwat teruggetrokke mense, maar dit is asof die politieke verwikkelinge van die afgelope drie jaar ekonomiese historici uit hul sluimerslaap geruk het. ’n Klassieke historiese strokiesprent van ’n ou man wat in sy wiegstoel sit en sê: “Diegene wat nie die geskiedenis bestudeer nie, is bestem om dit te herhaal. Maar diegene wat die geskiedenis bestudeer, is bestem om hulpeloos toe te kyk hoe almal anders dit herhaal,” lyk meer toepaslik as ooit vantevore. Oudergewoonte was daar referate oor…

sedert Jacob Zuma se termyn as president beëindig is, is sy nalatingskapsprojek van radikale ekonomiese transformasie (RET) deur sy opvolger, Cyril Ramaphosa, afgewater. Ramaphosa het, sedert hy die presidentskap by Zuma in Februarie vanjaar oorgeneem het, skaars verwys na die beleid van RET. Dit is nog te vroeg om RET as dood te verklaar, maar sy toekoms lyk maar sleg. Tydens die Zuma-jare is RET beskou as die naam vir die grootskaalse plunder van ondernemings in staatsbesit. Die Gupta-familie, die sakevennote van sy seun Duduzane, is geïmpliseer by die stroping van ondernemings in staatsbesit, staatsdepartemente en munisipaliteite – ’n hartseer deel van Suid-Afrika se geskiedenis wat nou bekend staan as “staatskaping”. In die aanloop tot die ANC se verkiesingskonferensie in Desember verlede jaar, het die ondersteuners van RET Zuma se…

“Dit is die mees gehate bulmark ooit — niemand wou nog ooit in die bestaan daarvan glo nie.”- Barry Gill, hoof van aktiewe aandele by UBS Asset Management, aangehaal in ’n artikel op ft.com oor die langdurige styging van die S&P 500 toe die indeks ’n dag weg was van sy langste bullopie ooit. “ ’n Groot deel van die mark het dié ongeloof, grootliks vanweë die ongewone hoeveelheid monetêre stimulus,” het hy luidens die artikel gesê. Teen druktyd (op 22 Augustus) het ft.com berig dat die S&P 500 reeds 3 452 dae sonder ’n daling van 20% of meer (wat gewoonlik as ’n beermark beskou word) agter die rug gehad het, gelykstaande met die vorige langste bullopie tussen 1990 en 2000, wat deur ’n oplewing in die tegnologiesektor aangedryf…

fred Arendse vertel ’n interessante verhaal oor hoe hy ingeroep is na die kantoor van Ralph Havenstein, destyds uitvoerende hoof van Anglo American Platinum (Amplats). Die rede was dat Arendse, tesame met ’n paar ander uitblinkers, as ’n toekomstige leier geïdentifiseer is. Hy was in sy vroeë dertigs: ’n Outjie van die Boland uit nederige omstandighede wat hoofseun geword het, universiteit toe is en daarna by JCI, destyds een van Anglo American se maatskappye, werk gekry het. Die ander talentvolle jongelinge, onder meer Chris Griffith en July Ndlovu, sou mettertyd ’n indrukwekkende loopbaan by Anglo American opbou: Griffith, het by Amplats oorgeneem en staan ’n goeie kans om eendag in Mark Cutifani se pos as hoof van Anglo American self aangestel te word, en Ndlovu is nou uitvoerende hoof van…

’n Maatskappy in private besit wat waarskynlik nooit sy openbare buiging sal maak nie, is Canyon Coal van Vuslat Bayoglu, of sy aandeelhouer Menar Holdings, ’n Luxemburgse maatskappy waarin die Bayoglu-familie se rykdom belê is. Dit is jammer, maar nie onredelik nie. Bayoglu se onderneming ontgin steenkool. Met die huidige tydgees in ’n wêreld wat teen fossielbrandstowwe gekant is en op skoon energie gesteld is, sal ’n suiwer steenkoolmaatskappy nie meer vir beleggers so aantreklik soos voorheen wees nie. “Daar is nie ’n gevoel oor die steenkool in die mark nie en ek wil in elk geval nie ’n beëindigingstrategie hê nie. Ek hou daarvan,” sê Bayoglu in ’n onderhoud met finweek. Voorlopig is die fokus daarop om nuwe myne vir die ontginning van termiese steenkool te ontwikkel. Volgens Bayoglu…